【我在IG Shop買了一個流星少女】: 第六章(4)

我與紫鈴攜著手談天說地，漸漸走到了西提的位置。
 
「呢到好舒服啊！」紫鈴舉起雙手享受著海面吹來的涼風。「如果市區都有咁清爽既話就好喇。」
 
「所以話星瑤呀爸呀媽真係識揀……」當我講左出口既時候，先發覺咁樣可能會令紫鈴唔開心。
 
「咳咳！無事。」於是乎我立即將呢句說話完整吞番落肚。
 
紫鈴聽到之後，轉過頭黎狠狠咁睥住我。
 


死啦，佢真係嬲喇！點搞！！！
 
「馬家樹！」紫鈴向著我走前一步。「你咁算咩意思！」
 
「sorry啊我唔係有心架！」我慌忙解釋道。「最多我唔再提星瑤啦！」
 
「我問你啊，你咁算咩意思！」紫鈴再走前一步，然後勁大力捏住我塊臉。「乜我有話介意你講星瑤既事咩？」
 
「下？！」我意外得張開大口。
 


「因為你仲未放得地星瑤，所以你會提起佢係一件好正常既事黎。」紫鈴微笑說。「而我作為你女朋友，當然就唔會刁難你，要你死口不提啦！」
 
「紫鈴~~~」我非常感動道。「有你呢個咁開通既女朋友真係好！」
 
「哈哈，洗乜講，你今次執到寶喇！」紫鈴說罷就鼓起腮子。「咦唔係喎！咁即係你本來覺得我唔開通啦！！」
 
頂，我又自爆添……
 
「我……」我慚愧地低下頭。
 


就係呢個時候，紫鈴哄前吻了我的臉頰一下
 
「嗯？！」我臉紅地看著紫鈴。
 
「玩你咋！」紫鈴重新拖著我的手。「傻佬！」
 
我地再度起程在海旁漫步，然後來到了一幢幢白色的三層大屋面前。
 
「哈，又黎到呢到。」我感慨地說。「之前我為左搵番星瑤，一個人黎左長洲呢到雜亂無章咁東奔西跑。」
 
「當我回過神來既時候，就俾一段鋼琴聲吸引左黎呢到。」我繼續說。「你知唔知道結果係邊個彈緊鋼琴？」
 
「嗯……」紫鈴思考道。「應該唔係星瑤？」
 
「哈哈，梗係唔係星瑤啦！」我笑說。「如果係佢既話我一早衝左上去……」


 
此刻紫鈴面露一絲不悅，令我驚覺自己講太多了。
 
雖然話紫鈴唔介意姐，但我都無理由開口埋口都係星瑤架麻，依家係我身邊既係何紫鈴呀！！！
 
馬家樹，你要記得自己承諾過d咩！！！
 
於是乎我立即轉移話題 : 「個陣我見到既竟然係阿彥既家姐Mandy！」
 
紫鈴聽完之後一臉驚訝望住我。
 
「咩話？！你話你係呢到見到Mandy？！」紫鈴難以置信道。
 
「係啊，你都覺得好巧合呢！」我回應道。
 


「唔係唔係，我覺得唔係巧合！」紫鈴說。「乜你無諗過，點解Mandy會出現係呢到架咩？！」
 
「下，咁佢……」當我試圖解釋既時候，我先發覺自己原來一直都合理化左呢個問題。
 
係喎！點解Mandy會住係長洲既！
 
「阿彥之前都無乜點同我提過佢屋企既事，我知道既就只係佢父母一早離左婚，而阿彥就跟老豆住係天水圍。」紫鈴道。「如果係咁既話，即係Mandy同佢媽咪一直就住係長洲？！」
 
「星瑤本來就住天水圍既，不過小學畢業之後就搬左去長洲......」我分析道。「而星瑤同阿彥又係青梅竹馬......」
 
「唔通星瑤搬去長洲都係因為有阿彥屋企人幫手？！」紫鈴道。「但點解星瑤要搬黎長洲呢？」
 
「星瑤曾經同我講過，因為佢小四發生左d事，所以就令到佢父母對佢變得非常管束，最後仲搬左去長洲......」我苦惱道。「但實情係發生左d咩事我就唔知......」
 
「換言之，」紫鈴綜合所有對話既重點。「想解開佢地兩個既一切，就一定要知道星瑤小四發生左d咩事？」


 
「但我地可以點做？」我不解道。「星瑤阿彥又唔見左！」
 
「乜我地眼前唔係已經有解決方法喇咩？」紫鈴望著二樓的露台。
 
我隨著紫鈴的視線望過去，就看見有一個少女徐徐走到鋼琴前坐下。
 
嗯，無錯，佢係Mandy。
 
由於我同紫鈴發現只有地下一個門口，所以我地就走左埋去並且按下門鈴。
 
「咔嚓------」門打開了。
 
「嗯？」迎接我地既係一位大概40幾歲既女人。「你地係......」
 


雖然呢個女人話就話係上左年紀，但佢仍然滲出一種強而有力的氣場，使我不禁打了一震。
 
「姨姨你好啊！」紫鈴從我後面走左上黎。「我地係黎搵Mandy架。」
 
「喔，你地係佢d學生呢？」姨姨聽完之後笑得非常和藹。「入黎坐啦，佢係裡面彈緊琴！」
 
就係咁，我同紫鈴就入左去裡面。
 
當我入到去，我先知道呢間原來係三層連埋的大屋黎，換言之呢三層都係Mandy屋企！
 
「妍！」姨姨向著二樓喊道。「你有兩位學生黎左探你呀！」
 
「學生？！」Mandy係房中大叫。「得，我依家出黎！」
 
當Mandy出到樓梯口與我眼神接上之後，佢即時變得非常驚訝。
 
「家樹？！」Mandy道。「點解......」
 
此時Mandy望了姨姨一眼，然後望番住我講 : 「你地兩個跟我入黎先啦。」
 
於是乎我地就黎到二樓Mandy的琴房。
 
頂，呢間屋究竟有幾大......
 
「好喇，」Mandy把門關上。「麻煩你可唔可以解釋俾我聽，點解你會知我住邊架呢？」
 
「係咁既------」我把以前的事講晒俾Mandy聽。
 
「即係話你本來係想搵番星瑤，點知偶然間就發現到呢度？」Mandy說。
 
「嗯啊，」我回答。
 
「哈，真係天意。」Mandy苦笑說。
 
「即係咩意思？」我不解道。
 
「無，無事。」Mandy重新變回平日的女強人樣。「咁你今日突登走上黎係為左d咩事？」
 
「我......」我思考了一會。「我想你兌現番當日既誠諾。」
 
「我想……係你面前彈一首歌。」
 
「喔？！」Mandy帶點驚喜道。「竟然夠膽係我面前彈琴？！」
 
老實講，我自知自己的能力根本就唔會令眼前呢位重量級導師睇得上眼，但為左明白一切，我一定要咁做。
 
「無錯。」我堅定地回應道。「如果我能夠令你刮目相看既話，請你兌現番當日既誠諾，回答我一條問題。」
 
「哈哈，有趣。」Mandy讓出了琴椅。「咁你開始啦，隨時都得。」
 
於是乎我就坐上了琴椅，並準備彈奏樂曲。
 
然而，當我接觸琴鍵的一刻，腦海中竟然掠過了星瑤的身影。
 
呢個片段，並唔屬於我同星瑤以前任何既回憶。
 
係我腦海出現既......係星瑤坐係呢到彈琴既畫面。
 
「點解會咁既……」我困惑得整個人坐係到發呆。
 
就係呢個時候，一雙溫暖的手按了在我手背上，使我重新回到現實。
 
「家樹，你無事啊麻？」紫鈴緊握著我的手。「唔洗驚架，有我係到。」
 
「嗯。」我點了一下頭。「我無事。」
 
紫鈴點了一下頭回應我，然後就徐徐移開雙手。
 
我望著琴鍵，閉上了眼睛。
 
呼......好緊張。
 
唔知道星瑤彈琴既時候，係咪都會好似我咁架呢，哈哈。
 
但係我唔會退縮。 為左妳，我一定會努力。
 
我要繼續彈下去，唱下去。
 
我緩緩張開眼，身體亦隨之配合按下琴鍵和腳踏。
  
琴音和歌聲在室內盤旋，直到快要消散的時候就徐徐飄到外面的世界。
 
演奏過後，是一片沉寂。
 
我回頭望向紫鈴同Mandy，只見佢地早已經變得目瞪口呆，有口難言地注視著我。
 
「做......咩？」我稍為難為情道。
 
「估唔到你......」Mandy終於開口。「容許我問你一句。」
 
「你係咪諗住等星瑤番黎？」
 
我望向紫鈴，發覺佢正低著頭緊捏著拳頭，眼神中流露出一點點的不安。
 
紫鈴……你要等我。
 
我轉過頭來望向Mandy。
 
「依家既我，真係好掛住，好掛住星瑤。」我說。「掛到一個地步，係我會成日發夢見到佢，每一日都仲幻想緊佢會番黎。」
 
「如果你問我，我係咪諗住等星瑤番黎既話，我可以答你，係。」我繼續道。
 
「但如果你咪我等到星瑤番黎之後，係咪想同佢係番埋一齊既話，」我笑了一笑。「我會更加肯定咁答你，」
 
「唔會，我唔會同星瑤係番埋一齊。」
 
我徐徐站了起身走到紫鈴旁邊，然後輕輕按著她的頭。
 
紫鈴抬起頭來與我對望著，而我則是甜甜的笑著。
 
「因為依家係我身邊，已經出現左一個更加值得我去愛既人。」我微笑說。「傻妹，我一定唔會離開你架。」
 
紫鈴聽完之後，露出了燦爛的笑容。
 
「所以即係話你依家對星瑤抱著既，係一種舊情人既情感？」Mandy說。
 
「嗯，可以咁講。」我回應道。「又或者有一個名詞可以更加準確咁形容。」
 
「神仙伴侶。」
 Mandy似懂非懂咁點了一下，然後說 : 「雖然你彈琴可以話係零技巧，一睇就知你係自學，但見你竟然能夠如此完整順暢咁彈唱一首流行曲，就知道你花左好多心機落去練習。」
 
的而且確，為左學好彈琴，由暑假開始至今我幾乎每一日都會花掉整個晚上用來練習。
 
「不過，有一樣野其實更加令我為之震驚。」Mandy繼續說。「就係你內心既力量。」
 
「每當你按一下琴鍵，唱一句歌詞既時候，都仿佛帶俾我一個畫面。」
 
「一個，令我於心不忍的畫面。」
 
「過獎。」我說。「其實我只係將自己既心聲唱出黎姐。」
 
「好啦，既然係咁讚美既說話我就唔再多講喇。」Mandy單刀直入重點。「之前我應承過你，如果我認同你努力既話，我就會回答你任何一條問題。」
 
「所以依家我可以好肯定咁同你講，我好認同，甚至欣賞你對星瑤的心意。」Mandy續說。「換之言，你得到既係一個發問時間。」
 
「多謝你。」我深呼吸了一口氣。「真係咩都得？」
 
「係，咩都得。」Mandy回應。「不過係你問之前，我有d野想提醒你。」
 
「嗯？」我不解道。
 
「你仲記唔得，係上次我地係琴室見面既時候，我最後同你講左d咩？」Mandy問道。
 
於是乎我腦海中就漸漸回憶起當時發生的事。
 
「之不過咁，」Mandy臨入去之前拎轉面同我講。「如果你可以證明到俾我睇你為左星瑤有幾努力學琴既話，我就會回答你任何一條問題。」
 
「點樣證明？」我說。
 
「你自己會搵到方法既。」Mandy笑了一笑，但隨即又收起了笑容。「不過有d野……我勸你都係唔好摷咁深。」
 
「點解咁講？」我再說。
 
「因為你知道既野已經好足夠，再挖落去對所有人都無好處。」Mandy講完之後就關上了房門。
 
「記得。」我回應道。「但如果我唔搞清楚成件事既話，我會過唔到自己個關。」
 
「而且，」我再次望向紫鈴。「咁樣對我眼前最愛既人好唔公平。」
 
「既然你已經決定左，我都無謂再講落去。」Mandy明白事理道。「好啦，你想問我d咩？」
 
我與紫鈴互望了一眼，然後異口同聲道 :
 
「我地想知道點樣可以搵到星瑤同阿彥。」
 
可能你地會問，點解我地咁白痴，唔直接問咩「我地想知道晒所有野」咁樣。
 
但其實我地咁做係有原因。
 
事關我同紫鈴都希望有一個機會，可以同星瑤阿彥坐低傾計。
 
「決定左啦嗎？係呢個問題啦嗎？」Mandy驚訝道。「你地可以問得再深入d架喎。」
 
「唔需要。」我說。「有d咩我地自己會搵佢地問清楚。」
 
「嗯。」Mandy說。「相信你地兩個都估到，星瑤同阿彥依家係住緊埋一齊。」
 
「但佢地依家並唔係外國。」
 
「咩話？！」我驚訝道。「咁佢地依家住係邊？！」
 
「佢地依家……」Mandy難堪道。
 
「佢地依家就住係呢到。」
 
大概呢一刻，我同紫鈴的表情都應該從未試過如此僵硬。
 
「哈哈……你唔好玩啦大佬，明明你之前先同我講，星瑤佢去左英國架喎！」我簡直不能夠相信Mandy岩先講既野。
 
「的確我個陣無呃你，星瑤佢真係去左英國。」Mandy堅定道。「但佢之後番左黎又係另一回事。」
 
「啊，應該咁講先岩。」Mandy繼續道。「其實自星瑤升上中學開始，佢就已經同我一齊住。」
 
「下？！」我與紫鈴再一次目瞪口呆。
 
「唔好意思，我好亂……」我的頭痛得快要裂開。「麻煩你簡短易明d咁講一次俾我聽究竟發生咩事啦，好無？」
 
「我諗呢d野，都係留番佢地兩個自己同你講好d。」Mandy此時對一對錶。「佢地應該都係時候番黎架喇。」
 
「佢地係邊度番緊黎？」紫鈴從旁加一把嘴。
 
「佢地？」Mandy說。「佢地係銅鑼灣番黎。」
 
咩話……銅鑼灣……？
 
一諗到兩日之後就要同星瑤一齊去旅行，真係有種說不出既興奮！
 
為左做定多D準備，我就去左觀塘APM個間書局睇旅遊指南。
 
睇左一陣，我就攞部手機出黎睇，然後就見到星瑤覆番我！
 
星瑤 : 我手機岩先無電，依家係銅鑼灣一個商場到差緊，一陣番到黎再搵你啦！
 
下？星瑤做咩走左去銅鑼灣咁遠？！
 
***
 
「家樹，」紫鈴臨走前回眸道。「有樣野我覺得應該要同你講。」
 
「嗯？」我回應道。
 
「今日阿彥佢......」紫鈴皺一皺眉。
 
「都去左銅鑼灣。」
 
此刻有大量信息一次過湧進我的腦袋中，使我完全愣住了，根本看不到聽不到現實世界既一切。
 
當我回過神來既時候，就發現紫鈴非常擔心咁捉著我雙手。
 
「家樹！」紫鈴發現我重新有反應之後非常高興。「你唔好嚇我呀，你無事呀麻！！！」
 
「嗯，我無事啊，放心。」我攬著紫鈴輕撫她的頭頂。
 
我環顧四周，發現Mandy唔見左。
 
「Mandy呢？」我不解道。
 
「佢見你成碌木咁坐左係到，就落左去沖杯茶你飲喎。」紫鈴仍然緊抱著我。「家樹……我地一陣就會見到星瑤同阿彥，到時就可以明白晒一切。」
 
「嗯，無錯。」我回應道。
 
星瑤，我一定會問清楚妳。
 
「咔嚓------」房門被打開了，入黎既係Mandy。
 
「家樹，你好番d未？」Mandy向我遞上一杯熱紅茶。「飲一啖先啦。」
 
「唔該晒你。」我接過紅茶並且喝了一口。「其實我無事，只不過係所有野都黎得太過突然，搞到我嚇親姐。」
 
「咁我諗如果你知道左之後……」Mandy喃喃自語道。
 
「知道d咩？」我不解道。
 
「無，你一陣自己問星瑤啦。」Mandy苦笑著。「呢d野由我開口始終唔係咁好。」
 
真奇怪。
 
「嗯，好。」我回答道。
 
點知，就係呢個時候……
 
「咔嚓------」
 
開門聲，再次響起。
 
不過今次……係由大門口發出的。
 
當我地三個聽到之後，都立即抖震了一下。
 
「家樹……」紫鈴走到我身旁撓著我的手臂。
 
「出去啦，」Mandy拍拍我大腿。「如果你仲有勇氣既話。」
 
「多謝你Mandy，你肯幫到咁我已經好感動。」我用餘下的手放在紫鈴撓住我的手上面。
 
然後我就轉過頭來望著紫鈴 : 「我地行啦。」
 
「嗯。」紫鈴有我係佢身邊，都漸漸變得冷靜下來。
 
於是乎Mandy打開了房門，三個人一起走到樓梯口。
 
「我地番黎喇。」
 
就係呢個時候，一把動人清澈的聲音從一樓傳來。
 
此刻，我的心就好像是被人緊捏著一般，使我整個人徹底崩潰，痛得連呼吸也像快要停頓似的。
 
過左三個月喇。
 
星瑤離開至今，已經有三個月喇。
 
        想當初我為左搵番佢，每天的生活就係到長洲到處闖蕩，希望命運之神能夠眷顧我，給我一次重遇星瑤的機會。
 
        但結果，幸運從來都無出現過。
 
        漸漸的，我把星瑤藏了在心中一個沒有人可以動搖的位置。
 
        她既是我的回憶，更是我的全部。
 
        直到那一天，我背著紫鈴回家。
 
        自此之後，我與紫鈴的關係變得更親密，更溫暖。
 
        紫鈴對我的愛意，確實把我從深淵中的某角處拯救出來。
 
然而我卻三番四次推搪呢份心意，甚至對紫鈴發脾氣。
 
因為，我心中仍然保留著星瑤的影子。
 
幸好，命運之神終於願意保佑我，保佑我和紫鈴的感情。
 
終於係呢個旅行，我衝破了心理關口，與紫鈴有情人終成眷屬。
 
正正因為咁，我以為自己已經有足夠的心理準備去面對星瑤。
 
但到頭來，原來我都只不過係係到自欺欺人。
 
我……。
 
「我地番黎喇。」一把熟悉的聲音從下層傳過來。「妍家姐呢？」
 
「佢係上面同緊兩個學生傾計呀！」剛才的姨姨說道。「妍！佢地番左黎喇！」
 
「哦好，黎緊！」說罷Mandy轉過頭黎望住我。「真係可以嗎？」
 
唔得……我做唔到……
 
「我……」我的雙腳仿佛軟了下來。
 
「啜。」
 
突然間，紫鈴吻了我的臉一下。
 
「家樹，有我係到。」紫鈴堅定的眼神把我再次拯救出來。「我一定唔會離開你。」
 
無錯喇……
 
有紫鈴係身邊，試問我又有何需要懼怕呢？
 
「多謝你。」我輕吻了紫鈴額頭一下，然後望向Mandy。「行啦。」
 
紫鈴撓著我的手，三人緩緩從樓梯口走下去，直到能夠看清下層的所有事物。
 
出現在我眼前的，係一個帶著雪球冷帽，穿上杏色外套深藍色裙和leggings，笑容依舊動人，雙眼依舊明亮的少女。
 
少女與我對望著，眼神中流露出一股久違的牽動。
 
「好耐無見喇。」我微笑了一下。「星瑤。」
 
星瑤愣了一會，然後深呼吸了一口。
 
「嗯，真係好耐無見喇。」星瑤微笑著。「近來幾好嗎？家樹。」
 
就係呢個時候，一個身影從星瑤背後冒出。
 
那個是非常帥氣，就好似係上帝偏心製作的男人。
 
「hello阿彥。」紫鈴從旁講呢句既時候，明顯把我撓得更緊。
 
「紫鈴？！」阿彥非常驚訝道。「家姐，點解佢地會係到架？！」
 
「簡單黎講就係不請自來。」Mandy帶著我們緩緩走到sofa，位置剛好與星瑤阿彥對望著。「但如果要我正確d黎講既話，我會話係天意。」
 
「好啦，你地四個慢慢傾啦，我同呀媽番上房先。」說罷Mandy就同姨姨行左上樓梯。
 
我地四個對望著，一時間空氣變得凝結起來。
 
「家樹，」星瑤首先開口。「不如我地兩個出去行下？」
 
我望向紫鈴，她允許的點了一下頭。
 
「嗯，好。」我回答道。
 
「但係星瑤……」阿彥突然從旁開口道。
 
「得架喇，我無事。」星瑤緩緩站了起來望著我。「我地行啦。」
 
臨出去之前，我在紫鈴耳邊說 : 「我一陣call你。」
 
「嗯。」紫鈴甜甜的笑了一下。
 
唔知道星瑤係有意定無意望到呢一幕，但她的表情明顯因此而變得生硬。
 
我和星瑤徐徐走到外面的路上，往碼頭的方向前進。
 
一路上我都跟隨在星瑤的背後望著她的背影。
 
點解我會咁做？
 
因為我害怕知道真相。
 
哼，好搞笑啊可？當初又係我講話要知道所有野，但當事實放在眼前既時候我又唔夠膽去接觸。
 
一陣微風吹來，使星瑤身上的白蘭花香味送到我的鼻子裡。
 
嗯，呢一陣味道依舊非常芬芳，非常吸引。
 
走著走著，我們竟然來到了白色帳篷。
 
那個，我們初次相遇的地方。
 
就係呢個時候，有一個匆忙既身影從大街處入黎帳篷，並且朝著我呢個方向直跑。
       
「唔好意思呀，等左好耐？」一把好像蓋了糖衣既聲音伴隨著腳步聲靠近。「我就係Meteorlass既店主！」
 
係呢一刻，我真心開始覺得自己應該要考慮下阿溢同嘉琪既說話。
 
因為原來世界上靚既女仔，真係大有人在。
 
事關企係我眼前既，正正就係一個皓齒星眸既少女。
 
呢個女仔擁有一把棕啡色及肩既曲髮，賦有輪廓既臉上配有一個半月彎既嘴巴，加上一對汪汪眼睛，倍添動人氣質。
 
「仲記唔記得個一晚？」星瑤走到欄杆處站著，望向茫茫的大海。「個一晚就係呢個位置，我第一次見到你。」
 
「點會唔記得。」我同樣走到欄杆前。「如果唔係因為個日嘉琪唔得閑，我就唔會遇上你。」
 
「係wo，嘉琪近排點呀。」星瑤帶點關心道。
 
「佢咪又係咁，成日掛住同阿明拍拖唔理我！」我笑了一笑。
 
「好心你呢個做人呀哥既就咪咁小氣啦！」星瑤取笑道。「嘉琪第時總要嫁人架麻，佢總要離開你架喎！」
 
星瑤用右手輕撫著我的臉頰，雙眼早已泛著閃爍的淚光。
 
「家樹......」星瑤哽咽說。「好多謝你帶俾我呢一個月黎既回憶，我一定會好好記住佢。」
 
說罷星瑤便吻了我的嘴唇一下。
 
「再見喇，傻瓜。」
 
就係呢一刻，有一種抑壓已久的負面情緒從我心底裡爆發出來。
 
「咁你呢。」我緊握著拳頭。
       
        星瑤聽到之後整個人愣住了。
 
        「咁你呢。」我再次問道。「咁你點解要離開我？」
 
        涼風吹過海面，使星瑤頭上冷帽的雪球在隨風擺動。
 
「我……」星瑤空洞的雙眼仿佛正告訴我一個殘酷的真相。
 
然而，千言萬語最後都被星瑤吞進肚子裡，換來的只有三隻字。
 
「對唔住。」
 
「我唔係要聽對唔住啊！」我稍為激動說。「我想聽既，係你點解要粒聲唔出就走左去！」
 
「……」星瑤低著頭，身體逐漸變得抖震。「對唔住……」
 
望著如此痛苦的星瑤，我實在再無辦法忍心追問下去。
 
「星瑤……」我緩緩踏前。
 
「你唔好埋黎！」星瑤黎然大叫了一下，使我整個人頓了在原地。「你唔好埋黎呀……」
 
「點解呀星瑤，點解你要不斷避開我！」我不忿道。「你走個陣係咁，之後又係咁，直到依家我地面對面喇你都係咁！」
 
「唔得……總之你唔可以埋黎！」星瑤抬起頭來望著我，淚水早已一湧而下。「點解……點解呢個時候你又要出現係我面前……」
 
「你究竟係到驚緊d咩呀星瑤……」我說。「講俾我知啦，好無？」
 
「我怕……」星瑤再退後了一步。
 
「我怕，我以後都會唔捨得放你走啊，家樹。」
 
「既然唔捨得咪唔好走囉！」我追問道。「你失機無神走左去，你知唔知道我幾辛苦，我幾傷心呀！無左你既日子，我好難過呀……」
 
「家樹……」星瑤喊得非常厲害。「好對唔住……嗚……」
 
我一下子衝了過去，把星瑤擁進懷裡。
 
星瑤本來打算掙扎，但卻被我緊緊扣著。
 
過了不久，星瑤就放棄了逃走，依偎在我胸前痛哭起來。
 
「點解……點解呀……」星瑤哭著的時候不斷在重覆這句說話。「明明我已經……」
 
嗅著星瑤的體香，過去所有往事幾乎一次過重現在眼前，使我的眼淚忍不住溢出瀉下。
 
或者人類對於愛情有時就係咁。
 
縱使身邊已經各有伴侶，但仍然會有一個人深深植根在你心中。
 
只要彼此的回憶被誘發出來既話，就會牽動整個人的情緒。
 
無論何時何地，你都能夠不顧他人地痛哭起來。
 
時間徐徐流過，身旁的遊客都不知換了多少個臉孔，我和星瑤才漸漸把哭聲收細。
 
星瑤稍為推了我一下，而我也察覺到再無任何理由擁抱星瑤下去，所以就緩緩放開了雙手。
 
「好對唔住。」星瑤再次把這句話說出口。「無論係以前我突然離開你又好，定抑或係依家我唔肯講個真相俾你聽都好，真係好對唔住。」
 
「但請你原諒我，我真係唔能夠講俾你知。」
 
「點解？點解去到依家你都唔講得俾我聽？」我實在不能理解。「我係當事人，我絕對有知道所有野既權利！」
 
「家樹……」星瑤沉重道。「有d野，知道左就等於要分擔。」
 
「而且呢種分擔，係番唔到轉頭架……你一定會後悔。」星瑤苦笑著。「話說你同紫鈴岩先好親密咁喎……係埋左一齊？」
 
「嗯。」我回答道。
 
唔知點解，當我講呢句出口既時候好有一種背叛了星瑤的感覺。
 
星瑤聽到之後，滿意地點著頭。
 
「咁咪好囉，有個咁好既女仔係你身邊，我都無咁擔心。」星瑤說。「既然係咁既話，你都無必要再對我既事追問下去啦，一心一意對紫鈴仲好啦係咪先。」
 
星瑤說著這句話的一刻，表情難堪得像是快要再次哭泣。
 
「紫鈴個方面，我一定會好好對佢，最起碼我唔會俾佢偷偷離開我，令我再次後悔不已。」我說。「但咁樣並唔代表我唔會再關心你啊，星瑤。」
 
「你係我心愛既女人，無論以前又好，而家又好，將來都好，呢個都係不變既事實。」我堅定道。「仲記唔記得以前係台灣，我係酒店同你講既個番說話？」
 
我深吸了一口氣，然後望著星瑤把當時的說話重新訴說了一遍 :
 
「男朋友唔係應該要無時無刻都關心自己女朋友架咩？」
 
原來星瑤都頭痛！唔知佢沖完涼好番d未呢？
 
於是乎我伸手輕輕按著星瑤個額頭。
 
「咁你依家仲有無頭先咁痛？」我關懷咁問。
 
點知星瑤聽到呢句之後，居然臉紅起上黎！
 
「無...無咩事喇依家......」星瑤緩緩放下雙手。「衰人，明明我地鬧緊交架麻，你做咩無啦啦關心我......」
 
「傻妹黎既！」我坐在床邊，然後雙手按在星瑤的腰間 (星瑤企左係床邊)。「男朋友唔係應該要無時無刻都關心自己女朋友架咩？」
 
星瑤聽完之後，臉更是紅過紅雞蛋。
 
「但我已經唔再係你女朋友。」星瑤低著頭道。「你要關心既唔係我，而係你依家既女朋友紫鈴。」
 
「無錯你講得好岩，我同你已經唔再係以前既關係。」我走前了一步。「所以呢句說話都應該轉一轉方式表達。」
 
「我馬家樹一定會關心著緊妳架，劉星瑤。」我微笑了一下。「所以，就等我為你分擔下啦，好無？」
 
「我……我……」從星瑤的眼神中，我看得出她現在內心是多麼的掙扎。
 
突然間，星瑤的表情變得非常辛苦。
 
「好痛……」星瑤抱著頭大叫起上黎。「好痛呀！！！」
 
「星瑤？！」我衝上前扶住了星瑤。「做咩事呀，係咪吹風吹到頭痛呀！」
 
星瑤勉強扶著我站了起來 : 「快d番去屋企……」
 
「下？！」我不解道。
 
        但望著星瑤如此痛不欲生的樣子，我都免得問咁多，只顧攜扶著她緩緩往家中前進。
 
        點知行左兩三步，星瑤就整個人軟了下來！！！
 
        「星瑤！！！」我把星瑤整個人依靠在我胸前。「你做咩呀！」
 
        「我無事。」星瑤強咬字道。「快d番屋企……」
 
        「得！」我立即公主抱起了星瑤。「你頂住呀！」
 
        說罷我就拔足往屋企狂奔。
 
        你唔好有事呀……星瑤！
 
        轉眼間我就已經來到白色大屋門前。
 
        一路上望到星瑤越變痛苦的樣子，我的內心真係痛得有如刀割。
 
        「開門呀！」我一腳大力伸向門口，發出了響亮「砰」的一聲。「星瑤佢好頭痛呀！！！」
 
        之後我聽到室內有一股急速的步伐聲衝過來，然後門就被打開了。
 
        「星瑤！」打開門驚訝道的是阿彥。「交佢俾我！」
 
        於是乎我就讓阿彥接過手抱著星瑤走進屋企的sofa。
 
        原本坐係sofa的紫鈴快速站了起來讓位。
 
        「星瑤佢做咩呀！」我急不及待問阿彥道。
 
        「佢既野唔洗你理！」阿彥把星瑤抱到sofa放下後再準備跑進廚房的時候，狠狠瞪了我一眼。「你呢個瘟神……星瑤見親你都唔會有好事發生架！」
 
        「咩……咩話……」我發呆地望著坐在sofa上一臉難過的星瑤。「我係……瘟神……？」
 
        「家樹……」紫鈴跑了過來捉實我雙手。「阿彥都係亂咁嗡架咋……唔好放係心……」
 
        我把視線放到紫鈴身上，發覺紫鈴有喊過的淚痕。
 
        「你做咩喊啊傻妹？」我立即攬住紫鈴。「係咪阿彥對你做左d咩！」
 
        「唔係呀！我地一直都係到傾緊計……」紫鈴側視著星瑤。「只係……只係……」
 
        就係呢個時候，阿彥拿著兩粒藥丸和一杯水出來走到星瑤身邊。
 
        「食藥喇星瑤！」阿彥非常關切道。
 
        星瑤聽到之後強行瞪開眼，然後稍為坐直了身子。
 
        於是乎阿彥就把藥放進星瑤口中，然後餵星瑤飲水。
 
        服藥後過了一會，星瑤痛苦的表情逐漸散去，接著就安靜的睡著了。
 
        「我抱星瑤番上去訓先，你地坐下啦。」阿彥熟手的抱起了星瑤，讓她靠在自己手臂，然後就從樓梯處走到三樓。
 
        由於我實在放心不下，故與紫鈴跟隨著阿彥的背影來到了星瑤的房間。
 
        估唔到，我竟然係咁樣第一次來到屬於星瑤的空間。
 
        阿彥把星瑤放到床上蓋上被子，然後把星瑤的冷帽除去並放到衣櫃裡的第三格。
 
        而呢個阿彥……卻比我更要來得熟悉星瑤的一切。
 
        望到星瑤舒適的樣子，我的心終於安定下來。
 
        我四處張望，發現星瑤的天花板貼滿了夜光的星星牆紙，非常漂亮。
 
        「仲企係到做咩？」阿彥突然從我前面推了我一下。「快d出番去，星瑤要休息下。」
 
        阿彥推了我們出來並關上房門，但臨關門前的一刻阿彥卻頓了一頓，雙目任神注視著房間裡的星瑤，表情顯得非常擔憂。
 
        看著眼前的一切，我大概了解道呢個並唔係d咩不尋常事件。
 
        「阿彥，」我對著呢位我曾經多次掛在口邊，但卻從未見過面的阿彥道。「可以同我講發生咩事嗎？」
 
        「咩事？應該係我問你咩事先岩呀！」阿彥突然發難捉著我的衣領把我整個人扯起。「你呢個人點解係都要搞住星瑤呀！！！」
 
        「咳……咳咳！」我的喉嚨就好似被勒緊般，令我呼吸非常困難。
 
        但縱使我如何掙扎，都擺脫唔到阿彥的雙手。
 
        他媽的……究竟呢個人係有幾大力？！
 
        「阿彥放手呀！」紫鈴用身軀從旁直接把阿彥撞開，使我重新接觸到地面。
 
        我一時站不住腳，整個人跌倒在地上。
 
        紫鈴立即蹲下來為我檢查傷勢，當發覺沒大礙之後就狠狠睥住阿彥。
 
        「阿彥，你點可以咁過分架！」紫鈴大聲喝道。「同‧我‧道‧歉！」
 
大概，這是我第一次從紫鈴口中聽到如此憤怒的聲音。
 
「對唔住？要我同呢個瘟神講對唔住？好難呀！」阿彥仇視著我。「你呢種人渣，點解個天就係唔換你去死，反而要一個天使般的女孩每日受住生不如死既身心折磨！」
 
「你係到講緊咩呀！！！」我憤怒地站了起來。「開口埋口都話我瘟神，我邊忽瘟神呀！」
 
「夠喇家樹，唔好再講喇！」紫鈴從後抓著我的手臂。「阿彥，你同我收聲呀！」
 
「我話你係瘟神就係瘟神！」阿彥大叫著。「如果星瑤唔係同你出左去，佢就唔會頭痛！如果當初星瑤唔係跟住你周圍去玩，星瑤就唔會！------」
 
「高晉彥！」就係呢個時候，一把老而彌堅的女人聲打斷了阿彥的說話。
 
我地三人隨聲音方向望去，發現是從二樓走上來的Mandy和姨姨。
 
「你講夠未呀！」姨姨再一次使用那種強人的震懾力。「同我落番去！」
 
Mandy走了過來，把阿彥扯走。
 
「sorry，近排彥既情緒有d波動。」Mandy望著我抱歉道。
 
「我先無！------啪！」當阿彥想再說話既時候，就被Mandy狠狠咁掌了一巴。
 
「你係咪想所有人都喊你先開心呀！」Mandy的淚水已在眼眶打轉。
 
阿彥望到Mandy的模樣後便收了口，只有繼續狠狠咁望住我。
 
「你地自便啦，我地唔打擾你地喇。」說罷Mandy就撓著阿彥手臂與姨姨緩緩從樓梯口向下走去。
 
結果三樓的走廊上，就剩下了我與紫鈴。
 
「紫鈴，好多謝你。」我與紫鈴對望著。「雖然我知咁樣對你好唔公平，但唔知道你可唔可以俾d時間我同星瑤相處下？」
 
「……嗯。」紫鈴點了一下頭。「我係地下sofa等你。」
 
隨著紫鈴漸行遠了，我就重新望入了星瑤的房間。
 
我把星瑤房間裡的電腦椅搬到床邊，然後坐下來注視著睡得正甜的星瑤。
 
「星瑤……」我輕輕拭去星瑤臉上的頭髮。「明明妳就仲係我以前認識既星瑤，應該係好活潑，好可愛先岩架……」
 
「既然係咁……點解你剛才又會咁痛苦……」
 
我把頭靠在星瑤額前，不知不覺間睡著了。
 
星瑤穿上了一身白衣坐左綠草如茵的平原上，而我則躺了在星瑤大腿上被她撫摸著頭髮。
 
我張開眼望向星瑤，嗅著她身上的白蘭花味道。
 
嗯，真香。
 
「家樹。」星瑤低下頭來望著我。
 
「嗯？」我享受於此刻的環境。
 
「好對唔住。」星瑤續道。
 
對唔住……？
 
唔好……唔好同我講對唔住！
 
「好對唔住。」星瑤再次說道。
 
就係呢個時候，整個畫面就好像調高了亮度似的，所有野都開始變得白濛濛一片。
 
除了，我。
 
「家樹，真係好對唔住。」星瑤漸漸變得白玉。「我要走喇。」
 
「唔好，唔好走呀！」我跪在地上緊緊擁著星瑤。「我唔會俾你走架！」
 
「我要走喇。」星瑤徐徐閉上了雙眼。「好對唔住啊，家樹。」
 
唔好，唔好呀！
 
剎那間星瑤消失於我眼前，使我撲了一個空，整個人迎臉撞到地上。
 
「呀！」我赫然瞪開雙眼，發現自己仍睡了在星瑤的枕頭上。
 
一陣夕陽的紅光從窗外照到我的臉上，使我只能用手掩著陽光抬起頭來。
 
然而當我抬起頭來之後，就看見星瑤正靠在床背觀望著外面的景色。
 
        這刻的畫面，大概我這輩子也不會忘記。
 
        「嗯？」星瑤feel到有動靜之後轉過頭來望著我。「你終於醒喇，家樹。」
 
        「對唔住，我只諗住望下你，點知就訓左……」我不好意思道。「我訓左好耐？」
 
        星瑤微微的搖了一下頭然後道 : 「我諗你訓左10分鐘到姐。」
 
        於是乎我望了一下手機，原來都只係過左十幾分鐘。
 
        「你休息夠喇咩？！」我驚訝道。「你岩先咁樣痛法，訓多陣啦！」
 
        星瑤再次搖了一下頭。
 
        「唔洗喇，我由小四開始就已經抖緊，仲抖唔夠咩。」星瑤重新望向窗外的夕陽。「我父母就係成日叫我抖下，所以先唔俾我出街。」
 
        「星瑤……」我實在難以置信。「我唔係好明……」
 
        「家樹，」星瑤轉過來望著我。「我地一樣交換一樣啊，好無？」
 
        「嗯？」我問道。
 
        「你同我講關於我走左之後你做過既事。」星瑤回答道。
 
「我就同你講關於我既事。」
 
我坐在星瑤的床邊細說起當初的一切，就好像從前母親夜晚為我同嘉琪說故事般。
 
「我足足成個星期都係長洲搵你，但都係搵你唔到 ; 」

「每一日我都好似行屍走肉咁生存，直到紫鈴將我拯救番出黎 ; 」

「我好努力學識彈琴，為的就係要向Mandy攞一個問答時間，然後就要搵番你 ; 」

「去到最後……」
 
「去到最後，」我安慰道。「終於都俾我見番你喇，星瑤。」
 
「但見番我之後……又可以到改變d咩？」星瑤望住我，露出一個腼腆的笑容。「無，咩都改變唔到。」
 
這是一個語重心長的笑容。
 
「我……」本打算反駁的我，一時間答不出話來。
 
「家樹，我諗你明白我講咩既。」星瑤說。「有d事改變唔到就係改變唔到，就算俾你得知到真相都無用。」
 
「凡事事在人為架姐！」我不甘道。「學求婚大作戰話齋，『只要心懷改變的夢一步步不斷積累，總有一天奇跡之門會為你敞開』架麻！」
 
「但如果……你係同緊個天鬥呢？」星瑤緩緩道出了一句我難以理解的說話。
 
「你係到講緊d咩……」我呆望著星瑤。
 
「家樹。」星瑤道。「係時候到我講自己既事喇可？」
 
「嗯。」我點了下頭。
 
「但係我講之前，你可唔可以應承我一件事？」星瑤微笑著。
 
「承應我，聽完之後你要同紫鈴一齊離開我的生活，以後都唔好再出現係我面前。」
 
「點解啊星瑤……」星瑤的說法使我內心更加沉重。「俾我同你分擔啦！」
 
「再斟酌係呢個問題既話我就唔講架喇！」星瑤鼓起腮裝怒的樣子真係好可愛。
 
「家樹……」星瑤伸出手指尾，非常誠然地望著我。「我講真架，應承我啊，好無？」
 
星瑤……
 
「嗯。」我痛惜地點了一下頭，並且伸出右手。
 
我們就這樣，勾了一下手指尾。
 
其實……呢個結局遲早都會來臨。
 
星瑤已經有阿彥悉心的照顧，而我亦有紫鈴陪伴在身邊。
 
我和星瑤之間那條緣份的紅線，或者早就已經消失得無影無蹤。
 
「咁我就放心……」星瑤低頭喃喃自語道。
 
「星瑤？」我不解道。「你無事啊麻？」
 
「無事，嘻嘻！」星瑤立即轉過身望向窗外。
       
        然而，我卻從陽光的輝映中看到星瑤臉上的淚痕。
 
        「準備好聽故仔未？」星瑤仰視著天空。「呢個……」
 
        「係關於一個流星少女的故事。」