如果你既人生好似打機一樣……: 6.4, 直線異性對毒L黎講都係一個大挑戰
一較訓醒，十點。
太陽依然升起，除左今日係新年之外，無乜特別。
打開電腦，收到水牛既off-line message.
「呀波，我父母好即興咁話想去旅行，年初四先番；依幾日我比你冷靜諗清楚自己想點。」
有錢人真係唔同啲，旅行咋嘛？話去就去。
咁依三日我做乜好？之前報左果個武術班初四先開始。
打機囉唯有，仲可以點。
我打開facebook，見到張同學online，但係我無理到佢。
我唔知可以點面對一個背叛過自己既人。
打開online game，一大朝早已經見到呀方。
「毒撚方你咁早起身既？」
「早晨呀波仔，我依家去訓先
原來係未訓，依條友真係，我睇你番學果陣點調較番個生理時鐘。
水牛出左埠，呀方又要訓，依家既我可以做乜？
我望住自己個書架，依一刻我竟然有溫書既衝動！
打開本數學書，做左十零條題目，望下個鐘，仲係十二點。
咁落去唔係辦法，我唔悶死都dry死。
打開電視，係年年都有既大年初一花車巡游。
隔離屋有人上門拜年，我聽到好愉快既交談聲同埋麻雀聲，就一牆之隔，我身處既房間竟然如此死寂。
大年初一究竟係為乜野而被慶祝？因為捱完舊既一年？因為期待新一年會更加好？定係單純地因為可以開心既時間太小，所以要為開心製造一個理由？
就同生日一樣，生日可以理解為向死亡又邁進一步，點解要慶祝？
原來一個人無野做，真係會變左做一個哲學家。
於事依三日我都係毒撚模式同哲學家模式之間轉黎轉去，今日已經係年初四。
亦即係武術班第一堂既日子，一起身之後我就拎起電話，睇下水牛有無指示。
有訊息，來至水牛，凌晨五點鐘左右SD黎既。
「你第一個任務係要習慣直視女生。」
WTF?
我相信各位對依一條考題既反應充份反映左你究竟係乜野人。
如果你覺得「乜咁都算係一個挑戰？」，你應該係出街睇女多過睇路既果種人，入黎都係想恥笑一班毒撚。
如果你覺得「一黎就玩到咁大？」，恭喜你，你應該同我係同一類人。
一個人既步姿係充份反映左佢自己既性格。
周圍望女既，多數係有啲自信果種。
而毒撚就習慣望住地下黎行，有時會離遠望下啲女，但係一有視線接觸就會立即迴避。
女仔係最睇唔起依種人，但就算知道係咁，作為一條毒撚都好難更正。
我梳洗一番之後就準備出門口去社區中心，履行水牛要我做既野。
沿途見到啲妹妹仔，一月咁凍都著熱褲黑襪出街？你地唔凍架咩？
平時我一定會望落啲，一來避免有視線接觸，二來可以做下腳膠。
《興奮度上升中！》
仆街喇，除左興奮度我仲感受到有啲野上升緊！
佢係對面行緊過黎，水牛叫我要習慣同女仔有眼神接觸，等我試下先！
我望住佢，佢仲未留意到我，而我留意到既就只有 － 乜依區咁多正囡囡架咩……
佢望過黎喇，遊戲畫面即刻出現。
駁水喉？你當我Mario呀？
但係我未等個遊戲介面出齊既時侯，我已經下意識咁望向另外一面，而遊戲亦都立即Gameover.
《興奮度下降、自信度下降、無伴終老度上升》
無伴終老度係乜撚野黎？小智你係唔係夾埋水牛玩尻我？
《任務 － 與五名少女進行眼神接觸 0/5》
唔知幾時開始，遊戲視窗竟然有依個咁ONLINE GAME式既任務訊息。
但係唔係殺某一隻怪五次，而係同五條女有眼神接觸。
對我黎講刷五次副本而不死既難度應該仲高……
眼神接觸咋！唔係性接觸！點解我會覺得依樣野咁難？
睇黎一定要打開心裡面某個開關先可以衝破依個障礙……
又有囡囡行緊黎，相比頭先個美腿少女，今次黎左幾隻金華火腿。
依隻怪低LV咁多，我應該夠做既……
我離遠就望住佢，期待緊佢既視線接觸。
燃燒吧，我的Mario之魂！
佢亦都將個頭擰過黎，戰鬥啦水管工！
《Gameover》
唔得，條女實在太豬，我唔想為左個咁既爛鬼任務而用迪露洗眼……
睇黎都係要順其自然。
下一刻，我眼前既已經係社區中心。
其實我唔係好知道要係邊到上堂，所以就走埋去問reception。
「請問知唔知青年武術基礎班係邊到上？」
「上去一樓，轉左應該有間number係1.12既排舞室，果到就係。」
「唔該。」
我行上樓梯，然後慢慢開始意識到……
我頭先咪同左個異性有眼神接觸囉！
我打開遊戲視窗確認，出現既係：
《任務 － 與五名少女進行眼神接觸 1/5》
頭先連水喉都唔洗駁就搞得掂，點解會咁？
入到去排舞室，有幾個個樣「好健康」既男女。
唔同其他場合見到既串柒柒香港後生樣，佢地見到我無避開我視線，而係好友善既微笑。
《任務 － 與五名少女進行眼神接觸 2/5》
「各位學員早晨。」係排舞室既另一端，一個中年女性出現，用好有朝氣既方式講左句早晨。
「早晨。」我地回應。
唔係平時係學校好似斷氣咁果隻早晨，而係真係有energy果種。
「我想問下依到之前係學過武？空手道、跆拳道、太極又或者自由搏擊，有既舉手？」
無人舉手。
「咁你地黎岩左地方。」
「有無人可以答到我，練武第一樣要練乜？」
「扎馬？」「無錯！」
導師係我地之間踱步，就好似武林高手咁。
「依個班講到明叫武術基礎版，你地第一樣要學既野就係扎馬！」
佢即刻示範一個扎馬比我地睇。
「試下整跌我。」佢望住我。
「哦。」
今次任務欄無出現，眼前既導師雖然有一兩分姿色，但係歲月不饒人，佢既皺紋呀之類果啲都出晒黎，所以點計都唔係任務需求既少女。
既然導師要求到，我都唔婆婆媽媽咁交功課，我一黎就用力推佢，但係都推唔郁。
「各位同學，扎馬既重點係將重心放係邊，要用丹田黎呼吸；各位依家開始試下做，我會從旁指導你地擺出一個正確既姿勢。」
由一開始我就對社區中心開既班期望無太高，但係眼前既中年女性似乎真係有啲料到。
我都唔馬虎，即刻將雙腳以工字型打開，然後再夾住個屎忽，再雙手握拳放於兩旁。
雖然我之前無學過，但係我記得啲武俠片都係咁做。
「再夾緊啲個籮友，然後將重心放低。」
佢毫不避忌咁膝頭頂住我個屎忽，迫我將條腰吉向前。
仆街，前面好緊添！
《興奮度上升》
我屌，我比個中年女人搞到興奮咁重口味？
女俠饒命呀！生理既野我控制唔到。
佢行番去我前面，上下打量一番然後話：「覺得緊係正常，初初學係咁，慢慢就慣。」
完全無半點尷尬。
就係咁，我地幾個學員係間排舞室入面練扎馬，練左陣之後抽筋，抽完筋之後就休息，咁樣來來回回左幾次就落堂。
遊戲視窗乜野都無出現到，睇黎暫時都仲未見到扎馬既功效。
「好，落堂。各位番屋企記得自己練下。」
我即刻成身鬆晒，坐左係個地下到，HEA左半分鐘然後就起身執野走。
行出間排舞室，用毒男既視線望住個地下然後見到對面既長凳有一雙雪白既美腿。
我醒起今日既任務，於事我由下望番上去。
條女玩緊自己既生活態度，但係留意到我企左係到，於事佢都抬起頭望我。
O FUCK
我見到佢個樣之後，並無出現到水管視窗，唔係代表眼前既女仔唔係少女，相反佢絕對係靚女果種。
《任務 － 與五名少女進行眼神接觸 4/5》
只係，唔應該出現既人永遠係唔應該出現既時間同地點出現。