誰能逼我將就: Ch.85

「咩話？」我不敢相信唐爾棋的說話，壓低聲線再問一次。

「阿朗同我講咗，佢同爾墨喺旺角見到你同你以前女朋友一齊。阿朗想衝過嚟質問你，但最後俾爾墨拉走咗。」

唐爾棋說出原委，但我內心反而有點惱火，墨不是同樣在騙我嘛？

「係誤會嚟…」但我也嘗試，不想把事件搞大。

唐爾棋見到我想解釋，很使勁的在擺手：「阿純你聽我講先，爾墨返咗屋企，成晚都冇瞓過。佢覺得好傷心，但唔知點樣表達。





佢以前拍過好多次拖，其實每一次都唔識表達自己，最後都係大家唔開心。」

「但點解會係…你叫我離開墨？定係佢叫你嚟同我講？」

「係我自己嚟搵你。」

我苦笑地看著唐爾棋，這到底什麼世代，妹妹的事要哥哥來作主？

「咪住先…係咪有小小嘢搞錯咗？我同墨嘅事，我諗應該由我地兩個人去處理返。」





唐爾棋的表情，慢慢由客套，然後是收起笑容：

「佢見到你呃住佢搵返舊女朋友，爾墨情緒已經好差，佢唔會有心情同你傾。」

「我呃佢？咁佢唔係呃住我同個前夫出去咩？」我試圖反擊，這是事實。

「阿朗唔同，阿朗係我兄弟，佢同爾墨之間唔會再有乜嘢發展。」

「你話係就係？你係佢地兩個咩？」我斬釘截鐵的說，氣氛變得有點僵持。





我把臉別過去，先緩和一下自己的心情。幾分鐘後，唐爾棋繼續說：

「咁即係冇嘢講？」

「就算有事要講，我都唔會係同你坐喺度講啦係咪？我自己會搵墨講，你唔好理我地嘅事啦好冇呀？」

我愈說愈怒火，準備將不應該由我說的話也說出來了。

它：「純，我知你想講咩，唔好講呀。」

遲了，「它」的勸阻來得太遲，我的話已經衝口而出：「我尊重你叫你一聲哥哥，其實我都知道你唔係好掂，既然你有咁多時間去理個妹同個兄弟，不如正正經經搵份工，先返嚟同我講道理。

做男人有個錢傍身，好過有咩事就打電話問個妹借丫嘛。」

它：「純，你呢番說話唔單止令唐爾棋收聲，仲會影響你同墨關係，你點解唔諗清楚？」





我正想跟「它」辯解，但「它」已經離開了。

唐爾棋聽到我的話後，臉上陣紅陣綠，良久也說不出話來。

「我個妹情緒一向唔係太穩定，你最好處理得小心啲，如果我個妹有咩事，我地乜嘢都唔使再傾。」

唐爾棋說完，便轉身離去。

不能再將阿爸的問題拖太久，接了阿媽回家之後，我要再找英琦一次，看看她想到辦法沒有。

我跟墨的事，我不認為自己有錯；至少錯的不止我一人，犯不著要我第一時間搶著處理吧。

我匆忙來到阿媽的中醫館，在大門外離遠已看到那兩個同樣的身影，阿媽跟子俊叔叔。





跟上次所見，子俊叔叔的神情更加憔悴，身形更是瘦削了一點個圈。

我看見阿媽激動地拉著子俊叔叔的手，而子俊叔叔也是一臉誠懇地扶著阿媽，嘴裡說著一些我距離聽不到的說話。

他們兩人愈說愈激動，突然我的電話響起。我打開接聽，正當我把電話貼到耳邊時，眼前卻出現了一幕令我難以置信的情景。

子俊叔叔跪在阿媽面前，兩隻手不斷地拉著阿媽雙手搖晃，彷彿在說著同一件事情。

眼前的爆炸畫面尚未平復，電話的另一邊，李英琦傳來的消息更是令我震驚：

「純，我今朝見過世伯，同佢傾過偈。你冷靜啲，原來…原來你大哥唔係世伯親生仔。」