《完美犯罪手冊》 - 為了上進而失去一切的故事: 3
『呢間公司？！』
阿Dee瞪大雙眼，目不轉睛咁望住我。
「咮！……」我示意細聲少少：「咪咁大聲啦傻左咩，慌死人唔知？」
阿Dee靠近道：『呃…sorry…咁…你目標係咩？』
「老實講啦，我地日日返工做到仆街得果萬幾二萬蚊，夠月頭都唔夠月尾啦。」
『所以呢？』
「所以我決定自己既糧，自己出！」
『咁你有咩方法？』
「嘩你當我神仙咩？話講就有既計劃，講你都唔好信啦…等我返屋企度下有咩好橋仲好。」
『好，等你好消息，』阿Dee點著頭道：『我果然冇睇錯你。』
當日放左工返到屋企之後，我就坐係梳化上，望住個天花板不斷地係咁諗…
「如果要係呢間公司落手…要侵吞佢一部份既資產…做呢件事九成都係犯法…」
犯法既事，老實講，我由細到大除左過馬路衝燈；搭地鐵買優惠飛；同亂拋垃圾之外，
基本上我都係一個奉公守法既好市民黎。就算果啲小事真係犯左法比人拉到，最多都只係罰下錢，警告下就無事。
但而家講緊既可能係「詐騙」、「盜竊」、「虧空公款」喎…萬一出事既話，下場就唔淨只係罰錢咁簡單，九成監都有得我坐！
但…點算呢？我又應承左阿Dee…而且Hyuna又係因為錢而離開我…
不過，
諗深一層，唔係喎，
萬一我…成功呢？
成日聽人講：「人生就好似一場賭博咁，成功同失敗只係一線之差。」
犯罪如果成功，你可以飛黃騰達，可以一步登天，甚至可以做特首統治香港，我地香港最高領導人已經證明左比我地知；只要你心思細密，唔好比人查到，你都一樣可以成功。
呢一刻係我腦海中，簡直好似聽到特首講「你而家無，但你將來肯定會有」一樣。
冇錯。
我唔想好似普通人咁，唔犯法就會成功喇咩？好！就算當你係，都只會係一個小成功。
有穩定既收入，有份鐵飯碗既工，但…又有咩用？
人生在世，倒不如轟轟烈烈咁去做一場大事？
我諗左成晚，由夜晚諗到凌晨，略略已經諗左幾個方法。
第一個係直接偷公司既錢；每日公司開門之後，都會派人去入數，將前一日既業績，交比帳房同事，再由該名同事去銀行存入指定戶口，咁果個時候…我就可以拎走ｄ錢…
不過唔得，破綻太多，危險性太高，而且仲有好多蹤跡可被追查…
想話比人打劫咩？到時公司一定會報警。
想扮入錯戶口？你估係電視劇啲人隨隨便便就有太空戶口咩？再加上入數連埋入數紙架嘛…
想整唔見？更加唔得啦，為左少少錢，九成九會比人炒埋。
最重要一點就係，前一日既業績話多唔多…話少唔少，得幾萬蚊…都唔值得為咁少錢去搏。
仲有，我需要係一個長遠，可實行多次，而且能減低風險，更加唔會比人懷疑到既計劃。
做一次半次，果啲叫bonus，每個月可以不斷做既先叫幫自己出糧。
唔得唔得…要再諗下……
就係呢個時候。
〔就這樣愛你愛你愛你 隨時都要一起〕
電話響。
唔響由自可，一響就嚇到我。
唔知係咪做緊虧心事，比電話咁樣都嚇左一嚇。
「喂？」我立即壓低聲線，扮到咩事都冇：「邊位。」
『阿沁？我係張經理啊。』聽筒傳來張經理既聲音。
「呀…張經理你好呀…咁夜打黎，唔知有咩幫到你？」
『冇咩，想問下你有冇阿陳太電話之嘛？』
「陳太？」我呆左一呆。
『公司個大客呀！』
「哦…咁你等我一陣，我搵返本薄先。」
作為一個專業既售貨員，有留客人既資料係好合情合理既事，而我就有本memo，係保留左所有客人既電話。
尤其是大客。
唔單止係咁，我sell完客，個客埋完單後，我仲有一個習慣，就係print多張單出黎，夾係本薄度，咁個客買過啲咩，鍾意啲咩款式都一目了然。即使有新貨返，我都可以即時聯絡到個客去做生意。
至於張經理咁夜打黎，相信佢應該係收到公司聽日返既新貨，想叫陳太黎買下野。
由於我呢排失戀，即使口裡說不，身體卻很誠實，無可否認我個人既業績都差左好多。
「張經理呀…」我夾住個電話講：「陳太既電話係…13815529323。」
『哦…323…好唔該哂你先。』
「唔洗客氣，仲有冇咩事咁？」
『冇…阿沁，呢排見你唔多精神咁，冇事啊嘛？』
「冇咩…有心喇……」我都唔好意思理佢。
『我知Hyuna走左你情緒應該會好低落，但男人以事業為重啊，加油啦！』
「嗯…咁聽日見喇經理，拜拜。」
男人以事業為重…
我就係因為呢份垃圾事業先失去個女朋友…
唔係…我係失去左做男人既尊嚴。
明明我已經冇遲到早退，日日準時返工，點解？點解Hyuna仲要離開我？
「屌！」
我愈諗愈激氣，最後將成本客人資料薄扔左落地。
本薄好自然咁張開，入面既單據飛到一地都係，頓時成地都係紙張。
「頂……又要執返…」
我望住地下既單據，每一張都係我花心血，花力氣去完成。
每一張都見證住我既努力……
但點解…點解我已經咁努力…我仍然一事無成？
我唔甘心！…我唔甘心呀！！
我每日做到成隻狗咁…一見到啲大客黎就搖哂尾、申哂脷咁，仲要同其他狗搶野食，
搶到仲要受人冷眼…去到最後，即使開到十幾萬大單，我既佣金都只係有…
只係有…
只係有…幾十蚊…？
佣金比率係…0.1%…？
點解？
點解咁唔公平？
個客一個唔鍾意，返黎換貨都唔緊要…萬一佢退款…
我連果幾十蚊都無埋！
點解間公司對啲客就咁好？仲要有條條款，係比佢半年之內可以退錢…？
但，對自己ｄ員工就咁差？
唔好話比OT錢啦，甚至打八號風球果時因為你住得近，要你落波之後半個鐘之內要返到公司！
我真係望唔透…
對住客就要自動做隻狗，對住公司就比人當係狗。
到底我係人，定係狗？
我辛辛苦苦咁跑數…為左呢Ｄ單…到底為左Ｄ咩？！
〔就這樣愛你愛你愛你 隨時都要一起〕
又邊個呀……
「喂？」
『啊沁呀？張經呀，唔好意思，唔知你方唔方便聽日帶埋所有客人既資料返公司呢？』
「所有客人…？你指我既熟客？」
『冇錯冇錯，係咁既，因為公司黎緊有個週年晚會Project，想聯絡返所有客人參加。』
「哦…冇問題呀…」我收拾地上既紙張：「我聽日帶本note比你抄低啦。」
『唔洗咁麻煩喇啊沁，你將啲資料入哂落個word檔度，入落隻手指聽日交比我啦。』
屌，咁咪仲麻煩我。
「好，冇問題張經理。」
呢個張經理真係好煩，但奈何佢係店入面係最大果個，我地唔可以唔聽佢講。
話說我同阿Dee返緊既呢間公司，係一間國際連鎖既時裝公司，專門代理世界各地既高級品牌，
有自己既廣場，整個廣場入面有大大小小唔同既時裝，鐘錶品牌…
而我，
就係公司廣場入面既一間時裝店度做售貨員。
由於經理係一間店入面係最大既，所以佢做乜都係大哂。
呢條張經理，係店入面行就好似一個識郁既漢堡包咁，賤肉橫生，蛇頭鼠眼，成日咸咸濕濕咁捉啲女同事入經理房。
記得果時Hyuna都同我投訴過佢，佢捉女同事入房除左捉儀容，仲會摸手摸腳…
借啲以話呢度唔岩，果度唔岩咁，但其實就只係滿足佢一己私慾！
最離譜係就算要告都告佢唔入！因為經理房既攝錄機，比堆積如山既貨遮住哂！
再加上人人都為左保住自己飯碗，冇一個女同事敢出聲…
呢個世界真係好唔公平…點解呢種衰人可以愈做愈上位，就算性騷擾都唔可以告佢，唔通呢啲就係香港而家既風氣？
唉，算喇，我又唔似動漫入面既英雄人物可以伸張正義。
就算係自己既女朋友比人性騷擾，我都只可以好無能咁去安慰一下佢…根本咩都做唔到。
當我諗到呢一步就覺得，或者Hyuna離開我都係一個正確既選擇黎既…
翌日
當我一返到去公司既更衣室，阿Dee就咁啱從後趕上，好似好期待我有咩大計劃咁。
『喂！沁哥～！』
「喂，早晨…」我徐徐放低個袋。
『做咩咁頹呀？』阿Dee將手中既快餐店袋住既咖啡遞比我：『拿，醒你啦！』
「唔該……冇…琴日張經話要我熟客ｄ資料…我入左成晚…唔夠訓之嘛…」
『熟客…？』阿Dee聽到搲哂頭：『做咩無啦啦要比你熟客ｄ資料佢？』
「乜你唔知咩？」我反問：「公司黎緊有週年晚會嘛，要經理聯絡Ｄ客人黎參加…」
『週年晚會？有Ｄ咁既事咩？』阿Dee縐一縐眉好奇道。
「乜冇咩？」
『乜有咩？』
「冇咩？」
『有咩？！』
「頂～～我問你又問返我，可能經理一時未聯絡得哂咁多同事呢？」
『哦…一陣你返工醒定Ｄ啦，廢事又比個肥佬經理捉你錯處。』
忽然間。
咯咯咯咯咯咯咯。
我同阿Dee都立即望向更衣室門口，因為正常員工入黎換衫都唔會敲門，
所以一有人敲門，我地都被突如奇來既聲音嚇左一嚇。
道門慢慢推開，我地既心情都不其然咁緊張起來。
更衣室門外透射出柔和既燈光……慢慢映照出既身影…竟然係…
………
張經理。
『早…早晨張經！』阿Dee立即肅然起敬。
「早晨，啊沁你準備好我要你交既野未？」張經立即將視線集中係我身上。
「哦…係…」我從袋中拎出一隻USB：「已經入哂喇…係呢…張經做咩咁趕既？」
「哦無，」張經理立即接過USB：「公司等住要姐。」
「哦…」
「呀仲有。」
「仲有？」我好奇地問。
「呢度有封信，」張經理遞封信比我：「你今日開始要調去另一間分店。」
我頓感錯愕：「調鋪？！」
「係，冇錯，」張經理解釋：「公司見你呢排表現差左好多，決定調你去另一間分店，因為以你既業積黎講，怕你應付唔到旺區既客流量。」
阿Dee聽到後急忙道：『但…啊沁佢都冇做錯過咩啊？點解要調走佢？再加上經理你都知佢岩岩失戀……業績下降少少好正常姐！』
「Shut up！」張經理一臉怒容：「我條team唔需要呢種廢物！少少打擊都受唔住，仲講咩事業？為左個女人要生要死算咩男人啊？」
「算啦…」我拍一拍阿Dee膊頭：「調鋪咪當我散下心囉…冇咁忙、又少啲 OT咪仲好？」
『阿沁……』阿Dee緊縐著愁眉。
我望住張經理：「但張經，我唔明點解你琴晚要我將所有熟客資料比哂你？週年晚會係咩一回事？」
「下？」張經理忽然露出一張詭異的笑容，好奇問：「週年晚會？咩黎？」
我目瞪口呆：「明明你係琴晚講……！」
「我講？」張經繼續詐傻：「邊有啊？熟客不嬲都係自己Keep返客人既資料架嘛？我琴晚淨係叫你比客人既資料我，因為你要調鋪我可以交比第二個跟進，係你自己主動放棄你自己既熟客，關我咩事？」
「你…！」
係呢一刻，我終於知道…我奶左野。
原來張經理一直都睇我唔順眼，原因係咩我唔知。
我只係知道我一直都好努力咁做野，就算佢要性騷擾Ｄ女同事我都冇出過一粒聲。
到底係點解…？就算要調都唔一定係要調我走呀？
但，係五秒之後…我終於明白。
〔就這樣愛你愛你愛你 隨時都要一起〕
冇錯，電話響。
但我左搵右搵，都仲未搵到個電話。
直到有一張熟悉既臉龐係我面前出現。
Hyuna。
佢出現…並唔係因為佢真係出現係男更衣室。
而係…佢出現係一部手提電話入面。
而且…仲係一張來電照片。
而果部電話…正正係屬於我面前既呢個男人。
「點…點解…」我自言自語。
我問點解，唔係因為Hyuna係佢手機入面出現，佢係公司經理，
有Hyuna既電話係好正常，我問點解…係因為果首鈴聲。
就如我電話既鈴聲一樣，男人老狗點會用Ｄ咁女人型既鈴聲至得架？
係Hyuna第一晚同我發生完關係，就擅自幫我轉左鈴聲…
一轉就係幾年，而今日…呢個臉孔，呢首鈴聲，竟然係另一個男人手機中出現。
而且係一個令人嘔心既男人。
張經一臉恥笑：「啊哈哈…唔好意思，我女朋友打比我，啊沁，唔同你講住喇，你拎埋封信，就去新鋪報道啦，信入面有新店既地址，你去到就有人教你野，係咁先。」
佢女朋友…？
Hyuna…？
張經理見我呆左接住講：「呀係呀，啊Dee。」
『我？』阿Dee呆左咁望住我。
「係，」張經理笑笑口：「你既好同事Hyuna下星期放完大假就會返返工啦。」
『Hyuna？！佢唔係補錢辭左職喇咩？』阿Dee大驚。
「辭職？」張經大笑：「哈哈哈！佢只係放大假之嘛？佢咁做～得野，我邊捨得佢唔～做～～？」
原來……
一時三刻，我個腦咩都諗唔到…淨係有好多零零碎碎既記憶…對話…不斷咁出現係我腦海。
『不如我地都係分手啦…我要既野你都比唔到我。』
『冇人同你講過…兩個人本身就係兩個世界既人，一齊就係為左踏入對方個世界架咩？』
『哎呀…啊沁…我又比果個肥佬摸我啦……』
『啊沁…個肥佬今日捉我入房…佢…佢…佢用果度磨我啊…』
『你點呀…啊沁？冇事嘛？Hyuna走左你冇受打擊嘛？男人以事業為重啊！』
『啊沁你聽日拎哂所有熟客既資料比我，公司有個週年晚會，想………』
啊！！！！！！！！！！
原來Hyuna辭職消息係佢專登放出黎引我上釣。
要我意志消沈，要搵籍口整走我！
點解…點解呀！
更意想不到…Hyuna一直都同佢…
點解…點解我仲意識唔到…完全唔知發生緊咩事…
果條咁核突既肥佬…竟然同我女朋友…
唔通…我一早已經戴緊綠帽？
不知不覺間，我將Hyuna性感既胴體同賤肉橫生既肥佬經理聯想埋一齊…
由抗拒，變成享受；由討厭，變成陶醉；由矜持，變成淫蕩…
係我太信任佢，原來一直最危險既人，就係身邊最唔想理會既人。
『你個…！』阿Dee比我仲嬲準備衝上前郁手。
「阿Dee。」我低下頭拉住阿Dee：「唔好衝動。」
『之但係！』
「張經理，我接受調鋪，而家就去果間分店報道。」
「哦～？」張經獰笑著：「估唔到你都幾睇得開喎？」
「不過，」我接著道：「我有一個要求。」
「仲講咩要求？」張經理眼尾都唔望我。
「希望…你會好好照顧佢。」
『啊沁……』
我拍一拍阿Dee既膊頭，其實我咁講只係唔想阿Dee衝動，去幫我呢個兄弟做任何事。
因為咁樣，分分鐘連Hyuna既消息都冇埋。
雖然我地分左手，雖然所有證據都好似話比我聽係Hyuna不忠…
但我好明白凡事唔可以睇表面呢個道理，可能佢有苦衷呢？
可能佢有咩困難？我唯一做到最後既事，就係留返阿Dee幫我繼續觀察經理同Hyuna…
我把口話就話就好易放低呢個女朋友，但初戀…初戀呀大佬？
邊有話咁易忘記到？
再者Hyuna無啦啦放大假…一定發生左啲咩事先會咁…直覺話比我知，
呢件事一定唔係咁簡單架…
我一邊執拾私人物件，一邊回想起係呢間公司既點點滴滴。
原來，我人生中有好多個第一次係呢間公司發生左。
第一次返工，
第一次拍拖，
第一次溝女，
第一次戴綠帽…
第一次……
琴日仲興奮好有大志咁去諗將來…
仲以為所有事都掌握自己手中，到頭來，原來只係人地佈局中既一隻棋子…
真係可笑。
我拎個心出黎對人，但人地就拎我個心去賣。
唔通呢個就係社會既真面目？
如果係咁既話我都算幾好彩，都起碼開心過幾年先見到咁醜惡既一面。
我左一揪右一揹，拎住制服，拎住行李，頭也不回咁行出呢間公司。
雖然係好難受，但我唔會忘記我失去過既野。
呢個時候我心想：以為調走我就得架喇咩？我一日未死，我都一日仲有機會！
咪住先…
「調鋪」…？
我好似…諗到Ｄ咩…