如果你既人生好似打機一樣……: 8.3, 小圈子既基礎上再搞小圈子是咪ON9?
「呀方。」
「係？」青年停下對話回答我。
「你中邪？」
「拿，無厄你啦，波仔平時都係咁幽默架。」個斯文既女仔掩嘴笑。
無可能！
呀方依家睇起上黎完全唔毒，而企係旁邊既蜜糖唔係男人不特止，亦都唔係暗瘡肥婆，而係一個平陰少女。
雖然佢唔係特別靚，但我唔相信我所認識既毒撚方可以同一個咁既女仔溝通得咁好！
無可能！！
「不如行囉？」鱷魚問。
畸安組圍內打緊機，追風撩緊文雀傾計，毒撚方又同蜜糖咬緊耳仔。
結果真係聽緊團長講野既，得我同軒仔。
「各位，行喇。」軒仔道。
此時眾人立即回應，跟隨前往輕鐵站。
如果你係鱷魚依種人的話，網聚依樣野你都係唔去好過去。
上到輕鐵之後，畸安四加一見到有位即刻衝埋去，好似玩緊爭凳仔咁。
而我地比較年長既一班人就圍住啲扶手附近。
文雀依住輕鐵門隔離既單丁位，厹風就繼續強攻文雀。
各位，有好多家長誤解左隻GAME，成日問「你咁大個人仲咁沉迷打機，你幼唔幼稚啲？」
NONONO，對厹風依種人黎講，打機只係溝女既平台。
佢地無錢去蒲（亦都無膽），落唔到酒吧，唯有落網吧。
早幾年我次次落網吧果陣，實有一兩條友係到開外掛玩勁舞團，我開頭覺得：「咁玩黎有乜謂？」
但自從我明白左佢地既動機之後，我就再毫無疑問。
我唔會鄙視佢地，一個願屌一個西痕，凸凹合埋一齊好正常。
由於我係一個智識分子，所以我知道以科學既角度黎講，依種正正係鎖鑰假說。
我地決定係屯門碼頭轉巴士入龍鼓灘。
諗深一層，蜜糖由柴灣黎龍鼓灘都真係幾辛苦，佢應該係全團入面用最長時間入黎果一個。
係輕鐵上面，我地開始傾下自己既背景。
螢光幕外既真面目。
「呀軒，你讀緊邊間大學？」
「中大，今晚BBQ完我就番宿舍。」當初提出係屯門搞既就係軒仔，我本身以為佢讀嶺南。
中大起碼都叫三大，睇黎呀軒都係前途一片光明，就算非禮都剩係判服務令果種人。
「咁你讀乜科？」
「engin...」ok，當我無講過野。
「鱷魚你呢？」平時係game入面我都尊稱佢做團長大人，但係我既自尊唔容許我對個咁細粒既人咁有禮貌。
「我中四。」嘩屌，原來仲細過我！
鍵盤唔止係武器，仲可以係變身器，現實中再失敗既人（例如毒撚方），用左鍵盤之後都可以變成另一個人！
「文雀你呢？」文雀比追風一路係到煩，於事我想幫佢解圍。
「今年A-level。」嘩，係咁重要既關頭你仲出黎玩？
「好有信心喎。」軒仔笑道。
係大學既佢應該好清楚a-lv係有幾可怕。
「當休息下。」文雀撥一撥佢既頭髮，散發出文學少女既氣質。
「讀a-level係咪好辛苦架？我果陣會考都讀到想死，最後得三分咋，哈哈哈哈。」單睇語氣，似係毒撚方所言，但係毒撚方係未考會考。無錯，依一刻追風已經變成煩膠。
而毒撚方依一刻就同蜜糖自成一角咁傾計，散發出甜蜜既力場，生人勿近。
因為我地係比錢去燒烤樂園，因此我地唔需要好似八十年代番大陸咁，成間屋搬過去。
其實出黎BBQ都係比錢去開心，所以我寧願花多少少錢煩小樣野。
一來可以震興經濟，二來小左樣可以嗌交反面既野。
無錯，買野係可以買到嗌交。
當年小學六年級，有個聖誕聯歡會，我地參加左做個遊戲攤當。
成班人話話約出黎買野，到最後剩係得番我同張同學兩個。
然後，我地果陣小學雞，張同學要扮成熟慳得就慳，而我就覺得唔應該花太多時間係購物上面。
因為咁，我地果陣係文具鋪入面鬧起交上黎。
嗌交係好朋友既証明，要夾錢果陣，一毫子都夾足比你既，果啲唔算係真朋友。
真朋友係食M記果陣，會問都唔問就食你雞翼；真朋友係夾錢果陣，會成日話：「果一兩蚊，你豪比我啦！」。
真朋友係遲到果陣，會毫無羞恥之心；真朋友係嗌交果陣，會據理力爭一步不讓，但係之後簡簡單單一兩句，大家又可以再搭肩頭。
哈哈，原來我同桑……張同學曾經咁熟。
雖然我住係西北區，但係我平時好小坐輕鐵，所以唔係好慣，有小小暈。
「點解輕鐵唔洗入閘既？咁咪唔洗買飛囉。」住港島區，未坐過輕鐵既蜜糖即刻發現依個BUG。
「因為佢有人查架嘛，比人捉到要罰錢喎。」毒撚方用好溫柔既語氣解釋。
我作嘔，唔係因為我暈車浪，而係因為頂唔順毒撚方。
講起上黎，入到輕鐵之後我一句話都無同毒撚方傾過。
英文諺語有一句叫"speak of the devil"，輕鐵埋站一刻，devel出現，我伸手入褲袋摸摸。
「safe。」我心裡暗道。
下一站即刻有堆人係到準備查飛。
車門未開，我留意到追風靠近車門，臉色變壞。
用屎眼諗都諗到係乜事，條友一定係無飛。
輕鐵埋站開門果陣，追風表現得出奇地寧靜，住附近既鱷魚同軒仔都估到乜事，於事都無出聲。
「咦？忽然咁靜？」本身十問九唔應既文雀忽然出動撩追風講野。
「口乾姐……」追風吞吞口水。
所有乘客落車果陣都要比人查飛，而且啲人咁疊馬，一定走唔甩。
唯一既空隙就係車門就關，佢地上車果陣！
香港人三歲至八十都鐘意睇人仆街，所以本身打緊機既畸安四加一都收機睇表演。
而一直放閃光既毒撚方，就擔任旁述既角色，解釋追風既舉動。
「請小心車門，PLEASE MIND THE DOOR，嘟嘟嘟嘟嘟嘟嘟嘟」
係查飛員進入車廂果陣，追風突圍而出，查飛班想追果陣車門已經關上。
「你識佢？」查飛員應該見到文雀同追風講野所以問。
「唔識。」文雀答道，然後由口袋中拎左本書出黎睇。
「估唔到追風真人都識得衝鋒喎！」軒仔細聲道，我與鱷魚聽到後偷笑。
衝鋒係遊戲入面戰士既獨有技能，睇個名都知係尻跑既技能。
「學生哥，好溫功課……」
「係！」呀軒收到電話。
「哦，好，無問題，陣間見。」來電者顯而易見。
鱷魚問：「佢點呀？」
「去廁所喎，信不信由你。」
「反正我就信了。」鱷魚回答。
到左碼頭之後，我地一行人落車轉去搭巴士。
係巴士站到無野做，周圍望下都好正常。
但係附近偏偏無女比我望，本身仲想解下任務，文雀同蜜糖其實都可以一試，但係成日流流長，我唔想搞到我地之間既關係太尷尬住。
既然無女望，我就搵啲字睇下，於事巴士既路線圖就成為我既選擇。
我一望，發覺唔對路。
「邊條仆街要坐輕鐵黎碼頭先轉車架？」
屌你，西鐵站都有得坐既巴士，我地特登坐輕鐵黎轉？
「好似係追風，佢話熟依頭我先比佢帶路。」軒仔回答。
唔識路咪話唔識囉，除非你個名叫做Google，否則唔該你唔好扮乜春都識！
好彩依家係冬天，所以巴士站入面都唔算太熱。
個零字之後，架車上左。
車上面人唔多，畢竟龍鼓灘都算係偏僻既地方，一般無車既人要去都幾麻煩，所以人唔多我都可以理解。
架車沿住龍門路一直駛入去，當經過碼頭同埋焚化爐果陣，畸安四加一即刻好似小學雞咁好興奮，又拎生活態度出黎影相，又係咁問咩黎架咩黎架。
我無理到班小學雞，我、鱷魚、軒仔同文雀四個坐係巴士後面既對座位，一路係到傾緊自己既背景。
但係我漸漸地覺得，我地已經分開成三至四個圈子，大家唔係同一團人黎架咩？點解出到黎都要再搞小圈子？