此後雪菲兒仲帶左我去鎮內唔同既地方,例如廣場,浴場同驛站。

除此之外仲添購左小許衣服,畢竟一路上著住地球帶過黎既衣服同身處既環境都格格不入。
更加唔好提沿途我所受既奇異目光,同將異鄉人三隻字刻係額頭無分別。
白石鎮唔算大,大概中午既時侯雪菲兒已經帶我繞場一周,並且返回圖書館。

而我地返到圖書館既時侯,發現老野坐左係草地上既長凳上面恰著左。
「長老,長老。」雪菲兒走埋去示圖叫醒老野。

佢係咪死左?




「阿……菲。」長老搓搓雙眼,後道:「老身徹夜未眠,於等待兩位之同時亦稍作休息。」

「長老你洗唔洗入黎休息下先?」雪菲兒扶起老野。
「不必,老身找少年有事。」

「搵我?」我問雪菲兒:「佢地唔會解剖我架可?」
* * *
白石聖堂不愧為白石鎮既地標建築物。

聖堂裡面非常宏偉,樓底比起圖書館更高。





日光透過玻璃照入聖堂內既長椅之上,飄浮於空氣既塵埃在陽光映照下亦發出零星既光芒。
老野安排我坐係長椅上之後便自行離去,睇佢頭先一臉倦容似乎都係想歸家休息。
於主教堂另一端既門被打開,帶頭既係一個頭戴白色高帽、身披白袍既中年男人,緊隨其後既係兩名士兵,其中一名正正係蘭卡特。
「少年,你就係嘉穎?」中年男人語速並不快,並且帶住一種穩重既感覺。

佢既問題只係用黎打開話匣子,想必佢開口之前已經向身邊既蘭卡特確認過。
「無錯,請問閣下係……」睇佢既一身裝扮,應該都身居要職。

「我係伯雷,亦都係白石鎮既主教。」伯雷坐於我旁邊,而兩名士兵則企係遠方。




「請容我確認一下,閣下係方舟教既主教?」

「無錯。」伯雷從容地點頭。
主教微笑道:「似乎菲兒已經向你略略解釋過我地方舟教。」

「嘛,略知一二。如果可以的話由閣下你再解釋一次更加好。」
「無問題,畢竟向人傳道都係我責任之一。」

然後伯雷主教就簡單地將方舟教既成立、教條略略地講解左一次,同菲兒講既無乜出入。
「你仲有無問題?」

「你地既教義我都大概明白,亦都無乜意見。但係主教你要見我,應該唔係為左同我上宗教堂?」好彩我都已經唔係嫩口正太,否則伯雷可能已經將我吊起黎雞姦。

「無錯,除左宗教之外我仲要向你解釋下我地社會既運作方式。」
跟住落黎佢要講既野先係重點。




「異鄉人雖然唔係經常出現,但係亦都唔算極之罕有,每隔幾年就會係世界不同既地方收到零星既無比敵出現報告。但係對比其他異鄉人嘉穎你依然有特別既地方。
首先,無比敵傳送過黎既唔一定係人類,其他物種都曾經被傳送過。
但即使無比敵傳送黎既係異鄉人,佢地好多時直到死果陣都唔識得同其他人溝通;而聽長老講,雖然於詞彙上兩者依然有少許不同之處,但無可否認嘉穎你可以同我地好順利咁溝通到。」
的而且確,去到異世界之後竟然可以用同一種語言溝通,邊有得咁方便?

但係聽伯雷主教講完之後,我明白左幾樣野。
一、以整個世界黎考慮的話,異鄉人並不罕見,難怪當初長老見到我都唔算非常驚訝,而且好快就相信我係異世界黎既人;

二、被傳送黎既物種唔一定係人類;

三、被傳送黎既人類唔一定識講中文。
「咁其他溝通唔到既異鄉人下場係點?」我記得琴日老野係想瀨低我係森林唔理,係多得雪菲兒求情先帶左我返黎。

「我唔清楚所羅門國同蒂芬妮亞既處理方法係點,方舟教係果到既影響力大不如巴克撒大公國。」出現了,自己理所當然咁講好多對方聽唔明既專有名詞。
「主教先生唔好意思,你地既地理我唔係好熟,可唔可以略略講解下?」





「喔呵呵,抱歉,一時唔記得左你係異鄉人。」

「畢竟同異鄉人對話既機會唔係成日有,我好理解既。」我用自己視帝級既演技嘗試留個好印像比對方。
同佢傾左一陣之後,我覺得伯雷主教比老野更加好相處,相信從佢身上應該可以得到唔少有用既情報。
「我地身處既白石鎮,係位於『巴克撒大公國』入面既一個小鎮。巴克撒大公國係依一塊『恩基大陸』既南端,連同周邊附屬及友好既國家,係恩基大陸上面第三大既勢力。而我地方舟教係巴克撒大公國裡面比較有影響力。」非常中世紀既設定,領土由唔同家族佔有,並且受到教廷控制。

「東北方既係『蒂芬妮亞』,早於2000多年前成立,但係曾經多次被滅國又多次復國,依家既蒂芬妮亞同2000年前第一個蒂芬妮亞已經唔係同一個政權,唯一相同既地方係歷史上所有稱為蒂芬妮亞既國家都係以魔法為本立國。」辛苦晒你,明明滅左國都要比人借屍還魂。
「西北方既就係『所羅門國』,立國於1800年前,國力超越蒂芬妮亞,係恩基大陸上最強大既國家。其國力強大既原因係領先既科技。」宗教、魔法、科技三分天下既王道設定。
「多謝主教既解釋,你可以繼續講返處理異鄉人既話題。」

聽完伯雷主教既解釋之後,我大概明白點解巴克撒大公國會係三個國家入面最弱既一個。
「所羅門國同蒂芬妮亞對異鄉人處置既方法我唔清楚,但係係巴克撒大公國入面,所有異鄉人同土生土長既人面對既權利同義務都一樣。」

「若果可以擁有同其他人一樣既權利,我都唔介意履行返同其他人一樣既義務。」所謂人離鄉賤,我身為異鄉人都唔使淪為二等公民其實都唔錯。




當然有得UNUN腳唔使做就更好,但我平時係屋企都係做家務果個,所以對於工作我並不致於「工作你便輸了」程度既厭惡。畢竟有工作就有生產力,有生產力就會被需要,被需要就可以繼續存在;若果我係屋企乜家務都唔做,咁我就無晒價值,隨時會比人踢出門口。
所以我老豆老母養我並唔係湊仔咁養,而當係請賓妹咁養。
「哈哈,嘉穎你又同我地溝通到又明白事理,我相信你好快就融入到我地既社會。」

當然,放下自尊寄人籬下係我強項。
「多謝你既鼓勵,但係係你繼續講之前我想問一個問題。」

「請講。」

「有無可以返到去我世界既方法?又或者係離開哩個世界既方法?」
雖然我唔介意係到生活一段時間,但係始終我都要返香港繼續為地產商服務。

伯雷主教作出思考狀之後回答:「抱歉,我並不如長老傲嬌。」
邊個教識你啲咁無聊既野???





主教一臉認真,我必需強忍至臉容扭曲先無露出破綻。
「至少我自己並無聽過類似事例。」

果然想返香港都唔係咁易,睇黎要等我儲齊七粒龍召喚神龍先有機會。
「你既情報已經非常足夠,請繼續。」我示意伯雷主教繼續。

「頭先講到權利同義務。係白石鎮及其他信奉方舟教既國家,所有人都必需於17歲尋找到社會上適合自己既崗位並就職。」睇黎讀大學副學士等等既避世課程係到並唔存在。
「舉例,喜歡製衣並且有才能既人,只要証明到自己既才能就可以以裁縫既身份貢獻社會並且獲得社會提供既權利。你明唔明?」

根據我多年既見工經驗,一定要問返啲問題黎顯示自己有興趣,識問一定係咁問:「咁請問要點先可以做到主教?」
問題之後既係十數秒既沉默。
「哈哈,有志氣。」伯雷首先用笑聲黎化解左尷尬,然後繼續:「所有主教既經歷都唔一樣,但係我可以分享下點樣成為主教。首先,係17歲果陣我証明左自己有成為學者既志向及能力;由於白石鎮無高級學府,所以我就去左『聖廷堡』留學。」
又邊到黎?不過今次主教醒目,未等我開聲問已經自己補充。
「『聖廷堡』係巴克撤大公國第二大城市,亦係方舟教教會既行政所在地,我地既教宗就係長駐係聖廷堡辦工。除此之外,市內亦都有好多學府聚集全國最精英既學子。係一個有濃厚宗教氣色及學術氣氛既城市。」

伯雷既補充除左曲線讚左自己係全國最精英既學子之外,我亦留意到一樣野。
「係咁既環境之下深造,難怪你之後由學者轉變成主教。」我回答。

「無錯。」伯雷主教滿意地點點頭。
所有最叻既人走晒去做毫無生產力既主教,難怪國力會落後於推祟科技既所羅門國及推祟魔法既蒂芬妮亞。
「講返你,所有異鄉人都一樣要通過測試,証明自己可以貢獻社會。但係你同其他異鄉人唔同,你可以同我地溝通,所以你可以擁有選擇。請問你覺得自己有乜野特長可以貢獻比我地?」
「你呢個問題問得真係好。」死勒,見工果陣我最唔擅長既就係必問既「你有咩優點?」環節。
我識乜野呢?雖然我識做家務,但係無理由同佢講我的志願係做賓仔下話?車衫我又唔識,生產我又唔識。就算講學術,我岩岩先黎到依個世界,唔好話歷史,我連個星球叫乜野名,每日有幾多個鐘頭,每年有幾多個月都未知。
講生產系,我識既釣魚係上堂釣魚,我識既種田係配音員,我識既斬樹係伐伐伐伐伐伐伐木工。
媽,我過去廿年究竟學過乜野?
「如果我答你我乜野特長都無呢?」見工果陣反問返個咁既問題其中同拍檯起身走無分別。

「唔使擔心,咁你就會同其他異鄉人及無特長既本地人一樣,會被派去當兵。」
似乎當兵係巴克撒一樣,都係厭惡性行業。好仔唔當差既道理係依到都似乎適用,當你乜野專長都無,又想有餐溫飽果陣就要去做兵。
「順帶一提,志願做兵既人亦都有,蘭卡特就係其中一個例子。」伯雷補充。

原來做人做警都可以自己決定。
「明白晒,幾時可以返工?」平時係僱主問既問題由我黎問返,就好似對方已經請左我一樣。

我既回應令到伯雷主教當堂嚇左一跳,然後得啖笑。
「後生仔你好有熱誠,但係就算你決定做兵都要通過測試。」

體能測試?跑圈引體上升果啲?如果做唔到咁點?
伯雷主教下一句就解答左我既疑問:「係白石鎮所有服兵役既人不論是否志願者,都必需通過生存測試。」
生存測試?聽起上黎好似好容易會搞出人命。
「跟住落黎有關生存測試既詳細,我交返比蘭卡特同你解釋,我仲有公務要處理,恕我失陪。」

「慢行。」我回答。
伯雷主教企起身,向在遠處既蘭卡特示意,然後由另一位士兵陪同下離去。

然後蘭卡特慢慢向我接近,佢無坐低,只係企係走廊到望住我。

「跟住落黎我所講既野非常重要,我只會講一次。」
既然咁重要,點解你唔講多幾次呀?
已有 0 人追稿