如果你既人生好似打機一樣……: 1.7, 視乎任務內容，玩家既認真程度都會有分高低

一入到班房，我就變成成班人既焦點。

「你威晒啦依家。」第一個行埋黎抽水既係呀飯。
呀飯佢矮我小小，所以當佢用手臂繞住我條頸果陣係需要蹬高對腳，同時我條腰亦都感到小小隆起既物體。

我之前都有講過呀飯似男仔既原因並唔係先天，我意思係呀飯本身都係一個JJABLE既女仔，似男仔性格既原因純粹係因為屋企有三個呀哥。

「你唔係下話，特登黎抽我水。」我笑住回應，然後亦都有好多平時眼尾都唔望我既女同學開始望下我，而平時同我得一兩句既女仔亦都開始同我講野。

「呀方佢點呀？」小息已經就完，岩岩處理完班務番黎既水牛亦都開始同我傾計。




係水牛問我之前，完全無任何一個人關心呀方既情況，一個都無。

「無呀，MISS周話佢無得大礙，不過最好休息下囉；依家益晒佢啦。」
「咁就好喇，我幾驚自己間接害左佢……」因為佢同我講呀方失左蹤我先會去搵佢，所以佢會咁諗我可以理解。

「頭先你咁主動去搵呀方……果一刻真係唔似你既作風。」水牛果然係我死黨。
「咁佢始終係我死黨丫嘛。」我求其塞一個理由。

「換轉係平時既你，如果知道係演習的話你一定無咁緊張。」何止演習，就算真係有火我都會賴低佢。





「呀方有你依種朋友真係好。」Sony亦都搭話。
「我不嬲都係咁好架啦！」一時威風既我講左d平時唔似係我講既說話。

「如果你一直都咁主動，識得表達自己同打小d機，就唔會搞到人緣咁差；你小學果陣……」桑妮用頗快既速度講左出黎，而一講到果陣兩個字既時侯，佢停左。

「都係無野喇。」桑妮欲言又止。
「係喎，唔記得左你兩個係同一間小學架添。」係隔離既呀飯說道。

「係咩？我真係唔覺喎。」八婆同學A搭嘴，的確上到黎中學之後我就無再好似依家咁同桑妮對話。





我一直只可以係水牛後面做旁觀者，一路妒忌，一路幻想自己有一日可以成為被女圍既人。
今日我已經踏出左第一步。


「有無人今晚想溫書？」水牛想轉轉話題，其實水牛既真正意思係有無人有乜野唔識想今晚請教佢。
「我去我去。」呀飯好主動咁講，然後問桑妮：「溫書應該岩你啦，乖乖女。」
「我要問左媽媽先知喎。」桑妮屋企家教都幾嚴，我細個果陣已經知。
「依家我地又唔係教壞你，琴晚倒數你屋企都肯比你出黎啦。」
「呃……咁你當住我會到先啦。」

然後有多幾個想溝水牛既狗乸話會出席，但其實醉翁之意不在酒。

「波仔，聽日考試喎，今晚打小陣機出席啦！」呀飯盛意權權想邀埋我。
「唔……」我平時真係好小出席依類活動，我係屬於回家社果種人，學校時間外既活動就只有約埋呀方同水牛落網吧打機。





「咁樣啦，你想黎就比電話我。」水牛幫我解圍，然後繼續話：「今晚七點Ｍ記等。」

除左水牛之外，我地班大部份人都住係依個屋邨又或者係附近地方，所以番完屋企再出番黎完全無問題。
小息鐘響起，對話框又出現……

《呀飯好感度上升、Sony好感度上升……》後面仲有好多我唔知係邊個係好感度上升，但係唯獨一樣野係下跌左……《呀方好感度下降》

雖然係對呀方唔住，但係我覺得今次既交易係值得，跟住落黎我都帶住非常舒暢既心情繼續上堂。
之後既數學堂同物理堂好快就過左，主要亦都係講下遲幾日考試會出既範圍。

上堂既時侯我都仲係到諗緊今晚去定唔去，比著平時既我一番到屋企一定連校服都唔換就登入夢之黃金國，就連飯都係電腦台到食。

有野諗既時間過得特別快，話咁快就到LUNCH TIME，呀方依然仲係保健室扮死狗，我探完佢之後就同水牛去街市買燒味飯。
我同水牛行去街市既時侯，發現Sony就係我地前面講緊電話，聽佢既聲調同語氣睇黎係談判緊。





當佢cut線既時侯，我同水牛想上前搵佢，但係佢無意識地行出馬路。

「小心有車！」

《任務：守護桑妮》

從車禍的邊緣中將桑妮拯救出來。

屌你老母你估講玩呀？我同水牛同時間加速奔跑過去，一向無做運動既我竟然比體育健將水牛跑得仲快！我一手捉實桑妮既右手，然後將佢拉番後。

同一時間架車亦都係我地面前急煞，若果唔係我及時捉失桑妮，佢一定會比架車撞低。
依個情節非常之行，我好似係唔知邊套漫畫，動畫或者小說入面見過咁。

「屌你老母你識唔識過馬路架！」個ＭＫ司機較低個車窗鬧桑妮，但係佢無任何反應。
「唔好意思，唔好意思……」我同個ＭＫ司機道歉，然後佢就開車走左。





《任務完成，靈活度+2，桑妮好感度上升》

就係下一秒，我既肺入面既空氣好似抽空左咁，我跪左係地下到咳到氣促，依個時間桑妮終於有反應。
「仆你個街……」我唔係講個MK司機，而係講小智。

竟然將人命拎黎較飛？你估玩架？