星期一的上午,香港國際機場。
 
「yeah!」星瑤就好似一個小朋友咁大叫,非常可愛。「出發喇!」
 
「劉小姐,你係咪連行李都唔要呀!」我一個人拖住兩個喼係到行。
 
不過星瑤完全係聽唔到我講野咁款,一支箭就跑左去勁遠,叫都叫唔住。
 
「我幫你攞住先啦!」送我地機既嘉琪替我分擔手中一點重量。
 


於是乎我地就慢慢行左過去服務台check in,然後就行左去離境大堂閘門前作最後道別。


 
「星瑤,記得去旅行個陣要小心d,唔好蝕底俾我呀哥!」嘉琪笑說。
 
「咩...咩喎!」我立即反駁。
 
「哈哈!」星瑤望住我甜笑了一下。「量你呀哥都唔夠膽既,嘻嘻!」
 


「好喇好喇,你地搭十點九機依家就差唔多入閘架喇,快d入去啦!」
 
「好啦咁......」星瑤回應著。「byebye喇嘉琪,muah <3!」
 
「muah <3!」嘉琪笑說。「你地渡蜜月要玩得開心d!」
 
「一定會!」星瑤有意無意咁望左我一眼。
 
「哈哈......」我怕羞地說。
 


於是乎我同星瑤就攞起行李準備入閘。
 
「哥,」嘉琪突然叫住我。
 
「做咩?」我問。
 
「無論你同星瑤之前發生左咩事都好,依家趁呢個旅行就咋咋聲搞番掂佢啦!」嘉琪道。
 
「下?」我不解道。
 
「嗯......」嘉琪窒了一窒。「咁可能係我get錯啦,不過......」
 
「我硬係覺得你有d野屈左係個心裡面好想同星瑤講。」
 
同嘉琪道別入閘後,我就同星瑤去大家樂食左個早餐,然後就去到登機既位置等候上機。




 
係等待既時間裡面,星瑤一直都目不轉睛咁欣賞外面飛機場宏偉既景色。
 
等左一陣我地就上左機,然後飛機駛進了跑道準備啟航。
 
「家樹啊!」星瑤突然轉過頭黎望住我。
 
「做咩啊傻妹?」我撫摸著星瑤既頭。
 
「其實呢......」
 
「嗯?」
 


「其實呢......」星瑤甜蜜的認真道。「可以同你去旅行,我真係好開心。」
 
「哈哈!」我將頭微微哄前,吻了星瑤的嘴唇一下。「正一傻妹黎既。」
 
「其實我都係。」
 
飛機升到了高空,往台灣高雄機場進發。
 
由於我地太早起身關係,星瑤已經攰到係飛機上面靠著我膊頭睡著了。
 
望住身旁呢個小可愛,我忽然記起嘉琪剛才最後個番說話。
 
嗯......其實呀妹佢講得無錯,我心裡面的確係有條刺係到。
 
事關,星期六打邊爐個一晚,我始終都係無將自己心裡既疑問說出口。


 
你可能會問我點解唔問,乜我唔係好想知個真相架咩?
 
係,我真係好想知。
 
但比起呢個求知慾,我更加著緊既係星瑤既感受。
 
我害怕一旦「打爛沙盆問到督」,換黎既會係一個星瑤唔希望講出黎既答案。
 
所以呢件事,我一直都收埋左係個心裡面。
 
於天空傲翔了個幾鐘之後,我地終於都到喇!
 
由於呢七日既行程大概可以分為兩部分 : 3日台南,4日台北!
 


所以落左機之後我同星瑤就去左搭租車前往墾丁既渡假民宿!
 
我相信總有一部分讀者未去過台灣,唔知個到係點,所以就容我係到分享下啦!
 
墾丁係台灣南部既渡假區,係一個專門for嬉戲休閑用既地方。
 
整個渡假區由一條「墾丁大街」連貫著,而大街旁邊則有無數的小販車售賣食物紀念品。
 
一望無際既大海,綠油連綿既高山,再加上美食盡在既大街,就係墾丁渡假區既標誌!
 
乘車既路上,我望向出面既風景。
 
炎夏的太陽打在海面上,發出閃閃生輝。
 
「星瑤你睇!」我用眼神示意星瑤望出去。
 
「嘩!」星瑤簡直係成塊面痴左落個窗到。「好靚啊!」
 
一黎就有呢個咁美麗既景色陪伴住,我相信呢趟旅程一定會好順利!
 
學嘉琪話齋,有d咩心刺,咪係呢到解決晒佢囉!
 
坐左兩個幾鐘,坐到屎忽都爛埋,終於都到左我地住既旅店!
 
呢間「馬丁威旅店」位於大街鄰近既小巷裡,大堂裝潢典雅,富有外國風味,企係裡面真係好舒服。


 
搞掂晒d入住手續之後,我地當然就係要上房放低d行李啦!
 
「先生,這裡就是你們的房間了!」服務員超好態度咁講。「如果有什麼問題的話,只要撥打內線到大堂就可以了!」
 
哈哈,唔知道係咪我錯覺呢,台灣人好似個個都好nice咁!
 
「嗯,謝謝!」我都好有禮貌咁講,然後徐徐走進房間。
 
不過當我望到眼前既景象之後,真係即刻想講粗口。
 
「點...點解......」我驚訝地說。
 
「點解會係一張雙人床架?!」
 
明明我記得老母話幫我地book左間有兩張單人床既房先岩架......
 
我知喇!一定係媽子佢既陰謀黎!
 
可惡,中伏添!
 
不過......有得同星瑤一齊訓我就梗係樂意至極啦,哈哈!
 
「既然得一張床,不如......」我向星瑤打一打眼色。
 
「唔怕!」星瑤此時從衣櫃裡面拿出幾張被鋪。「你訓地下!」
 
......屌。
 
安頓好晒之後,我同星瑤見都已經5點幾,所以就諗住出去行下,認識下呢度既環境。
 
我地兩個拖著手,從墾丁大街的起點開始慢步。
 
如果要我形容既話,墾丁大街就好似一個大型既嘉年華。
 
因為除左野食之外,呢到仲有好多唔同既攤位遊戲,比如係射氣球,扔飛鏢咁。
 
行左一陣,星瑤突然撓住我隻手講 : 「家樹......我好肚餓啊!」
 
「有無咁快!」我捏一捏星瑤的鼻子。「岩先先係飛機食完咋喎!」
 
「我要食野啊嗚!」星瑤撒嬌道。
 
於是乎我地就搵左一間叫「100熱炒」既小菜館食晚飯。
 
所謂香港人食飯最重要既係咩?
 
當然就係「相機食先」啦!
 
所以等到D野食黎齊之後我就同星瑤自拍左一張相。
 
啊,講起上黎我都有成個星期無入過IG喇喎!不如就upload呢張相上去啦!
 
搞掂之後,當然就係要禁入星瑤個ig瀏覽一下啦!話晒咁耐未入過去睇!
 
不過當我禁左入去之後,就發現到一個驚為天人既情況。
 
點解星瑤個IG會轉左做private,而且我仲要未follow佢架?!
 
「星瑤?!」我驚訝咁將個屏幕遞俾星現睇。「點解會咁架?!」
 
「喔!」星瑤仿似憶起番d野咁講。「記唔記得上個星期日食完lunch之後你坐係sofa睇我IG,然後俾我發現左?」
 
「個陣你明明應承過我,要當咩事都無發生過架麻!但你轉過頭又做埋晒D咁曖昧既動作,所以我嬲嬲地咪直接將成個IG轉左做private,然後block左你囉!」
 
「下......」我腦海裡回憶起當時既情況。「咁個陣又真係我唔岩既,不過依家我地都一齊左啦,可以unblock番我喇掛?」
 
「咁又唔得喎!」星瑤笑說。「你個衰人,成個星期喇依家先發現到!即係證明你對我d野唔上心!」
 
「所以你依家要守行為,睇下你呢幾日既表現係點樣我先再決定要唔要accept你啦!」
 
WTF?!咁都得?!
 
食完野之後,就梗係繼續行街啦!
 
不過有樣野值得一說既就係,墾丁既早上同夜晚簡直係兩個地方黎!
 
早上既大街,大多數是用作交通穿梭之用,並沒有太多行人 ; 但到了夜晚,呢條街就成了熙來攘往的市集,幾乎是人山人海,到處都係遊客的蹤跡!
 
係呢個咁高漲既氣氛低下,我同星瑤都變得興奮起上黎。
 
「嘩,臭豆腐真係好撚臭!」
「你睇,炸雪糕啊!好似好好味咁!」
 
「家樹~~~我想食腸仔!」
「......」
 
「不如我地去飲下珍珠奶茶!」
「好呀!」
 
短短個幾鐘頭,我地已經由街頭掃到街尾,見乜就食乜,好似當正自己無過晚飯咁。
 
「嗚啊!」星瑤一番到旅店就立即攤左落張床到。「食到好飽啊~~~」
 
「哈哈,有人呢個trip之後就要變大肥婆lu~~~!」我取笑道。
 
「咩...咩喎!」星瑤不甘地反駁道。「咁有人係呢個trip之後都要變死肥仔啦!我只係廢事佢咁慘,所以陪下佢之麻!」
 
我徐徐坐在星瑤身邊,然後開玩笑道 : 「咁我係咪應該要代表個個死肥仔,多謝星瑤姐姐你咁善解人意呢?」
 
「咁就梗係啦!」星瑤訓側左個身望住我,甜甜笑道 : 「最起碼都要有d表示,報答一下我啦~~~<3」
 
「咁......」我將臉哄到星瑤的眼前。「你想我點報答你?」
 
「嘻嘻~~~」星瑤窩心地笑著。「我想你......」
 
此時星瑤突然撓著我的後頸,將我個頭再拉前一步。
 
星瑤的體香味,再次因互相靠近而變得濃烈起來,不斷傳入我的鼻子裡。
 
「我想你......」星瑤的雙眼仿似懂得放電般望著我。「叫下我個名。」
 
「哈哈,乜你個要求咁怪架!」我輕輕撫摸著星瑤的臉。
 
「正一傻妹黎既,劉星瑤。」
 
星瑤的臉早已變得通紅,眼定定咁望住我。
 
「馬家樹,」星瑤莞爾一笑。「大傻瓜。」
 
說罷,我將頭微微向前一伸,令彼此的嘴唇接上。
 
所謂孤男寡女共處一室,無人干擾既時候原來真係會大膽好多,過火好多。
 
接吻之間,我把脷伸過去星瑤嘴裡。
 
一開始星瑤無預料此著,所以抖震了一下。
 
不過好快咁星瑤就懂得配合我,將脷伸過黎。
 
唔知道大家有無試過濕吻啦,不過有試過既人應該都會有呢個感覺------
 
好撚爽。
 
呢個感覺就好似對方只係屬於你一個咁,好實在,好暖心。
 
由於我同星瑤係上下咁kiss,所以係上面既我就要一直撐住自己個人,搞到無幾耐之後雙手都酸軟起上黎。
 
唔知道星瑤係咪知道我辛苦呢,居然就係呢個時候擁著我!
 
結果我好順理成章咁成個人壓左係星瑤身上,c cup的觸感完美咁落左係我個胸前。
 
於是乎我又攬番住星瑤然後訓落床,令到大家既動作變到好似當初第一次係我將床上面接吻咁 (不過今次係攬住)。
 
咀左一陣,唔知道係咪大家都見攰,所以就好有共識咁分番開。
 
「邊個話俾你伸脷架!」星瑤甜甜地笑著。「以後再黎既話我就唔俾你錫!」
 
「哈哈!」我一野跳左起身坐左落星瑤到。「你話唔俾?係呢到你喊破喉嚨都無人理架喇,所以邊到你話唔俾!」
 
說罷我雙手就向星瑤最怕「喞」的位置------腰部進發!
 
當我一野「喞」落去星瑤條腰個陣,佢即刻叫左出黎。
 
「哈哈哈......」星瑤笑到抖唔到氣。「救命呀,我投降喇!」
 
「算你啦!」於是乎我就停止攻勢,然後打算坐番係星瑤隔離。
 
點知星瑤趁呢個時候黎個大反擊,一野「喞」番落我條腰到!
 
「嗚呀哈哈哈哈!」我完全俾星瑤玩弄在掌心之中。
 
「知錯未知錯未!」星瑤笑得勁開心。
 
「得得得!」我裝哭道。「我知錯喇姐姐!」
 
「咁就乖!」星瑤滿意道。
 
玩完之後我地就各自沖左個靚涼,然後一齊坐左係張床到睇電視。
 
不過唔講大家唔知,原來台灣有幾個電影台,而且佢地播既片仲要係d出名既近年電影,就係似「mission impossible 4」咁,真係睇到你唔想訓。
 
不過由於我同星瑤今朝好早起身,當然就已經好攰,所以睇左陣我地都係決定訓。
 
於是乎我走番落去地下個被鋪到訓,而星瑤就好開心咁訓張雙人床。
 
就係我左右滾動準備入睡既時候,突然有一雙手從我腰間冒出!
 
我立即轉過頭一望,原來係星瑤落左黎攬住我。
 
「傻妹,做咩有床唔訓走黎攬住我呢?」我成個身轉左過去攬番住星瑤,然後撫摸著她的頭髮。
 
「家樹......」星瑤微微抬頭仰望著我。「唔好離開我啊,好無?」
 
「俾你攬到咁實,我又走得去邊呢?」我笑說。
 
「咁......」星瑤諗左一諗。「不如你今晚......陪我一齊訓?」
 
嗚呀!我得米喇!
 
「好!」我答應道。
 
「嗯!」星瑤微笑道。
 
於是乎我地就番番上張床,然後星瑤就攬住我漸漸睡著了。
 
望住眼前呢個可人兒,我真係好想保護佢一輩子。
 
咩阿彥個d,屌,理撚得佢啦。
 
就係咁,我都開始進入了夢鄉。
 
嗅著星瑤的白蘭花香味,令我個心變得安靜下來,甚至靜得整個世界只剩下星瑤一人。
 
結果第二日,我同星瑤都訓到王朝八晏先起身。
 
我微微瞪開雙眼,就看見星瑤甜甜的睡了在我面前。
 
她的髮尾、她的眼簾、她的臉蛋、她的嘴唇,每一樣東西都仿似是上帝特意精心打造的致愛。
 
究竟,呢個小美人係咪天使派落黎送俾我既禮物呢?
 
如果係既話,我諗呢份會係我呢輩子以收過最好,最好既禮物。
 
我一直欣賞著這個可人兒,不知不覺間星瑤漸漸睡醒了。
 
她微微瞪開眼,然後就望到我望住佢。
 
於是乎星瑤立即瞪大雙眼,然後紅都面晒咁講 : 「你...你一直望住我訓覺?」
 
「哈哈,」我笑說。「有個咁靚既女朋友訓左係我隔離,好難唔望喎小姐!」
 
「......」星瑤害羞的移開眼神。「大傻瓜。」
 
「嘩!」星瑤企左係床上面望向出面既景色。「家樹快D黎睇!」
 
我緩緩企起身望向星瑤視線的方向,然後就見到一個美麗的景色。


 
「真係好靚!」我頓時感到身體充滿力量!
 
「咁......」星瑤望住我奸笑左一下。「我靚D定出面個景靚D?」
 
「你想聽真話定假話?」
 
「嗯......真話!」
 
「咁就梗係我靚d <3」
 
「......食屎啦你!」
 
我地梳洗好之後就出左去飲茶食點心,然後就往墾丁既其中一個旅遊景點------國立海洋生物博物館進發!
 
國立海洋生物博物館,簡稱海生館,係一個類似海洋公館咁既地方,不過惟一唔同既就係呢到並無機動遊戲玩,只有一個個既海洋展館供遊客觀賞。
 
由於今日真係超好天超猛太陽既關係,我同星瑤淨係行過去都已經出晒汗。
 
「好熱啊~~~!」星瑤苦叫著。
 
淨係著左件灰色背心出黎既星瑤,再加埋身上面既汗水,真係好好好好誘人!
 
但亦都係因為咁,每當有男人行過星瑤隔離既時候都會望實佢,有d仲會仆街到望住星瑤對波!
 
「星瑤,凍呀呢到,著番件衫啦!」好彩小弟我一早準備左件深藍色拉鍊衛衣姐!
 
星瑤望住我,然後放左隻手係我額頭上面。
 
「家樹啊......」
 
「嗯?」
 
「你......」
 
「嗯嗯?」
 
「你......無病啊可?」
 
去到海生館買完飛之後,我地就係門口影左一張相,然後就開始遊覽。


 
由於整個海生館可以特別著筆既地方並唔多,所以我就廢事寫咁多喇,送俾大家一d圖仲實際啦。




 
不過值得一說既就係,我係裡面間紀念品店買左一條勁似「天空之城」既夜光頸鍊,真係超靚!
 
買完之後我已經急不及待戴左上身,然後就同星瑤拖住手繼續暢遊展館。


 
我地行完之後,都已經成5點幾。
 
正當我地企左係正門前苦惱緊接下來有咩節目既時候,突然有個出租車司機過黎R水吹。
 
「hello,你們想去哪裡?」
 
「我們也不太清楚啊,」我笑說。「你有沒有一些好地方給我介紹一下?」
 
「哈哈,那就當然有喇!」司機回應。「來墾丁的人,大多數都會去餓鑾鼻看日落!」
 
「下?」我不解咁講。「嗯撚b?」
 
「餓鑾鼻呀!」星瑤笑得合不攏嘴。「聰明仔!」
 
喔!原來係個個燈塔!
 
「要看就快點上車喇,快日落了!」司機催促道。
 
我同星瑤對望了一眼,然後就有共識咁一齊講 : 「好!」
 
於是乎我地就坐左上車,啟程往目的地。
 
此時我抬頭仰望,發覺橙黃色的落霞已經開始漂染整個天空。
 
***
 
「這裡就是了!」司機叔叔勁好禮貌咁講。「再見!」
 
說罷出租車就馳騁而去,消失於馬路轉角口之中。
 
「快D行啦,太陽就黎落山喇!」星瑤連忙抓著我的手,然後往山頂的燈塔奔跑。
 
好彩岩先個司機識得頭搖又尾擺,所以我地兩個總算趕得切係日落前跑到上去山頂!


 
我地搵左一個靚位坐低,然後彼此挨著膊頭欣賞這個迷人的橘紅色太陽。
 
望住眼前呢個畫面,我就攞左部手機出黎,諗住將佢永久捕捉於記憶卡內。
 
點知就係我按下快門的一刻,剛好有一粒流星飛過!


 
「嘩!」星瑤同我一樣都表現得好驚喜。「家樹,係流星啊,快d許願啦!」
 
於是乎我地立即閉上眼,心中默默唸出自己的願望。
 
「你許左咩願?」星瑤好奇地望著我。
 
「嗯......」我裝作思考。「講出黎好似會唔靈架喎!」
 
「講啦講啦~~~」星瑤撒嬌地打著我手脾。「家樹~~~<3」
 
「唉好啦!」我裝作沒好氣道。「我既願望就係,」
 
「希望流星少女永遠都可以留係我身邊。」
 
星瑤聽完之後頓時愣了,然後眼神中不斷流露出一種我唔係好明既感情。
 
「做咩呀你,呆晒咁既!」我笑笑口咁捏住星瑤的臉蛋。
 
「家樹......」星瑤感動地望著我。「你要知道,流星雖然燦爛美麗,但卻會一閃即逝架。」
 
「下?」我不解道。「咁你又唔係一粒流星,唔會識閃走架麻!」
 
「哈哈,又係啊可!」星瑤微笑著。「我又唔係一粒流星,又點會識閃走呢。」
 
「咁你又許左咩願?」我反問道。
 
星瑤聽完之後諗左一諗,然後突然將身體哄前,吻了我臉頰一下。
 
「?!」我被呢個突如其來的kiss搞亂了思緒,臉一下子就紅了起來。
 
「嘻嘻~~~<3」星瑤莞爾一笑。「呢個係秘密~~~!」
 
日落西山,夜幕漸漸取締黃昏,於是乎我同星瑤都啟程番去旅店。
 
「家樹,我好眼訓……」係公車上面星瑤挨著我的膊頭道。「不如番到去直接訓覺?」
 
「之但係我地仲未食野架喎!」我笑了一笑。
 
「我有計!」星瑤眼仔碌碌咁望住我。「一於買外賣!」
 
「咁……你想食d咩外賣?」
 
「我想食麥當勞!」
 
「下?!」
 
結果,我地真係走左去m記買外賣番去食,哈哈……
 
可能你地會話,去到外國旅行都仲食頹麥真係on99!
 
本來我同你地都係同一個諗法架,不過依家我就對此完全改觀!
 
首先,台灣麥記d包多款得黎又大又足料,真係同香港個d唔可以相提並論 ;
 
第二,佢整個餐既價錢只不過係香港既四分之三,食起上黎都順氣d ;
 
第三,亦都係最重要既野就係,佢跟餐個薯條可以免費轉大沙律!
 
對於我呢種成痱滋日生既人黎講,呢個簡直係天大既喜訊!
 
食完之後,我同星瑤就走左去沖涼訓覺,抖足精神準備迎接墾丁最後一天的行程,亦都係我最期待既------
 
陽光與海灘!
 
點解我會最期待?
 
你懂的,嘻嘻嘻哈哈哈!
 
***
 
翌日早上。
 
「家樹!」睡意朦朧之間,星瑤突然一下子壓左落我身上同我打招呼。「早晨呀!」
 
由於我無預料到呢一下,所以俾星瑤壓到氣都咳埋。
 
「咳咳咳……」我抖番順條氣。「星瑤小姐,你做咩事咁興奮呢?」
 
「因為今日好好天!」星瑤指向窗外。
 
於是乎我探頭出去一望,天空萬里無雲,比昨日的更蔚藍,更遠闊。
 
「所以亦都即係話,今日我地可以盡情咁去沙灘玩喇!」星瑤坐左係我身上un左一下。
 
哈哈哈,果然係天助我也!
 
我地揀定左去南灣沙灘之後 (墾丁有幾個沙灘) ,就開始執野準備出發!
 
「家樹!」星瑤換完衫之後從廁所走出黎。「你覺得好唔好睇?」
 
今日既星瑤戴上了一頂闊邊有花的草帽,上身穿了一件白T,下身則著了一條粉色短裙。
 
整體望下去,星瑤洋溢著一種夏天的味道,但同時又不失女性的溫柔,簡直係一絕!
 
不過最絕既係咩?就係星瑤件T恤底下若隱若現的粉藍色比堅尼,同埋個對C CUP既炸彈!
 
「好靚,你著得真係好靚!」我誠懇道。「好啦,咁我地行啦!」
 
「等等!」臨走前星瑤突然拿出一支太陽油。「幫我搽埋先!」
 
「咩話?!」我腦海中即時浮現出好多唔應該出現既情節。
 
「快d啦!」星瑤一臉興奮咁遞左支野俾我,心中完全不存歪念!
 
就係我接完支野發緊呆既時候,星瑤突然係我面前脫去身上的白T!
 
然後展露係我面前既,就係一對充滿彈性的山嶺。
 
我紅都臉晒咁目視著星瑤的胸口,一時間答不出話來。
 
片刻,星瑤終於注意到我不軌既視線,於是乎即刻明白我諗緊咩。
 
「……喂啊!」星瑤立即用雙手掩著自己的胸。「衰人你望夠未啊!」
 
「對…對唔住!」我把視線移開,口都窒埋咁講。
 
星瑤轉了身背面向我,然後帶點害羞道 : 「快…快D搽啦!」
 
「哦!」於是乎我唧左D油落隻手心到,然後淆晒青咁伸向星瑤背脊。
 
老老豆豆,雖然我攬過錫過星瑤好多次,不過呢種肌膚既接觸我一次都未試過!
 
搽左落去之後,我就幫星瑤塗得勻循D。
 
唔知係咪搽左油既關係呢,星瑤雪白既背部真係好滑好滑!
 
「你搽完未姐!」星瑤繼續係好怕羞咁講。
 
「搞掂!」我說。
 
於是乎星瑤就一野搶走我手上支油。
 
「淨低既我自己黎得喇!」說罷星瑤就跑左入廁所,然後「呯」一聲閂左道門。
 
……哈哈。
 
我地搽晒油之後,就正式出發了!
 
經過岩先見到D咁hot既野,再加上俾個猛烈太陽曬住之後,我一早就已經流晒汗,恨不得即刻跳入水!


 
「到喇!」一落車就已經望到個靚靚海灘。「快d行啦星瑤,我就熱死!」
 
就係我地差兩三步行到沙灘個陣,無啦啦有個呀叔走過黎。
 
「hey帥哥美女!」個呀叔叫道。「要不要玩水上活動?」
 
「不用喇不用喇!」我拿拿林拖住星瑤。「我們自己玩可以了!」
 
點知條友仔不但只唔行開,仲要繼續阻住我講 : 「就玩一項活動啦好嗎?」
 
於是乎我嬲到企左係到,然後用廣東話對住佢大喊 : 「所謂好狗就唔攔路,我依家熱到就黎想死,你乖乖地就同我行開,唔好阻住我游水!」
 
「算啦家樹!」星瑤係後面拉住我。「不如就玩一樣啦!」
 
「但係佢擺明食水深架喎!」我反駁。
 
「算啦,一次半次!」星瑤整個人哄到我的手臂上。「咪當留低多d回憶囉,係咪先~~~?」
 
唉,星瑤你都咁講到囉,我投降!
 
「唉好吧!」我對住條呀叔喝道。「就一項吧!」
 
「那你想玩什麼?」呀叔攞出一本menu。
 
「就這個吧!」我求其指左落一個叫「飛船」既活動到。
 
係呢個時候,我都仲以為呢d水上活動係好廢好悶好呃錢。
 
不過到頭來,原來係我低估左水上活動既能力……
 
「呀~~~!」一段又一段段淒厲的慘叫聲接連在海中心發出。
 
放心,依家墾丁個太陽猛過碌蔗,所以一定唔會有鬼!
 
就算有,都一早曬q死左。
 
既然係咁,究竟係邊個亂叫緊呢?
 
屌,呢個問題咁簡單……
 
之唔係我馬家樹囉!
 
事關我同星瑤依家,正身處係一架被水上電單車用麻繩扣住既氣墊飛船上,然後係汪洋大海高速奔馳中。
 
老老豆豆,如果俾我知道邊條仆街發明呢樣玩意出黎既話,我一定會殺左佢!
 
一黎,架野行得勁快,我要用盡九牛二虎之力先捉得實 ;
 
二黎,架野係水上邊飄移緊個陣,會係咁撞落個水面到,搞到我上下顎係咁冚埋一齊,牙都痺埋 ;
 
第三,成架野上面都係沙,所以同肌膚摩擦個陣就會撞到損晒。
 
由於星瑤係訓係到玩,而我係企係到玩,所以佢唔洗點用力,而我就要連奶力都用埋先令自己唔趺落海。
 
點知就係我一個分心既時間,架飛船突然魯芬急轉灣,搞到我成個拋左出去!
 
「屌!」我完美咁直插左落個海到,成身即刻濕撚晒,仲要飲左幾啖鹹水。
 
好彩本人識游水 (其實一定要著救生衣) ,所以一路係到撐水,終於都等到架船番黎接我。
 
玩完之後,我同星瑤就上番岸。
 
「嘩!真係痴線!」我成個人攰到即刻趴左係沙灘上。
 
「有無咁誇張呀孱仔家樹!」星瑤睇起上黎仲係中氣十足。
 
「你又唔係企住玩,梗係無事啦!」我反駁道。「雖然整體黎講都幾好玩既,哈哈。」
 
「咦?!」星瑤望住我個陣突然驚訝道。「你條鍊個粒石唔見左!」
 
啊,唔記得同大家講,由於我唔捨得除左條靚靚頸鍊,所以連玩緊個陣都戴係身。
 
於是乎我低頭一望,頂!真係唔見左!
 
一定係頭先跌落海個下衝擊力太大沖甩左!
 
「唉……」我一臉失望咁握著剩下落黎既黑色繩子。「買左一日咋……」
 
「唔好唔開心啦!」星瑤一野攬落黎,成個波餅壓左落我手臂上。「不如……我地出去玩下水?」
 
都未等我回應,星瑤就已經扯左我過去海邊。
 
「食屎啦你!」星瑤一野將d水濺落我臉上。
 
「靚妹,夠膽死整我?!」我裝作兇惡道。「你死得喇!」
 
說罷我就作出還擊,將水撥向星瑤。
 
星瑤就係有一種特殊能力,可以令我覺得好開心,忘記一切負面情緒。
 
玩左一陣,我地就已經晒到黑晒,所以就決定番上水休息下。
 
點知就係呢個時候,我突然感到隻右手好似俾鞭左一下咁!
 
「痛!」我立即將手從水中攞起,然後就發現右手手臂處出現了一條頗長既紅色痕!
 
呢條痕漸漸浮腫起上黎,紅色亦越來越明顯。
 
於是乎我就行上水,然後遞俾星瑤睇。
 
「你咁樣係俾水母電親呀!」星瑤焦急道。
 
「下?乜原來就係咁架?」我笑說。
 
事關我由細到大都未試過,所以變態d咁講我有時都會想試一下。
 
「你呢個大傻瓜仲笑?!」星瑤一臉關切。「快d去搵乾淨水沖下啦!」
 
本來我地諗住搵d沖洗區洗傷口,點知原來係台灣沖身要俾錢。
 
「算啦,番到旅店先再搞啦!」我建議道。
 
「但係你痛唔痛啊?」星瑤仲係好擔心咁捉住我手臂。
 
「放心啦,係岩先第一野痛姐,依家只不過係痺痺地!」我笑說。
 
經過多番討論之後,星瑤終於都同意呢個方案,於是乎我地就直接搭的士番左去。
 
一番到去旅店個服務員見到我個傷口,就立即遞上白醋一杯。
 
搽左一陣之後,傷痕就開始退腫。
 
「好彩無事咋!」星瑤一臉安心咁攪住我。「對唔住啊家樹,如果唔係我叫你玩飛船,你就唔會整爛條頸鍊 ; 如果唔係我拉你出去玩水,你就唔會俾水母電傷……」
 
「我邊會咁易有事!」我安慰星瑤道。「我諗係個條仆街呀叔同埋隻水母妒忌我有得同個靚女去旅行,所以想教訓下我姐!」
 
「總之你依家無事就好……」星瑤望住我。「有d野,前一分鐘可能仲係身邊,但下分鐘就會失去架喇!」
 
「傻妹,唔洗咁擔心啦!」我雙手搭著星瑤膊頭。「我應承你,我唔會俾自己有事,一定會繼續陪到係你身邊,好無?」
 
「只係怕有事既……」星瑤欲言又止。
 
「只係怕咩?」我問道。
 
「無事!」星瑤笑了一笑。「拿你記得你應承過我架,點都唔可以俾自己有事!」
 
「知道喇星瑤大人!」我裝作士兵敬禮道。
 
休息左一陣之後,我地就出左去周圍行街,然後食晚飯。
 
經過一間飾物店個陣,星瑤好似發現到寶物咁突然走左入去,然後過左一陣就買左一袋野出黎。
 
「咩黎?」我笑著咁哄頭向前。
 
「唔話你知~~~!」星瑤賣關子咁一手將我個頭推開,然後笑笑口望住我。
 
「車!」