誰能逼我將就: Ch.32

「我一早講咗，係呢個女仔。」

「乜嘢都唔係，妳唔使亂諗。」

「咁樣攬住你，仲話乜嘢都唔係？」

「李英琦，妳唔好又扮到天真無邪咁放大所有事去講好嘛？咁樣叫攬住我，妳嘅道德水平幾時去到咁高？」

簡單的四句對話後，開始了我和英琦在大堂內的對峙。





最近每一次和英琦爭執，那個「它」又會很準時的出現。

它：「純，你今晚打算點做？」

我：「我唔會讓英琦。」

它：「如果佢話分手呢？」

我：「我冇問題。」





它：「但八年時間，有冇疑問？」

八年……「它」所說出的八年，讓我再次凝神看著眼前的英琦。八年時間不短，一個女人如果在你身上投資了八年的時間，這代表著什麼東西？

它：「有覺得內疚嘛？」

我：「點解？」

它：「因為你準備離開英琦。」





我：「我未離開。」

它：「你有打算繼續用當年佢同Michael做武器？」

我：「呢一樣係武器？」

它：「係武器，所有情侶對峙，第一樣要搵嘅唔係解決方法，而係武器。」

我：「我好亂…」

它：「自己處理，英琦準備再向你發問。」

「呢一個到底係乜嘢女仔？妳幾時識？識咗幾耐呀？」英琦繼續發炮，以她一貫的說話方式向我進逼。

「普通朋友，我講完喇英琦。」我不想在大堂跟她對罵，刻意把聲線壓下。





「我特登幾日冇搵你，就係想俾時間你諗清楚，我地之間嘅關係。今晚仲要嚟陪你阿爸阿媽食飯，就係想幫你修補下你同佢地嘅關係，估唔到一嚟到就會見到你同個女仔攬埋一齊。」

「點解妳覺得…妳同我阿爸阿媽食飯，係可以幫我同佢地修補關係？」

我突然的搶白，令英琦的怒火可以再借勢提升。但我沒有讓她開聲，繼續的說：

「我好多謝妳咁有佢地心，但妳所做嘅事，唔一定係幫我。」

「即係我做咩都係多餘啦！」英琦咆哮著，街坊都開始看著我們。

突然…

它：「純，先同英琦返上屋企。」





純：「點解？我想解決我地嘅事。」

它：「我清楚你嘅性格，唔好因為一時嘅想法，去做一啲你未必願意做嘅事。你同英琦可以有好多方法解決，但唔一定係喺條街上面。」

我彷彿聽到「它」的說話，正在帶點怒火的我，試著考慮應不應該選擇相信「它」這個道理。我們都聽說過，在任何有可能過於衝動的決定之前，默念三聲是最好的緩衝方法。

因為好奇和衝動，不止是魔鬼殺死一隻貓般簡單。

我閉上眼睛，試圖撫順自己已經跳亂了的呼吸，然後打開眼睛，換了一個平和的聲線向英琦說：

「我地唔好嘈，返上去食飯先。」

回到家中，爸媽剛好準備了晚飯。我和英琦各坐在一角，安靜的吃著晚飯。整頓飯我們的話也不多，眼神接觸也少得可憐。

突然，爸一句說話，剖開了我們的沉默：





「你地兩個係唔係鬧交？」