肥宅 點溝女神啊: 第四章 第一節 夢與雨中的你
「啊...言...?」我對眼前感到好疑惑，「做咩唔帶遮呀？」佢既溫柔令我係雨中有一絲絲既溫暖，佢既一字一句都令我身體上每條神經線都抖動，我對腳仲有啲震，「搞咩呀你？震到咁。」除左佢既出現，可能因此臨近冬天加上大雨，有份額外既冷，全身震到不得了。「震到咁，因為見到我？」聽到佢咁講，我都唔知比咩反應，「其實，啊言...我...」當我講到嘴邊時，突然諗番起好多野，諗番佢之前個ｍｋ仔，我個口頓時變得無力，唔知從何來既自卑感不斷湧出黎。我走出左佢把遮既範圍，一下就跑左出去，跑返去我個幢樓既樓下大堂，我回頭一望，見啊言仲企左係原地。
「嘩，死仔，搞咩全身濕曬呀？」我家姐一見到我返黎就嚇親，「無呀...唔記得帶遮姐。」講完我就走左去沖涼。一路沖涼就不禁回想岩岩所發生既野，「明明就有機會，我真係好撚ｏｎ９！」 我不斷對自己岩岩所做既而內疚同後悔，我既淚水同沖涼水一同衝到排水口，但係藏係我心入面既自責同自卑卻未能衝走。我唯有帶住哩個狀態番房，試下可唔可以用睡眠當作鎮定劑
「喂，一齊出街？」啊言同我講
「好呀，幾時？」佢立馬就拖住我隻手
「宜家」佢塊面紅扑扑，好可愛
瞬間，我地就到左學校附近既一條街。佢拖住我係人群中左穿右插，不時仲同我講「行啦行啦」個心真係甜一甜。突然佢行開左，我係人群中見到佢，佢拖住個男仔，我想上前追。
「起身啦！細佬！」我係朦朧既畫面中聽到啊媽既叫聲，眼簾慢慢擘開，「唔好呀，啊言，唔好走呀！」晨光慢慢射入我既眼簾，唔知係咪晨光刺激到我隻眼，一滴兩滴既眼淚直流，令我面上有兩條淚線，意識清醒時更回想起夢中發生既野，眼淚開始唔停咁流，情緒接近崩潰。個感覺好奇妙，明明只係點頭之交，但就好似識左好耐咁，夢中見到佢拖左另一個男仔隻手，而自己只能在夢中清醒，卻唔能夠阻止夢中既啊言。就連睡眠都唔能夠令我暫時忘記佢，我諗我，呢次係認真。
一個可以令我滿面淚水既人，我諗我對佢既情，已經唔單單只係一個男同學鐘意學花咁簡單。我成日諗，我真係無咩優點，讀書唔勁，無運動，加上我係個肥宅。個ｍｋ仔家底好，靚仔，運動健將，成身肌肉。其實我全身得一塊肌肉，係一塊大腹肌。漸漸我既自信心比呢啲所謂條件而打沉，變得對自己無自信，就算我同啊言住得有幾近，中間既距離就好似一條深谷，我就係另一邊岸望住啊言，望住自己站係原地。
宜家係學校都好頹，最期待就係英文堂，用盡我係英文堂既每一秒，去望一個我永遠唔能夠去接近，仲要避開佢，只能透過係英文堂去嘗試接觸或者了解佢。可能我係佢眼中只係一個微不足道既存在，但佢唔會明白佢係我眼中係幾重要。我永遠唔能夠同佢有超過４秒既眼神接觸，所以唔知點解，當我想嘗試去諗起佢，但唔知點解永遠佢係我腦中既容貌都係唔完整，有時只係隱若記得佢既眼，其他都記唔起，就係咁......直到今年既聖誕節。