《有無廢柴要回收》: 第一回 - 人呢?

「叮噹…叮噹…」
 
「叮噹…叮噹…叮噹…」
 
「叮噹…有無人呀?叮噹…有無人呀?」
 
唔知有幾耐，屋企個門鐘無響過，我試圖盡力咁係被窩裡面發出叫聲……
 
「阿媽…開門啦!」
 




可惜，我仍然聽到「叮噹…係咪有人呀?麻煩開開門呀?」
 
我終於醒起，因為阿婆係鄉下過咗身，阿媽要返鄉下一日。係呀，只可以係一日，如果唔係佢驚我餓死咗。
 
「好嘈呀!無人係到呀!」我唯有試圖咁樣打發呢個不速之客。
 
「叮噹…係咪有人呀?麻煩開開門呀?」門鐘仍然響起，個個人仍然係到叫。不過，聽聽下我對呢把聲好好奇，因為，我都唔記得幾耐無聽過真正嘅女人聲。而且，呢把聲仲好似幾好聽……
 
或許，真係太耐無人撳過個門鐘；又或許，太耐無聽過女人聲，我竟然起咗身去應門。
 




門一開，頂你!人呢?無人嘅，玩我咩!正當我想大力啪埋到門之際，個把聲又響起…
 
「終於開門喇，你好…」我再望真啲，原來係到鐵閘遮住咗佢，我唯有趟開到閘。
 
唔趟尤自可，一趟我一生就此改變……
 
「先生，你好!請問……無……收呀?」
 
眼前呢位女生，嬌小玲瓏，加上及肩的秀麗長髮，水汪汪的大眼睛，甜而不膩的香氣，我三魂即時捨七魄而去，亦可能因為咁我聽唔清楚佢講乜。我唯有張手放係耳邊，示意聽得唔係好清潔。
 




佢再用帶有磁性嘅聲線講：「請問……係……回……呀?」
 
我再次表示聽唔清楚，或者，可能係因為我將100%嘅能量都用咗係視覺到。
 
佢忽然面色一轉就叫：「妖!我要問幾多次你先聽到呀!」嘩!呢下足以同包租婆嘅獅吼功有得揮嘅叫聲，如雷貫耳，我當堂呆咗一呆，實在唔敢相信呢把聲係係我面前呢個女神般嘅女生所發出。
 
佢一講完，自己都驚一驚，表情又轉回含羞中帶點歉意。不得了，呢種反差美，我真係做咁多年人都未見過。
 
佢又轉回溫柔的聲音講：「唔好意思，其實我係想問你有無廢柴要回收?」
 
廢柴?我應該仲係暈緊浪，所以聽唔清楚。我答：「……無……無垃圾……要回收……」
 
呢一刻我嘅手汗，我諗用晒成包TEMPO應該岩岩好。
 
佢搖搖頭，講「唔係，我係問廢柴呀，唔係廢物垃圾個啲。」




 
我再次確認，講「……廢……柴?」
 
佢嫣然一笑，就話：「係你喇!我終於搵到喇」佢一面講，一面伸出佢纖細嘅小手，輕輕咁捉住有如黃河氾濫般濕透嘅污糟手。呢下沖擊，實在太強大喇!!! 實在太強大喇!!! 實在太強大喇!!!(因為好緊要，所以要講三次)簡直有如EVA裡面嘅「第二次衝擊」一樣，我叔叔不行了……
 
「先生!先生!你醒下喇!先生……」