【我在IG Shop買了一個流星少女】: 第二章(上)

第二章
 
        「起身喇，」係睡夢之中，我隱約聽到星瑤既聲音。
 
        「嗯......？」我徐徐睜開雙眼。「哎！？」
 
        當我打側一望，就發現星瑤佢坐左係我既床邊！
 
        「起身喇？」星瑤望住我，莞爾一笑。
 


        嗚哇！真係一個完美既朝早！
 
        ......
 
        「啪！」突然一個清脆既拍打聲從門口個邊發出！
 
        「嘩！」我嚇到立即瞪大雙眼，然後就發現係阿妹企左係門口。
 
        「仲唔快D起身！」嘉琪沒耐煩咁講。
 


        「乜原來頭先發夢咋......」我R住個頭講。
 
        咦！唔係喎！會唔會其實連琴晚既事都係發夢！
 
        「嘉琪！」我勁驚咁問。「星瑤呢？」
 
        就係呢個時候，有一個身影從嘉琪背後彈出黎！
 
        「早晨啊，」星瑤哄前左個身埋黎，然後打側左少少個頭咁講。「家樹<3(誤)」
 


        「er......」我從上而下咁望左星瑤一次。「你係真架可？唔係我發夢整出黎架可？」
 
        「妖！」嘉琪突然一腳踩落黎我腳面到。
 
        「嘩，好痛！」我痛到捉住隻腳係到彈下彈下。「做乜q踩我！」
 
        「痛就唔係發夢啦！」嘉琪沒好氣咁講，然後就望番住星瑤講 : 「我哥佢成日都係咁架，一見到靚女就係變到勁驚青！」
 
        謝天謝地！好彩唔係發夢！！
 
        「我先唔係成日都係咁！」我望一望佢地兩個，就發現兩個都已經梳洗好換晒衫。「咦，你地兩個準備去邊？」
 
        「唔係我地兩個準備去邊，」嘉琪奸笑住咁講。「而係你諗住帶星瑤佢去邊！」
 
        「下？」我不解咁問。


 
        「事關呢我就已經約左男朋友去街，所以今日全日都係得番你地兩個係屋企。但星瑤又唔熟呢邊，所以點都要有人帶佢行下既，如果咪呢兩個月叫佢點生存！」
 
        嘉琪繼續講 : 「所以，靠晒你喇哥！」
 
        「哦......」我點頭是道。「okay啊，咁等我換個靚衫先！」
 
        「咁我出門口喇！」嘉琪拍一拍我膊頭，然後係我耳邊細細聲咁講 : 「好好照顧人呀~~~<3！」
 
        呢個妹真係呢......成日潤呀哥都有既！
 
        「你係就快d走啦！」我推一推開嘉琪。
 
        「咁好啦，我走先喇，拜拜哥，拜拜星瑤！」說罷嘉琪就出左門口，得番我同星瑤。
 


        死火！依家咁樣咪即係「孤男寡女，共處一室」！？
 
        一諗到呢到，我既心就即立急速咁跳動起上黎。
 
        「喂！」星瑤係我視線前面揮動隻手。
 
        「嗯？」我嚇一嚇咁講。
 
        「你唔係換衫咩？我好肚餓啊，快d換完落去食野！」星瑤笑住咁講。
 
        老老實實，依家呢個情況，係咪就係d人所講既「同居生活」？
 
        如果係咁既話，我真係想成世都同星瑤同居呀！
 
        如果可以有一個咁靚，咁溫柔，咁可愛既女朋友，真係三世修黎既福氣！


 
        天外之音 : 妖，十畫都未有一撇，人地星瑤只不過係黎住一陣架咋，唔好咁多FF啦馬先生！
 
        我 : 屌，你呢d拖都未拍過既天外之音，識條鐵咩！
 
        天外之音 : 乜你拍過咩？下下下？
 
        我 : ......ok，fine。
 
        「好！等我五分鐘！」我一路講，一路飛奔入去廁所梳洗。
 
        搞掂晒裝身之後，我就同星瑤一齊落樓，去觀塘市中心行下。
 
        由於我係一個唔多交際既人，仲要係A0，所以當初我真係好怕會同星瑤無野講，搞到印象分崩潰。
 


        不過好好彩既就係，星瑤佢原來係一個好善談既人，同佢做朋友既話真係唔怕會無野講！
 
        興趣啦，平日既活動啦，生活碎事啦，咩都可以講一餐！
 
        我諗佢可以咁善談既原因，大概就係因為佢好相信別人，唔會對人有戒心，願意將自己既野同晒別人分享。
 
        ***
 
        我地既第一站就係先去樓下一間茶餐廳到食野。
 
        「你食咩？」我問星瑤。
 
        「火腿通粉配多士！」星瑤以九秒九既速度回應我。「事關我平時係長洲呢日日都必定係食呢個早餐！」
 
        「okay！」於是乎我自己就叫左個沙嗲牛肉麵。
 
        係等緊野食既時候，我決定把握時間了解多d劉星瑤呢個女仔。
 
        「係呢，其實住係長洲既生活係點架？」我好奇咁問。
 
        「哈哈，咪又係番學放學食飯訓覺！」星瑤聽完之後笑一笑。「加上我係讀長洲官中既，所以平日真係唔會點出市區，所有消遣基本上都只會留番晒係個島上面！」
 
        「咁咪好悶囉？」
 
        「都係架，」星瑤有d嘆息咁講。「不過無辦法啦，因為我父母由細到大都管得我好嚴，所以基本上我都無得點出街既。」
 
        「所以你平時交收都只可以係長洲碼頭就係咁解？」我試著去理解星瑤既苦況。
 
        「係呀！」星瑤講。「而且好慘架，就連出去交收都唔可以搞咁耐，要盡快番歸！」
 
        聽到呢到，我終於明白點解上次交收個陣星瑤會咁匆忙。
 
        「咁星期六呢？」我忽然記起。「點解星期六又可以出去市區既？」
 
        星瑤聽到之後當堂窒左一窒，然後把口又張又合咁。
 
        「er......因為呢......」星瑤吞吞吐吐咁講。
 
        「靚仔靚女你地既早餐！」就係呢個時候，樓面既姨姨走左過黎放低d食物。
 
        「哇！」星瑤望住d野食，雙眼即刻發晒光！「好似好好味咁！」
 
        「梗係啦，呢到我同嘉琪成日黎架，信心保證！」我自豪咁講。
 
        「咁就唔好等喇，快d食野啦！」星瑤都未講完，就已經攞起匙羹食起上黎。
 
        望住星瑤食野個樣，真係好可愛！
 
        感覺我同星瑤就好似已經拍緊拖咁，哈哈哈！
 
        星瑤食食下feel到我望住佢，於是乎就抬起頭黎望番我，然後講 : 「做乜望住我食野！」
 
        「因為......」我笑了一笑。
 
        「因為好吸引囉！......」
 
 
 
 
 
        「你碟通粉。」
 
 ***
 
        食完野之後，我就帶星瑤周圍行街。
 
        不過我諗，住係觀塘或者熟觀塘既讀者們其實都應該好清楚------
 
        觀塘，真係無咩好行！
 
        所以有見及此，係星瑤大概記得晒觀塘D路之後，我就決定帶佢去其他地方！
 
        呢個地方，就係觀塘友經常去既------九龍灣(淘大、德福、megabox)！
 
        老實講呀，其實我住左係到咁耐，呢d地方我一早都已經行到悶晒。
 
        但除非......
 
        「個條鍊好靚！」星瑤指住櫥窗裡面一條星星鍊講。「不過都唔夠我整個d咁特別，哈哈！」
 
        嗯，無錯。
 
        呢d地方雖然我一早都已經行到悶晒。
 
        但除非，有星瑤陪伴在身邊。
 
        望住星瑤既側臉，我心中既係佩服，但又猜不透呢個女仔。
 
        明明只係同我見過一次面，但佢就已經願意相信我，上黎我屋企住。
 
        明明只係相處左半日，但佢就已經可以同我互相開玩笑。
 
        明明彼此認識唔多，但佢就已經可以同我互相稱呼彼此既名字。
 
        究竟星瑤佢係隨便啊，定抑或係隨心呢？
 
        究竟係話星瑤佢容易俾人呃啊，定抑或係話佢願意信任別人呢？
 
        呢個女仔，我依家真係睇唔透。
 
        不過正正就係因為佢有呢種神秘感，所以先令我更加有衝動想深入認識佢！
 
        「星瑤，」我笑一笑。「不如去megabox行下？」
 
        「嗯！」星瑤點左一下頭。
 
***
 
        去到megabox個陣，星瑤話有d肚餓，於是乎我就帶左佢去ikea到食野。
 
        好啦，係到賣下廣告先！
 
ikea係沙田同九龍灣分店到均設有一間瑞典餐廳 (唔係銅鑼灣個種熱狗小食店)，咁裡面就有好多唔同既野食，而且仲要好平！
       
        「嘩，乜原來ikea有意粉食架？」星瑤望住個menu勁驚訝咁講。
 
        「你真係好有個種『大鄉里出城』既feel囉小姐，哈哈！」我取笑星瑤道。
 
        星瑤聽完之後居然紅都臉晒，勁不甘咁講 : 「咩……咩喎！哼！」
 
        哈哈，真係好可愛！
 
        食完之後我地就係商場裡面漫無目的咁周圍行，然後就到左溜冰場。
 
        「好似好難玩咁！」星瑤目不轉睛咁望住冰場裡面既人。
 
        「乜你唔識溜架咩？」我問。
 
        「其實我唔單只係唔識，仲要係未溜過！」從星瑤抱怨既聲音中可以聽得出，佢平日既生活真係幾苦悶下。
 
        咁又係既，住係長洲不特只，仲要有一對管得咁嚴既父母，唔俾佢出街，真係想唔悶到發毛都幾難啦！
 
        如果可以做番d野令到星瑤佢呢兩個月過開心d咁就好喇！
 
        ……咦！我諗到喇！
 
        「星瑤，」我從後推著星瑤往前行。「我地行喇！」
 
        「哎？！」星瑤十萬個不解。
 
        「我地去溜冰！」       
 
        ***
 
        不一會兒，星瑤手中已緊握住一對溜冰鞋。
 
「真係要入去？」星瑤既興奮又惶恐咁望住我講。「我完全唔識架喎！我怕會跌親！」
 
「傻既，」我拍一拍自己心口。「你跌既話有我接實你！」
 
其實，我溜冰都只係得半桶水架咋，哈哈！
 
不過只要令星瑤開心到既話，就算跌死我都在所不惜！
 
「咁……」星瑤望住我，點一點頭。「但你記得要接住我！」
 
「得！我發誓！」
 
就係咁，星瑤俾左佢既第一次我。(誤)
 
我企左係星瑤後面，陪佢一齊踏上冰面。
 
一上左冰面，星瑤就立即緊緊咁捉住側邊既欄杆，既唔肯放手又唔肯行，就好似塊冰面會食左佢咁。
 
「唔得呀，好驚呀！」星瑤呢個時候變到成個小朋友咁係到叫生叫死，仲要半跪咁蹲左係冰面上，甚是可愛。
 
「哈哈！」我走左去星瑤前面，然後親身示範腳既步法俾佢睇。「學我咁慢慢行啦！你可以架！」
 
「唔得啊，好跣！」星瑤完全唔敢郁。「不如走啦，我唔玩喇！」
 
我見到呢個情況，就諗番起自己初初做戲個時都係咁。
 
*************************************************************
 
「唔得架，係咁多人面前我表演唔到！」我係後台淆到乜咁同阿溢講。「不如都係走啦！」
 
阿溢聽完之後用手勁大力咁拍左落我膊頭上面，然後非常認真咁講 :「我地排練左咁耐，俾左咁多心機落去，依家先話黎走？」
 
                「但係我真係好驚……」我不安咁講。「我好怕出醜……」
 
                「傻既，出下醜又有乜所謂？」阿溢望住我笑左一笑。「我會係到陪住你！有醜就一齊出！」
 
                個陣，大概係我第一次以為自己係gay既時候。
 
                事關阿溢真係好撚型，好撚charm。
 
                「嗯！」我點一點頭。「我地出場啦！」
 
*********************************************************************
 
「唔得啊，好跣！」星瑤完全唔敢郁。「不如走啦！」
 
        「你鼓起左咁大勇氣先踩到上呢個冰面，唔通咁快就要俾佢打低咩？」我與星瑤對望著，非常認真咁講。
 
        「但係……」星瑤不安咁講。
 
        「傻既，跌下傷下又有咩所謂？」我望住星瑤笑了一笑。「我會係到陪住你！要跌傷就一齊跌！」
 
星瑤聽完之後先是驚訝，後是微笑。
 
        「嗯！」星瑤點一點頭，然後用盡九牛二虎之力企番係身。
 
        就係咁，星瑤終於願意嘗試行出第一步。
 
        「左一下，右一下……就係咁喇！」
        「隻腳係向外推，唔係向前向後推！」
        「你咁樣好容易跌親架……喂喂喂少心呀！」
       
        係我既教導之下，星瑤雖然未算溜得純熟，但總算叫溜到一兩下。
 
        中途星瑤有幾次差d跌落地下，好彩我都即刻扶住左。
 
        之但係個幾下同星瑤有咁近距離既身體接觸，真係搞到我個心亂咁跳囉！
 
        「你依家都識晒d基本動作，可以試下離開個欄杆喇！」我提議。
 
        「下？！」星瑤聽到之後簡直係驚過見到小強。
 
        Er……又或者見到小強會驚d，哈哈。
 
        「我唔得架！」星瑤補充。
 
        「岩先你夠話行唔到啦，結果咪又得左！」我鼓勵道。「得與唔得，其實只係取決於自己既信心同態度！」
 
        呢個時候星瑤雙眼忽然閃爍了一下，就好似明白左一d野咁。
 
        接下來發生既事更加令我震驚，就係星瑤竟然離開左個欄杆！
 
        「係咁喇！」我試著引導星瑤。「一步左，一步右！」
 
        「一步左，一步右……」星瑤唸著我既口訣，一步一步咁行左出黎！
 
        三……二……一……！星瑤終於行到黎我面前！
 
        「星瑤……你得左喇！」我勁開心咁講。「恭喜晒！！！」
 
        星瑤先係愣左一愣，望一望自己背後，再望番住我。
 
「我得左……？」星瑤開心到捉住我雙手。「我得左喇！！！」
 
嗚哇！媽呀我都得左喇！！！
 
或者星瑤係見到我個樣勁緊張，所以就明白自己個動作過左火，於是乎就即刻縮開雙手。
 
「太興奮添，哈哈！」星瑤完全無尷尬。「sorry！」
 
「唔洗sorry既，哈哈……」我R住個頭講。
 
興奮就岩架喇，以後要興奮多D！！！
 
無錯喇！就等我陪星瑤做多d佢未做過既野，去多d佢未去過既地方，咁就可以令佢開心d，興奮d！
 
溜完冰之後，我地就因為太攰既關係決定番歸抖抖。
 
「番黎喇？」一番到屋企就已經見到嘉琪。「我煮好晒飯架喇！」
 
「真係架？嘉琪你好勁呀，又靚女又識煮野食！」星瑤聽到之後勁開心咁衝入廚房。「等我幫你手開枱啦！」
 
妖！雖然我知道自己唔靚仔……
 
但我煮野食超勁囉好無！嘉琪都係我教出黎架咋！
 
「哥，你唔係要星瑤自己一個人開飯下話？」嘉琪走左埋黎講。「今日你地既感情進展好嗎？」
 
「er……都唔知係好定唔好喇，哈哈……」我諗起星瑤縮開手個一下。「遲下再傾，我幫手開飯！」
 
「妖！係到賣關子！」嘉琪一路講，一路陪我入廚房一齊攞碗筷。
 
搞掂好晒之後，嘉琪就同星瑤一齊坐，而我就坐星瑤對面咁樣一齊食飯。
 
「嘩，嘉琪你煮野食真係好掂！」星瑤讚賞道。
 
「普通啦，都係我哥煮野食好味d！」嘉琪望住我笑一笑。
 
啊你個死妹釘，又幾識做架喎！
 
「真係架？」星瑤勁好奇咁望住我。「咁第時真係要試一試你手勢喇！」
 
「放心，一定有機會！」我笑住咁回應。
 
「嗯！」星瑤莞爾一笑。
 
望住眼前此情此景，我心裡面衷心咁許願 :
 
但願呢個咁美好既時光，能夠一直延續下去。
 
***
 
        食完飯hea左陣之後星瑤就去左沖涼，而我同嘉琪就坐左係sofa到一齊睇明珠周末大電影「哈利波特」。 

「嘉琪！」我忽然諗起嘉琪做緊我線人。「琴晚有無幫我收下料先？」 

「嘩！好少見阿哥你咁落力去追一個女仔喎！」嘉琪挖苦我道。「睇黎你今次認真架喎！」 

「痴線，我一向就無玩過！」我反駁。「有料就快講！」 

「拿，事關琴晚佢好早訓，所以我地淨係傾左一陣lady talk！」嘉琪準備將d料講俾我知。「以我所知，事關星瑤佢屋企管得佢好嚴，除左一放學就要番屋企，就連同朋友出街都唔俾去！所以佢完全識唔到交心既朋友，最起碼暫時到依家都未有。」 

「但當然啦星瑤佢咁nice又靚女，咁就梗係有人同會佢做朋友啦，不過只會係d酒肉朋友，又或者係想追求佢既人囉！」 

終於講到重點！ 

「咁即係星瑤佢依家有無男朋友？」我勁緊張咁問。 

「妖，你冷靜d聽埋我講先啦！」嘉琪沒耐煩咁講。 

「哦......」於是乎我將嘴巴合實。 

「於是乎我個陣就問星瑤佢有無拍緊拖或者拍過拖啦，點知佢竟然俾左一個難以理解既表情我。」嘉琪嘆左一口氣。「然之後星瑤就同我講話......『我無拍過拖啊，但都唔會去拍拖。』」 

咩......咩話？？！ 

係聽到呢句說話既呢一刻，我腦海一片空白。 

「下？！」我不解咁講。「點解呀，你有無問佢點解唔拍拖！」 

「我梗係有啦！」嘉琪講。「之不過星瑤佢既回應就真係再次嚇到我。」 

「佢講左d咩黎？」我急切咁問。 

「嗯......」嘉琪細細聲咁講。「星瑤聽完之後先係笑一笑，然後就好認真咁同我講，」 

「因為初初say yes好容易，但最後say goodbye就好難。」
 
        「......哎？」我簡直係一頭霧水。「乜咁玄既？」
 
        「我諗簡單黎講，就係星瑤佢怕開始左一段感情之後最終要結束。」嘉琪嘗試解釋俾我聽。
 
        「但未試過又點知會結束呢？」我不解咁講。「話唔定可以一拍拖就成世呢！」
 
        「咁我又唔係星瑤，你問我我都唔識答架！」嘉琪又挖苦我。「總之我收既料就係得咁多！」
 
        「唉......」我心中吐出一個嘆氣。
 
        或者嘉琪因為見到我咁sad既關係，所以就安慰我說 : 「咁你又唔洗咁sad既，其實有好多女仔都係咁架，對愛情會有種「為何還沒有初吻便要怕失戀」既態度！」
 
        「但只要你捉得到佢地既弱點既話，佢地就會願意將成個人交晒俾你！」
 
        「所以唔洗擔心，你仲有機會架馬家樹！」嘉琪拍拍我膊頭講。
 
        哈......居然要個妹鼓勵番我轉頭......
 
        不過咁，聽嘉琪講完之後，我既信心又好似多番d！
 
        「嗯！」我chok左個帥棍樣出黎。「就等我馬家樹黎一個絕地一擊，完美咁攻陷劉星瑤啦！」
 
        「咔嚓！」就係呢個時候，廁所門突然開左，然後星瑤探左個頭出黎！
 
        「岩先係咪有人叫我？」星瑤眼仔碌碌咁問。
 
        ......有無咁勁呀，咁都聽到！
 
        「哈哈，無人叫你呀，哈哈哈......」我尷尬咁講，然後立即拉開話題。「你沖完涼喇可？咁到我沖喇！」
 
        「okay！」星瑤笑道。
 
        沖完涼出到黎，星瑤同嘉琪都已經番左房，所以我都廢事打擾佢地，惟有走番入房。
 
        講起上黎今日成日掛住同星瑤出街，都無點掂過部手機添。
 
        於是乎我就訓左落張床到玩手機。
 
        一打開個mon，就見到阿溢wtsapp我黎。
 
        溢 : 死仔，練好個一幕未呀？聽朝記得番黎排戲！
 
        弊家伙！我完全唔記得左呢件事！
 
        我立即覆番阿溢 : 得得得，聽朝死都死俾你！
 
        「唉，惟有一陣練下啦......」我嘆了一口氣。
 
        之但係我黎緊逢星期一至五都要朝早排戲架喎！咁星瑤點算？
 
        不過其實星瑤又唔係同緊我拍拖，就算我陪唔到佢佢都會自己出街架啦！
 
        嗯！咁就一於聽朝俾條後備匙星瑤，再順便同佢講埋我要排戲既事啦！
 
        覆完wtsapp之後我就打開IG睇。
 
        一打開，我就見到「Meteorlass」岩岩PO左張新相。
 
        呢張相所拍攝既畫面，就係megaboc溜冰場既冰面。
 
        不過最特別既並唔係張相，而係個caption。 
「哈哈哈……」望住呢段文字，我心裡面不斷有一股暖流湧上黎。
 
明明早幾日之前，我地只有一面之緣。
 
明明早幾日之前，我只係一個瀏覽星瑤IG既陌生人。
 
但去到今日呢？
 
我竟然進入左星瑤既生活裡面。
 
        呢種感覺好窩心，就好似我同星瑤既距離一下子拉近左好多咁。
 
        我笑了一笑，然後係星瑤既POST上留言。