才剛到達炮台山的流主他們,竟然第一晚便遇上兇殺命案...而且兇手更是阿寶!?
 
由於事出十分突然,也十分意外,流主他們立即趕到兇案現場,也就是會議室。只見駐房的守衛已經押著阿寶,會議室的書桌上也有一具被白布蓋著的屍體,地上則扔著美雅被撕破了的軍服...還有跪在地上哭哭啼啼的麗雅...
 
 
一個中年男人忿怒說:「司徒寶,點解你作為正勢力一員,要殺死指揮官...仲要...做出啲咁嘅事!?」
 
阿寶解釋說:「我無殺人!我同佢兩姊妹細細個就識,我點會想殺美雅?保安糾察長,我根本無殺人動機!」
 
「姦殺都要殺人動機??」糾察長說




 
「我都話我無殺人咯!你煩唔煩呀?我一嚟到,佢就已經死左啦!」阿寶激動說
 
「你唔使再狡辯啦!我返到嚟嘅時候,就得你同已經死左、全身赤裸嘅指揮官!」駐房守衛說
 
流主立即上前:「咪住先...阿寶絕對唔會做啲咁嘅嘢...一定係有啲嘢搞錯左!」
 
「證據確鑿仲有搞錯!?我知你係黃金力量嘅成員,但就算係咁都唔可以干預我地!」駐房守衛忿怒說
 
孖根也忍不住搭話:「雖然阿寶個人係古古怪怪,但係我都信佢唔會做啲咁嘅嘢。」




 
「妳又係邊個呀?妳咁幫佢,係咪你其實都係同謀呀?」糾察長質疑
 
鎖匙萱生氣說:「喂!你唔好屈孖孖喎!」
 
糾察長指著孖根說:「哼!好人好姐就唔會遮住塊面,蒙得面嘅都係鬼!你地係咪政府軍間諜??」
 
孖根拉下斗篷:「你話我痴孖根係鬼?」說著,她更伸手打算拔槍
 
「痴孖根!?」糾察長和在場的人都一片嘩然,不管是崇拜她,還是害怕她...




 
流主上前按住孖根:「冷靜啲先...」他續對糾察長說:「你地諗住點處理依件事?」
 
糾察長辭嚴氣正說:「當然係軍法處置!」
 
「比時間我...我地會搵證據證明阿寶係無辜。」流主說
 
「你憑咩要我聽你講?」糾察長瞪著流主
 
「...定係你想見血?」流主說著,孖根和鎖匙萱也拔出武器
 
「你......」糾察長一時間被流主唬住了
 
「而事實上,我已經大概知道邊個係兇手。」流主瞪著糾察長,鏗鏘道:「兇手,就喺我地入面!!」
 




「咩話!?」在場的人都立即緊張起來
 
「我只要多少少證據,就可以證明佢係兇手!」流主眼神堅定續說:「你夠唔夠膽比機會我證明呀?糾察長。」
 
「哼...我唔知你講緊咩...」糾察長不期然回避著流主的眼神:「天光前...天光前如果你無證據...就唔好怪我無比時間你!」
 
流主自信滿滿、昂首挺立說:「我以黃金小子之名發誓,一定會捉到真兇!!」
 
 
.........
 
 
「點算呀...個黃金小子可能知道係我殺指揮官...」某人在一個房間內對著手提通訊器說
 
「殺埋佢!唔可以暴露你係我地間諜嘅身份!」通訊器另一邊說




 
「但係...佢有痴孖根保護...」那個人無奈說
 
「你諗你啦!自己闖嘅禍自己搞返掂!」通訊器的另一邊說完便掛線了
 
「......屌!!」
 
 
那個人無計可施,只有硬著頭皮,拿著一支裝有滅聲器的手槍,來到流主房間外的轉角...
 
 
「咁我宜家去,流主你自己小心啲。」孖根說著,便從流主的房間離開
 
「好呀!天助我也!」那個人不禁大喜
 




 
他待孖根離開後,便慢慢把流主的房門推開...只見房內漆黑一片,看來流主已經入睡了...
 
 
「哼!落地獄啦,黃金小子!!」那個人舉槍指著睡在床上的流主
 
「你已經玩完啦!殺人兇手!!」一把聲音就在此時從後傳來
 
 
那個人嚇得立即回頭,只見鎖匙萱就站在門口!
 
 
「自首啦,殺人兇手!」鎖匙萱指著那個人說
 
「哼!咁多事,妳都一齊死啦!」那個人打算向鎖匙萱開槍




 
 
然而,卻在電光石光之間被誰人開槍把他的手槍打掉!
 
 
「呵呵,流主真係無估錯。」能夠輕易把手槍打掉的,當然便是孖根
 
 
這時,其他人包括流主都走進房間。
 
 
「你...!?」那個人這時才發現躺在床上的只不過是個抱枕而已!
 
 
流主打開房燈,兇手的真面目終於要曝光了!!
 
 
「果然係你。」流主說
 
「竟然係你...?點解...」淚盈滿眶的麗雅十分驚訝
 
「點會......」糾察長也感愕然
 
「所有謎底都已經解開啦!你就係殺死指揮官美雅嘅真正兇手!駐房守衛!!」流主指著兇手道
 
「我...我點會殺指揮官呀...?你唔好屈我喎!」駐房守衛慌張說
 
「咁你宜家做緊咩?」孖根問
 
「我唔係諗住滅口呀!我只係見...有可疑人物入左嚟...先入嚟睇下咩事...」駐房守衛解釋
 
「我都無話你諗住滅口。」孖根說
 
「呃...但係...但係都證明唔到我殺指揮官架!」駐房守衛說
 
「美雅死嘅時候,你有無不在場證據?」流主問
 
「你...唔比我去左廁所嘅?...而且,司徒寶一樣無姦殺指揮官嘅不在場證據!」駐房守衛狡辯
 
「依個正正係你失手嘅地方。」流主笑說
 
駐房守衛大感不惑:「...咩話?」
 
「你一定估唔到,阿寶佢...其實係有女性恐懼症!!」流主道
 
麗雅十分意外:「女性恐懼症!?」
 
「無錯,佢其實喺嚟香港島之前,一直係比Bitch Kingdom監禁,受到難以想像嘅虐待!...佢就係喺嗰陣患上女性恐懼症!所以佢根本無可能強姦美雅!!」流主續對駐房守衛說:「用姦殺嚟施加殺人動機本來係好聰明嘅做法,但係你又點會估到佢有依個病。」
 
「...咁...咁我都無殺人動機啫!」駐房守衛仍不認輸
 
「作為一個守衛,確實係無殺指揮官嘅動機。但係,如果你係政府軍間諜就唔同講法啦。」流主說
 
「政...政府軍間諜!?你...唔好含血噴人喎!」駐房守衛手足無措
 
「如果唔係,你又點知我係黃金力量嘅成員?如果你唔係政府軍嘅間諜,又點會知咁多嘢?」流主問
 
「我...都係之前聽到你地...同指揮官對話先知咋!...其他再深入啲嘅嘢...我咩都唔知架...」駐房守衛死辯
 
「阿寶一直都只係話我係黃金小子,幾時話過我係黃金力量嘅成員?你又知黃金小子就係黃金力量嘅成員?」流主問
 
「唔...你...你唔比就係咁啱知道嘅?歷史嘅嘢...唔係咩秘密!」駐房守衛強辯
 
「仲死撐?咁依段錄音你又點解釋?」流主說著,鎖匙萱便拿出一個手提錄音裝置,並把剛才駐房守衛與通訊器的對話播放出來
 
「你地...係幾時錄架!?」駐房守衛大感驚訝
 
「咪就係你嚟殺我滅口之前。鎖匙萱其實頭先一直都跟蹤住你,你估唔到呢?」流主說
 
「一個女仔...竟然跟蹤到我...而我唔知!?」駐房守衛十分震驚
 
「點解唔得呀?因為你係連指揮官都暗殺得到嘅間諜?」流主咄咄逼人
 
「我......」駐房守衛無言以對
 
「普通女仔就緊係跟蹤唔到你啦,但係鎖匙萱唔係普通女仔,佢係貓頭鷹嘅前成員!」流主說
 
糾察長譁然:「貓頭鷹!?戰區嘅貓頭鷹!??」
 
鎖匙萱立即驕傲起來:「無錯!呵呵呵呵...」
 
「而且,你頭先無否認錄音入面把聲係你喎。」流主對駐房守衛乘勝追擊
 
「嗚......」駐房守衛無力掙扎跪在地上...他,已經徹底敗北了
 
「係時候講真話啦!駐房守衛!」流主指著駐房守衛道