【我在IG Shop買了一個流星少女】: 第六章(2)
時間匆匆就過去，眨眼間暑假已經完結，話咁快又到左開學日。
番到班房，見到一眾久違的臉孔，心情都即刻開朗番不少。
「家樹！」阿溢衝埋黎。「一陣間on show 加油！」
「得啦長氣！」我搭住阿溢膊頭。「我唔會搞臭你個朵既！」
然後我地就打算落去禮堂準備一陣既開學禮表演。
就係我地轉彎出課室既時候，剛好就碰到係隔離班走出黎既紫鈴。
「早晨啊阿溢家樹！」紫鈴的心情睇黎都平復番。「一陣大家都要比心機！」
「嗯！」阿溢講完之後突然碌大左對眼。「死火！我好似漏左d功課係屋企！」
「唔撚係掛？」我恥笑道。「中六喇，大個仔喇，仲成個小學雞咁！」
「屌你啦，我琴晚先攞出黎亂做架麻，做完鬼記得收番好咩！」阿溢繼續說。「我入番班房打個電話俾老母先，你地落去啦唔洗等我！」
「okay！」
於是乎我同紫鈴兩個就行去禮堂先。
「你好似無咩事喇喎。」落緊樓梯既時候我向紫鈴說。
「咁唔通成日都要愁眉苦臉咩，哈哈！」紫鈴笑說。「要走既人，留都留唔住 ; 阿彥佢唔係屬於我既呢個事實，遲早都要接受。」
「嘩……好犀利……」我敬佩道。
估唔到睇起上黎弱質纖纖既紫鈴，灑脫起上黎居然可以比我呢個男人黎得更豪爽。
「你咁樣係讚緊我？」紫鈴的笑容依舊能溶化我的心。
「er……係掛，哈哈！」我難為情道。
開學禮好快就完左，我地既表演非常成功，獲得好多學生老師既掌聲。
尤其係當中我同紫鈴對戲，我叫紫鈴唔好走，然後上前攬住佢個段，更加係震攝全場。
「屌你岩先正啦！」小息個陣一個同班既男生走黎拍我膊頭。「有得攬女神，仲要攬得咁實！」
這時我回想起來，先發覺原來我對紫鈴已經無左個種陌生感，所以攬起上黎都自然左好多。
「做戲姐做戲姐！」我慌忙解釋道，免得成為其他男士既公敵。
「掂呀！好掂呀！」阿溢勁興奮咁箍住我條頸扯我埋去。「岩先做完之後我望到miss chan (劇社導師) O撚晒嘴個樣，不知幾爽！」
「真係架？！」我都笑左出黎。「條仆街睇死我地做唔到好戲出黎，依家一野剝左佢排牙真係心情朗！」
阿溢叫晒大部份劇社社員過黎，然後企左上張枱大喊 : 「為左慶祝我地空前成功，一於今晚就去食打邊爐賀一賀佢，大家話好唔好！」
「好！」聚人狂歡道。
於是乎放左學之後大家決定先番去換衫，然後再係觀塘地鐵站集合。
「番黎喇！」我勁快衝左番屋企。
「呀仔番黎喇？」老母從廚房處探頭出來。「乜你仲要出街咩？」
啊，係到同大家講番先，事關我無同老豆老母講到星瑤個單野，所以依家佢地都仲以為我同星瑤有聯絡。
「係呀，劇社慶功！」我一路換衫一路講。
「唔好玩咁夜喇聽日仲要番學！」老母說罷就遞左一筆錢俾我。「過兩日我出Trip喇，你地自己照顧自己喇！」
「嗯，知道喇。」我說。
其實我同嘉琪一早都慣晒，老豆老母一個做物流一個做導遊，成日都唔會留係香港。
加上佢地又咁中意去旅行，所以平時可以見到佢地既時間就更加少之有少。
去到地鐵站，就見到紫鈴企左係到。
「咁快手既你？」我笑著走埋去。
「咁你都好快手姐！」紫鈴笑住回答。
我地兩個一直閒聊著，不經不覺其他人都陸續黎晒，然後我地就上左去打邊爐。
「為左慶祝我地演出成功，大家乾杯！」阿溢大叫。
我地每人攞住一罐啤酒，和應地暢飲起來。
食完野之後傾到咁上下，大家都開始見攰。
於是乎我地就決定埋單番歸，擇日再戰。
「喂家樹！」阿溢飲左三四罐啤酒，都開始發酒癲。「你唔洗陪我架喇，送紫鈴番歸啦！」
「痴線，佢自己識番去架啦！」我說。
「你唔係要一個飲左酒既靚女自己行番去下話？！」阿溢睥住我講。
……Okay you win！
我轉過頭黎望住紫鈴，發現佢個樣都有少少醉。
天啊，究竟你又飲左幾多罐啤酒……
「喂，我送你番去啦！」我說。
「嗯？」紫鈴望一望我。「嗯，好啊。」
同其他人道別之後，我同紫鈴就徐徐往藍田的方向走去。
一路上紫鈴都無出聲，只有微微搖擺地前行著。
「紫鈴？」我受不了呢種沉默，所以首先開聲。「你無事啊麻？」
「嗯，無事。」紫鈴的語氣變得好冷漠。「可能係飲得太多，個頭有d痛姐。」
「你飲左幾多罐啊？」
「嗯……5罐？」
「嘩，你借酒消愁啊？」我苦笑道。「對身體唔好呀！」
「借酒消愁？哈哈！」紫鈴突然大笑起上黎。「就算我身體唔好咁又點？依家都唔會有人緊張架啦！」
「紫鈴……」我望住佢呢個失落的笑容，心裡面突然覺得好痛。
原來紫鈴佢同我一樣，根本就未放得低。
咁又係既，感情呢家野，邊有話想放就放到。
「你知唔知呀，阿彥佢對我好好架！我病左既時候，佢會準時提我食藥，有次仲買左碗粥係樓下等我……」紫鈴越講就越傷心。「不過呢種好，就好似係哥哥對妹妹咁，而唔係愛情……」
「但點解阿彥會對你咁好既？」我不解道。「照你所講，佢應該唔係中意你，而係中意星瑤架。」
「點解？」紫鈴聽罷嗤笑道。「我都想問下佢，點解要對我咁好！如果阿彥對我差d既話，我咪會自動放棄囉……」
阿彥呢條友究竟係到諗緊乜？我真係了解不透，理解不能。
「！」就係呢個時候，紫鈴突然停左係到，一臉痛苦咁望住隻腳。
我回頭走過去紫鈴身邊一望，就發現佢雙腳腳踭都損晒！
「嘩！」我驚訝道。「發生咩事？」
「無野……新鞋挖腳姐……」紫鈴續說。「我ok架，繼續行啦！」
紫鈴行左一步之後，又痛到企左係到。
唔知點解，我呢個時候居然有如此既勇氣。
「喂，」我望住紫鈴。「除左對鞋佢，我背你。」
「下？！」輪到紫鈴驚訝道。「痴線啦，洗咩呀，慢慢行咪得！」
「何小姐，你咁樣慢慢行法我今晚唔洗訓覺架喇。」說罷我就半跪在地上。「快d除鞋上黎啦，唔好婆婆媽媽！」
「咁……」紫鈴思考了一會兒。「咁拜託晒喇。」
紫鈴用雙手捉起對鞋，然後整個人挨左落我背部上面。
「一，二，三！」我一鼓作氣就背起了紫鈴。
紫鈴個頭放左落我左肩上，佢既頭髮不時被風吹起，使我嗅到一陣陣誘人的牛奶香味。
「唔該晒你…….」紫鈴雙手擁著我的頸。「我會唔會好重？」
「傻既，」我笑說。「上次同魯芬跳舞佢整親隻腳，我都係咁樣咩佢番屋企咋麻！你呢d重量，最多咪重魯芬少少！」
「食屎啦你！」紫鈴勁大力捏我的臉。
「痛痛痛！」
不知不覺間，我地已經來到紫鈴家樓下。
「咁你自己小心d喇！」我拍了一拍紫鈴個頭。「聽日見啦，byebye！」
就係我轉身準備離開既時候，紫鈴突然大叫道 : 「家樹！」
「嗯？」我拎番轉面。
「其實呢……」紫鈴支支吾吾道。「你有無聽過一句成語？」
「邊句？」
「塞翁失馬。」
自那一晚之後，我同紫鈴既關係好像變得不同了。
係學校既時候，我地多左好多以前無既交流，比如小息個陣出走廊傾計，午膳既時候一齊出外食lunch咁 ;
而放學之後，我地就會用wtsapp聯繫，而且有時仲會傾到深宵，然後在不知不覺間睡著 ;
週末假日既時候，我同紫鈴有時就會出下街放鬆心情，有時就會去自修室準備黎緊既DSE。
你問我點解會發生呢種變化？
嗯......我都唔可以確實回答你。
我諗......係因為大家都想找尋一個心靈又好，身體又好既依靠？
又或者，係因為我同紫鈴都有同一個經歷，所以惺惺相惜？
定抑或係因為......
每當一諗到呢個位置，我就會強迫自己唔好再思考下去。
事關我心裡面仲係好掛住星瑤，所以暫時都唔會容納到多一個人。
而且，如果依家我同紫鈴開始一段關係既話，我唔可以確定呢個係愛情。
咁樣既話，對我，對星瑤，對紫鈴，對阿彥任何一個人都唔公平。
但人類呢種生物，往往就係愛犯賤。
明知道唔可以超越朋友既界線，卻仍然會繼續成為對方的密友。
某一個上學天的清晨，我同紫鈴約埋一齊番學。
「赫嗞！」紫鈴係我身邊打左個大噴嚏。
「何小姐，一早叫左你著多件衫架啦！」我除下身上的冷衫遞俾紫鈴。「拿！」
「唔該晒~~~」紫鈴拋左個書包俾我，然後咋咋林著起件衫。「Wu~~~暖晒！」
「啊你真係當我工人咁駛架喎！」我一野將個書包哄番俾紫鈴。
「嘻嘻，唔該晒你囉，家樹~~~！」說罷紫鈴突然撓住我隻手。
「嘩嘩嘩，你咁樣撓住我隻手番學，即係想我俾你班兵仔斬死姐！」我督一督紫鈴塊面。
哈哈，軟林林，好可愛。
「咩喎，咁人地凍啊麻！」紫鈴更靠近咁整個人壓左落我隻手到。「依家係咪唔俾先！」
「女神叫到囉，我呢個做兵仔既梗係樂意奉陪啦！」我笑說。
「我講左幾多次，都話我唔收兵架！」紫鈴伸手出黎捏住我塊面。
「你隻手好凍啊！」我立即打了個冷震。
「嘻嘻......」紫鈴奸笑左一下。「不如我請你食d野？」
「吖？！」我驚嚇道。「拿拿拿，唔好呀你！」
「洗咩咁驚喎，嘻嘻~~~！」紫鈴伸出雙手，瞄準著我臉部衝過黎！「等我請你食凍柑啦！」
「嗚啊！！！~~~~」我大叫左一聲，便往前拔足狂奔！
迎面而來的冷風不斷打在我臉上，使我快要瞪不開眼。
原來......咁快就到左冬天喇。
12月的中六校園生活，既完了陸運會，又完了球類比賽，剩下迎接我們的只有數月後既公開試。
原本我以為大家都一定會進入了作戰狀態，班房裡想必只會剩下書本的聲音。
點知當我一入到班房，就發現個個都係到討論緊D野咁，整個氣氛異常高漲。
「乜咁遲架你！」阿溢把我拉到座位處。
「嘩，今日搞咩呀，個個都好high咁既？」我不解道。
「咁你都唔記得？！」阿溢無奈地嘆了一口氣。「今日係決定畢業旅行地方既日子呀！」
畢業旅行！
係喎，點解咁重要既野我都唔記得左！
兩日一夜無老師看管，成級同學想玩乜就玩乜既冬季宿營！
「係喎！！！」我的情緒立即變得興奮起來。「咁大家諗定左去邊未！」
「未呀，大家都有好多意見，有d人話想去西貢北潭涌，又有d人話想去摩星嶺，」阿溢回答道。「不過，最多人揀既地方都唔係呢d。」
「嗯......」我大概都估到後面既說話。「咁係邊到？」
「係長洲。」
午膳既時侯，我將呢件事同左紫鈴講。
「唔好咁擔心啦，話唔定最後會揀左黃宜洲呢！」紫鈴牽強咁笑左一笑。「雖然我地個班都係揀長洲......哈哈......」
「其實都唔會有d咩尷尬既，」我吃著一口譚仔。「反正星瑤都唔係個到。」
紫鈴聽到呢句之後，臉色變得略為沉鬱。
「家樹，」紫鈴突然開口道。「其實佢地都走左成三個月啦，點解你唔試下接受呢個事實？」
「我幾時無接受到？」我反駁道。「如果我係無接受到既話，乜依家仲可以咁冷靜同你傾計咩？」
「我意思係話，接受呢個事實，然後試下放低佢。」紫鈴認真咁講。「如果佢地一直都唔番黎既話，唔通你就要背住呢段感情成世咩？咁樣咪盞令自己辛苦。」
「我唔覺得辛苦喎。」我繼續食麵。「呢d野唔係話想忘記就可以抹得走，唔通你隨便就可以忘記晒阿彥同你既回憶咩？！」
「我唔係叫你忘記段回憶，我係叫你放低段回憶！」紫鈴不甘道。「過去既事記就一定記得，但當你學識放低之後就唔會再執著，回想起黎會係窩心一笑，而唔係耿耿於懷！」
「夠喇，食野啦。」我冷冷道。
「家樹啊......」紫鈴打算繼續講落去。
唔知點解，此刻我既怒火莫名其妙地燃燒起上黎。
「我放唔放低又有咩所謂？」我帶住怪責既語氣反問道。「你咁著緊做咩？」
「我......」紫鈴的臉色變得非常失望。「無野喇咁。」
食完野回校既路上，紫鈴一直都對我不瞅不睬，此時我先察覺自己岩先既說話似乎太刺耳了。
「sorry啊紫鈴，我岩先唔係想罵你......」我試著道歉說。
「嗯，得架喇。」這次輪到紫鈴冷冷道。
唉......我又做左d咩好事出黎......
***
畢業旅行的選址經過投票之後，最終決定都係長洲。
始終呢個結果都係大勢所趨，所以我對此早已有了心理準備，並唔覺得太震撼。
反而依家呢我為之著緊同擔憂既，就係紫鈴對我既態度......
自從個日中午膳我道出了那番說話之後，紫鈴就變得冷言冷語。
然後無論我如何道歉，如何哄氹，紫鈴始終都係唔原諒我，絲毫都無理睬過我。
係呢個關係之下，我同紫鈴既交流漸漸變得越黎越少，lunch無再一齊食，wtsapp無再搵大家，街都無再一齊出。
所以話人真係好犯賤。
當我好似依家咁樣失去紫鈴既時候，我竟然慌張起上黎。
呢種感覺，就同失去星瑤既時候一模一樣。
如果係咁既話，究竟我中意緊既係邊一個？
係曾經既星瑤，定係現在既紫鈴？
定抑或係......兩個都中意......？
唔得唔得，我唔可以俾自己再諗落去！
***
話咁快就黎到旅行前最後一個上學日。
隨住放學鐘聲響起，就意味住各位要進入「旅行作戰狀態」！
「BBQ team！」阿溢企左係枱上面指揮大隊。
「到！」一部份人和議道。
「呢到係清單，記得買齊野，聽日準時係中環集合！」
「收到！」
「活動籌備team！」阿溢繼續喊道。「聽日要用既道具今晚記得帶齊！」
「收到！」
望住呢個情景，唔知點解內心突然有種莫名其妙既高漲感不斷湧上黎，使我非常亢奮！
東指西派左一大輪之後，大家就徐徐收拾書包離開學校，為明天的旅行作好準備。
與阿溢回家既路程上，我地不斷係到傾談聽晚的情景。
「一於2點幾去食宵夜！」阿溢笑說。
「食佢老味！」我舉起右手。
「好！食佢老味！」阿溢跟住我舉高手。
突然一陣寒風吹過，使我立即放低手環抱自己。
「嘩屌，洗唔洗咁凍......」我打冷震道。
「聽講黎緊呢兩日仲凍！」阿溢補充說。「而且我地仲要去離島，一定跌多兩三度！」
「唔係掛，咁大整蠱？！」我說。
就係呢個時候，我腦海中突然掠過紫鈴冷得顫抖既畫面。
於是乎我立即攞左部電話出黎禁入wtsapp，然後傳送了一段訊息俾紫鈴。
我 : 紫鈴，黎緊呢兩日好凍啊，執衫個陣記得帶多件褸，如果咪冷親就唔好。
過左無幾耐，紫鈴就覆番我。
紫鈴 : 我帶唔帶又關你咩事？你咁著緊做咩？
睇到呢一句，我內心先感到一陣酸澀，然後取而代之既係一股不忿。
無錯，呢句的而且確係我講先既，但我之後都講左對唔住啦係咪先，洗唔洗記係心裡面咁耐！
我無mood咁徐徐覆了一句 : 哦，咁算啦。
紫鈴 : 哦。
搞錯，呢d算咩態度！
番到屋企之後我就開左電腦同阿溢打lol，打完就去左煮飯俾嘉琪食。
食飯既時候，我發覺嘉琪一直眼甘甘咁望住我。
「馬嘉琪，你做咩係咁望住我。」我不解咁問。
「哥啊，做咩呢你近排好似成日都悶悶不樂咁既？」嘉琪關懷道。「有d咩事唔怕同我講喎！」
「傻既，咪又係咁。」我吃著一口白飯。
咦咪住......乜我有悶悶不樂咩？
「嘉琪，你覺得我唔開心係幾時開始既事？」我好奇道。
「嗯......我諗係上個幾星期掛！」嘉琪思考著。「總之我見你少玩左手機，少出左街，成個人好似無左目標咁啦！」
目標嗎......
此時我腦海中突然浮過紫鈴甜笑的樣子。
無可能既無可能既，密友姐！
嗯，密友姐。
「能成為密友大概總帶著愛？」