如果你既人生好似打機一樣……: 1.1, 除夕夜，小智未得我同意就闖入我屋企

一月。
聖誕節放成兩個星期假，本應係打機既黃金時期，但係唔知邊條含家剷咁陰濕將考試放正係假期之後。

一月二號番學，一月三號考試依個時間表相信各位學生哥都有經歷過。
今日係一月一號，作為一個電玩宅既我並無相約異性去倒數，

因為我覺得去人多既地方一齊冷係開心尻嗌倒數、數完之後就散然後要迫巴士番屋企既戇尻活動係浪費時間既行為。
時間對我黎講好珍貴，尤其是一月一號晚我玩開既夢之黃金國ONLINE有雙倍ＥＸＰ活動。

聖誕既依兩個星期我每日都廢寢忘餐咁去打機，到今日我終於係全伺服器頭十既高手。




有人覺得打機打到好似番工咁好辛苦，佢地錯左。

食一樣好鐘意食既野係食野，食屎又係食野，點解個感覺會差咁遠？

以上講左啲乜你地自己參透下。
係香港打機有一條潛規則，伺服器一開放果刻就要立即去衝等，不停止，當發現自己已經追唔到果陣就要轉Game，因為我覺得如果唔做最勁果堆就不如唔好玩。

依個亦都係香港Online Game生命週期短既其中一個重要原因。
「Pokemon！日夜鍛鍊去取勝……」
「喂？講野。」





「喂？波仔呀？」
廢話，你打黎我電話會唔會係你呀媽接？

我本身想咁講去屌尻佢，但係我已經習慣左來電者既戇尻，所以我寧願慳番啖氣。
打黎既人叫游立方，我既死黨，亦都係機民一名，但係佢無我咁勁。

我指佢無我咁勁並唔係我主觀覺得，而係事實証明。
一有新Game出佢永遠係第一個叫我玩，但係永遠佢係第一個放棄，原因在上我就不多作解釋。





佢係果種你玩親Online Game都實會見到一兩個既戇尻仔，有乜唔識就係公頻洗住頻黎問人，但其實個答案個NPC一早有同你講到又或者一Google就有。
「十秒之後我就收線。」

「你有無溫書呀？」
……………………
「Pokemon！日夜鍛鍊去取勝……」
「波仔你做乜Cut我線呀？」

「無，我用緊衫收得差姐，你要怪就怪李生啦。」
「哦，我想問你你有無溫書呀？」
……………………
「Pokemon！日夜鍛鍊去取勝……」
「你快啲換過第二個台啦，衫真係好廢呀。」

你見到啦，我無厄到你，如果我同佢講係Ｄ李氏力牆遮蔽左我個網絡佢都會信。




「你仲玩緊夢之呀？」佢終於識轉過第個問題。

「咁春多Game叫夢之，你講緊邊隻呀？」其實我明知故問，但係借機會串尻佢已經變成我既習慣。
「夢之黃金國呀。」

「哦，你講緊你叫我玩然後你玩左三日就因為比人厄左張點卡然後唔玩既果隻夢之黃金國？」我成句說話一氣呵成，完全無任何語氣起伏。
「呃……我都唔算係比人厄既……」

我唔會咁覺得，因為佢比個人妖叫兩聲老公姣兩姣就比人厄走左張點卡，我係依次之前都無試過厄人點卡厄得咁易。
「嗯，我仲玩緊。」

「後日考試喇喎，不過我相信你有分數架啦。」Yes！又升左Lv。阿方佢講乜？我掛住打機完全無聽到。
「哦，係呀係呀……」萬能答案。

「咁好啦，我都係唔阻你喇。」如果你真係唔打算阻我的話由一開始就唔好打黎。





考試，我夠知要考試。如果我讀書有打機咁叻我就唔洗咁煩……

「Pokemon！日夜鍛鍊去取勝……」

電話又響，我開始唔耐煩。
「又點樣呀？」

「咦阿波，你心情唔好呀？」打黎既係另一個人。
打黎既人叫做龐毅斯，我既另一名死黨，但係佢同呀方係兩個世界既人。

佢唔會主動叫我地打機，但係到最後佢通常係最勁果個。
除此之外佢亦都唔鐘意玩衝等型既Game，佢專玩技術型例如CS，AOC同魔獸之類。
如果你覺得咁已經好屈機，咁你就錯左。





佢讀書亦都係名列前茅，運動都唔錯，個樣又有幾分英俊，仲識彈鋼琴添。
我有時真係想問個天點解會咁唔公平，又或者想問升中派位制度點解咁ＯＮ９會將呀方同佢派埋入同一間學校。
知道打黎既人唔係呀方個戇尻仔我即刻改改個語氣。
「哦，唔係。係呢，你搵我乜事？」

「無，想同你講聲Happy New Year姐。」
隔住電話都聽到一陣陣既歡呼聲，即係佢依家就係街上面。 但唔知點解佢把聲聽起上黎總係有啲唏噓。

我望望個鐘，12點02分。即係今年既第一個moment就係同呀方條戇尻仔傾住電話咁過。
「新年快樂。」我回禮。

好似佢咁優秀既人都肯同我做朋友，依個世界真係神奇。
「後日考試喇，睇你都未溫架啦。不過如果你真係轉死性溫書的話，有咩唔明就黎問我啦。」

「好呀，唔該晒你先。」




「遲下再Call你啦，byebye。」

「byebye.」
Cut左線之後我隻手就放左係keyboard上面無郁到，我望住個天花板冥想。

「如果人生係一隻遊戲的話，水牛既能力一定爆晒燈……」
水牛即係毅斯既暱稱，之前有次考試之前佢明明同我地一齊打機但係最後拎到全班第三就比我同呀方鬧佢水尻我地兩個，一定背住我地溫到成隻牛咁，兩樣野夾埋就叫水牛。
開始眼訓，唯有去洗洗個面。
冰凍既水令到我回復精神，我望住鏡入面既自己。

十八歲既我依家都仲係一事無成，點解有人十八歲可以去踢英超，有人十八歲可以晚晚同唔同既囡囡訓，而我就成碌撚咁係屋企打機？
我輕輕一嘆，腦海中用不同華麗既詞語去組成句子黎表達我心中既感受。

毒撚既浪漫感就只可以用係依啲場合上面。
「任再壯大的洪流也沖不走我的憂愁……」

我隨意講左句句子出黎，依句唔錯，陣間放上facebook先。
我用毛巾抹抹面，見到塊鏡上面多左啲紅色野。

睇黎我連續兩晚爆肛爆得太過火，開始眼花……
我再摔一摔對眼，紅色既野越黎越清楚，就快變成一堆文字。
「唔係咁猛下話……」

我再沖一沖塊面，帶住懷疑既心情望向塊鏡，只見一堆我睇唔明既文字於鏡中既我身後出現，下一刻我已經失去知覺……
「你既訴求我已經收到。」

「邊個？」
我四周白茫茫一片，真係用屎忽諗都知都我已經入左潛意識既空間同唔知乜野神靈溝通緊。
「我係邊個唔重要。」一個戴住紅色帽既人慢慢係我眼前出現，而依個景象同佢口中所講既野背道而馳。

「比卡超呢？」
我眼前既人正正就係Pokemon入面既小智。

「我收埋左佢入精靈球入面。」屌你係咪大陸黎架？係人都知比卡超唔會入精靈球架啦！
「咳咳，入正題。我可以改變你既生命，令到你好似你既朋友一樣咁犀利，咁受歡迎。」

「有無咁筍先？我係唔會出賣靈魂比路西法。」
「你唔洗擔心，你無任何野值得作為條件同身為永恆既我做交易……你有無睇過死亡筆記？」

「你有無睇過靚女會柯屎？」佢條問題問得太弱智所以我如此反問。
「我就好似入面既流克咁，因為太悶所以搵野黎搞。」

「咁即係我要買蘋果比你？你估蘋果平架？」講起流克第一時間諗起蘋果。
「哦，咁算啦。」小智轉身而去。

「喂屌你講下笑姐……」
「我可以令到你既人生變成遊戲一樣，所有野係你眼中將會變成可視既數據。一般人無動力溫書係因為佢唔知自己既付出最終可以獲得幾多回報……」

的確，打機就話有Exp睇，但係溫書連春毛都無得你睇。

「我舉個例，今日你去落街跑步，跑完之後就可以即刻見到自己肺活量同體力增加左幾多；你今日溫書，可以即刻見到自己智識增加左幾多，從而知道自己用既方法有無效率再作出變動；就連人際關係都可以以數據顯示，好似你咁樣既死毒撚應該都無溝過女架啦？我相信依個能力對你黎講好吸引。」

「除此之外呢？」死亡筆記既最大教育意義就係：說明書一定要睇清睇楚，我唔信真係咁筍。
「除此之外，你身邊既所有事都將會變得好似圍繞你而轉一樣，令你由平平無奇既背景角色變成眾所曯目既大人物。」
「就係咁？」我疑問。
「你就當你既人生變成遊戲一樣，當然有乜野漏左我會再補充。」依個小智真係同流克一樣咁仆街。
「你要繼續日日對住電腦打機，定係從此改變你既人生？」

┌─────────────────┐
│　　Ａ：改變人生　　　　│
│　　Ｂ：繼續做毒撚　　　│
└─────────────────┘