【我在IG Shop買了一個流星少女】: 第四章(上)

第四章
 
        唔知道語言係咪真係有魔力架呢，
 
        星瑤講完個一句之後，就好似真係忘記晒成件事咁。
 
「我地睇埋其他演場會囉好無！」星瑤衝左過去電腦面前，然後係到揀片睇。「邊套好呢？2006年好好聽，但moving on stage又好好睇！」 

然後餘下落黎既事，其實我都唔係好記得lu。 



大概，就係我同星瑤好有共識咁一個坐床一個坐凳，靜靜咁聽住陳奕迅的歌聲。 
 
        我諗，呢個亦都應該係惟一一個，可以唔破壞雙方友誼之餘，又可以唔俾對方見到自己喊既方法吧。
 
        依我記憶，我地一聽就聽到六點幾。
 
聽完之後我就出左去煮晚飯俾星瑤食，然後呢一餐我地就係胡亂搵話題之間渡過。
 
嗯，無錯，個感覺又好似番番去以前咁。
 


有一幅牆，有一段距離，有一種……尷尬。
 
食完之後，我搵藉口有d攰番房，實質就係想避免同星瑤獨處。
 
「點解會咁架……」我暗自嘆氣。「星瑤……」
 
諗下諗下，眼前既畫面就越見朦朧，然後眼前一黑，我就訓著左。
 
「對唔住啊家樹，但我要走喇。」星瑤說出呢句之後，轉身就離我而去。
 


「唔好走呀！星瑤！」我不斷向前奔跑，但發現自己根本就沒法追及星瑤既步伐。
 
星瑤既背影隨著距離逐漸變細，最後化為一粒流星，消失於我視線之中。
 
        「唔好啊！」我大聲一叫，然後嚇到彈左起身。
 
        我環顧四周，然後望望窗外剛冒出的晨光。
 
「原來係發夢……」我揉揉眼睛，腦海中突然又浮起了昨日與星瑤一段段的畫面。
 
那個，仿似做夢般的畫面。
 
咦，咪住先！星瑤會唔會因為咁而趁我訓覺既時候走左去架！？
 
一諗到呢到，我就驚嚇得立即跳下床，走到嘉琪既房門前。


 
「拜託唔好走呀，星瑤……」我心中祈求著，然後打開房門。
 
一打開，就發現星瑤正在熟睡的訓左係下格床，而嘉琪就係上面。
 
係喎！如果星瑤真係走左既話，其實嘉琪番到黎見到都會叫醒我架啦！
 
「哈哈……過份緊張添……」我心中嘲笑著自己，然後走到星瑤床前蹲下。
 
星瑤訓得就像睡公主一樣，甜美的，溫暖的，吸引的。
 
我輕輕督一督星瑤既臉蛋，然後佢眉頭就立即皺了一皺。
 
哈哈，好可愛。
 


「星瑤啊星瑤，」我虛聲說。「無論點都好，我都唔會放棄架。」
 
「我馬家樹，一定會追到你。」
 
就在此刻，唔知道係咪我錯覺，星瑤的嘴唇好似微微彎起上黎。
 
我安靜咁回到自己既床上，然後閉上眼睛。
 
嗯，無錯。
 
劉星瑤，我一定會追到你。
 
我再次訓著之後一起番身，就已經係11點幾。
 
「咔嚓！」房門突然被打開，映入眼簾既係嘉琪。


 
「琴日我走左之後有無D咩突破性發展？」嘉琪走埋黎笑說。「琴晚我一番到黎星瑤同你都已經訓左，搞到我無得問！」
 
唉......同唔同嘉琪講好呢......
 
由於我同嘉琪向來都心連心，所以佢一野就睇得出我有異樣。
 
「嘩，睇你個樣，好似好大鑊咁喎！」嘉琪道。「你唔係色心起搞人下話？！」
 
「痴線梗係無......」我當堂窒左一窒。「er......咀同攬......算唔算搞？」
 
「？！」嘉琪驚訝既表情就好似同緊我講 : 「唔撚係掛！」
 
於是乎我就一五一十咁將所有野同晒嘉琪講。
 


「嗯......」嘉琪消化完我既說話之後道。「綜合以往所有資料，我認為星瑤對你其實都有好感，但係礙於一個重大的原因，所以唔能夠接受你既好意！」
 
「妖，我夠知啦！」我沒好氣咁講。「依家個問題係，星瑤佢有d咩苦衷呀麻！」
 
唉，最衰我應承左星瑤唔可以再問佢啦！
 
「我諗......個苦衷會唔會就係因為星瑤佢屋企管得好嚴，所以佢怕就算同左你一齊之後，最終都只會被佢父母諸多阻撓而被迫分手？」嘉琪推敲道。
 
此時，我腦海立即浮現了星瑤的一句說話。
 
「我怕初初say yes好容易，最後say goodbye好困難。」
 
無錯喇......唔通呢個就係星瑤既苦衷？
 
「應該係喇！」眼前既大霧仿佛一掃而空。「既然係咁，只要我向星瑤證明到，我係真心中意佢，唔會懼怕一切障礙就得啦！」
 
「我諗都係掛，哈哈！」嘉琪拍一拍我膊頭。「總之俾你要星瑤佢明白到你唔係玩玩下，會用心去維持呢段愛情就得啦！」
 
「嗯！」我心裡立定決心。
 
於是乎我就同嘉琪出番客廳，然後就見到星瑤坐左係sofa。
 
「早晨！」星瑤望左過黎我呢邊，然後笑道 : 「不如煮野食囉？事關我就黎餓扁喇，hehe~~~」
 
雖然星瑤表面上已經變番平時咁，之但係佢既眼神卻略帶閃縮，唔敢直視我。
 
所謂君子不強人所難，既然星瑤佢想當作琴日無事發生過既話，我都無謂處處相迫！
 
所以，我決定回歸基本步，先透過相處重新獲得星瑤既好感，然後就勇敢地向星瑤表達自己既心意！
 
「得！」我笑一笑。「蛋炒飯岩唔岩？」
 
或者星瑤無估到我會零尷尬咁溫柔地回應，所以當堂窒左一窒。
 
「唔岩食？」我叫一叫星瑤。
 
「......嗯？唔係呀！岩食！」星瑤從呆滯中醒過來。「唔該晒你啊，家樹！」
 
哈，總算係有番個唔錯既開始。
 
食完飯之後，我無聊地坐左係sofa到玩手機。
 
突然間，我靈機一觸 : 「係喎！唔知琴日星瑤係IG到po左D咩呢？」
 
於是乎我就禁左入星瑤個帳號到。
 
入到去一望，就發覺星瑤昨晚po左一張「笑哈哈emoji」既相。
 
而下面既caption就係 :
  
就係呢個時候，星瑤佢無啦啦係我左邊出現！
 
由於我掛住思考既關係，所以根本反應唔切，結果就俾星瑤望到我睇緊佢個wall！
 
「馬家樹！」星瑤睇到之後臉馬上通紅了。「做……做咩睇我個wall！」
 
「咁…..咁岩禁左入去姐，哈哈……」我口都窒埋咁講。
 
「哼！」星瑤睥左我一野。「馬家樹，正衰人！」
 
講完之後星瑤就嬲爆爆咁拎轉面走左入房。
 
「……」
 
「哈哈，抵死！」嘉琪剛才一直都係飯廳個邊食緊花生。
 
「WTF？我做錯左d咩？」我一臉無奈。
 
「所有野囉，仲要大錯特錯添！」嘉琪恥笑道。「不過你最錯既，咪就係令到星瑤佢中意左你囉！」
 
「下……」我一頭霧水。
 
好彩星瑤無幾耐就嬲完出番黎，然後我地三個就好智障咁翻煲「戇豆先生」上黎，而且一睇就係一整天。
 
就係咁，又到左星期一。
 
由於嘉琪廢事我同星瑤獨處會好尷尬，所以佢就同男友傾好左，呢個星期都會陪我地。
 
不過由於嘉琪男友發晒爛渣話點都要date一日既關係，所以呀妹就決定今日去陪左佢先。
 
而亦都即係話，今日，就得番我同星瑤兩個人相處。
 
「呀！！！」我已經企左係星瑤房門前起碼5分鐘。「究竟叫唔叫星瑤去睇我排戲好呢？」
 
你知啦，星瑤之前話過一定要黎睇架麻！
 
之但係我地兩個依家既關係又咁撲朔迷離，而且今日仲要無左嘉琪係到做協調添，我怕獨處個陣會面阻阻！
 
正當我係到猶豫緊既時候，房門突然開左！
 
星瑤一打開門就見到我企左係門口，於是乎即時嚇左一嚇。
 
「搵我有事？」星瑤望一望我，然後又縮開眼神。
 
「無啊……」我腼腆一笑。「想問下你係咪陪我去排戲姐......不過你唔想去既話都可以唔去架！」
 
屌！我又係到講緊咩！
 
「邊個話唔……想……架……」星瑤勁緊張咁講，不過就越講越細聲。
 
「嗯？你講咩話？」我問。
 
「無野喇，衰人！」星瑤又臉紅起上黎。「我去呀，你等我一陣啦！」
 
然後星瑤就從我身旁溜左出去洗手間。
 
「哎？」我不解地R著頭。
 
番學既路上，星瑤一直都係嬲爆爆咁，都唔知搞咩！
 
「星瑤，你做咩好似好嬲咁既？」我問。
 
星瑤聽到之後望住我，然後用一種都唔知係嬲定唔嬲既語氣同我講 : 「係呀，我嬲呀，我嬲你呀，衰人！」
 
「下？！」我驚訝咁講。「點解嬲我？」
 
星瑤竟然一下子答不上話來。
 
「我……我……」星瑤鼓氣胞腮道。「我都唔知呀！」
 
我地之間既對話，就伴隨係呢句說話之後完結。
 
一番到學校禮堂，全世界既人又望晒過黎。
 
「嘩！」阿溢走左埋黎。「做乜又帶埋阿嫂黎……」
 
突然間，阿溢變得臉容扭曲！ 


......咁係因為，我用膝頭哥一野鋤左落去阿溢個肚到，哈哈。
 
「嘩，阿溢，你無野呀麻！」我掩住阿溢個口道。「睇你個樣好唔舒服咁喎，不如我帶你去休息下啦！」
 
然之後我就拎轉頭同星瑤講 : 「咁星瑤你坐住先喇喎！」
 
「咳咳咳……」阿溢被我帶到去台後。「你條死仔，洗唔洗咁用力呀！」
 
「sor......」我都知自己大力左，所以抱歉咁講。「一時緊張得滯，就唔到力，哈哈……」
 
「唉，得啦，識你咁耐，仲唔知你做乜野咩！」阿溢拍一拍我膊頭。「點呀，表白衰左？」
 
「唔係咁簡單架......」於是乎我又講左一次之前件事俾阿溢聽。
 
「嘩，你條友洗唔洗進展咁快呀，個幾星期咋喎！」阿溢驚訝道。「你之前中意紫鈴咁耐呀又唔見你咁主動！」
 
「咁點同姐！」我駁斥道。「一個就平時唔多傾計，一個就日對夜對！」
 
阿溢仿似明白咁點一點頭，然後望住我講 : 「咁你依家諗住點？」
 
「我依家諗住重新同星瑤打好個關係，然後再向佢表明自己既心意囉！」我苦惱道。「之不過呢幾日以黎我地D關係時好時壞咁，真係好難揣摩！」
 
「既然係咁，不如試下展現你既魅力俾星瑤睇啦！」阿溢奸笑左一下。
 
係呢一刻，我有一種將要被賣豬仔既預感。
 
「你......你......你想我做D咩先？！」我用懷疑既眼光望住阿溢。
 
「放心啦，做兄弟既點會賣你隊友！」此時阿溢從背後攞出一張宣傳單張遞俾我。「就係佢喇！」
 
於是乎我接過來打開一看，眼睛頓時瞪大！
 
「下？！」我O晒嘴望住阿溢。「做義工？！」
 
係我手上既呢張傳單，大概係咁 :
 「下？！」我O晒嘴望住阿溢。「做義工？！」
 
「無錯！」阿溢用一副得戚既聲線道。「想當初，我都係靠做義工先認識到詠琳架咋！」
 
「之但係做義工對我黎講又有咩用呢？」我不解道。
 
「屌，咁都唔明？」阿溢沒好氣說。「做義工，咪就係表現你愛心爆棚既時候囉！」
 
阿溢繼續補充 : 「女人天生就有一種母愛性格，所以只要你係星瑤面前表現到非常有愛心既話，佢就會被你牽動吸引，最後必定大大加分！」
 
「係咪架？」我半信半疑。
 
「妖，呃你托咩！」阿溢講。「總之呢聽日我同詠琳就一定會去既，而你就問下星瑤嘉琪去唔去啦！」
 
於是乎我地就出番黎台前，點知就立即俾我見到D好驚嚇既事！
 
星瑤同紫鈴......係到傾緊計！
 
「咩……咩話？！」阿溢同樣見到呢個十級荒謬既情境。「家樹，乜大婆瑤同二奶鈴識架咩？」
 
「er……」我腦海裡面即時浮現番起上個星期一，星瑤對紫鈴個種奇怪既眼神。「我諗星瑤……應該識紫鈴。」
 
為左可以偷聽下星瑤紫鈴之間既對話，我獨自撓左個大圈去佢地後面。
 
一行到埋去，就聽到紫鈴把聲。
 
「希望你可以體諒佢啦，始終佢屋企依家又搞成咁……」紫鈴把聲聽起上黎好有個種「趕走小三」既感覺。「而且，佢都係唔想我誤會姐。」
 
「我明白既。」星瑤道。「所以拜託你幫我同呀彥講，叫佢唔洗再擔心我，我依家十分安好咁就得架喇。」
 
下？阿彥？邊撚個阿彥呀？
 
「不過講開呢件事，我真係好想問你一個問題。」紫鈴懷疑道。「阿彥佢好著緊你，但卻從來都唔肯同我講多d關於你既事，究竟係點解？你同佢以前究竟係咩關係？」
 
「放心，我地只係青梅竹馬既好朋友黎。」星瑤道。「只不過係因為我有d私隱野唔可以對外公開，所以阿彥佢先幫我謹守呢個秘密姐。」
 
「總之簡單黎講，我地既往事係唔會影響到你地。」
 
聽到呢句，我心裡不禁顫動起上黎。
 
就咁聽落，阿彥就係星瑤之前口中所講既「極少數的知己」。
 
但係呢個阿彥，依家卻同紫鈴有著一種我唔清楚既關係……
 
……可惡！
 
就係呢個時候，突然間有種衝動從我身體內心深處爆出黎。
 
「赫痴！」
 
大家估得無錯，我......
 
打左個噴嚏。
 
FXXK！
 
「嗯？」星瑤同紫鈴幾乎同一時間望過黎。「家樹？！」
 
「哈哈……」我從牆邊慢慢行出黎。「其實我本身就諗住搵星瑤傾關於做義工既事既……點知你地咁岩又係到傾緊計喎！所以……我咪企埋一邊等，廢事阻住你地囉！」
 
係呢一刻，我都幾佩服自己既腦轉數，呵呵。
 
「我地都傾完架喇！」紫鈴望住我笑一笑。「你地傾啦！」
 
「我會幫你轉達架喇，星瑤。」說罷紫鈴就拎轉面走左。
 
之不過係走之前，紫鈴卻偷偷地昅左星瑤一眼。
 
一個，意思深遠，但我完全唔明白既眼神。
 
望住紫鈴逐漸離去既背影，我先至赫然發覺依家呢個獨處環境好尷尬！
 
然後首先係星瑤打破僵局。
 
「死人馬家樹，你擺明係有心偷聽啦！」星瑤好似仲嬲緊我。「點啊，搵我做咩？咩做義工？」
 
本來我就諗住打蛇隨棍上，問下星瑤頭先D對話內容既。
 
之但係諗深一層，依家風頭火勢，萬一搞唔好令星瑤再嬲我既話，我咪死火？！
 
所以關於個條咩阿彥既事呢……就算啦！遲下先再問星瑤啦！
 
「喔，係呀！」我立即遞上宣傳單張。
 
星瑤好專心咁望左一次張紙，然後問我 : 「點解會無啦啦想去做義工既？」
 
「嗯……」我諗左一諗。「一黎係因為，我認為做義工呢件事好有意義！」
 
「而二黎係因為……」我望住星瑤，微微一笑。
 
「我好想同你一齊經歷多D野，儲低多D唔同既回憶。」
 
星瑤聽完之後，轉過頭黎與我對望著。
 
「我諗我都有興趣去既……但唔係想同你儲回憶囉！」星瑤咬了一下嘴唇說。「……衰人。」
 
望住星瑤呢一個動作，我簡直好似被人點左穴咁，郁都唔識郁。
 
星瑤佢……真係好可愛！
 
「喂！」星瑤沒好氣咁叫醒我。「話說你依家唔係要去排戲架咩，我等住睇架！」
 
「喔！」我回神過來。「係喎，即去！」
 
於是乎我就立即衝過去舞台個邊。
 
就係我拎轉面跑緊既時候，我突然隱約聽到星瑤既聲音。
 
佢，好似講左一句……
 
「……傻瓜。」