流主和維琪經過生死關頭,總算來到了目的地。
 
 
「哇...」流主對青衣城的宏偉感到意外
 
「終於都到啦...雖然聽講過,但親眼睇到都覺得好壯觀...」維琪也略感驚訝說
 
「咁妳之後諗住點呀?」流主問
 
維琪想了一下:「唉...我都唔知...或者入去再算啦。」




 
流主他們走到城門旁邊,守衛便上前詢問:「你地係咪諗住入城?」他打量著流主他們
 
流主回答:「係呀。」
 
守衛看了一下流主身上的裝備,再看了一下他的樣子:「嗯...好啦,請緊記,城範圍入面係唔可以使用任何攻擊性武器,否則我地嘅守衛會攻擊你。」
 
流主問:「明白...仲有無其他嘢我地需要注意?」
 
「未經許可,唔可以進入商場範圍。如果有咩想知,可以隨時問城入面嘅守衛。」守衛說著便把城門打開




 
 
穿過城門,率先映入眼簾的是一個在大簷篷下的殘舊市集。市集內雖然人來人往,但售賣的商品卻都是品質低劣的次貨...腐爛的食物、骯髒的水,甚至一些被使用過,剩餘下來的藥物。
 
 
維琪疑惑地說:「青衣城應該有好多商隊來往先係架...依度賣嘅嘢似係執返嚟多啲...」
 
 
流主他們隨便逛了一會,穿過市集來到一所酒吧。裡面燈光昏暗,也沒有甚麼精緻的擺設,最引人注目的便是那台殘舊得「隆隆」作響的發電機。
 




 
「...要咩?」穿著殘破西裝的酒保問
 
流主想了一下:「......有無餐牌...?」
 
「啤酒5蚊、伏特加10蚊、威士忌12蚊。」酒保說
 
「...有無核子可樂......?」流主尷尬地問
 
酒保有點不滿的表情答:「5蚊。」
 
維琪搶著說:「兩支呀唔該。」然後便掏出錢袋,續說:「應該我請你嘅。仲有,我都唔記得比埋尾數你...250蚊。」她說著並遞給流主一些錢
 
流主搖頭說:「但係我都唔能夠保護到妳...地,唔應該收錢嘅...」
 




維琪苦笑說:「算啦,無你嘅話,我都已經死左...」
 
 
流主沒有回答,只有默默地收下這些錢。此時,一個身形瘦削、衣衫襤褸的小女孩走到流主身旁,輕輕拉著他的衣袖,楚楚可憐地看著流主。
 
 
流主溫柔地問:「...嗯?...小朋友做咩事呀?」
 
小女孩有點害怕地說:「我...我媽咪病左...可唔可以借啲錢比我買藥......我咩都可以做......」
 
 
聽到這番說話,流主頓時眉頭緊皺。為甚麼一個小女孩居然會說出這種話來??這不禁讓人心痛這小女孩是不是已經為了錢...幹過了甚麼嗎?
 
 
維琪微笑說:「妳要幾多錢?姐姐借比妳。」




 
小女孩低下頭說:「我...都唔知...」
 
流主說:「一係我地同妳一齊去買啦。」
 
小女孩喜出望外:「真嘅?多謝哥哥姐姐!!」
 
 
於是,流主和維琪便跟著小女孩來到市集的藥販處。
 
 
「歡迎!!」藥販十分熱情,但看到小女孩便皺起眉頭:「...乜又係妳呀?」
 
「哥哥姐姐佢地...會借錢比我......」小女孩淚著眼說
 




藥販慨嘆:「唉...我都講左啦,唔係唔肯賣藥比妳...係我都真係無依隻藥呀嘛...就算有呀,我自己都食左先啦。」
 
流主好奇問:「係咩嘢藥嚟架?」
 
「抗輻射藥。佢阿媽唔係有咩病,係感染左過多輻射。其實呢...我地依度好多人都感染左,只係多定少咁解...都唔知咩事依排會咁多人中招...講真,唔係唔想幫你地...係我都真係無抗輻射藥...」藥販無奈地說
 
維琪懷疑問:「但係青衣城一向都有唔少商隊來往...點可能無抗輻射藥...」
 
藥販搖搖頭:「唉...妳有所不知啦。其實住喺商場區入面嘅醫生有...但咪就係因為嗰班所謂嘅高級市民買晒商隊批發嘅抗輻射藥,我地先無咋嘛!」
 
流主驚奇問:「吓?點解呀??」
 
藥販有點生氣說:「我點知呀!我地唔入得去,佢地又唔肯賣...我地又無錢申請做高級市民...搞搞下都唔知會唔會成村人中晒招等死...睇嚟真係遲早暴動...」
 
流主皺眉:「竟然有啲咁嘅事...」




 
 
如此這般,流主和維琪決定去問過究竟。但是,他們帶著小女孩來到商場門口才看了兩眼,已經有守衛緊張地上前查問。
 
 
守衛態度並不友善:「你地想做咩呀?依度唔係你地普通人可以嚟,快啲走!」
 
「我地想搵醫生...」流主說
 
「無呀!依度淨係服務高級市民,你地快啲走!」守衛態度強硬
 
維琪說:「依個小妹妹好需要抗輻射藥去救佢阿媽,你放心我地有錢買...」
 
守衛拔出警棍說:「我叫你地走呀!聽唔聽到呀?」
 
 
小女孩一副無助失望的表情,讓人看了心痛,但又無可奈何...由於天也黑了,流主便打算先送小女孩回家,卻在此時被人叫住。
 
 
「等陣!」一個穿著金屬裝甲的中年男人走過來
 
「宗Sir!」守衛有點意外
 
中年男人說:「依度交比我,你返去站崗啦。」
 
 
果然,守衛立即點頭離開了。
 
 
中年男人自我介紹說:「我係青衣城嘅最高決策人,大家都叫我宗Sir。你地係咩人?嚟做咩嘢?」
 
「我地只係想買抗輻射藥。」流主說
 
宗Sir打量了流主一下說:「...我可以同你單獨傾下嗎?」
 
維琪聽到便說:「...咁我帶小妹妹返去先。」然後便帶著小女孩離開了
 
看著現場只剩下流主和宗Sir兩人,宗Sir說:「你睇落唔係商人,更唔係依度嘅居民...如果你幫我做一件簡單嘅事,我唔單止可以比抗輻射藥你,我仲可以比你做高級市民,入住商場區。」
 
流主疑問:「係咩嘢事?」
 
「幫我殺一個人,佢叫做他伯。」宗Sir毫不掩飾
 
流主猶豫了一會問:「...點解要殺依個人?」
 
宗Sir說:「我地發現左佢想煽動群眾暴動,擾亂青衣城嘅秩序。其實,之前佢已經搞過事...佢夾埋我嘅得力助手破壞商場嘅核子發電機,搞到輻射大量洩漏。宜家我個助手已經潛逃左,所以依一刻可以做嘅就係阻止他伯引發暴動。」
 
「你意思係成個城都係輻射??」流主立即用嗶嗶小子量度附近的輻射值,果然四周都充斥著極微量的輻射,連他自己也已經感染了輕量的輻射!