我出生破碎家庭，同屋企啲女人全部無血緣闗係: 04. 溫馨。尷尬

的確，人喺習慣嘅動物。
 
一屋住咗三個人嘅生活，已經七年；無錯，到依家，我都仲喺講唔出「一家三口」。
 
雖然，相處咗七年咁耐，我確實無以前細個咁抗拒佢地兩母女，不過，我嘅目標依然無變。我今年中六，要考DSE。以我依家嘅成績，考上大學絕無問題。
 
只需要考上大學，我就可以申請宿舍同助學金，跟住搵多份兼職，慢慢企劃我一個人嘅生活。當然，依件事，我從來無向阿姨同巧伶講過。
 
阿姨就喺個女人。過咗咁多年，佢照顧咗我咁耐，我無可能再當佢透明。所以，我會叫佢阿姨。
 


至於巧伶......
 
「咚咚」兩下敲門聲。
 
「入嚟啦。又無鎖。」我兩隻手依然無離開鍵盤。
 
「嘻......阿澤，我......可唔可以入嚟呀？」房門打開，巧伶先探出半個頭。
 
「唔得。」我忍唔住笑住咁答。
 


巧伶一個靈敏嘅轉身，走入喺我間房之後，又啱啱好關得上道門，所有動作都好純熟。
 
巧伶細我兩歲，佢都要準備下年升中五。依家仲學人流長頭髮，加埋佢學校果套水手裝嘅校服，我都驚覺，原來當年鐘意偷糖食嘅大喊包，都已經不知不覺長大啦。
 
巧伶一走入嚟，就跳上我張床，拉起張毛巾被就將成個人包住，只喺露出個頭喺到對住我傻笑。
 
「你走入嚟做咩啫？」我偷偷咁望佢一眼。
 
「無嘢呀？」
 


「無嘢？依家咩天氣，包到咁實唔熱咩？」
 
「唔熱。張被......有......阿澤嘅氣味。好舒服。」巧伶又露齒傻笑。
 
「亂講啦。阿姨每日都有換架。」
 
巧伶大大力咁索咗一吓，然後就自己喺床到碌嚟碌去。
 
「咪搞亂哂我張床啦。聽日就開學啦，試完件校服就換左佢，一陣玩到皺哂又要阿姨幫妳熨。」我快速咁輸入埋兩行程式，依份兼職又完成。
 
無錯，為左將來入大學嘅日子可以過得舒服少少，我替兩三間手機程式公司接左唔少兼職嚟做，主要係debug或者寫一啲plugin，收入唔算多，但係已經夠自給自足。
 
盡可能我都唔想用爸爸每個月過戶俾嘅零用錢。
 
份Job做左成個星期，都咪話唔攰。


 
我大大力咁昂後伸左個懶腰，點知巧伶乘機捉住我兩隻手。
 
「阿澤做完功課啦，陪我出去買嘢啦。」巧伶反角度咁將塊面湊近，佢兩邊嘅長髮就好似布簾咁垂落，你眼望我眼，我個心有時唔知點解總喺會加快跳多兩下。

「......」
 
「......」
 
一時之間，我地兩個都無出到聲。
 
「唉......知啦。又想買咩唔俾得阿姨知呀？」面對依種唔知算係尷尬定係溫馨嘅時候，我都會即刻諗個理由講出嚟。
 
「嘻......都......都喺阿澤最了解我......」而巧伶無論聽到我講咩理由，佢都會笑住咁承認。