「突發」打打下丁比人捉左去研究所做實驗品: 暴走

「轟！」

面前傳出一聲巨響，洞穴嘅巨石都粉碎曬，令到成個洞穴煙霧瀰漫，

「咳，咳，大家冇事呀嘛」係煙霧當中傳出穆林嘅聲音，

我首先出聲：「冇事呀，其他人呢？」，之後每一個人都話冇事，

但我完全聽唔到詩詩把聲，我個心沉一沉之後大叫：「詩詩，詩詩！」





我都係聽唔到有人應我，開始慌張嘅我，不停係煙霧中搵詩詩，

但一直咩都見唔到，摸唔到。

突然！我隻手突然摸到一D非常凍嘅野，煙霧開始散去我望一望前面，

原來係一塊冰牆，冰牆入面傳出幾把女仔聲，我如夢初醒，原來係呀霜用冰做防禦，

我知道之後我即刻跑番去穆林佢地身邊，費事佢地見到我即刻對我出手，





一跑番過黎，我見除左呀吉之外大家都露出左非常驚訝嘅目光，我望一望前面，

果然係一條龍，不過唔係恐龍咁簡單，佢外表似一條暴龍，但同暴龍唔同似地方係，

佢頭上有隻非常大嘅角，成隻角都發出黃色光，同呀力奇手上嘅一樣，

佢兇神惡剎咁望住我地，我地全部人都即刻向後移一步，「吼！！！」，

耀龍一聲咆哮之後即刻衝過黎我地嗰道，





穆林係匆忙中話：「今次我地主力攻擊佢兩隻腳就可以，

因為冇左其中一隻腳就會訓低，嗰時我地就可以順利將佢隻角斬落黎，

我同軒仔負責阻止班女，你地盡快拎走隻角」

穆林講完之後即刻帶住軒仔走左去對抗班女仔，

而我，呀鴉同呀鋒就要對付條龍，係耀龍黎到我地面前之前，我地即刻散開，

呀鴉不停係佢隻腳盤旋，耀龍比呀鴉吸引住不停用爪試圖攻擊呀鴉，

但都比呀鴉輕鬆避開，而我就叫呀吉變大然後放我同呀鋒上去條龍身上，

喺我上去之前我同呀吉講：「呀吉靠曬你啦」，「喵～」呀吉冇用人聲答我，





咁我同呀鋒就上左去佢背脊道，

係行之前呀鋒同我講：「呀天，有咩事嘅話你記住要走」，

我就話：「得啦，放心我地個係都唔會有事」，我講完之後就跑左上去，

一上到去耀龍不停大叫，加上佢不停郁黎郁去，

我同呀鋒想要捉實佢背脊上嘅D刺先唔洗跌落去，

係佢郁黎郁去嘅途中我大叫：「呀吉！開工啦」，

係我大叫之後呀吉講左一大堆不明語言之後條龍都係好似聽唔明佢講咩一樣，





不停搖頭，直到呀吉拎起左佢條頸鏈之後，頸鏈不停發光，

耀龍好似見到D好恐怖嘅野咁，即刻向呀吉不停點頭，睇黎我地嘅計劃成功啦，

呀吉，係我後面嘅呀鋒問：「喂！呀天你搞咩呀，又話打條龍嘅？」，

我笑住答佢：「見唔見到呀，佢見到呀吉就冇再發威啦，

我地宜家落番去啦，我有D野想講」，講完之後我一馬當先跳左落去，

呀鋒都跟住跳左落黎，我落左黎之後，呀鴉第一時間問我咩事，

我就話：「呀吉識佢，佢可以同佢溝通」，但我睇黎條龍係驚左佢wo，

呀鴉都冇再追問落去，





我跑過去穆林佢地嗰邊話：「各位唔洗打啦，宜家條龍已經唔會再打我地啦，

叫班女仔過黎呀」，

我講完之後穆林同軒仔望一望條耀龍之後放低手上嘅武器

「大哥哥，班姐姐好惡呀，行過去會比佢打既，我唔去呀！」

「大哥哥，班姐姐好惡呀，行過去會比佢打嘅，我唔去呀！」

軒仔都出到聲啦，咁冇計啦，唯有我去啦，我慢慢一路行過去，表示我無惡意，

呀霜合埋雙手，雙手之間出現一陣陣霜氣，佢雙手拍落地下，





地下即刻出現一條條冰刺，不停擴張落我度，我跑前一躍，跳到班女仔面前，

我即刻出聲表明立場：「大家，聽我講少少野先好唔好，唔啱聽嘅先再打過」，

「係囉，不如聽下佢講啦，好....好..唔好...呀」一把甜美嘅聲音係我耳邊出現，

係詩詩！！，詩詩講完之後班女唔出聲，一直攻擊緊嘅呀霜都停左手，

睇黎經過頭先一戰，人人都唔敢再睇少佢，

「好啦大家，我想講嘅係，我相信你地冇人想留係度比人搞，

用不人道嘅手法對待架，係唔係？」，我一講完，女仔們個個望實地下，

好似每個人都有過一段不堪嘅往事，之後部分人默默點頭，

之後再望住我，等緊我出聲，

我就話：「我諗住依家就離開呢度，但係我地要你地幫手，一齊走出去」，

我都仲未講完，呀霜第一個出聲，

「你都傻嘅，當呢度酒店呀？話走就走，等等累埋我地咁點呀？」，

我早知佢會咁講 ，所以做好應變措施，

「我都知你地諗咩，比人捉到實死硬，咁倒不如留係度好過？我依家同你地係度講，

梗係有把握，你唔當幫我地都當幫你地自己，你地唔想過番正常生活？

唔想見番屋企人咩？唔怕同你地講，條龍係我啲FD，我地講掂數，佢都會幫我們走，

你地唔把握機會，就冇下次啦，要去要留，你地決定，我地男仔就一定會走」，

我講完幾秒過後，一片寂靜，突然一下腳步聲，詩詩既距離同我愈黎愈近，

今次唔係夢，咁姐係話詩詩決定跟我地走！！之後d女一見詩詩行過嚟，

都一個一個行過嚟，最後得番呀霜一個，連佢個妹定唔知家姐呀怡都行埋過我度，

只見呀霜深呼吸一下講「唉，你條友，如果今次走唔到我實攞你命！」，

之後緩緩行過我度，我拍一拍心口示意ok，突然我左面有股熱氣漸漸增強，

我望去左手邊，仆街，差啲嘴左落詩詩度，詩詩好近距離咁望住我塊面，

我咁近距離望去詩詩度，只見詩詩比之前更靚，之前係可愛，依家大個左少少，

可愛之間帶點成熟，臉上有一片紅暈，櫻桃似既小嘴持續一呼一吸，

我望到入曬神，佢仲傻傻地咁望住我，我驚我會忍唔住一啖嘴落去，

但係佢一直呼啲氣過嚟，我好似中左呀離招E技咁，慢慢靠近佢度，點知佢無啦啦靠前去我耳邊，

佢好怕羞咁話：「呀天，靠你啦.....」，講完臉紅紅咁急步行番去呀霜後面，

都唔知佢真傻定假癡，我就帶佢地到呀鴉果度，耀龍見到我地到齊就開聲，

「大家」，「嘩屌，你條龍識講野嘅喂」呀鋒大叫，耀龍無理佢，再講

「我等等會暴走失控，佢地會派人落嚟，大門都會打開，你地趁亂走，

我只可以幫到你到呢度，我唔走得上地面，吉少，算係咁啦」，

呀吉點頭喵左一聲示意，

「好啦大家準備好未呀」，

「吼吼吼！！！！！」

耀龍往天一吼，之後亂衝亂撞搞到洞穴入面地動山搖，大門都慢慢打開，

我地一眾人望實大門漸漸打開。



Only one way out！！！