廢青於中世紀魔法世界的生存法則: 10, 廢青 vs Wild

生存測試，所有士兵志願者或非志願者均必需通過之測試。

測試規則非常簡單，所有參加者將會被分別地放置於距離白石鎮有一定距離既地方，有命返到白石鎮當你嬴。
無地圖無指南針無食糧無工作人員無攝影師，有既只係一把小刀同一個水壺。

有命過到今鋪仲返到香港的話，幫tvb拍套人在野都唔係問題。
所有通過測試既人，恭喜你，你可以正式服兵役喇，仲送你白石鎮住民資格添！

至於通過唔到既人，well，其實通過唔到只係代表住兩個可能性其中之一。
一係你走佬去到一個比白石鎮更加好食好住既地方，假若你真係搵到，白石鎮既市民資格又算得係乜？





又或者你已經死左，同可能性一一樣，白石鎮既市民資格亦都對你無意義。
至於我上左雪菲兒同蘭卡特既兩星期雞精班之後，都一樣要參加今次測試。

異鄉人咁又點？唔工作一樣要死，唔好諗住自己身份特殊就可以獲得優待，對社會不負責任既人唔好期待社會要對你負責任，依番說話係由唔係好鐘意我既蘭卡特講既。
Fine，雖然古乳有暈工作你就輸了，但係講到失敗，我係專家。係到非法居留九年之後就可以自動獲得居留權既蝗蟲思維一啲都唔可以有！

而且有一份工作對更加了解同投入依個陌生既世界黎講非常重要，如果唔係我點搵方法離開呢個世界返去睇動畫做毒撚？
工作係為左係屋企休息更耐！
除左我之外仲有八個參加者，佢地全部都係二十出頭，其中三個仲係志願者(即係自願服兵役既人)。





我地九個人分三隊於凌晨出發，坐上晚間巡邏隊既卡車前往起點。
我地上車之前被戴上黑布矇眼，目的係為左防止我地記得路。

不過老老實實，外面咁黑就算唔朦我眼我都唔會認到路。
護送我地上路既士兵都以閒聊既形式分享自己既生存經驗。

原來返唔到白石鎮既都大有人在。
全程車就只有士兵好似對住空氣咁講野。
除左我之外，同一卡車上面既仲有兩個參加者。





我唔識佢地，亦都無同佢地有交流，因為所有參加者依一刻都應該考慮點生存。
因為生存唔到的話，識幾多人都無用，而且就算你生存到，對方都未必有咁好彩。

返到白石鎮之後若果發現對方無下落，只會令自己心情沉重。
所以其他人咁靜我都非常理解，反而我心情咁輕鬆先唔正常。

反正我死左都無人會察覺，而其他人死都唔關我事，無朋友既毒撚意志係最堅強！
當車卡駛經既地面越見凹凸不平既時候，士兵都開始變得沉默，亦代表我距離白石鎮越黎越遠。

士兵頭先提過太陽出黎之後就會分別係唔同既地方放低我地，假設馬車既移動速度係徒步既四倍，我至少要用兩日兩夜先可以返到白石鎮。
若果考慮要搵食物、休息同蕩失路等等既因素，需要既時間會更耐。

考慮到係唔安全既野外環境我好難有機會完全放鬆休息，我決定好好訓返一教等天光。
＊　＊　＊





「願方舟之惠與你同在。」

係放低我既時侯，士兵同時留低左一句祝福。
但係佢既語氣相當機械式，唔難想像佢送過幾多人上刑場。

或者對佢黎講，我返到黎固然係好，但係返唔到亦都無乜損失。
馬車慢慢駛去，而我亦將蒙眼既黑布拉低。
嘩……太陽好曬，點樣行呀？
雖然我有帶電話係身，而部電話亦都係白石聖堂入面充好電，但係一考慮到附近有熊侏既存在，我只可以將部電話保持係熄機狀態。唔到緊要關頭我都唔會拎出黎用。
「我係嘉穎，我將會教你如何係最危險既地方中生存。」

我第一時間望向天，提默（即係太陽）係我既右手面。
「係咁危險既地方，若果無適當既生存技巧，好難存活多過一日。」
雪菲爾教過，提默同我地既太陽一樣係由東邊升起。





換而言之我既右手面係東方。
「今次，我將會到白石鎮附近既森林裡面。」
但係只知道方向係無用，唔去睇下周圍有乜根本無可能知道自己係邊。
「除左嶙峋既地貌，我要為食物而戰，」

地下面竟然完全無留低卡車駛過既痕跡，想出下貓都唔得
「更要面對世界上最危險既生物。」
凳～燈～鄧！鄧！
「⋯⋯⋯⋯」忽然間失去左既羞恥心係最唔適當既時間返左黎。

都係行啦。
根據人在野既教導，搵高地同搵水源係第一優先選項。

而係我既西方正正有一座小山，於事我就向西方前進。




＊　＊　＊

係唔算非常茂密既樹林前進左十五分鐘之後，第一個難關出現。

媽咪，我肚餓喇，與你一起開心笑。
「係叢林入面，乜野都食既人更加容易生存。」
而係我面前，正正出現左一隻一米高，綠色既蜘蛛狀物體。

除左體積之外，佢同一般蜘蛛唔同既地方就係一對巨鉗同頭上長長既觸鬍。
「螯蛛，蜘蛛類寵物小精靈，單獨行動，但極度兇猛，其巨鉗所造成之一擊足以致命。」

我回憶中，蘭卡特曾經提及眼前既怪物：「距離十五米以上，掉頭就走；五米以上十五米以內，保持視線接觸慢慢後退；五米以內，孤注一擲。」所謂孤注一擲其實就係話你死硬，但係想比些少虛假既希望你。
此刻我同螯蛛之間距離大約為十米，我視線維持係螯蛛身上，而佢亦不斷調整步伐，正面始終面對住我，睇黎佢已經發現左我。
「慢慢走……勿亂跑……馬路如虎口……」我慢慢低聲歌唱，同時慢慢後退。





螯蛛對鉗不斷開合，唔知佢係單純地向我示威定係做緊熱身運動。
「交通叔叔講粗口……安全第一呠呠……屌！」

我腳底踩到樹枝，發出咔一聲，我既集中力稍微被分散。
與此同時螯蛛從口中吐出白絲，我見狀立即往後跳兩步。

而剛才我企既位置已經被白絲所覆蓋，白絲之上帶有泡沫，甚為核突。
然後螯蛛慢慢向我推進，而我亦繼續後退，但係由於我背住黎行，行既速度甚至慢過只有一米長既螯蛛。

我同螯蛛之間既距離已經慢慢收窄。
「係森林中生存，最重要係隨機應變。」貝爺請賜我力量……

我左手緊握匕首，右手伸入褲袋摸住部電話。
測試先岩岩開始左十五分鐘，唔通我咁快就要開大招？
我係腦海中不斷回帶雪菲兒同蘭卡特教過我既野，由於依個世界既所有野對我黎講都好新鮮，所以大學果陣經常走堂同係堂上面唔留心既我都變得非常集中。
如果佢地有講過的話，我一定會有印像。

如果佢地無教過………一切都係社會既錯！
就係我諗左幾行字既時間，螯蛛已經迫到接近五米既警戒線既時侯，與此同時我背部傳來樹皮既觸感。
我的媽呀！
唔使望都知我既退路已經被一棵樹截斷左，眼前既螯蛛繼續慢慢迫近，轉眼間已經係我眼前。
目前我既選擇就只有一個，我唯有大喝一聲：「孤注一擲！」

我大力踏地一下，雙手握刀撲向螯蛛，神奇既事就發生左。
一個西瓜咁大既椰子狀物體垂直跌落螯蛛既身體之上，螯蛛應聲倒地。

「嘎？」小弟我自出娘胎以黎運氣都唔算特別好，打機既爆擊率期待值經常性要除二，玩要抽寵既課金GAME想要邊隻無邊隻，玩紅豆冰雪條既抽獎遊戲永遠都只有多謝惠顧。
眼前發生既事只能形容為人品大爆發。
我上前多補一刀，確定螯蛛死亡之後我坐低嘆左口氣。

「重課不如神運，果然無錯。」
螯蛛既屍體望住我，我又望住佢。

「睇慣左其實都唔係咁核突姐。」
我走過去螯蛛既屍體旁邊，將舊疑似椰子搬開。

「係毛神神左啲……」我慢慢將螯蛛身上既毛割斷。
一輪功夫之後，螯蛛身軀及肢體上既毛已經被我全部切斷，露出其黑色既軀幹。

然後我再用匕首垂直插入螯蛛身體正中間既位置，然後垂直劏開。
「睇黎蛋白質都幾豐富……應該都有牛肉既六倍。」
我首先見到既係一大堆白色既液體，應該就係岩岩隻螯蛛吐出黎既絲，係側邊係同我地平時食蟹見到既蟹肺一樣。

根據我多年劏大閘蟹既經驗，蟹肺係唔食得，而果堆白色液體以大蟹閘黎比喻，就係最值錢既蟹黃。
「同埋有啲臭姐……」但係白液發出既惡臭令我卻步，我做唔到好似貝爺一樣乜都敢放入口。

但係我並無因此放棄，我目光轉投往佢既手手腳腳之上……
「睇落同阿拉斯加蟹差唔多姐……」