【我在IG Shop買了一個流星少女】: 第三章

第三章
 
        由於星瑤已經無咩錢係身，所以我就決定動用親情牌幫下佢------就係跪求嘉琪借d獎金俾星瑤用！
 
        好彩，嘉琪都好爽快咁應承左 (只係黎緊我要做佢阿四咁解) 。
 
        因為星瑤話想隨心d，所以我地最終都係無plan日程，凡事「緣督以為經」就好，哈哈！
 
「不過有一樣野我一定要做！」星瑤望住我講。「我要黎睇你排戲！」
 


「下？！」我不解。「有咩好睇啊？」]
 
「er……你理得我！」星瑤撒嬌道。「總之我要黎呀！！！」
 
嘩，出到呢招，我都無得say no啦！
 
「唉好啦咁，」我苦笑道。「唔好怕悶就得！」
 
「yeah~~~！」星瑤舉出個v字手勢。
 


哈哈，星瑤好可愛！
 
不過……究竟星瑤既目標係咩呢？唔通係紫鈴？
 
唔係掛？！唔通星瑤係les既……？
 
Oh no！！！~~~
 
就係咁，呢個星期我、嘉琪、星瑤三個就好似糖痴豆咁，真係好隨心地周圍走周圍玩。
 


去博物館啦，睇完戲去食自助餐啦，行旺角見識mk仔啦，總之每一日都玩到成身散晒先番屋企！
 
而係呢段日子裡面，我同星瑤既相處方式都變到好特別。
 
雖然嘉琪同星瑤兩個女仔幾乎每日都會一齊撓手行街，之但係我同星瑤總係會有意無意咁並肩而行，而且有時望住對方個陣仲會不自覺咁笑出黎。
 
不過你問我係咪曖昧呢，我又覺得唔係喎！
 
事關我發覺星瑤對我只係好似好朋友咁，既唔會話有d咩曖昧說話，亦唔會話有d咩曖昧眼神，更加唔洗講既就係毫無身體接觸啦。
 
話雖如此，但當每晚係星瑤既IG日記裡面望到自己個陣 (當然仲有嘉琪)，真係有種說不出既溫暖感。
 
***
 
由於成個香港有既景點我地都基本上都行晒既關係 (當然仲有d地方無行，事關嘉琪話想留番俾我同星瑤單獨去，嘻嘻！)，所以呢個周六日我地就決定留番係屋企。


 
啊，應該係話「呢個周六日我同星瑤就決定留番係屋企」。
 <星期五晚> 
「唔好意思啊，因為我上個星期都無陪過男朋友，所以佢發晒炆陣喇！」嘉琪抱歉咁講。「所以黎緊呢個星期我決定陪佢，咁就陪唔到你喇星瑤，sorry！」
 
「唔緊要架，你之前肯陪我咁耐，我多謝你都黎唔切啦！」星瑤甜甜咁笑說。
 
「嗚，星瑤，你真係明白事理架喇！」嘉琪一路講就一路衝埋黎sofa呢邊攬住星瑤。
 
各位讀者不必驚訝，事關經過呢個星期既同房生活之後，佢地兩個已經變到勁老友。
 
「哈哈！咁你遲下就要多D陪番我喇！」星瑤說。
 
「得，無問題！」嘉琪企番直個身對星瑤做左個「yes madam」動作，然後再望向我呢邊單左一下眼。
 


喔！原來呢招係啊妹既「撮合計」！
 
Nice ball！
 
就係咁，我同星瑤既單獨相處時間就係嘉琪星期六早上出門之後開始。
 
「咁我走喇，今晚我唔知幾點番架，你地自己搞掂啦！」嘉琪講完之後就出左門口。
 
「呯！」清脆既關門聲，然後就得番我一個係廳。(事關星瑤未起身)
 
相信大家都知其實星期六日係無咩電視好睇 (應該話tvb垃撚圾)，所以我就決定番房開電腦打機。
 
屌！成個星期都無打過lol，依家終於有時間打喇！
 
我帶上耳機，準備沉醉於遊戲世界之中。


 
「歡迎來到召喚峽谷！」
 
望住呢幾隻字，我就知道自己又要去拯救個班無腦既屁孩們了！
 
「首殺！你被殺了！」
 
「……」
 
(如果未打過lol所以睇唔明既讀者請唔洗驚，因為講完架喇！)
 
就係咁，我一打就打左兩三個鐘，轉眼間已經11點幾。
 
「妖，暑假真係暑假，特別多on9小學雞！」我一邊詛咒住個班屁孩隊友，一邊專心咁繼續打機。
 


「咔嚓……」
 
        我依然專心咁打緊機。
 
        「家樹……」
 
我仍然係聽唔到有人叫我。
 
突然間，有兩隻手搭住左我膊頭，並且有個身影從我右眼眼角處冒出！
 
伴隨住呢個身影傳黎既，係一陣誘人既白蘭花香！
 
於是乎我立即90度轉過頭黎一望，赫然發現------
 
原來係星瑤企左係我身後搭住我，然後再哄左個頭埋黎望住個mon！
 
就係呢一刻，我個嘴同星瑤塊面只有唔夠兩支牙籤既距離。
 
星瑤既體味不斷湧進我既鼻子裡面，令我感到神暈癲倒。
 
我從側面望向星瑤既臉，先至發現原來佢既皮膚比我想像中更加細嫩、更加白滑。
 
唔知道係咪我望得太耐既關係，星瑤佢終於feel到我既視線，然後就望番住我！
 
係依個moment，我地嘴唇之間既距離只有唔夠十厘米。
 
星瑤既嘴唇，望落好水潤，好嬌紅。
 
我地對望左一下，然後星瑤既臉開始紅起上黎，而我都feel到自己既臉越黎越燙。
 
        ……嗚呀！！！
 
「哇！」我就好似個女人咁叫左出黎，然後成個人彈開左。
 
各位讀者無睇錯，我選擇彈開而唔係kiss。
 
你地可能會屌晒老母咁講 : on9仔！送到埋黎都唔食！人地星瑤擺明已經對你有好感啦！
 
係架！其實我都係咁諗！
 
所以依家諗番起，其實我都會成日笑自己點解當時唔夠薑咀落去！
 
「全隊滅亡！」電腦熒幕上顯示著我戰敗既信息。
 
「搞…搞…搞咩入黎唔出聲呀！」我除下耳機，驚慌失措咁對住星瑤講。
 
「咩……咩喎！」星瑤唔知點解都變到吞吞吐吐。「我一早就叫左你架，係你戴住個headset聽唔到之麻！」
 
星瑤繼續補充 : 「跟住我見你唔知玩d緊咩勁投入咁，所以咪哄個頭埋黎囉，跟住！……」
 
講到呢到，星瑤同我又唔知做乜，勁有默契咁對望左一下。
 
「……呀！！！」星瑤既臉紅得像雞蛋般大叫著。「唔理你呀，我去沖涼！」
 
說罷星瑤就瀟灑咁轉左個身行出房，得番我一個人坐左係張凳到。
 
「……」我回想起剛才既畫面。
 
屌！做乜頭先唔食住上呀馬家樹！
 
不過見到星瑤塊面紅成咁樣，其實係咪即係代表……我有機會？
 
媽呀！你個仔我好似就得米喇！！！
 
過左無幾耐，星瑤終於沖完涼出黎。
 
由於我想補償番頭先既失誤，所以我係星瑤沖緊涼既時間已經走左去煮飯。
 
「星瑤，擺定枱啦，就快有野食！」我一邊炒緊個菜心牛肉，一邊喊出客廳。
 
於是乎星瑤就揭開左廚房既掛布走左入黎。
 
「嘩，好香！」星瑤雙眼發光，流晒口水咁講。
 
我望一望星瑤個樣，哈！勁似一個等緊食大餐既小朋友咁！
 
星瑤feel到我望住佢，於是乎就望番住我。
 
「做咩望住我？」星瑤有d疑惑咁講。
 
        「無啊，」我拎番轉個頭裝作專心炒餸。「我想睇下你仲有無面紅姐！」
 
        「啊你個死人馬家樹！」星瑤被我玩弄左一道，所以不甘咁講。「信唔信我真係唔理你呀拿？」
 
        我關掉煮食爐，然後將棻心牛肉上碟。
 
        「唔好嬲啦！」我向星瑤遞上呢碟香噴噴既餸。「最多我以後煮多d好野俾你食喇，好~~~無~~~？」
 
        星瑤仿佛早就已經無視左眼前碟餸咁，只顧專注地望著我。
 
        我地對望左片刻，然後星瑤就尷尬地打側塊面。
 
        「......哼！」星瑤的視線胡亂地在廚房掃視著。「唔要呀！」
 
        無錯喇，我要趁住呢d時間，把握機會拉近同星瑤之間既距離！
 
        呼......去啦馬家樹！！！
 
        於是乎我將碟餸改為單手攞，然後舉起右手伸向星瑤，輕輕咁用食指督住佢既臉蛋。
 
        今次，係我第一次同星瑤有呢種曖昧既身體接觸！
 
        唔知佢會有咩反應呢......
 
        就係我督左落去之後，星瑤既身體先係抖擻左一下，然後非常驚訝咁轉過頭黎望住我！
 
        死喇！唔通佢唔中意？
 
        「er...er......」我立即縮開手，然後非常驚慌咁望住星瑤。
 
        星瑤一粒聲都無出，直接向我踏前左一步。
 
        唉，仆街了。
 
        星瑤佢望住我，臉上微微泛紅。
 
        「我嬲緊你都仲搞我，你都幾大膽架喎！」星瑤講。
 
        「sor......sorry！」我抱歉咁講。
 
        就係呢個時候，星瑤伸出右手來到我既臉前，然後......
 
        輕輕彈了我額頭一下。
 
        我完全反應唔切，只可以呆左咁望住星瑤。
 
        「依家咁就『打和』喇！」星瑤望住我笑左一笑。「好肚餓啊，快D開飯！」
 
        「......哎？」我仍然係一頭霧水！
 
        「唉，」星瑤沒好氣咁攞起碟餸。
 
        「死蠢！」
 
        鏡頭一轉，我同星瑤已經好開心咁食完lunch。
 
        我攞晒D碗入廚房洗好之後一出番黎，就見到星瑤成條懶蟲咁攤左係sofa到睇電視。
 
        「乜你平時係屋企都係咁架？」我笑左一笑。「食完飯就訓因住變肥豬呀！」
 
        「你就肥豬！」星瑤反駁。「我呢d叫真性情！」
 
        「好~~~好~~~」我無奈道。「咁我番房打陣機先喇，你慢慢攤！」
 
        就係我轉身準備番房個一剎那，星瑤無啦啦係sofa到彈左起身，然後二話不說就衝左入我間。
 
        「下？」我跟住佢行左番房，然後就發現佢已經坐左係我張床上面。
 
        嗚哇！星瑤坐左落我張床到呀！今晚要嗅番夠本先得！
 
        「咳咳！」我故作清喉嚨。「劉小姐，乜你唔係攤sofa架咩，依家入黎我房想做咩！」
 
        「我想？」星瑤攤左係我張床上面，雙手托頭望住我。「我想......嘻嘻！」
 
        Oh no！！！~~~
 
        「你…你……」我驚訝得面青口唇白。「唔通你想……！」
 
        「無錯！」星瑤笑左一笑。「我想……」
 
「我想睇你打機！」
 
「……下？」
 
「嗯！睇你打機！」
 
於是乎，我同星瑤依家既位置就係 我坐係電腦凳到打機，而佢就坐左係後面張床到睇我。
 
「你真係想睇？」我問道。
 
老老豆豆，我俾男仔睇住打機就試過姐，但俾女仔睇都係頭一次，所以硬係有d怪怪地咁。
 
「係呀！」星瑤好好奇咁講。「岩先見你打得咁入神，好想知你玩緊咩！」
 
「咁…...好啦。」我徐徐按下「遊戲開始」。
 
係我一路玩緊既時候，星瑤都一直係到問我問題 :
 
        「隻game點玩架？」
「嘩，d插圖好靚！」
        「點解d人係咁講粗口既？」
        「點解個畫面黑白色既？」
 
        當然啦我一一都解答晒，之但係我反而覺得咁樣好似搞到自己好毒咁。
 
        所以打完一場之後，我就決定搵過第二d野做。
 
        「我唔打喇！」我閂左隻game。
 
        「下，唔玩喇？」星瑤無預料到我會咁做。
               
        「係呀，廢事悶親你啦！」我笑左一笑。「不如搵其他野睇仲好！」
 
        「咁睇咩？」星瑤問。
 
        「唔知呀，」事關我都未諗到。「不如……你坐上黎一齊上網？」
 
        「喔！」星瑤眨一眨眼睛。「好呀！」
 
        就係咁，星瑤搵左張凳坐左係我隔離。
 
        哈哈，呢種情景就好似一對情侶唔想出街，然後一齊留係屋企頹足成日咁！
 
        「有無話睇開咩劇集咁呀？」我問星瑤。「可以上網一齊睇喎。」
 
        「無啊，我平時都無追開劇既。」星瑤答。
 
        「下，咁你平時又無街出，留係屋企做d咩？」我好奇咁講。
 
        「diy飾物囉！」星瑤笑左一笑。「仲有就係彈琴唱歌囉！」
 
        「咩話？！」我驚訝道。「乜原來你識彈琴架？做咩之前唔講！」
 
        「Hehe，事關其實都唔係d咩勁野黎，所以你地無問既我就廢事講啦！」星瑤伸一伸脷。「況且我彈得麻麻地架咋！」
 
        「幾多級？」
 
        「演奏二。」
 
        「……」
 
        經過一輪討論之後，我同星瑤一致同意上youtube睇陳奕迅演唱會。
 
        「坐定定咁邊到好睇架？」星瑤係開場無耐忽然對住我講。「梗係當正自己係live先正架麻！」
 
        「咁即係點？」我不解咁講。
 
        「哼！」星瑤奸笑左一下。「睇野啦！」
 
        講完之後，星瑤就走左去閂門熄燈落窗簾，搞到成間房伸手不見5指，只有個mon係有光！
 
        「咁都得？」我笑左出聲。
 
        「梗係得！」星瑤將段視頻較至全熒幕播放，然後勁大聲，係勁大聲咁講 : 「eason~~~<3！」
 
        望住星瑤，我呢一刻真係哭笑不得！
 
        「搞咩呀你一d都唔high既！」星瑤今次就將條片播到勁大聲，然後推開晒d凳。「快d！同我high d！」
 
        你呢個傻妹真係呢……完全猜你唔透！
 
        「咳咳！」我做左個擴音手勢，然後吸左一口氣大聲叫 :
 
        「eason~~~！」
 
        「唔得！」星瑤扮不滿咁講。「係『eason~~~<3！』」
 
        「eason~~~！」
 
        「係『eason~~~<3！』」
 
        「eason~~~！」
 
        「係eason~~~<3！」
 
        於是乎我地兩個就好似傻仔咁，係房裡面睇住個mon不停亂跳亂唱歌起上黎。
 
        跳左頭幾十分鐘之後，我同星瑤已經攰到仆街。
 
「啊，我唔得喇，中場休息！」我攰到攤左係床到。
 
「啊，我都唔得喇，借個位黎訓下！」星瑤竟然一野就訓左落我隔離！
 
由於我地跳到成日都熱晒既關係，所以星瑤佢既白蘭花體味不斷咁飄出黎！
 
家下佢仲要訓係我身邊，搞到陣味更加濃烈！
 
聞住呢陣香味，我既心跳就不由得加速起上黎。
 
呢個時候，電腦傳黎陳奕迅既歌聲。
 
我同星瑤都靜下落黎，細心聆聽呢首歌曲------
  
        當中每一句歌詞，都仿佛表達緊我現在既心情。
 
        我偷偷地打側頭望向身邊既星瑤，點知佢咁岩都望過黎。
 
        結果，我地兩個嘴唇之間既距離又再次得番不足十數厘米。
 
***
 
漆黑的房間裡，我與星瑤躺在一張單人床上對望著。
 
惟一的光源------電腦熒幕的柔弱燈光，依稀打在星瑤的臉上。
 
星瑤的臉白裡透紅，而嘴唇則微微地抖動著，顯得份外性感。
 
我地兩個嘴唇之間既距離，再次只剩下不足十數厘米。
 
        「全神貫注望真你，然而喜不喜歡我忘記問你……」陳奕迅既聲音，仍然充斥著整個房間。
 
        但對於我黎講，呢一刻好靜，好靜。
 
        事關，我的雙耳已經自動blur晒周遭既聲音。
 
剩下的，只有我同星瑤彼此既呼吸聲。
 
我地雙眼對視著，眼神就好似已經說明晒一切咁。
 
我地兩個，都對對方有好感。
 
我緩緩將頭哄前，到達一個與星瑤鼻貼鼻的境界。
 
星瑤並沒有抗拒我的舉動，只有眼仔碌碌，害羞地望著我，仿佛就等緊我再哄前一步。
 
於是乎我再次將頭向前一伸，然後------
 
然後，我與星瑤的嘴唇輕輕接上了。
 
        由細到大，除左呀媽同嘉琪之外，星瑤就係我第一個錫既女仔。
 
        接吻既一剎那，我feel到全個世界都靜止左。
 
仿佛，就好似上天想俾多d時間我，希望我能夠好好記住那個觸感咁。
 
記住那個，富有彈性，水潤，軟綿綿，甜甜的，全身觸電的感覺。
 
接吻既過程大概維持左數秒之後，我同星瑤就有共識咁分番開。
 
呢一刻我地再次對望著，但彼此都已經心如鹿撞，唔知講d咩好。
 
就係我鼓起勇氣，準備向星瑤講「我中意你」既時候，星瑤緩緩地坐左起身，然後用一種……
 
一種內疚既眼神望住我。
 
「星瑤？」我都坐直番個人，然後與她對望著。「無事啊麻？」
 
唔知道係咪我講錯野，星瑤聽完之後先係整個身抖震左一下，然後低下頭飲泣起上黎！
 
「做……做咩啊！」我立即衝埋去，然後用唔知邊到黎既勇氣攬住星瑤。「做咩無啦啦喊啊傻妹！」
 
好啦，我諗我真係講多錯多。
 
星瑤聽完之後緊緊咁擁著我，然後簡直係一發不可收拾咁崩潰地喊起上黎。
 
結果我只好做一個人肉攬枕，等待星瑤哭完。
 
陳奕迅既concert話咁快就已經播到最後幾首歌，而我亦都坐到就黎變石像。
 
終於，星瑤既聲線慢慢平伏了。
 
「星瑤，究竟發生咩事？不如同我講啦，好無？」我輕撫著星瑤既頭髮，然後溫柔咁問。「我應承過你，會陪你經歷一切架麻！」
 
星瑤雙眼通紅咁緩緩地抬起頭黎望住我，但雙手仍然係緊緊抱著我。
 
「家樹，」星瑤仿似有千言萬語想同我講，但最後又一野吞番晒落肚咁。「對唔住……但我唔講得。」
 
「點解？」我不解咁問。「唔通你唔相信我咩？」
 
「我信你呀，而且仲……」星瑤又擁得我緊一些。「如果咪我點會俾你kiss……」
 
「咁點解……」我都攬到星瑤實一實。
 
「總之唔講得……」星瑤又好似想喊咁。「唔好逼我啦，好無？」
 
見到星瑤呢個樣，我真係好心痛。
 
「嗯，我應承你，我唔會再問。」我發誓道。
 
「多謝你，家樹。」星瑤再次抬起頭黎望住我。「不過仲有一件事，我都想你應承我……」
 
「係咩？」我問。
 
「你應承左我先。」
 
「……嗯。」
 
此刻，星瑤突然將頭向前一伸。
 
結果，我地擁吻起上黎。
 
呢一個吻，比剛才既更加長久、更加緊接。
 
一會兒，星瑤緩緩將頭退後，並且推開左我。
 
「我想你應承我……」星瑤帶淚地笑左一下。
 
「家樹我想你應承我，將今日呢件事當做無發生過啦，好嗎？」
 
陳奕迅歌聲，再次從我耳邊緩緩響起。
 
 
 
 
 
『誰都只得那雙手 靠擁抱亦難任你擁有』
『要擁有必先懂失去怎接受』