異塵餘生香港2277: 07 選擇

流主拿出嗶嗶小子一看，才發現原來整個青衣城都被輕量的輻射所掩蓋，而且連他自己也已經被感染了！
 
宗Sir無奈地說：「所以一切，都係依個叫做他伯嘅人嘅錯。」
 
流主不解問：「但係．．．點解佢要煽動居民暴動呀？？」
 
宗Sir說：「佢本身係青衣城嘅原居民，後嚟我同我啲人搬入嚟，將青衣城發展成一個大城鎮。而佢就不滿青衣城由我依個外人嚟統治，所以為左奪權，佢就做盡一切破壞．．．迫使我落台。」
 
「但係．．．咁點解你地唔比人入商場區？又買晒啲抗輻射藥唔比有需要嘅居民買？」流主追問
 




宗Sir嘆氣說：「唉．．．商場嘅核子發電機洩漏輻射，你估下邊度嘅輻射量最高？而且現階段我地亦唔能夠冒險比任何人有機會再破壞發電機。．．．你知嗎？就喺我地傾緊偈嘅依一刻，仍然有維修人員不惜感染輻射，好努力咁研究緊點樣維修部發電機．．．我地係咪好應該先將啲抗輻射藥留比佢地呢？」
 
「咁點解你地唔直接拘捕他伯，反而叫我去殺佢？」流主問
 
「他伯就係想搞大件事，如果我地正式拘捕佢，就要將青衣城洩漏輻射嘅事公開，到時全青衣城嘅居民都會陷入恐慌，仲有來往嘅商隊都唔會再敢嚟做貿易．．．最終受害嘅，就係我地嘅居民。」宗Sir面露難色說
 
「．．．原來係咁。」流主恍然大悟
 
宗Sir續說：「其實，我地起晒圍牆，又安排守衛保護大家．．．亦一直盡力提供水電比居民．．．我真係唔明點解會有人想造反．．．」
 




此時，一個守衛匆忙地跑過來：「宗Sir，有發現，就喺北邊嘅海岸邊！」
 
「好！即刻通知U記！」宗Sir續對流主說：「我有要事在身，他伯就交比你．．．我知我唔應該拉你落水，但係因為身份問題．．．依件事只可以交比外人做．．．拜託你啦！」宗Sir拍著流主的肩膀說
 
 
因為事關重大，除了青衣城所有居民的安危之外，也關係到同樣暴露在輻射中的流主自己，因此他不敢怠慢，天黑了仍然四周打聽他伯的下落。
 
 
「流主？點呀？」恰巧，流主遇上維琪
 




「成件事好複雜，總之就係宜家我地要搵一個叫做他伯嘅人，阻止佢引發暴動！」流主說
 
 
流主把事情的經過簡單交待了，便和維琪分頭打探，最後跟著線索來到了市集旁的居住區。雖然說這裡是居住區，但從四周一個個排起來的殘舊帳篷來看，這裡更像是一個難民營。
 
根據守衛的情報，他伯是一個年近七十的老年男人，雖然一頭白髮，但體格強壯。果然，在居住區中，很容易便發現他了。
 
 
流主走過去說：「．．．你就係他伯？」
 
他伯有點疑惑：「我係．．．你係邊個呀？」
 
「我係流主．．．係宗Sir叫我嚟。」流主說
 
他伯語氣不太友善：「哼．．．咁我知你咩事啦．．．宗Sir肯定係同你講，話我夾埋阿麥破壞發電機，想奪權所以煽動暴動呀嘛，係咪呀？」




 
想不到他伯竟然一語中的，流主想了一想問：「．．．你咁講，似係話我比宗Sir呃左。」
 
「我同阿麥根本就無破壞過發電機．．．實情係，阿麥係無意中發現發電機洩漏輻射，之後佢就自告奮勇留低維修。然後先知道洩漏嘅原因根本係佢地班乜鬼嘢高級市民過度用電。但係阿麥怕啲居民會恐慌，所以佢先無講出嚟，仲堅持一定要維修好部發電機。不過，過左幾個月之後，雖然已經好大程度降低左洩漏，但係阿麥就因為長期暴露喺高輻射環境下而異變左做食屍鬼．．．之後宗Sir仲怕佢會洩露發電機嘅事而想殺佢滅口。」他伯無奈地說
 
流主和維琪一時間互相對望，並不知道誰是誰非。
 
他伯續說：「依啲嘢全部都係阿麥偷走嗰晚話比我知．．．佢話佢其實一直都有要求抗輻射藥．．．但係個宗Sir就用咩物資短缺，盡量安排依啲咁嘅藉口打發佢．．．而後來我調查過先知，其實根本就係佢怕自己會感染輻射，所以將啲抗輻射藥留晒比自己同啲高級市民。」
 
流主問：「咁高級市民又係咩人．．．？」
 
「所謂嘅高級市民其實就係宗Sir班手下同佢啲守衛，仲有比得起錢嘅人。阿麥本身都係高級市民，係宗Sir嘅手下，不過佢個人好友善，所以我先同佢做到朋友。」他伯說
 
「但係，宗Sir嘅目的都係建設社區。而且佢有提供保安同水電依啲嘢比你地呀。」流主說
 




「哼．．．」他伯苦笑了一下：「係，有高牆有守衛有水有電，但係唔係免費呢！宗Sir係有向我地徵稅架，如果啲水電係免費，我地使飲污糟水？使自己用燃油發電機？而且萬一有土匪或者組織攻擊我地青衣城，我地商場外嘅人就係高級市民嘅肉盾！青衣城本身係我地嘅地方，佢呃我地話幫我地發展，結果就係霸左部發電機，濫用電力令到輻射洩漏！」
 
維琪聞言，想了一下對流主說：「．．．他伯又唔似講大話，佢講嘅嘢全部都好合邏輯．．．」
 
他伯有點怒氣續說：「佢地搶左我地地方，仲收返我地稅。如果無錢比佢地仲會驅逐我地．．．我地淨係交稅都已經捉襟見肘，邊度仲有錢成為高級市民上樓住？宜家佢地仲收起晒啲抗輻射藥，根本就係想迫死我地！係，佢係發展社區，不過係發展佢地自己嘅社區呢！」
 
「．．．咁有咩解決方法？」流主問
 
「方法得一個，就係推翻宗Sir。因為宗Sir追殺緊阿麥，所以我安排佢匿喺城外面。等我成功推翻到宗Sir嘅霸權，阿麥就可以返嚟維修發電機。」他伯說
 
流主聞言後面色一沉：「阿麥．．．係咪匿左喺北邊嘅海岸邊？」
 
他伯大為緊張：「你點知架？？宗Sir已經知道左？？？」
 
「嗯．．．佢好似話通知左咩U記去搵佢。」流主說




 
他伯聽到這個名字便面色發白：「咁．．．今次真係無啦．．．」
 
流主好奇問：「U記又係咩人？」
 
維琪解釋說：「U記全名係Ultimate Unit．．．佢地係一班僱傭兵。只要價錢合理，佢地就會不問因由不擇手段去完成任務．．．」
 
他伯突然跪下來：「你．．．你一定要救阿麥呀！如果佢死左．．．青衣城就玩完架啦！我．．．我唔出得城．．．我一離開城門，啲守衛一定會殺左我．．．我求你．．．只有你可以幫我地！」
 
維琪緊張地問：「咁點算呀？我地．．．應該信邊個呀？」