如果你既人生好似打機一樣……: 6.6, 有啲野講就容易，做係好難
當我一起身走果陣，兩個差人即刻跟住跑過黎大嗌「咪走！」
我無犯法喎！點解我要走先？
雖然我咁諗，但係跑開有條路，我已經返唔到轉頭。
遊戲畫面即刻更變，變左做灣岸咁。
我唔明點解我係一個人，左下角會有波棍比我揀，右下角仲有錶板。
個錶板既速度同你打機見到既一樣，最高係去到時速三百幾公里。
我心諗：小智你係咪戇尻？你覺得我會跑到咁快咩？你當我小明呀？
於事錶板亦都作出相應調整，原來睇起上黎無郁既指針亦都開始跟隨我既速度郁動。
我由雷達中見到兩個差佬追得越黎越近，係時侯加速！
唔知點解，遊戲視窗中既波棍亦都由2波轉左去3波，但我身體中可以稱為棍既野就有一樣，依家既我亦都無心情搞佢。
簡單黎講係，眼前成個情境都係九唔搭八。
更加九唔搭八既係，我既右上角出現左GTA既通緝指數，依家既我係一星。
畫面正中間出現左任務欄：
《任務：脫離警方的追捕，令通緝星數回歸於零》
屌你老母CROSSOVER?
後面兩個差佬窮追不捨，我因為要睇路所以唔可以查佢地耐力有幾多。
而遊戲畫面正上方亦都無倒後鏡比我睇後面，FUCK！想要既佢唔比我，多舊魚既就全部齊！
我唔想咁快用能力住，因為如果我一用能力都走唔甩的話我一定會比人捉到。
我地係公園中追逐，可幸既係依家既細路唔會好似以前咁成日出黎公園玩，所以都無乜人阻到我去路。
一路跑既時侯都見到偶然有啲坑渠蓋，唔知點解依一刻我好有踩上去既衝動。
「鏗。」我係唔影響到我逃脫移動路線既條件之下踩上渠蓋，左上角出然一個正方型，而正方型不斷閃爍住，中間有一堆堆殘影出現。
同時傳入耳中既仲有好有抽獎FEEL既音樂，我心諗：屌！咪撚煩住晒啦！
然後個音樂就逐漸減慢，本身係殘影既圖片都睇得越黎越清楚。
蕉皮。
WTF？孖車？
求撚其啦屌，我唔知點樣將啲蕉皮扔落地下，後面其中一個差佬閃避不及踩到而仆低，另一個人就繼續追住。
《令警務人員受傷，通緝星數上升至二》
屌你老母咁都計我襲警？無辜架我！
依家咁既情況更加不容我停低，我見到條路既邊邊有成堆既去水渠，我即刻好似小學雞咁特登行果啲路。
本身係橫紋既渠蓋係我眼中竟然變成倒V型，而右手面既咪錶應都顯示到我跑速越黎越快！
估唔到跑都可以咁撚好玩！
正當我以為今次實甩到身既時侯，估唔到後面條差佬跟住我跑渠蓋都會加到速，咁都得架咩？
再係咁落去唔係辦法，於事我細心諗下有咩方法可以令到通緝指數減低。
我跑到去公園隔離果個商場入面，但係個差佬係後面依然追住，咁顯眼唔係路。
點解甩極都甩佢唔到？啲NPC係唔係戇尻？
咦唔係喎，佢地唔係NPC黎架喎！我爭啲以為自己真係打緊機！
我經過U記，忽然間醒起係GTA入面只要幫架車噴過油就得。
換衫都得掛？
於事我即刻求其拎住一件衫走左入去試身室，換完走番出黎。
跟得咁貼既差佬相信一定全程睇住，但係我故作冷靜咁同自己講：無問題既！
我換完件衫之後行番出黎，個差佬一直緊盯住我。
《腎上線素上升！》
我好緊張，但只要我一路出馬腳，我就收尻皮。
我行過佢隔離，佢出手喇！
佢將肩頭上面既對講機撥向自己果一面，然後話：「搵唔到目標，收隊。」
………………
我係你隔離喎！點解你可以扮見我唔到先？
同樣地，右上角既通緝星數歸零。
《任務完成！ EXP+85 靈活+3 耐力+3》
我呆企係U記入面望住漸漸離去既差佬，下一刻有人搭我肩頭，心情仲係好緊張既我即刻縮一縮肩頭嘩左一聲，然後我回頭一望。
《與五名少女進行眼神接觸 5/5》
《任務完成》
「唔……唔好意思……」
原來係個女Sales。
結果今日同我有眼神接觸既五個少女都唔係因為駁水管而搞掂。
「對……對唔住。」我既反應好似嚇親佢。
「依件衫岩唔岩？唔岩的話果面仲有……」佢講得好細聲，睇黎都仲係驚魂未定。
「哦，唔洗，依件得架喇……」我其實都無留意到自己換左乜衫。
依條女含羞答答咁，行過唔知既人可能會以為我頭先鬧過佢。
「你手上面果件舊衫……要唔要個袋袋住拎走？」
「好丫，唔該你。」出於彌補既心態，我既語氣同表情都比較陽光。
我拎住個袋行出門口，回想起頭先既對話，原來我都可以同異性正常地溝通。
「媽媽，點解果個哥哥著住件Hello Kitty衫既？」
「乖女，唔好望。」
我一路忍受住沿途其他人既奇怪目光行番屋企。
一入到屋我即刻除低件T，換番自己既衫。
如果老母番到黎，佢見到我買啲咁既衫都唔知佢會點諗。
打開部電腦，原來已經七點幾。
登入平時玩開既online game，呀方依然全天侯online。
跟住我地好似平時番工式咁打副本咁過左依一晚。
係訓之前，水牛msn搵我。
「訓練完成？」
「嗯，我同左五個女仔有眼神接觸。」講就咁講，但係我好清楚自己仲未克服到依個弱點。
「描述下。」
「哦……」正當我將所有野打晒入去對話欄，準備禁enter既時侯我就諗：好唔好同佢講我見到呀飯果單野？
「有啲女仔，我一望過去既時侯就好下意識咁避左，但係依五個女仔我係好自然既情況下就交流到。」
「全部都唔識？」
「係。」
我都係決定隱瞞，多一事不如小一事。
「我從來都唔知道同異性有眼神接觸係咁麻煩。」
「其實唔難。」
對你黎講梗係唔難啦水牛。
「平常心就得。你handle到既女仔其實全部都有一個共通點。」
共通點？
「你去老麥買，你怕同收銀有視線接觸？」
「唔怕。」
「你係學校，怕同呀飯有視線接觸？」
「唔怕。」
佢提起呀飯，但聽起上黎唔似佢知道今日我見過呀飯。
「你同佢地講野，有其他目的 － 叫餐，又或是你已經同佢識。」哦，原來係咁！
水牛繼續講：「你叫餐既時侯，對方對你黎講係個收銀員，而唔係女性；你係學校同呀飯傾計既時侯，對方對你黎講係同學，而唔係女性。」
「即係……？」
「你唔好當對方係女人就得。」