【我在IG Shop買了一個流星少女】: 第六章(1)

第六章
 
        每一個由鋼琴鍵發出來的單音色，經過彈琴者雙手雕磨之後，仿佛變成了一串流水，深深的打在我心內。
 
        聽著呢首如此賦有韻味既《沙龍》，我身體未經大腦同意就已經緩緩站了起來，朝著聲音的方向前進。
 
        隨著琴音由微弱轉為清晰，我來到一個住宅區。
 
        呢到就好似一條村莊咁，由十數間全白色三層高大屋連成一個小型網絡，俾人一種難以駕馭的高尚感覺。
 


        我在路上一直走著，回過神來既時候發覺自己原來已經身處係鋼琴聲的正下方。
 
        於是乎我停左係呢幢白屋面前抬頭仰望，然後就從二樓既露台透視入去，看見一個正在彈琴的少女背影。
 
        係呢一刻，我真係好想好想呢一個女仔係星瑤。
 
        但好可惜，佢係黑色長髮而唔係啡色中髮。
 
        我一直望住呢個背影彈琴既動態，赫然發現佢同星瑤彈琴個陣既感覺好相似。
 


        嗯……算啦，睇黎我諗得太多。
 
        眼見又失去了一個線索，我都唔想再浪費無謂既時間聽歌，倒不如盡快搵番星瑤咪仲好。
 
        就係我準備轉身離開既時候，少女岩岩就彈完呢首歌，於是乎轉過頭黎望向窗外既景色。
 
        此時我先發現，呢個女仔好靚女，而且……
 
        仲有d熟口熟面。
 


        「我係咪識佢既呢？」我心想道。「唉算啦唔諗喇！」
 
        然後我就繼續我尋找星瑤既旅程。
 
        接下來又係一輪人肉搜索之後，我仍然係搵唔到星瑤。
 
        基本上全日我都係到不斷打俾星瑤同等佢電話，不過結果當然就係沒有如我所願。
 
        我沮喪地回到白色帳篷，四肢早就變得軟弱無力，只能夠任由身體攤在長椅上。
 
        「星瑤……」我的淚水從眼眶中不斷流出，然後大聲喊道 : 「星瑤！你係邊呀！我好掛住你呀！我好想見你呀！」
 
        我將心中想同星瑤講的說話一次過對住漆黑既大海爆晒出黎。
 
        然而，爆出黎還爆出黎，現實還現實，我始終都係搵唔到星瑤。


 
        尾班船最終都係會開出，我極其量都只會係當中既一個乘客，根本就什麼都改變不了。
 
        我拖著奔波了一整天的疲憊身驅回到家中，涼都唔沖就攤左係床上面。
 
        「唔通……」我打開手機的相簿，細看著一幅幅與星瑤的合照。「我就再無任何一種方法可以搵到妳？」
 
        失去了星瑤的日子，一點兒也不好受。
 
只剩下我孤獨一人的大屋，仿佛從來都唔係我既屋企咁，非常陌生。
 
        接下來既數天，我一大清早就會起身搭最早班次既船入長洲，然後直到明月掛在天上既時候，我先會搭尾班船番屋企。
 
        日日如是，不斷重覆。
 


        你問我點解唔解唔直接係長洲訓埋？原因好簡單。
 
        因為我害怕星瑤會無啦啦番左我屋企，然後苦苦等著我回家。
 
        時間一點一滴地過去，轉眼間就星期一。
 
長洲依舊人來人往，星瑤IG依然block左我，佢既電話依然無人接聽，家中依然沒有星瑤的笑聲，鋼琴少女亦再沒有出現。
 
        原來我……咩都做唔到。
 
        我無將呢件事同任何人講，除左係因為我唔知道應該點開口之外，更加係因為我唔知道可以同邊個傾訴。
 
        唔通要我同嘉琪講，星瑤佢一番到黎香港就著左草？！
 
        定係要我同阿溢講，星瑤佢同我好溫馨咁去左個旅行之後無啦啦走左佬？！


 
        咦咪住……我好似漏左一個方法未試！
 
        點解我咁耐都諗唔起呢樣野架呢……唔通，係因為我潛意識都係到逃避緊呢件事？
 
        但無辦法喇，我一定要咁做。
 
        於是乎我立即梳洗更衣，然後啟程奔往學校禮堂。
 
        「你一定要知道星瑤係邊啊……」我緊握著拳頭。「阿彥。」
 
        要搵到阿彥，最快捷既方法一定係從紫鈴著手。
 
        幸好今日係排戲既日子，所以我能夠立即回到學校搵佢。
 


        一上到禮堂，只見其他人都仲未番，只有紫鈴一人神情擔憂咁坐左係台邊。
 
「紫鈴！」我一路呼喚著紫鈴，一路向前走過去。
 
點知紫鈴見到我之後，居然焦急得整個人跳左落地上，然後望住我跑過黎！
 
「家樹！」紫鈴一衝過黎就捉起我雙手。「你一定要幫我！」
 
「嗯？」我不解咁講。「發生左d咩事？」
 
「我......」紫鈴行後左一步，一臉難以啟齒。「我想拜託你安排一下......俾我見星瑤。」
 
「......」老實講，呢一刻我真係唔知道應該點樣回答紫鈴。
 
紫鈴望著我呢個困窘既模樣，雙眼頓時瞪大。
 
「你......」紫鈴的聲線變得抖震既上黎。「你唔會係想同我講......星瑤佢唔見左架可？」
 
「點…點解你會咁講？！」我驚愕地看著紫鈴。
 
突然間，有一個荒唐的思想在我腦海中飄過。
 
拜託，千祈唔好俾我估得中，拜託......
 
「咁即係我估中左……」紫鈴絕望道。「我意思即係話，」
 
「阿彥佢同星瑤一樣，都唔見左。」
 
哈哈，睇黎我都係時候要去買六合彩了。
 
「阿彥唔見左係幾時既事？」我問道。
 
「上個星期二。」
 
果然，同星瑤唔見既時間一模一樣。
 
「咁你有無試過搵阿彥？」
 
「嗯。」紫鈴苦惱地點了一下頭。「不過我平時都只係靠電話搵佢，而且我淨係知佢住天水圍但唔知邊一忽，所以……係再無任何辦法之下，我先諗住搵星瑤問下，點知……」
 
「咁即係話我地連最後既線索都無埋……」我不忿地大力打了牆壁一下。「佢地兩個係咪玩我呀依家！」
 
「家…家樹……」紫鈴先係俾我嚇左一嚇，然後帶點惶惑道。「一定仲有其他辦法既！依家科技咁發達，搵兩個人出黎有幾難！」
 
「你講就易！」我大聲嗆紫鈴道。「你知唔知我已經搵左星瑤成個禮拜呀，結果呢？咪又係咩都無！」
 
紫鈴再次驚嚇得縮後一步。
 
「做人就唔好下巴輕輕講野唔經大腦，」呢一刻我心中對星瑤既牽掛唔知點解變成了一種憤怒。「你講到咁易搵，不如你依家就即刻搵俾我睇呀！」
 
「我...我……」紫鈴既眼眶仿佛開始變得濕潤。
 
「做咩唔出聲呀？」我冷血地一再追問下去。「成碌木企係到就搵到架喇？！」
 
「夠喇！」紫鈴突然間大叫了一聲，令我立即嚇得瞪大了雙眼。
 
「夠喇……」紫鈴不斷重覆著這句說話，聲線則越見哽咽。「你估我唔想搵番阿彥出黎咩？你覺得我呢個禮拜無盡力搵過佢咩？你覺得我唔攰架咩？」
 
「我……」我的理智漸漸恢復過來，使得我對自己剛才的態度而內疚。
 
「我好攰喇，我真係好攰喇……」紫鈴雙手垂下，低頭痛哭著。
 
望住眼前既紫鈴，我忽然覺得好心痛。
 
於是乎我緩緩踏上前，將紫鈴一擁入懷。
 
「對唔住啊……」我右手按在紫鈴頭上，緊緊咁抱住佢。
 
紫鈴並沒有反抗，只有伏在我胸前不斷係到喊。
 
呢一個畫面持續左唔知幾耐之後我地就分番開，然後紫鈴同我講左句「我去洗臉」之後就行開左。
 
「馬家樹，你究竟知唔知道自己係到做緊咩！」我為著剛才無故罵紫鈴同埋無故攬紫鈴呢兩件事而責怪自己。
 
過左一陣，其他人都陸陸續續番到黎，所以紫鈴上番黎之後我都免得再次勾起頭先既話題。
 
心不在焉咁排完戲之後，阿溢急不及待走黎搵我。
 
「喂！」阿溢拍一拍我背脊。「岩先你d戲好掂喎！尤其是係最後個句『唔好走呀』簡直發揮到淋漓盡致！」
 
「因為呢個正正就係事實黎......」我喃喃自語道。
 
「下？你岩先講咩？」阿溢疑惑道。
 
「無，無野！」我苦笑了一下。
 
始終，我認為係我仲未搞清楚呢件事之前，保密可能會比較好。
 
所以對唔住喇，巴打。
 
「我有d緊要事要做，走先喇！」我對著阿溢講。
 
事關我好想爭取多d時間，睇下仲有咩方法可以搵到星瑤。
 
阿溢望到我呢個忐忑不安既表情，立時明白到應該發生左d我唔想講出口既大件事。
 
「嗯，咁好啦，你凡事要小心d。」阿溢語重心長地搭著我膊頭。「家樹，有d咩要我幫手既即管出聲。」
 
聽到呢句說話之後，我心內即時有股難以壓抑的感激不斷湧出。
 
「嗯，我一定會。」我搭番住阿溢既膊頭。「多謝你。」
 
「屌你啦婆婆媽媽！」阿溢笑一笑。「快d去做你應該做既事啦！」
 
道別之後，我就走出學校門口，諗住再去多次長洲。
 
「家樹！」就係呢個時候，紫鈴突然從後跑出黎追趕我。
 
由於我依家對紫鈴有種內疚既感覺，所以佢一衝埋黎我就即刻逃避佢既視線。
 
「岩…岩先對唔住……」我真誠咁講。
 
紫鈴聽完之後先係愕一愕，然後就向我微微一笑。
 
「遇到d咁既事，係人都會心情差。」紫鈴說。「只不過惟一分別就係，我用既抒發方法係喊，而你用既就係發嬲姐。講到最尾，其實根本就無對與錯之分。」
 
「所以我明白架，唔洗介意。」
 
「嗯……」說話雖然咁講，但我始終仲係有點於心有愧。「你出黎搵我做咩？」
 
「喔，係喇。」紫鈴說罷就從裙袋拿出一張白紙。「雖然我知道你會有自己一套搵星瑤既方法，不過我認為你可以試下從呢到著手。」
 
我接過白紙打開一睇，發覺裡面寫住一個銅鑼灣既地址。
 
        「呢個係……？」我不解道。
 
        「呢個係之前阿彥同我傾計個陣唔少心漏口講出黎既地方。」紫鈴回答道。「聽講個到……就係星瑤學琴既地方。」
 
        「多謝你！」多左一個線索，對於依家既我黎講已經係天大喜訊。「我依家就去睇下！」
 
        「唔洗多謝，幫你其實咪即係幫我，哈哈。」紫鈴苦笑了一下。「如果有星瑤消息既話，記得通知我。」
 
        「嗯，一定會！」我手中緊捏住呢張白紙。
 
        搭地鐵往銅鑼灣的路上，我挨在車門邊抬頭仰望藍天白雲的天空，思緒漸漸飄浮到窗外。
 
        係茫茫人海之中想搵到一個人出黎已經好困難，更何況要搵一個有心躲開自己的人？
 
        係浩翰宇宙之中想尋找一粒微不足道的星已經相當唔容易，
 
        更何況，我想抓緊的係一粒流星？
 
        我來到一間商業大廈裡，門牌寫住「高氏琴室」的單位門前。
 
        「就係呢到喇……」我深吸了一口氣，然後把門推開。
 
        首先映入眼簾的，就係坐左係服務台的一位長髮女生。
 
        「先生，請問有d咩可以幫到你？」女生微笑說。
 
        「er……唔好意思，我想問下呢到係咪有一位學生叫做劉星瑤？」我問道。「唔知道佢逢星期幾會黎呢到上堂架呢？」
 
        「好對唔住啊先生，我地係唔可以向其他人透露學員既資料架。」女生回答說。
 
        「真係唔可以？」我再次焦急起上黎，把頭哄向女生。「我真係好需要呢d資料，求下你講俾我聽呀！求下你啦！」
 
        「先生，你咁樣我地好難做架......」女生見到我呢個樣，左右為難咁講。
 
        「嗯，我明白既。」我收起剛才的失態。「真係唔好意思，麻煩晒你。」
 
         說罷我就調轉頭準備離開。
 
        「咪行住。」就係呢個時候，一把清甜的女聲從一間琴房中傳出。
 
        我拎轉面一睇，雙眼頓時瞪大。
 
        眼前呢個黑髮紮馬尾的少女，正正就係當日我係長洲見到個個鋼琴少女。
 
        「高小姐。」坐係服務台的女生立即企起身打招呼。
 
        「……」一時之間我組織唔到整件事。
 
        「嗯？」少女一步步走到我面前。「我地之前係咪見過面？」
 
        「應該就無喇，哈哈……」我一臉尷尬咁講。
 
        唔通要我同佢講，我之前係長洲偷睇佢彈琴咩！
 
        「咁可能係我認錯啦，哈哈。」少女微笑道。
 
        「咁……」我不解道。「唔知你搵我做咩呢？」
 
        「啊，係咁既。」少女變回一個正經的樣子。「我叫高妍，你叫我做Mandy就得。我係呢間琴室老闆個女，亦都係星瑤既負責老師。」
 
        「咩話？！」我驚訝道。「咁你知唔知道星瑤去左邊！」
 
        「當然知道。」Mandy說。「我諗你一定係家樹喇，係咪？」
 
        「點解你會知道我個名？！」我追問道。「仲有，星瑤依家去左邊！」
 
        Mandy聽完之後笑了一笑 : 「果然就如星瑤臨去英國前所講，有一個男仔一定會鍥而不捨咁搵佢，然後搵到黎呢度。」
 
        「你…究竟係到講緊d咩……」我整個人愣住了。
 
「星瑤唔係半個月後先要去外國架咩，點解依家又會……」
 
        「呢一層恕我唔能夠直言，而且我知道既亦都唔係太多。」Mandy說。「總言之，星瑤佢提早左半個月去英國。」
 
        唔怪之得我會搵唔到星瑤，亦都打唔通俾佢……
 
        「嗯……我明白既。」我的心情已經跌至谷底。「唔該晒你。」
 
        說罷我就往門口走去。
 
        「等一等！」Mandy再次把我叫回來。「星瑤佢有一張相想我代佢轉交俾你架。」
 
        「嗯？」
 
        「拿，」Mandy向我遞上一張相。
 
        我接過來一看，內心的情緒即時被牽引得使我整個人在抖震。
 
        呢幅相，係做義工個一晚我同星瑤係譚仔影既。
 
        個陣星瑤趁我食緊麵既時候，突然間咀左我塊面一下。
 
        於是乎我好驚訝咁望過去，然後星瑤就趁機拍下我地兩個對望既樣。
 
        所以相中既我咬住啖麵非常狼狽咁望住星瑤，而星瑤則是甜甜咁望住我笑著。
 
        我把相翻轉面，就看見星瑤留下的一段說話。
 
        家樹 :
  
        「傻妹……」我把相緊握在手中。
 
        回家的路上，我再次記起星瑤的一番說話。
       
「我怕初初say yes好容易，最後say goodbye好困難。」
 
        或者係星瑤既角度黎睇，連goodbye都唔講就係最好既解決辦法吧。
 
        回到家一打開門，就發現裡面燈火通明。
 
        曾經有一剎那我以為星瑤番左黎，不過好快就打消左呢個念頭。
 
        「哥？」嘉琪從房間走左出黎。「做咩我打極俾你都無人聽！」
 
        啊，講起上黎嘉琪佢好似講過今日番黎架喎，都唔記得左添。
 
        「你番黎喇？玩得開心麻？」我拿出手機。「原來無晒電，哈哈。」
 
        「唔好講呢d住先！」嘉琪跑過黎諗住捉我入房。「星瑤呢？佢d野唔見晒，打俾佢又無人聽！」
 
        「星瑤佢……」呢件事總要同嘉琪講吧。「去左英國喇。」
 
        接下來嘉琪同我既對話我都唔太記得了，我只係依稀記得自己攬住嘉琪喊左好耐，然後就番左上張床訓覺。
 
我，好攰喇。
 
        當我意識再次清醒過黎既時候，已經係第二日既下午。
 
        「嘩，訓左成十幾個鐘……」我喃喃自語道。
 
        一打開手機，就見到兩段信息。
 
        紫鈴 : 有無打聽到d咩消息？
 
        阿溢 : 兄弟，做完要做既野未？
 
        於是乎我就先打俾紫鈴，然後同佢講關於琴日既事。
 
        「我上到去琴室之後就入左去問人關於星瑤的資料，不過佢地就唔肯答。」我在電話中向紫鈴說。「正當我諗住走既時候，星瑤既負責導師Mandy就出黎同我講，話星瑤已經去左英國。」
 
        「Mandy？」紫鈴懷疑道。「佢中文名係咩？」
 
        「高妍。」我回答說。「間琴室叫『高氏琴室』，係佢既父母開既。」
 
        「咩話？！」紫鈴的聲音震撼得令我移開電話。
 
        「做咩咁激動啊你，」我說。「乜你識佢架咩？」
 
        「點會唔識……」紫鈴道。「阿彥全名係高晉彥，佢有一個家姐，就係高妍。」
 
        收左線之後，我坐左係床上面反覆思考一切。
 
        首先，星瑤同阿彥係青梅竹馬 ;
 
        然後阿彥屋企係開琴室既，星瑤就係跟阿彥家姐Mandy學琴 ;
 
        星瑤要出國深造，想必都一定係靠Mandy推薦及拉攏關係 ;
 
        星瑤屋企對佢好嚴，但只要佢出左國既話就可以唔受屋企管束 ;
 
        阿彥同星瑤一齊唔見左，而星瑤就去左外國，想必阿彥都係 ;
 
        亦即係話------阿彥為左可以同星瑤係埋一齊生活，就藉家姐幫手替星瑤搞出國留學，好讓星瑤能夠避開家人的嚴格看管？！
 
        即係我……係第三者？！
 
        「唔會架……」我已經唔記得呢次係我連日黎第幾次既崩潰。
 
        如果我再唔同人傾訴，我諗我會痴線。
 
        我打開wtsapp，然後按下錄音鍵。
 
        「阿溢，十鐘鐘後樓下m記等，我有d事想同你傾。」
 
        所謂兄弟係d咩黎？
 
一句講晒，三隻字 : 梁涪溢。
 
「喂！」阿溢仲早過我黎到m記。
 
於是乎我走左埋去阿溢身邊坐低。
 
「叫我出黎唔係淨係想我一直睇你個sad樣下話？」阿溢說。
 
「唉……」我嘆了一口氣。「星瑤粒聲唔出就去左英國。」
 
然後我就將整件事同晒阿溢講，包括我剛才推敲的那一部份。
 
「照你咁講，星瑤同阿彥一齊去左外國既可能性好高。」阿溢聽完晒我講之後道。「不過以我既角度黎睇，我覺得成件事唔係你想像中咁簡單。」
 
「你咁講係咩意思？」我不解道。
 
「首先，如果星瑤同個個咩阿彥係有路既話，咁點解當初星瑤唔直接去阿彥個到住，而會變左搵你？」
 
「我記得星瑤曾經同我講過，當初佢係諗住去一個朋友到住，點知個朋友令佢好失望，所以星瑤先無去到，然後轉為係IG開post。」我回答。「所以亦即係話，個陣星瑤同阿彥鬧交，所以星瑤發脾氣無去到佢個邊住。」
 
「就當呢樣野講得通，但都唔代表佢地有路。」阿溢問道。「如果星瑤同阿彥係情侶關係，而佢地仲有兩個月就要一齊去外國生活既話，你估星瑤仲會唔會咁蠢係呢個時候搞婚外情同你拍拖？」
 
「呢樣咪就係我唔明白既地方囉……」我沒精神道。「星瑤一直都無向我提過阿彥呢個人，搞到感覺上我好似做左第三者咁。」
 
「但如果俾我推斷既話，」阿溢思考了一會道。「我會覺得阿彥對於星瑤黎講，係一個要報恩既對象多過情人。」
 
「即係點？」
 
「星瑤屋企自小就管得佢好嚴，唔俾佢出街玩，所以搞到佢識唔到朋友，日日淨係可以留係屋企渡過 ; 」
 
「好彩佢有阿彥呢個知己，阿彥運用自己屋企既能力，安排佢家姐教星瑤鋼琴，令星瑤可以搵到一樣自己有興趣既野寄託 ; 」
 
「唔單只係咁，阿彥仲幫星瑤爭取到外國留學既機會，等星瑤可以避開父母的嚴格看管 ; 」
 
「星瑤一直都好感謝阿彥呢個朋友，但就唔係中意佢，呢個推論從你同星瑤拍拖呢件事就可以證明 ; 」
 
「但阿彥就唔係咁諗，佢一直都好中意星瑤，所以提出左一個要求------就係要陪星瑤一齊去外國 ; 」
 
「星瑤覺得點都應該要報答阿彥，所以就應承左 ; 不過星瑤始終好想係離開前嘗試一個新生活，所以就同父母協議好，出去見識呢個世界，然後就遇到你……」
 
「咪住先！」我打斷了阿溢既說話。「但咁咪好矛盾囉，如果星瑤佢想係同阿彥出國之前獨自見識呢個世界，咁點解佢當初又要揀去阿彥個到住？」
 
「呢個就係重點！」阿溢自信咁講。「所以我推斷，星瑤當初想投靠既朋友唔係阿彥！」
 
「屌，咁請問星瑤唔係投靠阿彥既話，仲可以投靠邊個？」我沒好氣道。
 
「er……呢層值得深入研究。」
 
傾左一大輪，原來都係運桔！
 
不過算啦，見到阿溢為左我咁落力去諗成個來龍去脈，我都已經覺得好感動。
 
「咁你依家諗住點做？」阿溢突然問道。「就咁放棄？」
 
「我都唔知。」我絕望道。「就算我唔理d藤拎瓜瓜拎藤既過去，最簡單一樣野------我依家點樣先可以搵到星瑤，我都已經毫無頭緒。佢有心避開我既，我點搵都係徒勞無功。」
 
「你唔係仲有個線索架咩？」阿溢說。「高妍！」
 
「屌，佢肯同我講既話一早講左啦！」我笑說。「熟都唔熟下，想chok下料都唔得啦！」
 
「唔熟？」阿溢奸笑了一下。「唔熟咪整熟佢！」
 
鏡頭一轉，我又再次身處係「高氏琴室」門前。
 
望住個門牌，我諗番起頭先阿溢既說話。
 
「你一於就去高氏琴室學琴，然後指名道姓叫Mandy教你！」
 
「哈哈……會唔會衝動左d呢……」我苦笑著。
 
好彩，我平時都有儲落一筆緊急用既錢，依家總算大派用場。
 
「你好……」服務台既女生一見到我，個樣即刻變得苦惱起上黎。「先生，唔知道有咩可以幫到你呢？」
 
「我黎學琴架。」我說。「我想由Mandy教我。」
 
「又係你？」一把清甜聲線再度從我右邊響起。「你想我教你琴？」
 
「無錯。」我轉過頭黎望向Mandy。
 
此時我先發覺， Mandy輪廓同阿彥都有幾分相似，唔怪得當初我係長洲見到佢個陣會覺得熟口熟面。
 
不過呢個Mandy真係一個美人兒，圓亮的雙眼，高挑的鼻樑，櫻桃小嘴襯上白滑的皮膚，睇起上黎應該都只係19、20歲。
 
「點解會無啦啦想學琴？」Mandy質疑道。「我除左教琴之外，唔會同學生傾其他野架喎。」
 
原來佢除左靚女之外，腦袋都好聰明，一下就知道我既動機。
 
「唔緊要，因為我淨係單純想學琴。」我微笑說。「唔知道得唔得呢？」
 
「哈哈，我有d欣賞你。」Mandy笑了一笑。「不過恕我唔能夠教你，因為我既教學係for學生考演奏級，而唔係bb班。」
 
說罷Mandy便調轉頭走回房間，留下我企係原地發呆。
 
「之不過咁，」Mandy臨入去之前拎轉面同我講。「如果你可以證明到俾我睇你為左星瑤有幾努力學琴既話，我就會回答你任何一條問題。」
 
「點樣證明？」我說。
 
「你自己會搵到方法既。」Mandy笑了一笑，但隨即又收起了笑容。「不過有d野……我勸你都係唔好摷咁深。」
 
「點解咁講？」我再說。
 
「因為你知道既野已經好足夠，再挖落去對所有人都無好處。」Mandy講完之後就關上了房門。
 
我緩緩走到街上，腦海中不斷思考著剛才的對話。
 
就係呢個時候，一陣涼風吹過，使我打了個大噴嚏。
 
秋天……不知不覺來到了。
 
回到家中，嘉琪就即刻走過黎。
 
「哥，」嘉琪撓住我隻手。「你無事啊麻？」
 
「我無咩事喇，放心！」我笑說。
 
        的而且確，依家我知道既資料比之前多左，搵番星瑤既希望都大左，所以鬱悶既心情都緩減左落黎。
 
        「係咪真架……」嘉琪鼓起腮扁嘴道。
 
        「梗係啦。」我輕撫著嘉琪的頭。
 
「係先好講！」嘉琪立即成個人攬落黎。「你知唔知道琴晚我幾擔心你啊！」
 
「好對唔住啊，要你一直都擔心我呢個哥哥。」我都攬番住嘉琪。「雖然我依家對成件事仲未係好清楚，不過線索就有一條，所以係搵到星瑤之前，我一定唔會咁快崩潰！」
 
「嗯！」嘉琪抬起頭黎望住我。「咁呢段日子就等我呢個妹照顧你既起居飲食啦！」
 
「講到我好似殘廢咁！」我笑說。
 
就係咁，往後的日子我都以「搵番星瑤為中心」而生活著。
 
不過……搵番星瑤之後我又可以做d咩？
 
哈，我都唔知。
 
為左可證明俾Mandy睇我既努力，我上左Yahoo拍賣bit左部三百零蚊既電子琴番屋企，然後開始上youtube自學起上黎。
 
你地問我點解唔出去學？
 
因為我覺得咁樣唔夠誠意，亦都表達唔到我既決心。
 
「哇……洗唔洗咁撚難……」我望住電腦熒幕一頭霧水道。