我叫月沁,大家都叫我「阿沁」。 




唔好問我點解改呢個名,我問過我阿媽,但佢竟然答我係因為鄧麗君首『月亮代表我的心』…真係幾無奈。 

而我既另一個拍檔,佢叫劉一二,係自我中學就開始認識既朋友。 

佢話呢個名係佢老豆改,可能係因為佢老豆盲字都唔識多隻,就改左個咁Hea咁簡單既名比佢。 



我地一開始叫佢「阿二」,覺得怪怪地,所以有次玩玩下啤牌,就決定左叫佢阿Dee。 


阿Dee佢個名就簡單,但佢個人就一d都唔簡單。 

因為自中學起,佢就係一個壞學生。 

一間學校該有既校規,基本上佢都犯過哂。 



佢係痴線到睇住本手冊有咩校規,就一條一條咁去犯哂佢,個個都唔明佢點解要咁做,只係當佢係一個怪人。 


你問我點解佢冇比人踢出校? 


原因好簡單,佢係學校壞姐,但佢係學校內既高材生。 

每次考試都入全級三甲之內,簡直就好似漫畫入面既天才學生咁。 



所有校外既比賽佢都可以拎到冠軍;無論係學屆,定係全港性既比賽都好。 

佢除左係風雲人物,仲係一個好有性格既人。 


佢有一句野成日掛係嘴邊,佢成日話:「Break the rules, they were made to be broken.」 

所以佢成日都可以用不同角度去分析所有事。 

不過,佢雖然讀書好叻,但佢一啲都唔鍾意讀書,什至會考佢都只有10分。 

一科數學拎A;因為佢鍾意計數。 

一科英文拎A;因為佢鍾意個英文MISS。 



唔係講笑,假如佢報十科,佢一定做到十優狀元。 


佢會考得10分,好多老師都覺得好可惜… 


而我?我同佢就岩岩相反。


我讀書唔太叻,會考都只係岩岩Full cert畢業,仲要加埋科科得一分,岩岩好六分。 


雖然我讀書唔叻,但阿Dee佢唔知點解成日當我係大佬咁看待。 

我有問過佢點解架,佢話有一次…… 






記得果次係中一岩岩入學,第一次互相認識。 

就傾開大個左想做啲咩。 




『我準備做會計架啦!繼承我屋企人衣缽。』一名二世祖肥仔道。 

『我就做老師啦!』另一個油頭粉臉既毒撚學生道。 

眾人大惑問:『點解?』 



『可以捉d女學生去體罰嘛!』毒撚講得自信不已。 

「挑~~」阿Dee一臉不屑。 

『咁你又想做咩呀?』油頭毒撚擺出一副諷刺表情。 

「我?」阿Dee諗左一下:「唔知喎……你問第個先啦!」 


此時眾人望住我。 


『我想做一個全世界都認識既人。』 



眾人都你眼望我眼咁,完全唔明我講緊乜。 

但阿Dee忽然問:「全世界都認識?即係歷史上既偉人?」 

『唔係。』我諗左一下:『只要係全世界既人都認識,就算係十惡不赦既壞人都無所謂。』 


眾人沈默。




我接著道:『我唔想好似我死鬼老豆咁冇用,一生平庸,除左屋企人外,就算死左之後就冇人認識,勞勞碌碌咁過左佢一生。所以,就算要我殺人放火,好似開膛手傑克,殺人魔希特拉,甚至我地香港既賊王葉繼歡咁…只要被世人記住,無論係名留青史,定遺臭萬年又有咩所謂?』 



『嘩…』富二代肥仔叫嚷道:『呢條友傻架喎!』 

『乜係咩?』阿Dee打斷肥仔:『我覺得……你呢個諗法…』 

我滿臉好奇:『我個諗法點?』 

『哈,』阿DEE搖搖頭:『雖然呢個唔係一個好答案,但卻係一個我意想不到既答案。』 

『哈…哈哈…』我雖然唔係好明,但都表示友好咁笑兩野。 



呢個時候個個都望住我地兩個係度傻笑,完全唔明我地做緊乜野。 

我同阿Dee就好似相逢恨晚咁一見如故,自此之後我地係中學生活入面… 

無論係做Project,溝女,打波,打機,甚至打交,都會一齊去。 

雖然好似好GAY咁,但我諗呢啲就係所謂既兄弟。 


我同阿Dee係中學畢左業之後,冇好似其他同學咁四周圍撲學校, 

因為,我地一早已經決定左去做Sales。




點解做Sales?答案好簡單,梗係因為多女啦,而且入行條件又低,最岩我地呢種人。 


後生仔血氣方剛,已經浪費左十幾年去讀書,畢業對我黎講只有一個意義。 

就係出齊哂毛,梗係搵女黎溝打破A0既局面啦!唔係要讀到廿幾歲先出黎搵野做呀? 

再者佢地讀到22、23歲畢業出到黎社會,仲揹住一身債要還,相反,到時我地已經係社會打滾左四、五年,唔好話爭人錢,識得儲蓄戶口都有返幾萬蚊旁下身,分分鐘仲升幾次職添。 



就係咁,我地好順利咁入左去一間時裝店度做野。 

點知一做,就做左幾年。 

踏左入社會之後,我地每日經歷既,都係返工放工,去酒吧去飲酒,每日如是… 

簡直就好似…等死咁。 


夢想呢? 

周星馳講過:「人如果冇夢想,同條咸魚有咩分別?」 

不過,我每個月溝女要錢,屋企要錢,去玩要錢…乜都要錢… 

無錢…仲有咩資格學人講咩夢想丫? 

都係乖乖地繼續做份牛工仲好啦。 


直到…直到有一日。 


我人生中轉捩點既一日。



『我地都係分手吧啦,我想要既野你比唔到我…』 


「點解呀?!我已經咩都比哂你啦…你仲想點呀?」 



係我眼前既呢個女仔……佢叫Hyuna。 

冇錯,佢個名同韓國果條女一樣,都係叫hyuna。 

無論係化妝,定係身材,佢都同果個Hyuna不相伯仲,係朋友之間直情係女神級。 

每次陪佢落club都比一大堆男人投來懷恨既目光。 

我既Instagram有57個followers,而佢既IG都係57,不過佢多我一個「k」字。 

可想而知佢有幾吸引人,除左佢果對可以擺上台既豐滿雙乳,更殺食既係佢果對嫩白無瑕既白滑長腿。 

尤其是佢鍾意偽韓妹既打扮,鍾意著白色貼身Tee,一雙驕人既雙峰真係遮都遮唔住… 


可能你會問,咁完美既女神,我點溝到佢? 

是咁的,一開始我係間公司識到佢,果時佢都係岩岩畢業,好pure好true。 

但經歷過幾年社會既浸淫同摧殘之後,hyuna就慢慢變左另一個人咁。 

開始愈來愈港女,一開始就咸魚白菜也好好味,而家就變到咸魚白菜就…你老味。 

一開始好專一,成個世界都係我,而家就變到好專一,但成個世界都係錢。 


「錢」 



錢呢樣野乜真係咁重要咩? 

唔係夠用就得喇咩? 

冇錢又點? 

點解唔可以係我一無所有既時候陪我捱過去? 

我真係望唔透。





『你講得岩…或者我地真係兩個世界既人,你以後都係唔好再搵我啦……』 



呢句,係Hyuna同我講既最後一句說話。 


其實真係好好笑,雖然好心痛,但真係好好笑。 

好笑既原因唔係因為我傷心到傻左,而係因為我地一齊之前, 

佢同我講:「兩個人本身就係兩個世界既人黎架啦,一齊係為左行入對方既世界之嘛~係咪~?」 


而家佢用返呢一句說話黎做終結。 

唔講以為佢考緊中文作文,用首尾呼應黎同我開玩笑。 


不過算啦,我睇愛情呢家野睇得好淡,俗語話:「不在乎天長地久,只在乎曾經扑夠。」 

既然我都砌左佢咁多獲,佢都唔細啦,我諗佢都係想搵人「埋單」姐。 

我自問真係比唔到d咩佢,樓我冇,車我冇,除左碌撚,我真係乜撚都冇。 

就當祝福佢啦,其實佢都幾可憐既…希望佢唔會掛住我條巨龍啦… 

希望佢唔會同第二個扑野既時候諗起我啦… 

希望佢飛左我後唔好咁傷心啦… 

希望佢可以有一日會返黎我身邊啦…希望… 



…唉。


自從同Hyuna分左手之後,我就如常咁返工,當我返到公司,果然不出我所料, 


Hyuna都再無返工,我諗…係因為佢已經搵到個男朋友養佢。 

至於係「養」佢,定係「包養」佢,是鳩但啦,反正都唔關我事。 




『喂!阿沁!發生咩事?』阿Dee急急忙忙咁衝過黎。 

「下…」我放低個袋:「咩咩事?公司有『執四』咩?」(執四:指小偷,Sales術語) 

『唔係啊!係Hyuna啊!經理過佢補左一個月通知金辭左職呀,發生咩事?』 

「哦…我地分左手啦。」 

『分左……』阿Dee滿臉愕然:『兄弟…你冇野啊嘛?』 

「我?」我望一望自己:「我有咩野?」 

『你係咪傷心到傻左啊…唔好嚇我喎。』 

「哈……」我輕歎一聲:「冇咩,我廿零歲看破紅塵,是否悲哀?」 

『喂,唔開心今晚一齊去劈酒呀!我陪你喎!』 

「你?唔洗啦,你去溝女把啦。」 

阿Dee一臉同情:『…話哂Hyuna都係你初戀……』 

「唔講女啦!講黎都冇用。」我將話題一轉:「喂!阿Dee,你覺得錢重唔重要?」 

『錢…?』阿Dee縐一縐眉:『話重要唔重要,話唔重要又重要咁囉。』 

「好野好野,識左你咁耐講野依然係咁玄。」我苦笑。 

『無啦啦做咩講錢啊?係咪你爭人錢,所以要分手?』 

「唔係……只係覺得…我地每日辛辛苦苦咁返工,每個月淨係賺果萬零蚊…你甘心咩?」 

『………』阿dee開始思考。 

「再講丫,我同你都唔係蠢果類人,點解要同呢班mk廢柴,收埋同一份糧?」 

『……你唔係……』阿Dee支支吾吾。 

「阿Dee,你仲記唔記得我細個話要做咩?」我搭住阿Dee膊頭。 

『廢話…』阿DEE接住講:『齌講有咩用,咁你有咩計劃?』 

「其實我都唔知……」 

『挑咁你又……』 


「不過,我地可以由呢間公司落手。」 


『呢間公司?!』