【現代武俠】每個男人心中都有個武俠夢: 第八節　暗香落淚（上）

第八節  暗香落淚
 
教主：「做咩有床唔瞓地下？」

大食精：「琴晚你叫我上去瞓就係想瞓地下？」
 
毛毛：「我望到哂啦，有人色膽包天，抱個女仔入房。」
 
疲倦加上宿醉，身體像穿滿了鉛袋，沒有力氣也沒有心情理會他們：「要走就快啲走啦你地。」





毛毛：「好啦，我地去搵均均玩啦，你自己同自己玩啦。」
 
在一片寂靜中，我反而睡不著，在腦海裏胡思亂想，想桂叔為何不肯教我武功？如果要學，不如直接上少林寺……「咯！咯！咯！」「我入嚟啦。」是呀星。
 
星：「你唔舒服？」她伸手摸我的額頭。「你有啲燒喎。我斟咗杯水俾你，記得飲水。我出返去先。」
 
過了一會，其實我並非太病，起碼手腳靈活，神智清醒，想起床活動一下，拿著水杯到櫃台討水，看不見呀星就問另一位服務員，她說呀星出去了，大堂裏空無一人，我只好回房，手機和錢包也在均均那裏，悶得發慌，就把先前買來的蓮花碟、硯台和梅花扇拿出看看。
 
「咯！咯！咯！」這次她直接進來：「我買咗藥俾你。」
 




我：「我唔食西藥。」
 
星：「中成藥嚟。」
 
我：「我唔係真係咁病。」我習慣性地拒絕別人的好意。
 
星：「……你做緊咩？」
 
我：「冇呀，悶悶地咪拎之前買咗啲嘢嚟睇吓。」
 




星：「原來你咁鍾意工藝品嘎。呢把扇……係均均畫嘎喎，佢早兩日先畫好放出嚟賣，係佢第一件作品嚟。」
 
我：「佢又識武功，畫畫又咁叻，佢有咩唔識？」
 
星：「佢最鍾意梅花。『不經一番寒徹骨，焉得梅花撲鼻香』你睇吓扇嘅另一面，寫住『自有暗香來』，佢練習嗰陣我喺佢身邊，佢話希望搵到個欣賞佢嘅人，你咁快就買咗佢第一件作品，佢一定好開心。」
 
我：「呢把扇我一見鍾情。照你頭先咁講，均均佢……」
 
星：「唔好睇佢成日笑，好似好開心咁，佢就好似梅花咁，好堅強咁撐住。」
 
房間裏的氣氛被壓下了，我打開那中成藥包裝，呀星見我乖乖服藥就回到櫃台。我總是把別人的事看得很重，這次也不例外，只是剛認識兩個人，她們的眼神怎麼就讓我如此憂心。
 
我又睡了一覺，這次醒來精神不錯，好像回復過來了，他們也剛好回來。
 
我問：「你地去咗邊玩？」




 
毛毛：「關你咩事？」
 
大食精：「我地去西湖一個冇人嘅地方。」
 
我：「格劍？」
 
毛毛：「練新招，你要唔要親身試吓。」
 
我：「均均冇帶你地去玩咩？」
 
教主：「佢聽日先攞到假，我地自己周圍行吓咋。西湖真係好靚，行幾日都唔厭。望住湖中心個湖心亭就諗起張岱篇《湖心亭看雪》，我想冬天再嚟一次，睇吓『天與雲，與山，與水，上下一白』有幾咁靚。」
 
我：「係喎，仲有『斷橋殘雪』呢。不如真係冬天一齊再嚟？」
 




毛毛：「呢度咁靚，又舒服，再嚟梗係同女朋友嚟，仲同你地咩。」
 
我：「你都講得有道理，咁冬天同我伍芷珊嚟，希望唔會撞到你地。」
 
大食精：「原來五點，快啲沖個涼食飯啦。」
 
在他們輪流洗澡時，我到櫃台邀呀星一起吃飯，均均也來了，她提早下班來跟我們吃飯。
 
均均：「我特登早放嚟搵你地食飯，我已經攞咗飛啦，今日我地去食綠茶呀。」
 
「食綠茶？綠茶唔係飲嘎咩？」
 
「白痴仔，綠茶係餐廳嚟嘎，喺杭州好出名，又平又好食。」
 
「我個手機同銀包呢？」




 
「呀！係喎！我唔記得帶添。」她吐一吐舌，甜美終結我對手機錢包的執著。
 
我和她在大堂裏等齊人，一行六人到綠茶餐廳，果然名不虛傳，除了坐無虛席外，門外更是大排長龍，幸好有均均，不然我們可能要等一個小時。這裏的菜色無論色香味，都比香港中價餐廳要好，特別是一味椒麻雞，雞肉嫩滑鮮甜，儘管大白碗裏有許多香料，可是彼此仍能保留各自的味道，雞件、辣椒、大蒜、花椒、大葱，巧妙地互相補足，雞湯有花椒的麻和辣椒的香，大葱大蒜吸收了湯汁，最後碗裏乾乾淨淨，只剩辣椒如紅葉躺在雪地裏。