《928快樂》: 2014.09.27｛1｝

早就習慣一起床先滑手機，但今天，看著時多了份焦急。「警方實施清場並拘捕74個學生及民眾。」
看到這裡，我恨不得能用隨意門甫打開就到達政府總部，用行動告訴政權：我們不會輕易屈服。
但首先，我要通過子軒那關。

「一陣食完晏有咩做呀？」「睇你想去邊囉。陪你行街好冇？」
「唔使啦，你噚晚當完更好攰喇。」
「哦，你係咪約咗人，想撇甩我！」
我苦笑。
子軒好像察覺到甚麼似的，忽然收起了笑容。
「你又去政總呀？」


「班學生畀人拉咗呀，我想返去睇吓。」
「佢哋犯咗法，畀人拉係應份㗎。」
「都唔係犯唔犯法嘅問題。就算真係犯法，都唔使咁樣對人啫，噚晚我見住啲警察好近距離用胡椒噴霧㗎！」
「咁班伙記都係做嘢啫，上頭落Order都冇得唔做㗎。」
「就算接咗Order都有得揀點做㗎嘛⋯⋯一係今晚集會你去睇吓咪知囉。」
「咪話咗我唔參加得呢啲政治集會囉，你可唔可以尊重吓我份工呀？！」
「咁你又可唔可以尊重吓我呀？你入學堂到而家個人變咗幾多你知唔知呀？」
這頓飯陷入一陣沉默。

*** *** ***



我們第一次吵架的情景映入我腦中。那年畢業，我們說好要一起去澳洲Working Holiday，不過子軒家裡環境不容許他出國太久，最後決定去台灣打工換宿一個月，算是補償，也是體驗。某天晚上我偷偷買好機票，準備要給他驚喜。
我拿著機票和幾份台灣資料，走進他的宿舍房間裡，他竟然三更半夜在做掌上壓。
「練咩肌肉呀無啦啦？」
「差唔多要喇！」
我聽得一頭霧水，心裡迫不及待要告訴他好消息，誰知他比我先開口。
「我考到警察喇！就嚟入學堂㗎喇，遲啲我就係無間道個梁朝偉！」
「考警察？咁大件事點解你冇同過我講嘅？」
「你之前忙緊FYP吖嘛，咪廢事煩你囉。咁我都係試吓咋嘛，吖點知又得咗。」
「咁⋯⋯你幾時入學堂呀？」


「六月囉。」
「六月？就快開始㗎喇喎，你竟然間而家先同我講？」
「咩呀⋯⋯做咩嬲啫，都話本身冇諗住得先冇講咋嘛。」
「又係你話一齊去台灣嘅。」
「到我Passing out再去囉。未必去到一個月咁耐㗎喇，但係我應承你，到時你想去台灣又得，去日本又得，全程聽晒你話，好冇？」
意氣用事的我將那疊機票和資料用力扔在子軒面前：
「咁耐之後嘅事我唔知。我淨係知你都應承過話同我去台灣。總之我買咗六月機票，你去台灣定入學堂你自己揀。」

*** *** ***

回過神來，子軒終於開口打破沉默。「你去完台灣都變咗啦。我哋兩個，都變咗好多。」
.
.
.
（待續）