如果你既人生好似打機一樣……: 4.6, 考完試之後討論下份卷可以話係劇本
交左卷之後我鬆一口氣，我好想知道點解呀方可以到完果一刻都仲寫緊，另一方面都想知道水牛寫成點。
我、呀方同水牛去左露天平台到坐，開始傾有關頭先既試題。
就係我地開始討論之前，呀飯同桑妮依然好無防備咁行左入黎依個狗公專區。
佢兩個係到搵緊位，似係見唔到我地，於事我揮手：「呀飯，依面。」
桑妮見到之後好自然就行左過黎坐低，而後面既呀飯就行得比較慢。
「你地寫左邊題？」
「我揀左議論文。」「洗乜講？梗係揀拍拖果題啦！」
同樣意思既答案，聽起上黎非常唔同。
水牛最拿手係議論文，佢寫唔奇怪；但係毒撚方你只係一條毒撚咋，你扮乜野情聖？
「你都無拍拖，點答依題呀？」我問。
「我拍過拖。」「你咪睇我咁樣，其實我都談過幾次戀愛架！」
你係唔係指同你果啲二次元女朋友拍拖咋？醒醒吧，那只是你的幻想！
咦，等等，水牛都拍過拖？
旁邊既桑妮同呀飯都顯得意外。
呀飯佢都唔知？
「我其實都有過幾個女朋友架。」
「你咁毒係邊到識到女朋友呀？」
「星之河原囉！」
………………
我忽然間意識到自己有幾白癡。
呀方佢講緊既係網戀。
星之河原就係我果陣特登開AC厄佢點卡既地方，係欺騙，前後一日都無。
「雖然剩係得一日，但係我唔會忘記果日既時光！」
我已經習慣晒，所以我由呀方繼續沉醉係自HIGH入面，轉而問水牛。
「水牛你就唔夠老友啦？拍過拖我都唔知？」
講就咁講，水牛喎？拍下拖有幾出奇？
「好耐之前既事，段關係亦都只係曇花一現，所以無提起。」水牛既回覆簡單好多。
「原來你都有野我係唔知既……」呀飯拖長佢既語氣，而另一面水牛亦都一言不發。
既然連呀飯都唔知，咁就証明左水牛真係收得好埋，咁我都廢事問佢，但係呀飯就繼續問。
「邊個黎架？我唔識唔識架？佢靚唔靚架？」
最好既朋友失驚無神話有拍拖，你都好想知佢品味如何。
「佢係一個好優秀既人，我同佢亦都好開心，只係因為有啲事發生左我地唔可以再繼續落去。」
好有秒速FEEL呀！
「我同佢邊個好啲呀？」就算係女性，都係有競爭既心態。
「我比較唔到，總之佢就係好好。」
水牛睇起上黎唔係好想再留係依個題目入面，於事我幫佢解圍。
「咁你兩個呢？你兩個又寫左乜？」
「我寫左雨後清晨。」「我諗左好耐，但係最後都寫左雨後清晨。」
原來得我一個係寫朋友。
我地男人唔鐘意寫抒情文，但係女仔就唔同，睇黎男女既腦構造係真係唔同。
女仔可以讀言情小說讀成日，我就離遠聞到陣書徐就想嘔。
「乜你都寫左依篇呀？」呀飯顯得好興奮。
「係呀，因為我好鐘意落完雨之後陣味，尤其係朝頭早。」
「我都係呀！」呀飯攬住桑妮搖來搖去，係一堆毒男之中竟然傳來一陣百合香！
「波仔剩係問人，又唔講自己寫左邊篇咁衰既。」
「我？我寫左朋友果篇。」
毒撚方即刻扮熟搭晒我膊頭然後話：「我既朋友，回想起當日我地岩岩相識果陣，真係感慨！」
「我係感慨，感慨自己當時會識左你條弱智仔。」
「水牛呢？你仲記唔記得我地點識？」
「諗番都好耐之前，中三我地經常一齊坐，你仲成日撩我講野。」
「洗乜講，我地兩個入左黎咁耐依間中學咁耐就Friend足咁耐。」
水牛疾左一疾，然後微笑道：「係，原來不經不覺我地都識左咁耐。」
之後我地互爆左好多柒既事跡，水牛講既有啲我都已經唔記得左，原來真係轉眼間就五年。
其他三個都係到聽，然後仲一齊笑。依篇文令我回憶起好多往事，相信亦都令水牛同呀方諗起唔少。
鐘聲再次響起，得番聆聽同綜合能力。
聆聽同綜合能力無乜類似我扔左份試卷既柒事發生，所以我就唔講太多。
水牛今晚係M記同我溫英文，但係今次無女同學參加，唔知係佢地怕左我定係水牛唔約佢地。
當我問呀飯去唔去既時侯，佢出乎意料地拒絕左。
「我唔去喇，都唔好玩既。」
依家係溫書唔係玩喎，佢係唔係期待有架過山車比佢係M記到坐下。
而呀飯隔離既桑妮就例牌咁唔去：「屋企人話考試期間唔準我出去喎，不過如果我今次考得好，我之後可以自由啲，唔洗比人困實。」
「乜佢地咁好？咁恭喜晒先喎！」佢屋企人又會咁順撻比佢出黎，我只怕依張只係一張唔會兌換既空頭支票。
呀方就為左唔好再比人拋棄（副本），所以亦都無JOIN到我地，結果就係得我同水牛兩個。
之後既每一日就係考試、放學、休息、老麥溫書、歸家、訓教咁既節奏，無乜特別事情發生，每晚既M記都係水牛教我學，無大家期待既爆菊事件發生到。
每日過得好充實，我無乜問過電腦，就算係都只係上FACEBOOK同埋MSN，我忙到連飛機都無時間打，更何況係唔識飛果隻機。
期間一直都係得我地兩個，呀方無離開到佢開地下城，桑妮無係佢個雀籠偷走出黎，最自由既呀飯亦都唔知點解一晚都無出現過。
過左一個星期之後，已經考得七七八八，就係得番中文口語。