【我在IG Shop買了一個流星少女】: 第一章(下)

又un左個幾鐘頭既車程船程之後，我終於都番到屋企樓下。
 
        係番屋企既過程中，我一直都係到回想緊岩先個個少女既笑容。
 
        一句講晒，真係好甜！
 
        btw照我估計，佢應該係長洲居民。(廢話？on9？)
 
        但如果真係有個咁靚既少女住長洲既話，高登仔應該一早就起晒佢底，甚至會改埋佢個名做「長洲本土女神」諸如此類先岩架喎！點解我上網又搵唔到佢d資料架呢？
 


        唔通佢係近排先搬入去既？
 
        「唉！」我走到家門前，將門扭開。
 
        「番黎喇哥！」嘉琪坐左係sofa到睇緊電視。
 
        「嗯，」我已經攰到乜咁，直接坐左落sofa到。
 
        嘉琪哄左個頭埋黎，好親切咁講 : 「咁......你交收左喇可？」
 


        頂，唔講由是可，一講就把鬼火！
 
        「我親愛既妹妹，」我用一把勁奸險既聲線同嘉琪講。「真係好多謝你俾呢個機會我入長洲，令到我不單只蝕左幾廿蚊車錢之餘，仲要幫你嘔埋個100蚊頸鍊費。」
 
        嘉琪聽到之後，已經知道今次仆街了，於是乎驚到身個人即刻坐直左。
 
        我見有優勢，所以決定打蛇隨棍上 : 「為左要好好咁報答你，我決定每一日既晚飯都由我為你親自下廚，好讓我煮一d佳餚過你食，就比如話係『豆豉鯪魚炒麵』、『6成熟豬扒』、『肉鬆炒生菜』......」
 
        「等等！」嘉琪嚇到眼都大埋。「不如咁啦，呢幾日就等我煮飯啦！」
 


        「仲有！」嘉琪繼續補充。「你今晚加埋用左幾多錢？我俾番你......？」
 
        哈哈，我宣佈抗爭勝利！
 
        「算啦，錢個到唔洗俾番我喇，我玩下你咋！」我笑笑口咁遞上小紙袋。「不過飯呢就一定要煮！」
 
        「係既！」嘉琪用雙手接實。
 
        「仲有！」我突如其來既呢句又令嘉琪瞪大左對眼。
 
        「仲有就係，」我做出一個加油手勢。「一定要贏個個時裝比賽！」
 
        「好！」嘉琪聽完之後笑道。
 
        ***


 
        打後既呢幾日，我既生活都不外乎係朝早去排戲，下晝番歸打機，夜晚溫下書然後食飯訓覺咁。
 
        老實講，呢種重覆單調既生活其實都真係幾枯燥乏味。
 
        而且最慘既係咩？就係我排左咁耐戲都仲係搵唔到個種「愛情」既感覺！
 
        搞到依家日日都係紫鈴面前出醜不特只，仲要拖累到成班人既進度，唉！
 
        不過講到尾，其實都有樣野係呢幾日以黎值得開心既！
 
        呢樣野就係睇流星少女個IG！
 
        事關原來佢呢個IG唔單只係SHOP咁簡單，而且仲係一個相簿黎。
 


        所謂既相簿，就係少女每一日都會UP一張相，而張相就係佢個日特別想記錄既畫面。
 
        比如話琴日少女就去左長洲個大排檔食晚飯，於是乎佢就影左一張「鳳爪排骨」上IG。
 
        雖然D相全無構圖可言，但就特別多左一種親切感。
 
        所以感覺上……我終於可以認識多一點呢個一面之緣既少女。
 
        ***
 
        今日係星期六，亦即係阿妹去比賽既日子，所以嘉琪佢一早就出左門口。
 
而我就因為今日唔洗排戲既關係，所以訓到成十二點幾先至起身。
 
        「嗚啊~~~」我伸左個大懶腰，然後攞起部電話。


 
        我打開左ig，發現流星少女一個鐘頭前up左張相！
 
        不過呢幅相同平時個d好唔同，因為佢只係一張全白色既正方形。
 
        相下面有一句caption，寫住 : 「讓我有個美滿旅程！」
 
        由於我唔係好明，所以一於決定無視。
 
        於是乎我就去左打機，一打又成個下晝。
 
        「喂我唔玩喇，嘉琪就番，今日我煮飯。」我用skype同阿溢講。
 
        「好啦咁，星期一見啦！」阿溢回應。「記得呢幾日要練熟d個感覺，遲下排戲個陣落力d呀！」
 


        唉，做到先得架……
 
        我嘆左一口氣，然後講 : 「嗯，我會架喇。」
 
        可能阿溢都明白我難處既關係，所以都即刻補充 : 「我都知係難架喇，所以如果你真係唔得既話記住同我講，最多我就改改個劇本佢，刪走呢一幕！」
 
        「嘩，做乜忽然對我咁好呀溢大導！搞到我好受寵若驚！」我笑道。
 
        其實阿溢都算係唔話得架喇，因為刪走一段戲其實真係幾麻煩，而且分分鐘仲會俾我地個劇社on9負責老師屌，話我地唔跟佢意思！
 
        「屌，講呢d！」阿溢都笑住咁回應。「聽日再搵你啦，咪又雷我跌牌！」
 
        收左線之後，我就準備出廚房煮飯。
 
        就係呢個時候，出面傳來開門聲。
 
        「嘉琪你番黎喇？」我徐徐走出房間。「你今日比賽……」
 
        係我都未講完個陣，嘉琪就已經一個箭步走過黎，然後攬住我！
 
        「哥！我贏左呀！！！」嘉琪把聲聽落超興奮。
 
        「你贏左冠軍？」我一方面勁驚訝，另一方面就勁替嘉琪開心。「咁咪即係有大獎------一人法國來回機票囉？」
 
        「我！」嘉琪抬起頭黎望住我。「我……羸左季軍。」
 
        ……
 
        「車！」我不自覺咁笑起上黎。「仲以為你咁勁添，原來季軍咋！」
 
        「咩喎！」嘉琪一手推開我。「你知唔知要係廿幾個參賽者裡面突圍而出係一件幾難既事！」
 
        「而且~~~」嘉琪繼續講 :「季軍都有成8千蚊獎金架~~~！」
 
        「wtf！」我雙眼瞪大咁講。「咁多！」
 
        「本來呢見阿哥你幫左我手交收條頸鍊咁有功勞，就諗住用d錢請你食晚飯，可能係韓燒或者自助餐既，」嘉琪見我嚇到咁，就決定食住上。「不過你岩先串我呀麻，所以依家呢……我就要諗諗先！」
 
        唔撚係掛？唔制呀，我要食自助餐！！！
 
        「馬嘉琪！」我將隻右手搭左係嘉琪肩膊上。「如果有時光機既話，你知唔知我會用黎做咩？」
 
        「嗯？」嘉琪不解咁講。
 
        「答案就係，」我用堅定既眼神望住嘉琪。「我會番到去幾分鐘前，然後大大力車落去以前既自己到，再同佢講『唔準串你阿妹呀on9！』」
 
        嘉琪聽完之後勁大聲咁笑左出黎，然後同我講 : 「馬家樹，你為左餐晚飯，真係可以去到好盡！」
 
        「咁你仲請唔請先~~~？」我一手按落嘉琪既頭上。
 
        嘉琪裝作諗左一諗，然後望住我笑說 : 「係就快d換衫啦！」
 
        ***
 
        於是乎我同嘉琪就去左附近既一間「漢和」到食野韓燒。
 
        「恭喜阿妹你贏左冠軍……啊唔係，季軍！」我攞住杯酸梅湯講。
 
        「妖，食屎啦馬家樹！」嘉琪雖然扮晒嬲咁講，但其實佢臉上早已經掛上了甜甜既笑容。
 
        「碰！」嘉琪同我既杯互相撞擊。
 
        「其實要講最大功臣既話，應該就係賣頸鍊俾我既個間IG shop！」嘉琪飲左一啖酸梅湯之後講。「事關D評審都係因為呢條頸鍊先俾咁高分！」
 
        「下？」我好奇咁問。「成件事即係點！」
 
        「因為今次既比賽題目係『晚空』，咁岩我買既呢條鍊就有粒夜光既星星，所以D評審見到咪勁Buy囉！」嘉琪解釋道。
 
        「哈，咁你真係要inbox下個店主多謝佢喇！」我笑說。「仲有！要多謝你面前呢個幫你山長水遠去交收既哥哥！」
 
        「所以咪請你黎食飯囉！」嘉琪一路講，一路伸部手機出黎同我自拍。「影相send俾個店主多謝佢先！」
 
        影完之後嘉琪就inbox流星少女 :
 
        多謝你條頸鍊！佢幫我贏左一個時裝比賽季軍！我以後會多d幫襯你架喇！
 
        「咁就得啦！」嘉琪講。「……咦？」
 
        「做咩？」我無暇理會嘉琪，淨係全心專注緊係眼前煎板面上既燒牛肉。
 
        「店主......好似無家可歸！」
 
        「下？！」
 
        D牛肉好似燶晒了。
 
        「下？！」我非常詫異咁望住嘉琪。「點解你會咁講既？」
 
        「事關店主岩先up左幅相，就係佢係中環碼頭自拍，跟住------」
 
        「借你電話黎望望！」當嘉琪諗住繼續講個時，我就立即打斷左佢。
 
        於是乎嘉琪就遞左部電話俾我，而mon上正正就係顯示著流星少女既新post。
 
        正如嘉琪所講，幅相係中環碼頭影既。
 
不過比較特別既就係，流星少女係坐住一個行李箱！
 
而當我望落去下面段caption既時候，我先是驚訝，後是……嗚哇！
 
Caption :
 睇完之後，我腦海即時浮現出兩樣野。
 
仲洗問？！梗係救佢啦屌！
 
但另一樣野，卻令我有d唔明白。
 
點解佢要「重新去認識這個世界」……？
 
唉算喇唔好理咁多，一於救左先算！
 
「馬嘉琪！」我諗我呢一世人都未試過咁認真咁叫阿妹個名。「想唔想報答店主？」
 
「下？！」嘉琪明顯知我想點。「真心？」
 
「仲有假？」我雙眼既眼神簡直堅過石堅。「店主身為一個咁靚既女仔，夜媽媽仲係條街到係一件好危險既事！」
 
我繼續講 : 「而且人地幫過你，有恩於你，所以就梗加應該要學識報答！」
 
「咁……爸媽又唔係到，應該都得既……而且睇店主個樣都幾友善，應該唔難相處既……加上我間房又張下格床空左出黎……」嘉琪開始認真咁思考緊呢個方案！yes！
 
「不過！」嘉琪用一個勁唔知點講既眼神望住我。「你唔怕俾紫鈴知咩？有個女仔同居喎~~~！」
 
「er……」我當堂窒左一窒。「之但係你唔係話過，叫我去認識下出面個世界架咩！」
 
「拿！唔好賴落我到呀！」嘉琪即刻反駁。「係你想店主黎架咋，唔係我！」
 
「okayokay！」我講。「咁……即係議案通過？」
 
「係就食快d啦，食完出發！」嘉琪勁快咁食起野上黎。「仲唔快d wtsapp店主！？容不易俾人捷足先登架！你都識講啦，店主咁靚女！」
 
「知道！」我回應著嘉琪，然後攞出手機。
 
我 : hello！還在中環碼頭？
 
流星少女 : 係呀！唔通……你肯買？！
       
我 : 係呀，我同細妹過緊黎！
 
流星少女 : okay！
 
望住呢幾個對話，我不禁係到諗 :
 
呢個……究竟係咪動漫劇情黎？
 
***
 
當我經歷完因為食野食太快而差d啃死既生死關頭之後，我同嘉琪終於出發前往中環碼頭。
 
「哥，」係搭緊地鐵個陣嘉琪用一臉奸險既樣問我。「老老實實，係咪對店主有意思？」
 
嘩屌！咁直接！
 
「er……」一時之間我真係答唔出！
 
「哈哈！」嘉琪見到我呢個反應都知咩料。「得啦，以後我識做架喇！」
 
「拿，咪亂咁講野呀！」我裝作恐嚇嘉琪道。
 
「得啦得啦！」嘉琪一路講就一路笑。「我個A0哥哥要談戀愛喇~~~<3！」
 
「……」
 
就係咁，我地到左碼頭了！
 
「係邊呢？」我開始進行四周視線搜索少女既蹤影。
 
「你傻架咩，佢係長洲黎架麻，咁就梗係係5號碼頭附近啦！」嘉琪一言驚醒洛克人。「去個邊搵下啦！」
 
於是乎我地就行左過去，然後就見到一個容貌標緻，穿著黃色T-shirt黑色短裙，非常吸引途人眼光既少女坐左係個行李箱上面，漫無目的咁望住個天。
 
無錯喇，係佢喇，流星少女！
 
從遠距離望住少女，我個心就已經開始不自覺咁亂跳起上黎。
 
呢種個感覺我唔識形容，但就令我諗起陳奕迅《天下無雙》既一句歌詞 :
 
「億個背影但和你碰上」！
 
「哥！」嘉琪將我從發呆中喚醒。「我好頸渴去買野飲先，你自己執生喇！」
 
唔係掛，呢個時候先至黎玩d咁既野？！
 
「下？！」係我都仲未反應得切既時候，嘉琪就已經行開左。
 
嘉琪行開左兩步之後回頭望住我做口形咁講 : 「加~~~油~~~！」
 
……馬嘉琪你個死妹釘！
       
唉算，屌奶媽頂硬上！
 
我望住前方既流星少女，深吸一口氣，然後踏出一步。
 
老實講啊，依家諗番起，我都唔知點解當時既自己會咁有勇氣，哈哈。
 
三步……兩步……一步……嗚哇！！！
 
我終於行到去流星少女既身邊，之但係佢淨係掛住抬頭望住個天，根本就發現唔到我。
 
突然一陣風從迎面吹過，令到少女既髮香味定唔知係體香味飄進我既鼻子裡！
 
呢陣味……點講好呢……
 
感覺上就好似係白蘭花既味道。
 
好清新，好幽香，好吸引。
 
「好啦！」我鼓起勇氣，然後向少女說道 : 「hello……？」
 
少女聽到之後，立即轉過頭黎望住我！
 
依家再一次咁近距離望住佢，先發現原來佢眼睫毛都幾長，而且皮膚超好！
 
「hello！多謝你肯黎啊！」少女激動既心情已經寫晒係塊臉上面。「你又話同你阿妹黎既？」
 
我唔好意思咁講 : 「er……事關佢岩先話有d頸渴，所以就行開左去買野飲，哈哈……」
 
「係呢！」我決定首先解開自己心中既疑問。「乜你唔係住長洲架咩，做咩無啦啦會無家可歸既？」
 
「哦……」少女聽完之後臉上先是一沉，但剎那間又轉換番上一個笑容。「成件事就係咁既，」
 
「由於我同家人有d協議既關係，所以我係呢兩個月都唔會再番屋企。」
 
「本來我諗住出黎去個朋友到住既，所以就搭船出左黎市區諗住去搵佢啦，點知……」少女越講把聲就越細聲。「唉唔講佢喇，總之就令我失望啦！」
 
「然之後結果依家咪搞到我無屋企番，惟有滯留係碼頭呢到囉……」少女嘆左一口氣。
 
「我所有儲蓄加埋只有千幾蚊，如果要租屋就一定唔夠捱兩個月，所以逼於無奈之下......」就係呢個時候少女突然望左過黎，然後與我雙眼交接著！
 
「所以逼於無奈之下我咪惟有開POST求助養囉，哈哈！」少女笑說。「但我又怕會遇到D壞人，於是乎就決定搵d面交過既人！咁起碼都叫做見過下佢地個樣，知道佢地係咩料，有D保證！」
 
「哦......」我消化緊少女既說話。「咁即係一句講晒，就係你無地方住，所以想搵個信得過既人借地方訓？」
 
「就係咁喇！」少女好似搵到同道中人咁，雙眼忽然發晒光。「其實之前同你傾計個陣，我都已經覺得你係好人黎架喇！所以我信得過你！」
 
流星少女......究竟妳其實係咪真係來自星星架？！地球好危險架，唔屬於妳架！！！
 
利申 : 拐子佬
 
「其實你唔覺得咁容易相信人係一件唔好既事黎架咩？」我忍唔住問。「你會好容易俾人呃、俾人傷害、攞你著數等等，最後受害既都係你自己架咋！」
 
出乎意料之外，少女聽完之後竟然無反駁我話咩「好人有好報」諸如此既說話。
 
佢只係淡淡咁對住我笑左笑，然後徐徐道出 :
 
「我覺得，如果做人凡事都要互相猜忌既話，真係好可悲。  與其日日都要搞到自己咁難堪既話，倒不如就痛痛快快咁經歷自己既快樂時代仲好啦！」
 
我的快樂時代？咪即係佢IG個post囉！
 
「乜你好中意陳奕迅架咩？」我好奇咁反問。「見你之前ig個post都有呢首歌！」
 
「我簡直係佢忠實fans添啦！」少女講。
 
「我都係喎！」呢個我真心架，唔係吹水！
 
「真係架？！」少女聽完之後勁興奮。「咁就好喇，終於可以有人陪我聽歌！」
 
終於？
 
「哈哈，好！」我笑說。
 
「既然係咁，好啦！我地之間既協議成交！」少女望住我笑了一笑。「多謝你惠顧Meteorlass，買左我呢個流星少女！」
 
「小姐，呢D係叫做『收留』而唔係『買』囉好無！」我裝作沒好氣咁講，但內心卻有一種異常既跳動。
 
「又係喎可？Hehe……」少女伸一伸脷。「既然係咁，多謝你同你細妹肯收留我！」
 
「當識個朋友姐！」我客氣咁講。
 
呢個時候少女伸左隻手出黎，但又停左停諗左諗，然後就問我 : 「係呢，其實講左咁耐我都未知你叫咩名添。」
 
「我？」我笑了一笑。「我叫馬家樹。」
 
「哈哈，你個名又幾好聽喎！」少女都唔知係玩野呀定係真心咁講。
 
「你好呀家樹！」少女再次伸左隻手出黎，並且與我對望著，莞爾一笑。
 
「我叫劉星瑤，你叫我做星瑤就得架喇，多多指教！」
 
嗚哇，個名好好聽呀！！！
 
於是乎我立即伸出手，與星瑤打招呼。
 
「嗯！咁以後就多多指教喇，」我既嘴角不自覺咁上揚起黎。「星瑤！」
 
「哥！」就係呢個時候，嘉琪唔遲唔早咁走左過黎，完美咁破壞左呢個「戀愛磁場」(誤)。
 
「拿！」嘉琪向我遞上一枝水之後就一直望住星瑤。
 
「嘩，ig幅相都已經夠靚架啦，真人仲要靚多十倍！」嘉琪上下打量著星瑤。「呢個質素，絕對夠資格做我大嫂……」
 
「嘩阿妹你講咁耐都口乾架喇！」我立即堵截嘉琪既說話。「快d飲水啦！」
 
「你地兩兄妹d相處方式好正！」星瑤笑說。「真係好羨慕啊~~~！」
 
「佢就覺得正，我就俾佢蝦到上心口！」我裝作不滿咁講。
 
「有個咁可愛既呀妹係你既福份啦！」星瑤先係望住我講，然後就望向嘉琪。「你話係咪先？」
 
「哇！店主你唔單只靚女，仲要好friendly，我中意！」嘉琪勁得戚咁講。「我買多左枝水俾你呀，拿！」
 
「多謝！」星瑤接過水後就向嘉琪打招呼。「我叫劉星瑤呀，你以後叫我星瑤就得架喇！」
 
「我叫馬嘉琪呀，咁你以後就叫我嘉琪啦！」嘉琪回應道。
 
望住呢兩個靚到dum一聲既靚女，再諗下佢地將要同我一齊住，正常人應該係會出晒水打晒飛機。
 
之但係我依家就已經感受到一種不安既感覺！
 
睇黎，黎緊呢兩個月既生活將會好難捱……事關呢兩個女仔將會企埋同一陣線蝦我！
 
「er……不如我地一路番屋企一路傾？事關都夜喇！」我提議。
 
「好呀！」星瑤聽到「番屋企」呢三個字既時候簡直係開心過中六合彩。
 
「哥，幫星瑤攞行李啦！」嘉琪早就已經撓住左星瑤隻手向前行！
 
Wtf……
 
究竟係女人既熟絡速度快d呀，定抑或係光粒子前進既速度快d呢？
 
我猜唔透。
 
如是者我，嘉琪，星瑤三個人就開始歸家了。
 
番屋企既路上嘉琪一直都同星瑤行係我前面傾計，而我就好開心咁有行李箱陪伴在旁。
 
之後嘉琪就好有耐心咁將我地屋企既情況解釋晒俾星瑤聽，就比如話係我地父母出左trip短時間內唔會番，又或者係呢兩個月星瑤會同嘉琪一間房等等。
 
由觀塘地鐵站落車之後，我地就去左小巴站到等車。
 
「觀塘呢邊老實講我真係無黎過！」星瑤到處張望。
 
「梗係啦你住長洲咁遠，黎呢邊真係貪車錢貴咩！」嘉琪說道。
 
「其實唔單只觀塘，有好多地方我都未去過，」星瑤說。「事關我媽管得我好嚴架，平時除左星期六之外，其餘時間都唔俾我離開長洲。」
 
「所以，」星瑤微微笑左一下。「我今次同屋企人既協議，就係俾我出去見識下呢個世界！」
 
「咁你放心都得喇！」嘉琪既臉上呈現出一種狡猾既表情。
 
屌，你想點！
 
嘉琪望一望我，然後再同星瑤講 : 「事關我呀哥日日都會陪住你一齊到處走，見識下呢個世界！」
 
「真係架家樹？！」呢個時候星瑤望左過黎，用一臉期待既樣子與我對視著。
 
……得！我輸！
 
「梗係啦！」我做出一個「nice」既手勢。「放心交俾我！」
 
「無錯喇！」嘉琪即刻加把口對住星瑤講。「放心交出自己俾我呀哥啦！」
 
妖！玩野呀死妹釘！萬一嚇親星瑤點搞！
 
「好呀好呀！」星瑤成個小朋友咁，份外可愛。「咁我以後就拜託你喇！」
 
……
 
呢句野咁似d人求婚之後女方既答覆咁既！！！
 
「咕~~~！」聲音突然從星瑤身上傳出。
 
「hehe……」星瑤非常唔好意思咁講。「我其實未食晚飯……」
 
到我攞分既時候喇！
 
「得！我番去煮俾你食……」
 
「星瑤，不如我同你去買外賣好無？」嘉琪打斷我既說話。
 
「okay！」星瑤說。
 
……死人馬嘉琪！
 
就係咁，我就排住係小巴站到等佢地買完外賣番黎，然後就一齊搭車上去。
 
番到歸之後，嘉琪就帶星瑤參觀屋企，而我就幫星瑤執拾好張床同d地方，同埋幫佢準備埋d日用品，等佢可以住得舒服d。
 
搞掂晒d野之後，星瑤先開始食佢個外賣。
 
「點講好呢……」星瑤坐係餐枱到食緊外賣既時候忽然係到講。「其實我真係覺得自己好好彩，因為世界咁大居然都可以比我遇到你地呢對咁好人既兄妹。」
 
「傻啦，舉手之勞姐！」我講。「況且其實係嘉琪話你有恩於佢，所以就想收留你當係報答番你！」
 
當我講完之後，嘉琪立即轉過黎望住我，係想殺死我既眼神之中就好似同緊我講 : 頂你咩馬家樹，你係咪姓賴架！明明呢個係你既意思！
 
哈哈，我咩都唔知架，哈哈哈~~~！
 
「希望我地黎緊可以好好咁相處啦！」星瑤笑得非常甜蜜咁講。
 
嗚哇！真係好正呀！！！
 
「嗯！」我回應道。「一定可以！」
 
***
 
星瑤食完野之後就同嘉琪一齊番左房執野，而我就入番自己間房到hea。
 
當我訓左係張床到諗緊星瑤住左入黎呢件事既時候，忽然有人敲門。
 
「入黎啦！」我講。
 
「咔嚓！」門一打開，原來係星瑤！
 
一諗曹操，曹操就到！
 
「哇！」我立即彈番起身，就好似做左虧心事咁。「做咩？」
 
「無呀，我想問下你用唔用廁所，因為我準備沖涼！」星瑤笑笑口咁講。
 
呀！！！！！！ (下刪千萬個感嘆號)
 
點解我會完全醒唔起呢一回事！
 
星瑤佢住係到既話，就會沖涼，就會訓覺，就會著睡衣……嘻嘻嘻哈哈哈嗚哇！
 
唔得！唔可以咁架，我係正人君子黎！
 
「咳咳！」我試圖隱藏自己心裡面既興奮。「我唔用喇，你用啦！」
 
「嗯！」星瑤講完之後，仍然企左係門口。
 
「仲有事？」我好奇咁問。
 
「嗯，」星瑤吸左一大啖氣，然後鼓起勇氣望住我！
 
唔通……佢係想表白？哈哈哈！
 
「我想同你講，」星瑤好溫柔咁講，搞到我勁緊張！「我想同你講，」
 
「未沖涼就訓上床到好污糟架，不如落番黎！」
 
「……」
 
哈哈，一切都係毒男既幻想……
 
果然，那些表白的機會不屬於我……
 
於是乎我就出番客廳個sofa到坐低，等星瑤沖完涼之後到我用。
 
「哥，」當星瑤入左廁所一陣之後嘉琪即刻坐埋黎。「想唔想要情報？」
 
「請匯報！」我裝作boss咁講。
 
「那就請給線人費<3」
 
「……」我從銀包攞出100蚊。「呢到係一個星期既線人費！」
 
「多謝馬家樹！」嘉琪講。「我代『嘉琪bb入大學基金』個邊多謝施主你既慷慨解囊！」
 
「咁請問你肯講情報未呢？」我沒好氣咁講。
 
「er……暫時未有，哈哈！」嘉琪回答。「今晚開始幫你收集！」
 
「okay！deal！」
 
過左一陣，星瑤終於出黎喇！
 
「我用完喇，到你！」星瑤徐徐從走廊行出黎。
 
眼前既星瑤，頭髮濕濕，渾身都散發住比剛才更濃烈既白蘭花香！
 
佢上身著住一件白色T，隱約可以見到裡面有件底衫，而且仲望落都有番咁上下身材！
 
而佢下身則著住一條短褲，完美咁突顯左佢對白滑既美腿出黎！
 
「哦……好！」我廢事好似個咸濕佬咁眼定定望住星瑤，於是乎就只好打側少少個頭避免直視。
 
今次仆街了，要我日日都對住咁大誘惑，我真係怕自己會守唔住呀！
 
下？你想話我明明有個妹，所以應該睇慣左呢D野至係？
 
傻啦，對呀妹邊會有呢D感覺先得架！就算睇唔睇得慣都唔會FEEL啦，你估真係好似d AV情節咁咩！
 
「星瑤，我房有風筒啊，不如入黎吹，然後訓覺？」嘉琪提議。
 
「嗯！好呀唔該晒！」星瑤回應。「既然係咁，晚安喇家樹！」
 
「晚安！」我唔敢叫星瑤個名，事關感覺上會俾人覺得「賴係close」咁。
 
「咔嚓！」阿妹道門給關上了。
 
沖完涼之後，我就番左入房訓。
 
望住個天花板，我回想起今日既一切。
 
「真係好唔真實啊，」我舉起右手係空中揮動。「究竟……」
 
「我係咪發緊夢呢？」
 
 
 
 
 
『回想起這段回憶，的確就像發了一個很長的夢。』
『一個，名叫青春的夢。』