廢青於中世紀魔法世界的生存法則: 41, 我係香港做一世都做唔到既野，呢到兩星期就做左　－　新居入伙

「非常抱歉，一時之間我地好難提供最適合既住所比兩位。」

「唔使擔心。」三葉回答：「對我黎講只要邊到可以避開個癲婆邊到就係天堂。」
我都想講邊到可以避開你呢個癲婆邊到就係天堂。
小屋位處於白石鎮北邊，此處地勢較白石鎮其他地方高(因為北面係山獄鎮及龍坑山脈)，通常係行商們既石材放置場，一條小河亦於此處貫穿白石鎮。除此之外住戶唔算多，但係由於環境清幽，因此唔少鎮中富戶都選擇定居於此。
富戶們通常都有唔同既代步方法，唔使依賴公共交通工具，所以地理位置隔涉對佢地並無大礙。
再者，講到尾白石都只係一個鎮，所謂既隔涉都只係腳程30分鐘以內。
「哈…既然係咁兩位請自便。」說話既係伊曼既女下屬，帶人睇樓咁濕碎既工作唔需要出動伊曼或者老野本人，畢竟依家村入面有更多需要佢地煩惱既事。
除左救雪菲兒之外，對公眾維穩，重建圖書館，中斷左既幼兒教育同埋拳鼠既善後工作都等緊人處理。
順帶一提，女下屬口中既兩位亦包括我在內。





暫居既圖書館被毀，而且我又要繼續同三葉一齊行動，我同佢同居可以話理所當然到根本唔需要另外花篇幅解釋。
我想避開個八婆，但係以目前既形勢黎講，除非我離開白石鎮，否則都無可能避開佢。
而且菲兒總算係對我有恩，我無理由呢個時間走。

我忍！
女手下離開後，我同三葉開始探索呢個「家」，好彩屋入面既燈一早打開晒，因此三葉唔需要用類似鬼火既魔法以作照明，我亦都唔需要打開電話既螢幕當燈用。

間屋從外面睇至少有兩層，外表係同成個鎮風格相乎既中世紀風。三角型既屋頂，二樓有露台同花槽，玄關進入後右面係一個客廳，左面係樓梯，直去就係飯廳。
唔知間屋上一手既住客係邊個，但顯然白石鎮並無待薄三葉(我只係附帶)，單睇一樓就知呢間屋唔係做實Q既賤民(即係我)可以住得起。




三葉係女手下離開之後就立即進入客廳，並且立即跳入古舊既梳化之中。
「咁多塵你都唔理？」我摸摸梳化，單從啲塵黎睇我估呢間屋都已經被丟空左一段時間。
坐係梳化上面可以透過客廳正前方既大窗望到山下白石鎮市集既點點燈光。

梳化既旁邊有一個並未使用既火爐，依家既白石正值初夏，火爐並無開著既必要。
「污穢既都係我，你理得我。」

客廳除左梳化大窗同火爐之外，仲掛住左小量風景畫，係牆邊亦都有只有半個人高既書架，上面仲放住左無插到花既花瓶。
「你啲衫記得自己洗，打掃都自己搞掂佢。」





如果上述既說話我對自己個妹講的話，家庭暴力立即就會發生。
「…………」

三葉立即企返起身，投訴一句：「真係唔體貼，抵你無女朋友。」
「多謝你既關心，我雖然無女朋友，但係我三個月就換一次老婆。」

「係你既顏色變得更嘔心之前我地快啲睇下間屋有咩啦好嘛？我唔想天光先有得訓。」
飯廳之中最顯眼既就係放係正中央既長方型木檯，窄果面可以放到一個位，長果面可以放到三個位。就算我係動畫入面見過更加誇張既長檯（得兩個人食飯既時侯坐係長桌兩端既人要大嗌先可以同對方溝通到既程度），但係我都好肯定香港地無乜幾多間住宅可以放得入呢張檯。
然後我進入飯廳旁邊既廚房，同一樓其他地方唔同，廚房係以石材建成。

諗深一層都好合理，係minecraft入面貪得意起個火爐然後唔小心燒左半間屋既柒事我都做過幾次。
廚房入面有好多唔同既地方可以放下野，但此刻呢個廚房完全欠奉材料、器材等等。

更加唔好話雪櫃同微波爐，呢兩樣野同玻璃鞋一樣，係響童話故事入面先存在。
原來香港就係一個童話既國度！




「你識唔識煮飯？」我問三葉。

「唔識。」合乎預期。

「咁我地仲留係到做乜？」
廚房既深處仲有一道木門，似乎係放工具既儲物室，但係我此刻並無興趣打開。
睇完廚房之後我同三葉踏上木樓梯行上二樓，呢到間隔比較簡單。

以我既視角黎睇，走廊係好闊既長方型，左下方就係我身處既樓梯口位置。
而左中，正上方及右中方就係三道房門。

照道理呢三間應該係睡房或者書房。
我地由右中方果道門開始打開。
「好，呢到就係我間房。」





幾乎係房門全開既同時三葉就已經作出決定，我既意見從來未被查詢。
不過都好合理，若果唔係因為三葉既本事，我都無可能住到呢隻級數既屋。
至於呢間房吸引既地方到底係乜呢？

首先，呢間房係對住大屋既正前方，即係同客龐一樣，呢間房既大窗係望到山下面既白石鎮，除此之外仲有個露台。
除左景色之外，房間裡面既設備亦都唔失禮，首先有童話故事一定會出現既四柱大床，單係呢一點已經攻陷左無數少女。
梳粧檯、衣櫃、燈、書架，一個女仔房需要有既野呢間房都有。

而畫、鏡、花瓶、裝飾等等無用既野呢到亦都有。
「咁我唔阻你。」

既然呢到已經比三葉插左旗，我都不久留於此房間之內，呢到拉車邊都算係少女既房間，而作為一個毒撚出現係少女既房間總係有啲周身唔聚財。
不過，企係三葉旁邊呢一點本身就已經令到我好唔舒服。
離開三葉間房既時侯我直接走去對面，亦即係本身左中方既房間。





打開房門之後，同三葉間房風格完全相反，係一個非常乾淨既房間。
乾淨既意思係指乜都無。
除左床，一張檯同一張凳之外就乜都無，非常簡約。

不如話係太過簡約。