2012末日傳奇: 序章(猝死): 天師出手
"咁多位姐姐唔好笑我啦..........我...係對DR.展有好感...." Ann唯有以笑掩蓋害羞
"唔使怕羞喎!!，鐘意人唔係壞事呀...我撐妳!!" 金美按Ann肩表示支持
"我地都撐妳，放心去啦" 其他四美都舉手支持
"靜靜話我知...你地有冇....嘿嘿..." 金美在Ann耳邊俏皮地問
"哇....金美姐講咩呀?...冇....咩都冇......"Ann顯得有點驚惶失措
"KISS都冇咩?" 木美目光疑惑再問，Ann猛然搖頭
"唔好再玩阿Ann啦!!佢面都紅哂喇...." 水美嘗試替Ann解圍 "我睇佢真係咩都唔知...."
"咩都唔知就要學喇...." 金美鬼馬提議 "捉佢返房我地教下佢!!"
"好呀!!" 四美即時行動
"唔好啦....咁多位姐姐....." Ann半推半就地被拖進房間
"唏...妳地真係.....唔好玩得太過份呀!!" 水美唯有尾隨入房
銅鑼灣的夜晚，燈光璀璨，襯托經歷一天忙碌工作仍興緻勃勃相聚逛街的戀人們，堆砌成鬧市中的一片繁華景象，今夜，自然少不了這一對剛開始相戀的男女
"唔係遲左收工都唔使未食野就要趕入場，要妳陪我捱餓添.." Alan面帶歉意望向小咪
"唔緊要啦....況且我都唔係太餓...不過我驚餓壞你....."小咪輕倚Alan肩膊語氣關切
"呀...前面有M記...妳唔介意吖嗎?" Alan轉向小咪細問
"我冇所謂呀....你話事啦..." 小咪作小鳥依人狀
於是兩人推門進入，上了二樓，Alan往買食物並叫小咪找座位，剛巧近窗卡位一對情侶起身離去， 小咪即以極速閃身而坐，令正前來意欲就坐的一對男女目瞪口呆，驚惶離去
小咪望向櫃檯等待拿取食物的Alan，一臉幸福笑意滿溢之時.....
"小咪，妳要記得妳應承過咩，唔好要我再提妳...." 甲以傳心術提醒小咪
"我知點做...." 小咪頓時茫然失神
"喂!! 諗緊咩呀? 定哂形既? " Alan笑臉遞上食物
"冇呀......咦...呢包咩黎架?..." 小咪扮作一臉好奇....
"哦...係紫菜碎..加落薯條度調味既.." Alan一邊示範 " 倒d薯條落個袋度，再撕開包紫菜倒落去，再封好個袋，然後上下chok下佢..."
"好得意呀...我又玩!!" 小咪聽見袋中沙沙作響，眼觀Alan無邪笑臉，決暫忘煩憂，依樣畫葫蘆
見小咪正在輕啖淺嚼，Alan拿起手機察看電郵，心中似有所思...
"輪到我問你嘞...睇咩入哂神?..." 小咪嘟起小咀望向Alan
"冇...諗番開發呢部手機間公司創辦人生前講過一番說話啫..." Alan語氣感慨
"佢講過咩呀? " 小咪邊咬薯條邊問
"佢講過人生苦短，唔好浪費時間生活於其他人既陰影裡便；唔好俾教條困住，生存0係其他人思考既結果裡便。唔好俾其他人意見既雜音壓低自己既心聲。最重要既係，有勇氣去追隨自己既內心同直覺。佢地已經知道你真正想成為點樣既人。其他都係次要。" Alan娓娓道來
小咪聽罷直覺以上一番話不是正衝著自己煩惱而來? 即時茅塞頓開，當下心意已決
"呢個人果然唔簡單喎!!...." 小咪拿汽水呷了一口
"係呀!! 雖然佢死左已經幾個月，不過一望到部手機都會諗番起...."Alan望著手機輕嘆
"呀..係喇，你後晚係咪要做gym呀，不如我去附近行街順便等你做完一齊食飯吖?"小咪笑問
"好呀....不過驚妳等得耐噃....一係妳入埋會吖，最多會費我俾嘞.." Alan作大方豪氣狀
"好呀!!錫哂你" 小咪俯前親吻Alan，兩人無視身旁食客，熱烈擁吻
此情此景，配合窗外來往電車，好比一幅浪漫詩篇........
屯門分區警署內，James馬仍在等候機場入境部門及國際刑警協助查證有關死者身份的結果
"點呀? 確實到石灘死者身份未呀" James馬對剛從機場回來的探員問道
"入境處果便話冇名好難查，而且個樣咁模糊，已經盡量幫手查架喇...."探員如實匯報
"咁國際刑警果便有冇料呀?..." James馬轉問女探員
"仲未有回覆呀 馬Sir..." 女探員回應.." 都係send左出去一兩日...可能冇咁快啦..."
"如果再搵唔到死者身份，就真係要close file嘞.....點算好呢?" James馬正在苦惱之時
"馬Sir!! 大堂話黃金海岸酒店報案話有兩個住客失蹤左兩日，d行李冇攞走到..." 探員慌忙報告
"即刻全部人去查下...可能我地一直就係搵呢兩個住客......" James馬下令 "出發!!"
"YES SIR!!" 一眾探員熱烈回應
葵涌公眾殮房，乃香港四大殮房中遺體存放量最多，然而怪事亦較多，自從存放了189個無故猝死遺體後，夜班員工往往聽見悲哭連連，動人肺腑，可能是基於同情，還是從事這工作的特殊胆量， 他們都視若等閒，可是怪事仍接連不斷，先是屍體被盜，然後...
"今晚又係你當夜呀...梁伯..." 收屍員正運一屍體到殮房存放
"係呀!! 又有住客嗱..." 梁伯不慌不忙辦理接收手續
"係呀....天橋底走既.........咦? 好似冇咩位剩咁既....." 收屍員覺得奇怪
"哦...果團人未走呀...跟我黎啦...." 梁伯和收屍員推著遺體到一列櫃前
"嗱...放入去啦!!" 梁伯拉開其中一個櫃，與收屍員一同搬遺體進櫃內....
"喂!!..落唔到底既? 唔係呀?" 兩人百思不得其解
他們再三擺放後仍出現此難以解釋奇景
"咁我地報唔報好......" 梁伯似在猶豫
"呢個咪之前唔見左住客果個單位黎?.." 收屍員忽然驚覺
"吓!! 唔係真係咁邪呀......" 梁伯頓然不寒而慄
香港生物科技研究院內，DR.展有感已多日未抵辦公室，故回來處理堆積文件
"估唔到冇返黎一個禮拜啫...D文件多到....." Ann自然相隨左右幫忙
"所以單案唔早日了結，呢度d野都唔知點收科...."DR. 展忙於翻閱及簽署文件
"派左咭片幾日都未有進一步行動，都唔知班妖怪想點...會唔會俾佢地識穿左....." Ann有點疑惑
"唔會...d妖怪只係去到初心通功力，一般人就睇得穿啫，想睇穿我地一定冇可能.."DR.展語氣肯定
"噢...." Ann伸了伸懶腰..."抖一陣上下討論區先......咦......殮房屍體懸空放?..DR.展...你過來睇睇?"
"咩事?...咦!!" DR.展專注屏幕 "話條屍0係個櫃半天吊，擺唔到落底?........ Ann，妳認為係下面無形果條屍頂住左?"
"係呀....因為殮房發生呢d野多數冇人信，亦都唔會公開...不過一定估唔到d員工會上網爆料，真係鬼算不如天算!!" Ann表現自信
"但係如果明目張膽咁去揭穿佢，好似唔係幾好..." DR.展略有顧慮
"咁不如請我地靚女風水師 Kitty 出馬啦!! " Ann 活潑提議 "不過如果班妖怪知道有人上討論區爆料， 一定唔會就咁算數....睇黎又要打一場喇!!"
"事事小心d，唔好要我擔心妳..." DR.展望著Ann默默祈望
屯門分區警署內，James馬和一眾探員剛由酒店調查失蹤案返抵辦公室，大有所獲
"如果唔係酒店為左尊重住客，慣例連續兩日都唔見住客出入房間，先至叫兩個服務員用後備門匙開門，我地一早就可以確定死者身份...馬Sir都唔使咁煩惱啦..." 女探員有點不憤抱怨
"一開始我認定死者係香港居民，竟然冇諗到佢地出現0係咖啡灣，會係附近酒店住客既可能，呢個係我疏忽左...唔好怨喇!!... 將死者John Lam同失蹤者Coral Ho既資料 send俾國際刑警，搵到佢地親人就安排來香港協助調查..." James馬望向女探員
"不過馬Sir，死者條屍都仲未搵到...一旦搵到死者親人咁點向佢地交代呀?" 女探員再問
"我諗條屍可能冇離開過殮房，只係收埋左，畢竟對方唔係人類，有咩方法我地估唔到，不過既然
有人可以同佢地作對，變相俾我地一個希望......一切問題都可以解決到...."
James馬眼神顯出堅定，默認與妖怪大打出手的忍者乃破案唯一希望
風水堪輿學說，自古流傳至今，以其五行生剋制化之道，活用變化，令窮者改運，富者守財，因此每朝每代皆有能人輩出，直至如今繁華盛世，從未間斷，其中一位正出現於電視節目....
"~郭師傅，妳係風水界天之驕女，妳睇近日網上所謂殮房屍體懸空呢個傳言，係真定假呢?~"
"~我知呢兩日好多人談論緊呢個話題，不過可以話俾大家知，係假既.." Kitty向主持微笑回應提問~
"~相信係d員工疲勞過度睇錯啫，我為呢件事起左支卦，係第五十七卦 地天泰，代表一切如意吉祥~"
雖然有堪輿名家出面安定民心，不過並不能安了他的心，今夜奈何工作關係，不安也得安..
"都話左唔可以向外公報，都唔知邊個爆出黎，攪到差D連份工都冇埋，而家死都要否認.."
梁伯抱怨過後連隨臉有懼色 "不過發生D咁既事，就算做呢行都咪話唔驚..."
時近午夜，有人敲門....
梁伯見是一黑衣架太陽鏡女子，感到奇怪，故開門探問 " 小姐有咩事 呢?"
女子除下太陽鏡 " 認唔認得我係邊個呀?"
"妳係...郭師傅? " 梁伯大驚 "真係妳呀?"
"我算出呢度有怪事發生，又知道唔可以宣揚，所以對外就話冇事，實際暗中黎睇下..."
Kitty語氣平和 " 如果可以唔該你帶我去了解下，我保證唔會同其他人講..."
"咁..咁勞煩哂郭師傅喇.." 梁伯隨即帶Kitty到一列櫃前，拉出其中一格....
"就係呢個櫃喇，睇黎入面咩都冇，不過擺條屍落去就唔到底..."
"~Ann果然冇估錯，真係用妖法遮住左條屍，但係而家施法......有喇~!!" Kitty 心中盤算，已有計策
"唔介意問句，呢度之前係咪有屍體唔見左呀?" Kitty在梁伯面前屈指一算後探問
"郭師傅真係犀利!!呢件事從來冇向外公開過..." 梁伯大為讚嘆
"你聽朝再打開個櫃就會出現番，至於點樣解釋，唯有話係人為錯誤...你推埋個櫃先啦!!"
Kitty 趁梁伯推回遺體櫃時，已暗中破了妖法，並解了屍控術
"我要走喇，記住唔好俾人知我出現過..." Kitty 隨即離開，剩下梁伯一人仍半信半疑.....