如果你既人生好似打機一樣……: 8.4, BBQ,收到CALL,全員出動,跳高一齊YEAH

如軒仔所料，無隔幾耐就到左。
一落車已經見到燒烤樂園既招牌，我地跟住啲指示之後亦都好快黎到。
 
「原來依到有海灘架？」我雙眼放鬆漫無目的地觀察果陣，蜜糖以好興奮既態度問。
而我係對話框見到佢講既依一句，其實係有「＞３＜」依個表情。
 
見到啲咁肉麻既野我即刻彈一彈起，然後就聽到毒撚方回應。唔洗審如果我一開對話框的話，一定會見到排山倒海既顏文字。
 
「文雀你有無黎過？」
「無，去開大欖。」答完既時侯，文雀又揭一頁。




 
「呀波、鱷魚，你地跟我過黎拎炭拎野食先。」
「哦。」依一刻，軒仔已經變成實際既大佬。
 
軒仔幫我地所有人比左錢先，然後跟尾既我同鱷魚就幫手拎啲炭去呀方佢地mark左既位果到。
「依到有無人做過童軍？」我問，我見過有班on9仔去bbq，剩係起爐都起左半個鐘。
 
…………………
 
自從打機變成學生哥最愛之後，做童軍既人越黎越小。




大佬，戴綠帽喎！你估人人頂得順？
 
「有無火機？」文雀提出一個非常重要既問題。
我地一行人你望我眼我望你眼，睇黎依到無人食煙。
 
無火機咁起乜野火呀？鑽木取火呀？
聽，海哭的聲音！
 
「學生哥，好溫功課……」
「喂？」軒仔到電話。「我地到左喇，你係邊？」




 
講真，追風黎唔黎我都無乜所謂，對佢無乜好感。
 
「你行入黎就會見到我地，陣間見。」
「佢去到邊？」鱷魚問。
 
「佢落左車，行緊入黎。」呀軒望住個爐，望住堆炭，乜都做唔到。
我地三個係到戇尻尻，文雀繼續睇書，輕音部繼續打緊，而杜門卡遜同左佢部閃光高達落沙灘漫步。
 
究竟我今日決定要黎係唔係錯誤既決定？
 
正當我咁諗果陣，軒仔指住入口方向話：「到喇。」
我帶住不屑既眼神望向入口方向，見到追風，而本身絕望既眼神無啦啦又充滿希望。
 
我即刻企起身揮手話：「呀風，依面呀！」




 
我對呀風既態度轉得仲快過人民力量既立場／目標。
因為我清清楚楚咁見到呀風佢係擔住口煙咁行埋黎，咁即係有打火機啦？
 
「呀風，借打火機黎用得唔得？」
「想點呀？」你部打火機鑲左金咩？定係你食煙食飽唔洗燒野食呀？
 
「借比佢。」文雀依然望住本書，但係佢輕輕一句，追風已經將打火機雙手奉上。
正狗公！
 
我拎住個打火機，望住堆炭同個爐，又回憶起一段段既往事。
 
「嘿。」我冷笑一聲，然後將手放係頭上面，扮呀小智咁扭一扭頂帽（雖然我無戴帽）。
曾幾何時，我都係一名綠帽軍人！
 




燃燒啦，我既小宇宙！
 
但係要起火，都係搵啲野點著先好啲。
「有無炭精？」我問軒仔。
 
「無喎，頭先我都問過，佢地話要錢，仲幾貴下添。」
「咁點算？」我環望所有團員，燒得著既野就只有文雀手上果本書，文雀留意到我想打佢本書既主意，即刻好仇視咁望住我，而我見到佢咁有敵意既眼神就即刻避開左。
 
仆街，琴日既訓練白做？
 
「咦，有份東方喎。」鱷魚係凳底搵到份報紙。
「東方？拎去燒啦。」軒仔道。
 
無論於任何層面上，我都非常同意。
 




我將份燒著左既報紙丟左落去啲炭到，但係無乜反應。
唔通太大風？
 
「搞錯呀，點個火都點唔到，你依個法師唔合格喎。」軒仔取笑道。
「仆街我冰法黎架！」回想起當日，我擁有一雙太陽之手，任何既炭係我既手中都可以輕易咁燒著。
 
時移世易，五年後既我依家竟然咁狼狽？
正當我絕望既時侯，個火就著左！
 
「快啲整旺個火佢啦！」追風條仆街坐左係文雀隔離，扮晒大佬咁指指點點。你咁叻你黎做囉屌。
我拎左剩低既報紙，特登向追風既方向撥過去。
 
「咳咳咳咳……」佢比啲煙攻到要行開。
「唔好意思，比海風吹左啲煙落你到添。」見到追風咁狼狽既表情，我都即刻爽番晒。
 




頭先份東方，就係咁化成一堆白色既粉末隨風飄逝。
 
「喂，燒得喇！」我見到個火開始似模似樣就同其他人講。
年紀較大既人即刻幫啲叉除左個套，然後拎去燒，消下毒先。
 
我洗完手之後，同呀軒一齊去拎左野食番黎。
 
本身打緊機既輕音部即係拎左支叉黎比劍，曾經何時我都係咁小學雞，所以我只係一笑致之。
而杜門卡遜係無任何動作劇情之下拍完左機動武鬥傳，就算你係高達，你都需要醫肚。
 
所有人帶住一副樂也融融既表情開始燒下牛丸，腸仔同雞翼咁。
眼前既畫面非常熟悉，想當年小學做童軍果陣，我地成班人去燒野食都係咁樣。
 
原來曾幾何時，我係一個正常人。
原來曾幾何時，我都會同女仔單獨去街。
 
「Pokemon！日夜鍛…」
「喂？」我接過電話，續道：「乜野話？你話出左新既副本？」
 
我望向其他團友，全部逐一的向我點點頭。
鱷魚：「各位出動啦！」
 
「收到！」
 
《如果你既人生好似打機一樣……》已經全部播映完畢，聽日既同樣時間請收睇《毒撚、謊、比女劏》。