如果你既人生好似打機一樣……: 4.7, 口語考試既設計對平時野都唔講句既毒L根本唔公平……我建議口語考試提供鍵盤
中文口語係好hea既一日，基本上你就係番到學校，等、等、等，然後就考，考完就走得。
我地學校為左凝造會考既氣氛，所以五班會溝埋一齊考，而唔係分開咁考。
而我地一組有五個人，認得既有兩個，而我不知道剩低兩個是誰。
認得既其中一個人係Mandy，如果你已經唔記得左佢係邊個的話，請你睇番閃避球篇既介紹。
而另一個人就係猩猩。
冤家路窄……
剩低我唔識既一男一女，我會稱呼佢地做呀sa同偉霆。
今次考既題目簡直食正我個飯。
「遊戲被認為是抒解壓力的最佳途徑，你同意嗎？」
Yahoooooooo，討論依條題目無得輸！
如果你無玩過中文口語，等我解釋下個玩法先。
基本上就係一組四至五個人，全部戴晒個好虛偽既面具，好虛偽到嘔心既語氣、用字等等既方法去做出一個大約廿分鐘既大學seminar式既討論；遊戲既嬴法唔係你攻擊到對方放棄佢既論點，果啲係叫做罵戰。
真正知道點玩既人，就知道依科考既，係演技同理據。
開始之前，你有一段時間比你去讀兩三篇相關文章，期間無得交談，然後就開波。
我地既文章有兩篇都係講啲人點樣打打下機變左打老母，又或者係比人偷左武器就跳樓果種。
戇尻！就係因為媒體渲染先令到大眾覺得打機既同廢柴劃上等號，班港女係到睇唔起我地依種打機既人，佢地更加唔明白打打下機大嗌出黎背後果種既澎湃同浪漫，佢地剩係識食魚生，戇尻尻，生勾勾！
更加無恥既係，毒男打機叫做宅，叫做毒；但係meanwhile佢地既男神金城武都係一個打機又，但係佢打機就係消磨時間，有生活態度？
WTF？我對依個充滿住雙重標準既世界絕望喇！
睇完寫左小小重點有時間剩就睇下其他人做成點。
Mandy就好認真咁仲睇緊，佢成績唔係好突出，但係都係比較主動既人，估計佢都係講下野。
而呀sa就寫緊notes。佢個樣都似係文靜果類，但係個樣dry到不得了，完全無化到裝。
隔離既偉霆都係好認真咁睇緊篇文，但係一睇就知佢係存在感低到啲人唔記得佢個名果種人。
另一面既猩猩就係到玩緊手上支筆，依種人睇起上黎戇戇尻尻無防備，但係實際上並唔係咁。
可能性得兩個：唔理題目剩係想出聲既討論破壞者，或者係對題目熟到唔睇資料都大把野講既高手。
分析完之後，睇黎今場最大既敵人係猩猩。
準備完畢，係時侯搶第一個據點 － 開頭！
無論係蕭源定係蕭邦，佢都會同你講搶開頭係重要，因為可以比到第一印像人。
好啦，等我開始啦。
「好，討論開始。今次既題目主要係探討下遊戲係唔係作為抒解壓力既最佳途徑。」
就如我計劃一樣，我用左一個自己都嘔心既語氣講左一堆我平時唔會用既字眼。
當我準備繼續講果陣，猩猩即刻插左入黎。
「我講得依個題目由一開始就錯左，打機只係失敗者逃避現實既避難所。」
負責評分既老師即刻皺起眉頭，依種咁無禮貌既行為係一定會扣分；但係另一方面亦都令到我既評分受影響，因為我無機會表現自己。
好毒，竟然自爆？
我最憎人自爆，仲要累埋其他人；就好似係高登貼圖，然後等人地回覆左果陣改啲地雷圖，一個人拉死幾個人；係高登，做每一樣野都要非常小心，而係試場上亦都係。
除此之外，鐘意打機既我覺得佢既所言非常之有針對性，我聽左之後都甚為不爽。
「依位同學，唔知你介唔介意等我講完先？」但係依家係考緊試，我壓住自己既怒火，用一個扮晒nice既態度去講出依一句。
「唔好意思，我係果種好多野照直講既野。或者你比我講先，然後你去駁番我。」
同佢爭都無謂，罵戰係你可以係口語試做既咁多件事之中最蠢既一樣。
「我覺得抒解壓力有好多途徑，例如打下波，睇下電視，聽下音樂等等。佢地都有各自既好處，例如打波可以識朋友，增進人際關係，而且仲好健康；睇下電視亦都可以增進智識，講既當然唔係睇無記果啲師奶劇集，我講緊既係探索頻道果種；而聽音樂可以配搭其他野一齊做，適用既場合非常之多，搭車啦、溫書啦……」
佢講到依到都非常make sense，但係跟住落黎……
「但係打機就唔同，打機只係一個比失敗者互舔傷口既平台。」
「打機有乜好？我真係完全諗唔到。遊戲本身設計出黎既原因係想從遊戲中學習，但係我見到更加多既係學生為左打機荒廢學業，根本係本末倒置。」
所家長對打機最大既控訴出現，我唔意外。
「而且打機仲會直接同間接影響健康。先講直接，有好多小朋友因為打機而影響視力，要戴眼鏡；間接方面，亦有唔少人為左打機而捱眼訓，令到身體狀況越黎越差。」
亦都係非常之大路既point。
「你話打online game同人溝通都學到人際關係？唔好意思，我真係唔敢認同。我見到學校有好多毒男，打完機之後返到黎現實生活，一樣唔識得同人溝通。」
雖然猩猩一開始就擺出一個戰鬥格，但係佢舉出既三個點都非常之強。
「唔知你點睇呢？依位女同學。」佢轉問呀sa，完全無比機會我反機。
劣勢！
「你講出既論點非常之有道理，我好同意。抒解壓力有咁多途徑，點解偏偏要揀個最衰既途徑呢？我認為係因為佢地係現實中無自尊，而係虛構世界入面，佢地好多時係主角，覺得自己被重視，所以就自自然然沉迷左。唔知依位男同學你點睇呢？」呀sa問偉霆。
一直唔出聲無存在感既偉霆要靠女人先有機會講野真係無撚用。
「呃……我……我好同意你地既講法……」
死寂。果然係一條靠女人既廢柴。
依家係三對一（或者當偉霆無到，二對一），雖然係咁，但唔一定係劣勢。
「我認為各位同學將題目拉得太遠，我地唔係討論緊沉迷遊戲既壞處，而係遊戲是否作為抒壓既最佳途徑。先講下我既立場，我係表示中立。我自己偶然都會打下機，無可否認打機係解到壓，但至於係唔係最佳途徑呢？我有保留。唔知你又點睇呢？」Mandy救左我老母，到最後仲比番機會我講野。
咦，等陣先，咁我咪同偉霆一樣咁無用？唔得！
「我覺得外界為打機實在扣上左太多不必要既帽子。其實打機係唔係就一定係壞？我否認，最重要既係唔係適量。好多野用錯方法都會會變壞，例如你就算運動得太多身體都會負荷唔到，藥用錯左又會變濫藥。所以我覺得閣下咁樣一竹竿打全船人係好不負責任。」
我最討厭依種討章取義既人。
「不如用番你自己做例子？你係學校都無乜存在感，而且平時都成日係屋企打機，你覺得你有資格咁樣講咩？」
依一句好明顯係人身攻擊，係口試咁做係仆硬街，但係睇佢個款都唔似好在乎。
「依位同學請小心你既語氣。我覺得大家比遊戲等於打機既盲點誤導左，其實遊戲仲可以係指桌上遊戲，或者運動本身都係一種遊戲。既然你頭先都承認左運動係好好既抒壓途徑，點解你會覺得遊戲就唔係？抑或你已經將遊戲二字曲解左？」Mandy再次亂入救老母，而眼前既猩猩都比佢搞到口啞啞。
跟住落黎既討論都係充滿火藥味，但基本上形勢變左我加Mandy對猩猩一個，剩低兩個剩係得個睇字。
係之前閃避球戰打完果陣去明明仲笑笑口同我握手，依家佢唔知點解係咁攻擊我，到底我有邊到踩親佢條尾？
完左之後我地行出課室，猩猩留低左一個好敵意既眼神之後就走左，而我唔知道係邊個既果一對男女亦都去左唔知邊到。
「Mandy多謝你，如果唔係我一定比隻猩猩累死。」
「唔洗擔心，條友一睇就知有心針對你。」
Mandy性格其實都好好，可惜就係外表問題所以令到佢完全無桃花運；相反個涵同Mandy其實差唔多既呀飯，就係因為個外表而令到佢有好多追求者。
係香港，無外表的話根本無人去欣賞你內涵，雖然我自己咁講，但係換轉係我，一條女唔靚的話就算你幾善良我都唔會溝。
對唔住，我無啲乜野大智慧，我就係咁敷淺。