第五章
 
與星瑤拖著手,逛著街既呢幾個鐘,大概係我呢一輩子以黎都未嘗試過既甜蜜經歷。
 
我地十指緊扣,就好似一對情侶咁係商場裡面到處繞圈,而且見到D咩都會攞起黎玩。
 
「哇!」星瑤攞起一罐紫色既可樂。「呢罐可樂係車厘子味!」
 
「log on啲野飲出名伏架喎!」我笑道。「不過你係咪想飲?」
 


星瑤望住我,甜甜咁笑了一下: 「係!」
 
於是乎我地就買左一罐出去。
 
「咔嚓!」星瑤打開左罐可樂,然後飲左一啖。
 
只見星瑤個樣立即變得苦澀怪異。
 
「好......難......飲......」星瑤完全係唔想講野,係咁掩住個口。
 


「有無咁誇張!」我攞起個罐可樂,一野大啖隊落個口到。
 
......屌。
 
呢一陣味,邊忽係Cherry!
 
擺明係杏仁加奶仲要酸左既味!
 
「......」我掩住個口,差d就胃都反埋出黎。
 


「哈哈,都話左難飲架啦,仲咁大啖!」星瑤取笑我道。
 
「扔左佢啦不如!」我提議。「都唔知設計出黎個個自己有無飲過架!」
 
「扔左佢?唔好啦!」星瑤奸笑左一下。「我諗到d好好玩既野......嘻嘻......」
 
「?!」我真心淆左一淆。
 
原來,星瑤諗住玩包剪揼,輸左個個要飲一啖。
 
「好!」我扯高個衫袖。「我出晒名叫做觀塘區猜王帝,洗怕你!」
 
「咁就黎啦!」星瑤舉起手。
 
就係咁,輸左既一啖,輸左既又一啖,飲到我地兩個滿肚氣,終於都飲晒杯野。


 
「飲完喇!」最後一下係星瑤。「仲慘過飲苦茶!」
 
「哈哈,叫左你扔架啦!」我笑一笑。
 
此時,我見到星瑤個嘴邊飲到勁多可樂漬。
 
「傻瓜,洗唔洗飲到咁『呢hea』呀!」我攞出紙巾走前一步,替星瑤拭去污漬。
 
「唔...唔該......」星瑤望住我,臉漸漸紅了起來。
 
望住星瑤,我突然有一種衝動。
 
於是乎我抹抹下,突然把頭哄前,咀了星瑤一啖。
 


唔知係咪飲完可樂既關係呢,
 
呢一吻好甜,好甜。
 
咀完之後,星瑤眼都唔眨咁望住我。
 
「做咩呆晒咁呀!」我雙手捏一捏星瑤臉蛋。「我會忍唔住咀多你一啖架喎!」
 
點知,星瑤竟然怕羞咁點了一下頭!
 
「係咪......咀?」星瑤害羞得躲開視線。
 
嘩,好可愛呀!
 
「嗯。」我用雙手環抱星瑤的腰,一下把她拉過來。


 
星瑤嚇左一嚇,然後我地就變成鼻貼鼻。
 
我地對望住,然後頭漸漸打側,再次接吻起來。
 
不過始終我都係唔夠膽濕吻,哈哈。
 
咀了一會,我地就分番開。
 
「咀夠啦,滿足啦!」星瑤甜甜道。「大傻瓜!」
 
行多左一陣之後我地就去食野,食完就番屋企。
 
係樓下我望到屋企著左燈,即係話嘉琪番左黎。
 


到了屋企的大門前,星瑤忽然扯一扯我隻手。
 
「家樹,」星瑤說。「你諗住一陣點同嘉琪講?」
 
「嗯......」我思考。「我自然有辦法。」
 
說罷我直接緊握著星瑤的手,然後打開門。
 
「我地番黎喇!」我笑說。
 
不過,當我認清眼前呢個環境既時候,我真係笑都笑唔出。
 
「......」我與眼前的兩人對望住,雙方都十分驚訝。
 
「爸媽?!」
 
唔撚係掛,老豆老母唔係去左旅行架咩,做咩去番左黎!
 
「家樹?!」老豆望住我同星瑤,非常驚訝。「你後面個位係......」
 
屌,今次都唔知由邊個位開始講起好喇!
 
「er......伯世伯母你好......」星瑤口都窒埋咁望住老豆老母。「我叫劉星瑤,你地叫我做星瑤得架喇。」
 
老豆老母望住我同星瑤拖住個隻手,一臉難以置信。
 
「爸媽,唔好係咁望住啦!」我嗆道。「俾我地番入黎坐低先,然後再慢慢傾,好無?」
 
爸媽對望左一下,然後點頭回應。
 
入到去之後,我地四個坐左係餐枱上展開會談。
 
「呀仔......」老母首先開聲。「即係呢......咁快就帶人番黎訓係唔岩架......」
 
「媽,你誤會左喇!」我立即將成件事由頭到尾講左一次俾佢地聽。
 
「所以星瑤佢先會暫時住係到......」我抱歉說。「sorry啊爸媽,無問過你地就俾人上黎住......」
 
「哈哈!」老豆突然笑起上黎。「家樹,你真係有我以前既影子!」
 
「下?!」我不解。
 
「你老豆我呀以前就係咁樣瞞住你爺爺嫲嫲,帶你老母番屋企架喇!」老豆越講就越high。「如果咪邊會有左你呀!」
 
「......」我同星瑤都唔知點俾反應。
 
啊,係到應該同大家講下我老豆老母先。
 
我老豆係一個好玩得既人,個樣好man好型,依家做緊物流。
 
而我老母就係一個靚女黎 (嘉琪完美遺傳左!),依家做緊導遊。
 
不過其實佢地只係30幾歲,好後生。
 
佢地同我講,想當初,係因為唔少心有左我,所以先勁早結婚,然後老豆就努力打工賺錢養我地。
 
點知勁好彩,老豆佢之後投資賺左一筆,所以就買左層私樓,仲要大把錢同老母周圍旅行。
 
佢地話咁樣係為左彌補番當初無經歷過既拍拖時間喎。
 
「人地老豆,好心你講野就檢點下啦!」老母沒好氣咁講。「我地要教好個仔,叫佢唔好學我地咁樣先得架麻!」
 
「年輕就是任性架啦!」老豆望住我單了一下眼。「家樹,我撐你喎!」
 
「哈哈......」我苦笑。
 
「唉,無你咁好氣,你話點就點啦!」老母講完之後就望住星瑤。「唔好意思啊,有無嚇親你?」
 
「點會呢伯母,我覺得你地呢一家人好溫馨就真!」星瑤臉上流露了一絲羨慕。
 
「嘩,好識講野喎!」老母笑左一笑。「呀仔,我中意佢,一於就俾佢留低啦!」
 
老母繼續補充 : 「星瑤啊可?你當呢到係自己屋企得架喇!」
 
「係呢爸媽,」我問。「你地唔係8月尾先番黎架咩,依家7月尾咋喎!」
 
「本來就係既,不過遊輪個邊delay左,所以我地要番黎住三日,然後先再去過旅行囉!」老母講。
 
「放心啦,我同你呀媽識做架喇,夜晚會當咩都聽唔到!」老豆笑說。
 
「有你地兩個係到我先最唔放心......」我苦笑道。
 
就係呢個時候,大門再次打開。
 
「爸媽?!」嘉琪大叫。
 
哈哈,果然係我個妹,連說話語氣都同我一樣!
 
再次經過一輪解釋之後,嘉琪總算明白依家發生咩事。
 
「咁我同你媽子番房訓覺先啦!」老豆講。「星瑤,你自便啦!」
 
「好啊,多謝世伯!」星瑤禮貌道。
 
等到爸媽入左房之後,就輪到我地三個入左我間房開會!
 
我地三個坐左係床上面,星瑤靠著我,嘉琪坐對面。
 
「嘩屌,頭先嚇死我!」我勁淆咁講。「岩岩我同星瑤拖住手入屋,點知就同老豆老母撞到正!」
 
此時嘉琪用一對勁奸既眼神望住我同星瑤!
 
「喂啊!」星瑤臉害羞地推了我一下。「死人馬家樹!」
 
「哦~~~拖住手呀麻~~~」嘉琪笑了一笑。「得架喇,明架喇,嘻嘻!」
 
「不過你爸媽其實都幾nice幾可愛啊!」星瑤說。「搞到我都有d諗番起自己爸媽......」
 
「但你唔係好唔中意佢地架咩?」嘉琪說。「佢地對你好嚴架喎!」
 
「嗯......」星瑤諗左一諗。「雖然佢地對我咁嚴我的確係好唔開心,但我都知道佢地係為我好先咁做......」
 
「所以,我都仲係好愛佢地既。」
 
聽到呢度我忽然諗番起,當初星瑤拒絕我,話唔定就係因為呢個原因。
 
星瑤爸媽對佢好嚴,所以一定唔會俾佢拍拖。
 
星瑤雖然好中意我,但奈何佢又好愛自己父母,所以就決定忍痛割愛,廢事未來會造成「初初say yes好容易,最後say goodbye好困難」的局面。
 
好彩,星瑤最後都願意面對呢段感情,肯同我起埋一齊!
 
「咔嚓!」
 
正當我係到諗緊野既時候,房門突然被打開!
 
「hello!」打開門既原來係老母。「唔知你地三位聽朝得唔得閑呢?」
 
我、星瑤、嘉琪三人互相對望了一眼,然後異口同聲道 : 「得閑啊!」
 
「咁就好喇!」老母笑一笑。「你地三個聽朝不如陪下我同你老豆去飲茶啊!始終我地去左成個月旅行,都好耐無同你地傾過計喇!」
 
「星瑤你都要黎架!」老母繼續補充。
 
「嗯好!」星瑤回應。
 
「好啦,唔阻你地,早D訓喇,晚安!」
 
媽子閂番道門之後,嘉琪就話眼訓,所以佢同星瑤就番左房訓覺。
 
於是乎我躺在床上閉上眼睛,然後慢慢睡著。
 
***
 
「我要走喇,家樹。」星瑤漸漸化作一粒流星,浮升到天空中。
 
「唔好走啊!」我試圖努力咁去伸手抓著星瑤,卻發現自己的身體變成了一棵樹木,整個人動彈不得。
 
「多謝你帶俾我咁多美好既回憶。」星瑤的眼淚一點一滴落在我身上。「再見喇。」
 
「唔好走......」我頭頂的樹葉,伴隨著我哽咽的聲音徐徐落下。「唔好走啊......星瑤!」
 
「啊!」我再次從惡夢中驚醒過來。「原來又係發夢......」
 
點解會發埋d咁既夢架呢......唉算啦。
 
我望望時間,原來都已經朝頭早。
 
於是乎我緩緩走下床梳洗更衣,準備一陣成家人去飲茶。
 
等左一陣,星瑤嘉琪、老豆老母都陸陸逐逐起晒身,於是乎我地一行5人就去左樓下間稻香開位。
 
「食唔食奶黃包?」
「好啊,唔該伯母!」
 
「食唔食小龍包?」
「嗯,好既,唔該伯母!」
 
「食唔食水餃?」
「嗯,唔該晒伯母。」
 
「食唔食腸粉?」
「嗯......好啊唔該伯母......」
 
大概,係呢一餐裡面我聽得最多既對話就係咁樣。
 
都唔知我地兩兄妹係呀媽個仔女呀,定抑或星瑤先係喇!
 
食完一輪之後大家都飽晒 (特別係星瑤) , 所以休息個陣係百無聊賴間就傾起計上黎。
 
「係呢星瑤呀,」老母依舊淨係理星瑤,一d都無理過我地!。「唔知道你可唔可以同伯母我講下,究竟你係用d咩條件去同你嗲dee媽傾掂數,俾你自己一個出黎見識世界架呢?」
 
好呀!!!
 
老母好耶!一野就直搗黃龍轉身射個三分波,幫我問左呢個「我不能問的問題」!
 
星瑤聽完之後雙眼頓時瞪大,然後一臉苦澀咁思考起上黎。
 
「係咪好難講出口架?」老母唔好意思咁講。「如果係難言之隱既話就唔洗講架喇!我都係好奇問下!」
 
「其實......呢件事總要講出黎,係差左幾時講架姐。」星瑤講呢句既時候,唔知係有意定無意咁望左我一眼。「其實成件事係咁既。」
 
「我早前收到一個由英國皇家音樂學院寄黎既信,信裡面既內容係邀請我去參加一個鋼琴試,如果表現突出既話下年就可以去外國留學,跟隨一個出名既鋼琴老師學習。」
 
「我媽咪嗲dee由細到大一直都好希望我係彈鋼琴方面繼續深造,所以就係咁迫我參加。」
 
「不過其實我自己本身都已經好中意彈琴,所以就算父母並無威迫我都會參加呢個考試。」
 
「但既然事情發展到咁,倒不如黎個打蛇隨棍上,同佢地做一個協議------俾兩個月時間我出去見識下,然後番到黎我就會乖乖地去考試。」
 
「我父母最後答應左我呢個要求。」星瑤牽強一笑。「所以亦都即係話......」
 
講到呢到,星瑤無再講落去,只係充滿遺憾咁與我對望著。
 
我個心,係呢一刻仿似停頓了。
 
所以亦都即係話,
 
係呢兩個月過去之後,星瑤就要離香港,
 
離開......
 
我。
 
「咁星瑤你咪即係暑假完左就要離開香港囉?!」老母突然道出左呢一句。「咁你同我呀仔兩個月之後咪要long d?」
 
係喎!點解我會咁蠢架!
 
去左第二個國家咋麻,洗咩咁就分手!
 
我地可以long d架麻!
 
呢個世界係有skype架麻!
 
只要我同星瑤keep住聯絡,咁咪可以繼續維持呢段關係囉!
 
唔單只添呀!我甚至乎可以係長假個陣偷偷地繞過星瑤父母既看管去外國搵星瑤!
 
無錯喇,我洗咩咁悲觀!
 
「long d姐,有幾大件事!」我堅定咁望住星瑤。「我地一定會keep到既!」
 
星瑤咬一咬唇,然後徐徐道出 :
 
「嗯......一定可以既。」
 
「既然係咁一於就打鐵趁熱喇!」坐係隔離一直睇緊報紙既老豆終於出聲。「你地得番個幾月相處既時間,當然就要好好善用佢!」
 
「老婆,你之前唔係話有賺送機票架咩,不如俾左佢地,等佢地去下旅行啦!」
 
「下?!」我、星瑤、嘉琪同一時間叫左出黎。「旅行?!」
 
「喔,咁都得喎!」老母驚醒道。「我同你老豆之前儲左好多飛行里數,於是乎就換左兩張『台灣來回機票』番黎!」
 
「本來我地就諗住自己去既,不過依家......」老母望住我同星瑤笑了一笑。「好啦,送俾你地啦!」
 
「唔係掛!」呢句唔係我講,而係嘉琪講。「點解阿哥佢有我無架?好唔公平!」
 
「傻既,我地點會漏左你!」老豆說罷就係個銀包到攞左幾千蚊出黎窒左俾嘉琪!「呢到俾你同朋友仔去旅行!」
 
屌!我都寧願要現金囉!
 
「好耶,多謝老豆!」嘉琪收左筆錢,然後望住我單眼伸脷。
 
啊!你個死妹釘!
 
「拿,」老母遞左兩張機票換領券俾星瑤。「袋穩佢,遲下搵時間同家樹去啦!」
 
「咁唔係幾好既伯母......」星瑤推番俾老母。
 
「你袋左佢啦!」老母又推番俾星瑤。
 
就係咁來來回回推左十幾廿次之後,老母終於發火。
 
「星瑤,一係你就收左佢,然後同我乖乖地去旅行!」老母講。「一係你就即刻同我個仔分手,然後即刻執野走!」
 
「多謝伯母!」星瑤用九秒九既速度收好左d券。
 
呢一刻,我個心有兩種開心湧上黎。
 
一,我同星瑤可以去旅行!
 
二,星瑤為左同我繼續係埋一齊而立即向老母妥協!
 
哈哈哈!
 
於是乎,我同星瑤既「台灣之旅」就係呢個絕對威迫既情況之下,塵埃落定左。
 
經過一連串討論之後,我地最終決定去玩七日,下個星期一就出發!
 
於是乎飲完茶之後,我地一行5人就花光整天既時間去為我同星瑤籌備是次旅行。
 
我地分工合作去做野 : book酒店啦,plan行程啦,買保險啦,買日用品啦......
 
總之話咁快就乜都搞掂晒。
 
鬼咩,我老豆老母咁中意去旅行,呢d事前準備工夫佢地簡直係做慣做熟,根本一d都難唔到佢地。
 
不過其實撇除以上呢幾項工夫之外,都仲有d個人事項要靠我自己做既。
 
首先第一樣野,當然就係同阿溢請假唔排戲啦!
 
所以我就打左俾阿溢,然後將成件事同晒佢講。
 
「嘩,你都得架喇!」阿溢沒好氣道。「淨係掛住拍拖,男主角都唔理喇!」
 
「咁都係請一日假姐!」我說。「番到黎即刻排,好無?」
 
「咁啦,」阿溢思考左一陣之後講。「我都唔想你因為要排戲而放棄同星瑤僅餘既相處時間。」
 
「反正我信得過你既能力,不如以後你就唔洗番黎排,淨係入台先番黎啦!」
 
「咁正!?」我喜出望外道。「好啊屌!果然係好巴打!」
 
「得啦,我都唔想你同星瑤咁快散既!」阿溢笑說。
 
呢件事搞掂之後,就去到......暑期作業問題。
 
屌!我掂都未掂過!
 
所以結果接下落黎既個幾日,我就留左係屋企趕功課。
 
***
 
時間一轉,已經係星期六早上。
 
亦都即係話,過多兩日就係我同星瑤去台灣既日子!
 
之但係我仲未做晒功課,FUCCCCCCCCCCCCCK!
 
「好勤力喎!」就係我專心寫緊最後幾篇essay既時候,星瑤突然從後冒出,然後擁著我的頸。
 
「梗係啦,如果做唔晒既話去旅行就無咁盡興!」我轉過頭黎望向星瑤,卻發現佢換上了一身出街衫。「咦,乜你出街咩?」
 
「哦......係呀!」星瑤微笑道。「我見悶悶地,咪諗住自己出街行下囉!」
 
「傻妹,你叫我陪你麻!」我說。
 
「梗係唔好啦!」星瑤說。「你仲要做好D功課,遲下陪我去旅行架!」
 
「咁好啦,」我回應道。「咁我做完就打俾你啦,我差少少咋!」
 
「好!」星瑤說罷就吻了我的臉一下。「我出去喇咁,今晚見!」
 
星瑤出左去之後,我就繼續做我既作業。
 
用左成個下晝,終於都做晒喇!
 
「Yeahhhhhhh!!!」我狂呼道。「正,等我快d同星瑤講先!」
 
我撥出多次電話俾星瑤,不過都係無人聽。
 
「究竟星瑤去左邊呢?」我不解道。
 
於是乎我就send左個wtsapp俾佢 :
 
傻妹你係邊?我做完功課喇,一陣黎搵你!
 
話晒都已經係屋企發左霉幾日,依家當然就係要出去行下啦係咪先!
 
我隨便換上一身T 恤牛仔褲,獨自出了門口。
 
一諗到兩日後就要同星瑤一齊去旅行,真係有種說不出既興奮!
 
為左做定多D準備,我就去左觀塘APM個間書局睇旅遊指南。
 
睇左一陣,我就攞部手機出黎睇,然後就見到星瑤覆番我!
 
星瑤 : 我手機岩先無電,依家係銅鑼灣一個商場到差緊,一陣番到黎再搵你啦!
 
下?星瑤做咩走左去銅鑼灣咁遠?!
 
「喂!」正當我全神貫注望著手機屏幕既時候,突然有一把甜甜既聲音從我右面傳黎。
 
我隨聲線望過去,然後心裡頓時觸動了一下。
 
「紫鈴?!」我驚訝道。「點解你會係到既?!」
 
「乜間書局係你架咩!」紫鈴的笑容甚是吸引。「我咪同你一樣,係黎睇書架囉!」
 
紫鈴繼續補充 : 「星瑤呢?唔見佢同你一齊既?」
 
「佢去左銅鑼灣未番啊。」我答覆道。
 
點知紫鈴聽完呢句之後,表情頓時變得怪異。
 
「紫鈴?」我呼喚道。「你無事啊麻?」
 
「下?!」紫鈴此刻才回神過來。「我...我無事呀!」
 
望到紫鈴呢個反應,我直覺認為一定係有事發生!
 
既關於星瑤事,又關於紫鈴事既......
 
唔通,係關個個咩阿彥事既?!
 
「紫鈴,」我決定問清楚呢件事。「你得唔得閑?不如去M記坐下,我有D事想問你。」
 
「嗯......好。」
 
***
 
「你想問我D咩?」紫鈴與我在M記對坐。
 
「我想問關於阿彥既事。」我說。「好對唔住,但其實對上個次排戲我係有心偷聽你同星瑤既對話。」
 
「其實我個陣都已經知。」紫鈴說。「不過我估唔到既係你竟然唔問星瑤而走黎問我姐。」
 
「始終,你同星瑤佢一齊住緊,日對夜對架麻。」
 
「點解你會知道架?!」我驚訝道。「照計我淨係同左阿溢講架咋喎!」
 
「係我上次問星瑤既。」紫鈴回答。「因為阿彥好想知道星瑤既下落,所以我就代佢問星瑤。」
 
「又係個個阿彥......」我越聽就越嬲。
 
如果呢個阿彥係星瑤惟一既青梅竹馬,惟一既知己,咁身為男朋友既我係咪應該有權得知關於呢個人既事呢?
 
但係,我就從來未試過係星瑤口中聽過「阿彥」呢兩隻字。
 
「家樹,你係咪對阿彥呢個人一無所知?」紫鈴突然道出呢個關鍵。
 
「點解你咁講?」我反問。
 
「睇你個反應即係我估岩左啦。」紫鈴嘆左一口氣。「其實,我同你都係一樣。」
 
「因為我都從未試過係阿彥口中聽過關於星瑤既事。」
 
「你咁講係咩意思?」我再問。
 
「即係話,星瑤同阿彥係對方心目中都有一個異常既地位,呢個位置甚至特別到唔想俾別人知。」
 
聽完紫鈴呢一番猜測,我一時間俾唔到任何反應。
 
「咁呢個阿彥其實係你邊個?」我問道。「佢係咩樣,我見過未?」
 
「阿彥佢......係我中意既男仔。」紫鈴講呢番說話既時候表情非常糾結。「我IG有佢,你都應該見過。」
 
於是乎紫鈴打開手機俾我一睇......
 
原來個個阿彥,就係之前我係紫鈴IG見到既個個靚仔。
 
「阿彥佢對我好好,成日會搵我,同我傾計,就好似一個大哥哥咁。」紫鈴說。「不過......佢心裡面最中意既應該唔係我,而係星瑤。」
 
時間已經唔早,所以紫鈴就話要番去先。
 
「家樹,」紫鈴臨走前回眸道。「有樣野我覺得應該要同你講。」
 
「嗯?」我回應道。
 
「今日阿彥佢......」紫鈴皺一皺眉。
 
「都去左銅鑼灣。」
 
***
 
我係街上面漫無目的咁遊蕩著,腦海中不停在思考關於星瑤的一切。
 
係呢一個月既相處以黎,我自以為已經了解透徹星瑤的所有野。
 
佢163cm高,佢36號鞋,佢C cup,佢右眼角有粒美人痣,佢中意姣粉紅色,佢中意睇迪士尼D公主動畫,佢天真,佢可愛,佢細心......
 
但到頭來,呢一切一切原來都仲係太表面......太膚淺......
 
究竟,星瑤點解唔同我講關於阿彥既事呢?
 
明明呢個係星瑤佢惟一既朋友知己,照計應該會成日掛在口邊先岩架!
 
除非真係學紫鈴咁講......星瑤係有心向我隱瞞同阿彥既呢段關係......
 
「嗶嗶!」就係呢個時候,電話的震動聲把我從沉思中喚醒。
 
於是乎我攞手機出黎一睇......係星瑤打俾我。
 
我深呼吸了一口氣,然後徐徐按下接聽鍵,並將手機放在耳邊。
 
「......喂?」我盡量將自己內心的糾結壓抑著。
 
「你依家係邊呀家樹~~~<3」星瑤說。「我過黎搵你!」
 
唔知道係咪我錯覺呢,我硬係覺得星瑤好開心咁。
 
究竟佢係因為想見我而開心啊,定抑或係......
 
唔得架唔得架,我唔可以懷疑星瑤!
 
「我依家係觀塘APM!」我笑說。「我去定吉野家霸位先,一陣等你番到黎我地兩個就去食打邊爐好無?」
 
「好呀好呀,我要食竹輪!」星瑤興奮道。
 
「咁一陣見啦,Byebye!」
 
「嗯,byebye傻瓜!」
 
我將電話放番入褲袋,然後仰望黃昏的天空。
 
「究竟......我應唔應該向星瑤問清楚好呢?」