誰能逼我將就: Ch.49

這消息有絕對的提神功效，我所有的睡意被一下消滅。我沉思了幾分鐘，試圖構想現在到底發生什麼事？我打開電腦，先走到facebook看看什麼情況。

不出我所料，我這一條新聞已被很多朋友轉載，當然不乏一些又悶又麻煩的附帶評語。

「南華球星，勁過陳肇麒啦純哥你。」
「兩個好襯呀，幾時結婚呀？」
「英琦身形咁圓潤，好事近？」

「頂！」我愈看愈覺得不對勁，連忙查看一下墨在facebook的上線情況。從facebook的顯示來看，墨之前上線的時間應該是四個小時之前。





「四個鐘頭…唔知佢睇唔睇到條新聞，打唔打電話俾佢好呢…」當我正在苦思的時候，阿媽卻突然走進我的房間。

「純，你上新聞喎。」阿媽的表情很興奮，我很理解，但我不想附和。

「係呀，啲記者亂咁報。」我有點晦氣，阿媽很快的察覺到。

「做咩呀？同英琦俾人影到會唔方便咩？點解黑口黑面嘅？」阿媽問我，但我不想在這個關鍵時候，從頭到尾去解釋一次，我當下的處境。

「唔係呀，我搵緊嘢呀媽，一陣再同妳傾啦。」





「嗯，咁好啦…仲有呀，阿爾墨今朝又打過電話俾我，約咗我同你阿爸去佢個中心度，你會唔會去？」

「墨打俾妳？佢仲有講咩？」我收到這消息，立即上前兩手抓緊阿媽的雙臂問。

「佢冇講特別事喎，做咩咁緊張，佢冇打俾你咩？」

「冇…咁佢係幾時打電話嚟俾妳？」

「個幾鐘頭前啦。」





「唔該阿媽。」

阿媽離開我的房間後，我權衡過各方面的情況。如果墨是一個多小時之前打電話相約阿爸阿媽的話，她看到了新聞的機會應該很大；又或者說，如果她看到了這宗新聞後，仍然是關心我的家人的話，那該不會是處於一個很憤怒的狀態吧。

我應該可以嘗試一下，致電給墨去解釋這件事的由來。我勇敢的撥出墨的電話號碼，但很可惜，沒有人接聽。

我走出大廳，再向阿媽查問，墨相約她們兩老的時間。最後我得到了滿意的答案，明晚七時正，社福中心見面。

我關上了電腦，沒有再看那些在facebook上的轉載新聞；同時我也沒有給英琦任何連繫，因為情況看來有點尷尬。

乾等的感覺很可憐，那一晚墨還是沒有回電給我，最後我失望地在電腦桌上睡著了。

第二天，南華會。

「小春，你有信心就要射，咁怕射波不如打後衛啦。」




「肇麒你要俾指示阿純，佢交個波前半秒你就要起跑喇。」
「純，你今日做咩事呀？冇食飯呀跑快啲啦！」
「偉豪禁區就可以試下起腳呀！」

海sir入主南華後，感覺像是愈來愈好。隊中兩位老大哥跟他的相處不錯，起碼可以先撇除了將帥不和問題的苦惱。

「喂，南華球星，做咩今日冇力咁呀？」陳七走到我的身邊揶揄我。

「唔好玩我啦，無端端都唔知點解會上新聞。」我埋怨說。

「做咩呀？唔慣呀？」陳七帶點嬉笑的逗我。

「唔係唔慣…不過我嗰日…根本唔係咁嘅情況。」

「有咩所謂，真又好假又好，上吓上吓就慣啦。」





「我又唔係咩球星，你呢啲大佬輩就話上慣新聞啫，但係我唔係呀。」

「大咩佬輩…你真係覺得我好鐘意咩？」陳七坐在草地上，淡淡然的說起。

「都唔係呀，我以前睇你嘅新聞，你答親問題都好串，我仲以為你天不怕地不怕。」

「嘿…天不怕地不怕。」

「起碼我見到你唔會為呢啲事唔開心。」

「哈哈！」陳七站起來，乾笑兩聲後走到我身邊，在我耳邊輕輕的說：

「男人唔夠硬淨，會俾人恰架阿純。」





「咁即係點呀？」

「得啦！茶果日報呀吓？我同班記者熟，幫你問下佢地點解會跟你啦。」陳七邊離開，邊背著我豪氣的說。

「唔該哂七哥。」

晚上，我跟爸媽來到墨的社福中心。我很緊張，因為很快，我便會看到墨。