有一晚一個來電: 回憶都是突如其來的(上)
中五個年既會考，俾我負負碌碌咁係原校升讀中六
點解係負碌? 唔係因為我唔讀書，而係因為個時D屋企野實在太煩，
搞到我冇咩心機溫書 中六既日子，都係好平淡咁，繼續單身咁過
有一晚，D功課又係多到仆街，做到個人都慶慶地，AL咁辛苦把春咩
突然間手提響，咁我睇都冇睇係邊個，就有D燥底咁講
我：喂 ! 咩料呀 !!! (其實部手提都係男仔搵我多，所以習慣左果種語氣
（利益申報：我唔係GAY )
??：嘩 (我諗佢嚇親)，做咩你變得咁惡既
我心諗：把女仔聲咁熟既．．．．．．．．．．．邊撚個黎！？
我：你係．．．．．．．．
??：搞錯呀，咁都唔應得我把聲架（好明顯埋怨緊我），我係阿紫呀
我當時既反應係 ＞ ＞ 唔怪得把聲咁甜咁熟悉
我：唔好意思，對你咁惡添，我一開波冇睇邊個就接，估唔到係你打黎
阿紫：車！我唔搵你，你都唔會搵我架啦
我：唔係，近排中六忙呀麻（我仲唔啦啦聲兜咩，其實我係唔想搵佢）
阿紫：藉口！同你一齊個兩年仲唔知你份人咩！你都唔會掛住我架啦！
我：做咩冇啦啦又提返以前呢（我實在唔想再提起）
我再問：點呀你，升唔升到中六
阿紫：車！而家先識黎關心我。
我：係呀，咁講定唔講呀，唔講慳返。
阿紫：正一死人頭黎！講啦講啦。我升唔到呀，去左第二間重讀。
我見佢語氣明顯down左，我都費事再講呢個話題。
我：唔，唔好講學業既野啦，既然你一場打黎。
阿紫：算你識趣啦
然後，阿紫用好溫柔既語氣：係呢，阿樂，你記唔記得我地係點識架？
我：記得，中一個年．．．．．．．．．．
就係咁，回憶，都是突如其來地，被勾起了。
就係因為阿紫個電話，初戀既回憶再次從心底某個位置，被喚醒。
踏入中一開學既暑假期間，我一直都好唔開心。
因為我小學成績考得唔好，派去一間我唔係咁想讀既中學。
就係咁，暑假搞既中學迎新日我都冇去到。
中一開學第一日。
我一路跑一路自言自語：屌！今次真係仆街鳥！唔認得路添！
因為我暑假只係去過一次，我亦唔知有咩車可以上到我間學校。
就把心一橫決定行路。但估唔到呢個決定仲仆街。
我一路行一路問：唔該ＸＸ中學係邊呀？
陌生人：哦！呢間野雞中學呀（ ）你沿斜路上就係架啦
我：唔該你！
咁我老虎蟹都跑上去，第一日遲到真係好撚瘀皮。
最終，我都趕到。
我中一係讀Ｃ班，我心諗：屌，唔會係最差果班呀！
但當我後期發現，原來呢班係最好。咁點解唔索性Ａ班代表最好呢？
咁撚容易令人混淆！！
中一返學第一日唔識野，著校服走去扣粒頸喉樓，而家諗返起都柒到喊。
我當時仲好自滿，以為咁就係乖乖仔，真係ＯＮ９
當我聽到打鐘聲，排隊果陣，有個好ＣＯＯＬ既人同我講
??:屌！搞咩鳩呀你！解左粒頸喉樓佢啦，好撚樣衰呀你。
我當時都不以為意，望望自己．．．．
真係幾柒 ，拿拿林解左佢。
我：你叫咩名（睇佢個樣，好似唔多友善，古惑仔咁款）
??:叫我呀力得啦！
(估唔到打後，阿力就成為我中一至中工最老死既朋友。)
我：我叫阿樂。
阿力點點頭，就唔出聲繼續扮ＣＯＯＬ鳥。
聽完一輪悶到仆街既早宣之後，上課室。
由於冇安排位置，我又算ＯＫ高。我就是但坐左window旁邊既位。
我對呢間學校一開波冇咩歸屬感，始終唔係我想讀，所以一直都
處於一個唔係太開心既狀態。直至見到．．．．．
我班主任
一入黎，佢自我介紹
班主任：大家好，我叫MISS CHAN。我會係呢度既班主任，加數學老師
所以，大家有好多時間都會見到我架啦
我仔細打一打量Ｍｉｓｓ Ｃｈａｎ。
好後生，一把長既曲髮，皮膚算白，樣貌清秀。令我有點眼前一亮。
佢講完之後，好明顯全班既男仔都有點哄動，都係讚緊呢位ｍｉｓｓ索呀盛。
班主任：因為迎新個日，我已經係同學之中揀左由邊個做班長，而家就請佢地
兩位出黎自我介紹一下啦！
隨之而來既係一片掌聲。
我心諗：屌，又係呢ｄ老土既自我介紹。我睇都唔睇，就伏低左訓覺。
男班長：各位好，我叫ｘｘ（佢唔重要，費事開名了）
女班長：大家好，我叫阿紫。
就係因為佢把聲，我連伏低訓覺既時候，都抬一抬頭望佢個樣。
因為佢把聲真係幾甜幾好聽。
望到既係一個，樣貌有ｄ包包面，紮辮，對眼好精靈，身材ＯＫ既女仔。
我當時既感覺係．．．．．．．．
．．．．．．．．．．．．．．．
屌！真係好撚眼訓。唔得．．繼續訓先
我訓唔係真係想訓，只係掩飾緊我唔想接受呢個新環境。
朦朧間聽到班主任講：
而家你地坐緊既位置，只係限今日，聽日我會安排你低坐新既坐位。
就係因為一個令我唔滿意既小學升中派位結果，派到一間我唔願意既中學，
同時亦因為被ＭＩＳＳ安排既坐位表，將我同阿紫既緣份相連一起。
當時既我仲未意識到，原來緣份，一早已經為我鋪緊路．．．．．．．
第二日，我地未入班房之前，要係班房門口集一集隊先。
我：阿力，做咩唔入去呀？
阿力：屌，你尋日冇聽Ｍｉｓｓ講架咩？今日坐新位呀麻。
我：係咩？ 唉，坐位呢ｄ求其咪算，搞咁多做咩
班主任：大家靜ｄ好冇！？ 我會安排一男一女坐，費事你地傾計。
阿力即刻話：嘩屌！正呀喂！有得同女坐。
我：你駛唔駛成個咸濕樣現晒出黎呀
阿力：你真係唔識野，同女班長坐就正啦！
我：阿紫？
阿力：係呀！成級佢最索咁濟。
我：屌，你返左兩日學咋喎，咁快知？
阿力：我有做過Research呀麻！似你咁咩，咩都唔理咁
比佢咁講，我即刻留意阿紫個樣。佢真係幾可愛同靚。
不過我自問樣貌普通，同埋我又冇諗過咁快拍拖，所以對佢冇咩特別感覺。
就係呢個時候．．．
班主任：阿紫，第三行，第三個位。
阿力，第五行，第四個位。
阿力：屌！哎呀！冇得同佢坐
我笑撚左出聲，真係冇佢咁好氣。
我：認命吧啦你！這些機會不是你的！
班主任：阿樂！！．．．．．．．．
．．．．．．．．．．．．．．．．
．．．．．．．．．．．．．．．．．
．．．．．．．．．．．．．．．．．
第三行，第四個位！
我坐埋去，先知原來我係坐係阿紫後面。
坐我隔離果個女仔．．．．真係．．．
．．．．．．．．．．．．．．．．．
．．．．．．．．．．．．．．．．．
好
撚
肥！！
屌，我心諗，雖然我就話唔介意姐。但至少有見正正常常，普普通通呀
個肥婆同我講：Ｈｉ，我叫ＡＭＹ呀，我係咪好肥呀
我笑左聲：下，唔係呀，幾標準呀．．．．係古代果時。
ＡＭＹ：死人頭呀！
說時遲那時快，ＡＭＹ即刻揮動佢孔母有力既手掌，一野拍落我背隻到，
猛然發出一聲巨響！
我諗呢一聲，阿紫都聽到，即刻轉個頭望一望後面發生咩事．．．
見到我趴左下張枱度。因為真係好撚痛
阿紫：嘩，佢咩事呀！趴左係張枱度既？
ＡＭＹ：冇，佢想非禮我咋麻。
我即刻彈起身反駁。
我：大姐，講笑都搵第樣呀，我揀非禮都揀阿紫啦就算係
ＡＭＹ：哎呀！仲咁口硬！信唔信我再打力呀啦！
我：唔好！放過我啦ＡＭＹ！我咁樣會比你打到骨折架！我唔想咁細個就駝背呀
阿紫：哈哈，你地都幾有趣喎！
ＡＭＹ：鬼同佢有趣呀，一陣俾人誤會咁點算！
我：打風都未誤會到我同你有野啦下話
阿紫繼續笑，近睇佢真係幾可愛，同埋皮膚好白，初時真係冇咩留意清楚。
阿紫：咁其實，頭先到底發生咩事姐？
ＡＭＹ就一五一十講出真相。講完之後阿紫笑得仲開懷左。
阿紫：其實你都幾可愛架喎，你叫咩名呀？
我：阿樂。
阿紫：哦！你叫阿樂，唔怪得咁識講笑啦。
我：邊關事呢。（我本身個人真係悶，係有時ＯＮＯＮ９９咁）
阿紫繼續講：其實我對你有印象．．．．
我即刻．．．．．． ＞
我：我唔係同你有咩仇口呀？我未見過你架喎
阿紫笑左聲，微笑住咁講：唔係，你係惟一一個，
係我做緊自我介紹果時訓覺既一個男仔姐，我當時
覺得你真係好冇禮貌。
我淡淡地說：係咩．．．．．．（因為我根本唔喜歡呢度返學）
阿紫留意到我好似有心事咁，想繼續開口：你．．．
班主任：好啦唔好再傾計啦，就夠鐘上第一堂，快Ｄ拎好你地Ｄ書出
黎乖乖地等下一個老師黎啦。
阿紫見到ＭＩＳＳ咁講，就拎返個頭果去。
我亦覺得，原來我一開波俾佢既印象，就係無禮貌，唔怪得人地會記得我。
我又唔係Ｄ咩靚仔，講樣貌，大把人好過我，係呢個階段既人幾時會講性格呀。
估唔到果時既我，思想已經唔似係一個中一既學生，個腦已經會識諗好多野，煩好多野。
可能就係因為我係一個複雜既家庭長大吧．．．．．．．
第二日放學返到屋企，沖完涼，攤係張床度諗．．．．
唉，雖然係就係唔開心架啦黎呢間讀，但入左黎點都要比返Ｄ心機讀，
如果唔係實俾老母屌餐死！！
諗返一層，其實今日都幾開心呀，起碼識倒朋友（個肥婆ＡＭＹ除外 ）
開學之後既幾日，我都好俾心機上堂，同Ｄ同學都開始傾多左計。
上堂亦都再冇訓過覺。話咁快就黎到ＬＵＮＣＨ ＴＩＭＥ。
咁我就照係課室拎我既飯盒啦，點知．．．．．
ＡＭＹ：喂，阿樂！幫我拎個飯盒啦。
我：唔想幫你喎。
然後佢即刻舉起佢個拳頭，向我施壓。
我：唉，怕左你！好心你咁肥就自己拎啦，你知你一日既運動就係得你去拎飯盒個程架啦！
你咁都唔好好珍惜下呢個機會。
ＡＭＹ：咁多野講，叫你拎就拎啦！
如是者，無奈地拎完比佢我就繼續食飯啦。
當我食食下之制（其實我食野速度一般係果時），我隔離既手停左。
我望一望，屌！唔撚係呀！條肥婆咁快就食完！？痴線架！
ＡＭＹ望住我眼甘甘唔出聲。
我心寒一寒講話：做咩呀ＡＭＹ，唔夠食呀？我唔會比我個盒飯你架！
ＡＭＹ：唔係呀，我想你幫我個飯盒掉去垃圾箱呀，唔該呀！
我：頂，你真係麻鬼煩！
當我食完野出去掉完返埋位之際，有人想問我功課既野，咁我咪答佢。
正當我答完佢，想轉身行返去我個位之際，我聽到一聲好尖既大叫聲音。
呀－－－－－－－－－－－－之後全班靜晒。
我定一定神！如來我轉身果下撞到阿紫，佢當時正拎個飯盒出去掉！
剎那間我感覺到我個上身有Ｄ暖暖地同濕濕地！
頂！原來Ｄ汁整到我上身件校服到
阿紫即刻講：對唔住呀，呀樂！我唔係有心架！（佢個眼神真係好可憐）
你冇辣親呀麻？
我見到佢咁既樣，唔通仲屌佢咩．．．．
我話：冇事．．我去廁所洗洗就冇野！
其實大家都知道冇可能洗倒，洗左化左仲撚大達。真係好撚柒
其後ＬＵＮＣＨ ＴＩＭＥ ＢＲＥＡＫ我都係咁俾人望住
真係瘀皮。返上課室上最後兩堂時，阿紫係班門口見到我就用手，
拍一拍我膊頭。
阿紫：喂，阿樂！對唔住呀 拎隻手出黎
我：做咩呀
我講完後佢索性捉住我隻手，送左盒小食部買既糖比我。
然後我下意識即刻縮手，因為我感覺到佢隻手同我隻手有接觸。
佢見我咁，即刻講：ＳＯＲＲＹ。
我：唔緊要。（其實我唔係咁鍾意人地掂我隻手，因為某Ｄ原因，個刻我當然冇講）
多謝你盒糖！
之後我就返左入課室鳥。佢就好似仲有Ｄ介意我縮手縮咁快果下．．．．．
事後當晚諗返佢掂到我隻手，雖然我唔係好願意。
但係即使係個一剎那，我都感覺到佢隻手係好暖同柔軟。
個一刻既時間好似真係停頓左咁，話晒第一次比女仔捉住隻手．．．
我中一個時，先知道原來有一Ｄ日子既最後一堂係ＳＥＴ左做班主任堂
呢堂就唔係教書既，拎黎講下班會既野或者做自己野咁。
班主任：為左增加大家對學校既歸屬感，你地每人起碼要參加一樣課外活動ＯＲ服務。
我心諗：唔係呀．．
放學後，阿力就埋黎問我：喂，你打算參加咩呀？
我：我諗Table Tennis同風紀。
阿力：哦，我打算參加籃球隊呀。（事後發現佢打波幾勁）
阿力細細聲同我講：喂！你條死仔近排好似同阿紫有Ｄ兩句喎！
我：咪撚玩啦，講兩句就有路咩！
阿力：起碼佢會ＳＨＯＷ你呀，佢平時唔係點理佢地男仔。
我：咁佢多女仔ＦＤ呀麻。
阿力：我又唔覺喎，Ｄ女仔有Ｄ開始妒忌佢。唔係好想同佢玩。
我：係咩，我唔係好留意到。平時見佢幾活潑同笑笑口架喎。
阿力：屌，都唔知你隻眼生係邊！唔講啦，返屋企先，拜拜。
正當我執書包想走之際，阿紫轉身同我講：阿樂，你打算參加咩呀？
我照答佢。
阿紫：哦，我打算參加啦啦隊呀！
我：下，你鍾意跳舞呢味野架咩？
阿紫：冇呀，咩都試下呀麻
我：哦，咁如果冇咩野我想返屋企先啦。（好撚眼訓 ）
阿紫：哎，咪住。
我見佢猶一猶豫，有Ｄ野想講咁．．．
眼見佢猶豫．．．．．我心入面都一股疑惑（當時我冇特別諗Ｄ咩野）
阿紫：其實我．．．．．．．．．
．．．．．．．．．．．．．．．
．．．．．．．．．．．．．．．
．．．．．．唔．．．．．．．
．．．．．．．．．．．．．．
．．．．．．．．．．．．．．
唔係有心掂到你隻手，我見你好似好介意咁，我驚你會嬲。
我笑左出黎：哈，等我仲以為咩咁神秘，原來係咁咋，我冇野喎。
阿紫：咁你唔係以為我想講Ｄ咩呢？下？（佢用好鬼馬既語氣問）
我即刻塊面紅左，有Ｄ慶慶地。
佢見到我咁，即刻掩住個咀笑，一路拍我隻手擘
（事後我都一直留意到，原來佢一開心就會咁做．．．）
阿紫：做咩你塊面紅晒呀！你知你都唔算白架啦。面紅已經唔係咁易睇到，
而家仲要暗紅添！哈哈
我：係咩！？冇呀，邊有呀！（屌，點撚兜呀 ）
阿紫：你有冇ＩＣＱ？（個陣興玩ＩＣＱ無耐）
我：有，我寫比你．．．
阿紫：ＯＫ！今晚ＡＤＤ你啦！拜拜！
佢對我笑一笑，之後就走左。其實，佢既笑容，的確幾易令人
開心個隻，因為佢都算係活潑型，笑起上黎特別傳神。其後，
縱然我對阿紫冇咩感覺，但個腦，唔知點解，就會時不時諗住佢。
果一刻我只知道，原來我同佢一齊既時候，係幾開心，比起係屋企。
但當時我個刻未意識到，其實我正正需要既，就係佢既活潑同埋一個依靠．．．．．．．
自從拎左ＩＣＱ之後，我同佢夜晚都會傾下計，日子耐左，我對佢既了解都深左。
以下係ＩＣＱ既對話．．．．．．．．．
阿紫：係呢，識左你幾個星期都唔知你住邊
我：我住ＸＸＸＸＸ，你呢？
阿紫：我住ＸＸＸＸ。
我：哇咁近學校？行路都得喎！
阿紫：係呀！我日日都行返學校！
我：係囉，咁先係架麻！唔好好似ＡＭＹ咁懶！
阿紫：哈哈，你好衰呀！咁笑人。你聽日駛唔駛當值？（風紀）
我：要呀，但唔知看邊度，個風紀隊長好鬼惡，又嚴。
阿紫：哦，咁算啦，仲諗住撞下你添！
我心諗：撞我咁爽
阿紫：唔講啦，差唔多訓，聽日見。
第二照早，我見到我個隊長，就死死氣問：點呀隊長姐姐，今日看邊呀？
隊長姐姐：叫我阿晴得啦
我：哦，做咩今日咁好語氣呀，平時成個男人婆咁。
佢即刻搣我隻手，痛到我大叫。
阿晴：喂喂。（佢哄個頭埋黎講）
我：咩料呀！
阿晴：你係咪識得一個人叫阿力？
我：係，你點知架！
阿晴：我見你成日同佢一齊呀麻！佢打波幾勁喎，樣又唔差。
我：咁點呢你想？
阿晴：冇呀，我想識佢呀。
我：頂，男人婆真係男人婆，咁直接！抵讚！！
阿晴：你死啦！幫唔幫我呀！
我：求我啦
阿晴：阿樂少，唔該你啦
我：得啦得啦你行開Ｄ啦，哄咁埋把春咩！思春咁既樣！
我幫你都得，以後我鍾意守邊度就守邊度啦！
阿晴爽快咁：無問題！
我：咁我今日守樓梯（樓梯係阿紫上去操場集隊必經之地）
其實我又唔係特登為佢既，只係樓梯冇咁多野做，可以ＨＥＡ！
打後，見到咁多人經過，都冇見到阿紫，正當我面向樓梯之際，有人從後．．
用我雙手請我食左我塊面食一下凍柑 ，凍到我彈起
（因為個時都十一月，涼左好多，但又未換季 ）
我想拎轉身屌柒果個人時，發現原來係阿紫黎。
阿紫：嘻，今日都幾有緣喎，撞到你守呢度。
我：冇，我同阿晴講我要守呢度呀麻
阿紫：哦！邊個阿晴！快講 （佢do起個咀，鼓埋個腮講）
我：我個風紀隊長呀。
阿紫：你唔係講佢好嚴好惡架咩？又會咁聽你話既！？
我：唔係，，只係．．．（諗諗下費事爆人地Ｄ野，所以都係唔講）
都係冇野啦。
阿紫：哦！你死啦！有野暪我！哼！唔理你啦死人頭！
我：哈，你發惡講死人頭都講得幾好聽喎。 （我真係唔識死）
阿紫：哎呀！哼！（仲高音Ｄ）唔踩你呀！
講完之後佢即刻踩左我一腳！
心諗：仆街鳥！今日對白鞋污糟左，返去實比老母屌啦
阿紫：呵呵！抵死！
跟住佢就走就上樓梯。
眼見佢上樓梯．．．．．．諗左好多野．．．原來．．
．．．．．．．．．．．．．．．．．．．．．．．．
佢對腳都幾白
（因為個時有ＰＥ堂，要著住夏季運動服返學，女仔條褲又特別短ｄ ）
仲有，有咩咁好嬲呢？真係諗到腦爆！
ＰＥ堂教打排球，練習既時候，我就同阿力練。
阿紫就同另一個女仔練。而ＡＭＹ就同另一個肥婆練。
（冇錯，我個班有兩個肥婆，真係肥婆對對碰 ）
ＡＭＹ咁多位唔揀，編編要揀係我隔離練！
當佢跳起煞球，落低果下。地板上發出一聲巨響。
我大大聲咁講：嘩咩事！？地震呀頭先！？ （真係震左少少）
阿力笑撚左出聲：唔係地震，係ＡＭＹ跳完落地果下既聲響。
我：冇理由，ＡＭＹ點可能會有聲呢？
ＡＭＹ好開心咁答：咁又係呀，我咁瘦，點會有聲。
我：唔係，我既意思係，以你既身型，根本冇可能跳得起，又點會落地有聲呢？
ＡＭＹ即刻搵個波掉鳩我，痛到我ＨＩＨＩ。
而阿紫聽到，佢今次笑到連個人都蹲左係地掩住個口。（佢笑點真係低 ）
每次完左體育堂，阿紫個人成塊面都會好紅。紅得好可愛
但我上完ＰＥ堂之後，發現心口有點唔舒服，唔知係咪比ＡＭＹ打親呢。
真係好痛。放左學之後，痛楚仍然冇消減。我趴左係台面。
阿紫走黎問我：做咩呀你？唔舒服呀？
我：冇，應該冇咩事既（但真係痛得好犀利），我想走先都係。ＳＯＲＲＹ。
因為真係頂唔順，我決定打電話叫老母陪我睇醫生，因為有Ｄ唔妥。
我老母聽到我心口痛，嚇到即刻話唔睇門診，睇公立醫院。
初初我以為佢係驚門診冇料到，原來唔係．．．．．．．．
入到醫生房，醫生講：阿樂仔心口痛？
奇怪，我心諗：我一入到去佢就知我叫咩名同咩事！？
言談之間好似發現，我老母唔係第一次同呢位醫生傾過計，醫生好似知我Ｄ野咁。
我問：醫生，到底我咩事呢？
醫生老實咁講：樂仔，其實你好細個時，你媽咪已經帶過你黎睇我，所以我先識你。
我心諗：但我唔識你喎，真係冇印象。
醫生：其實你個心係有Ｄ問題。（佢好直接咁講）
我：有咩問題？？
我繼續問：咁呢個病嚴唔嚴重？
醫生：藥物係可以控制，呢層唔需要咁擔心。
我見冇咩野，我就出返去。我老母就繼續傾。
其實，本身個家庭已經夠複雜，再加埋個病，實在令我太煩太唔開心。
後尾發現，原來錢銀都係一個負擔，畢竟我屋企唔係好有錢，只係算基層。
家人關係唔好令到我老母既負擔更大。一想到呢度，我就真係好內疚，咩都做唔到。
就係個一刻，我個腦。就只係諗起阿紫。但另一方面，我又有Ｄ顧慮，無啦啦搵人始終
唔係太好，所以我都扮冇野，唔講佢知。但心入面一直唔好受，唔開心。
因為日子天氣開始凍，我地亦換上了冬季校服。有時放學無意經過，見到
阿紫排緊舞，心入面都好鄧佢呢份熱誠同活潑開心。佢見到我，都會對我微一微笑。
而我放學課外活動練緊Table Tennis既時候，佢知我練緊，好多時都會黎睇一睇我。
今次亦唔例外。
阿紫：阿樂。（佢向我招一招手，示意我過去）
我：咩事呢？
阿紫：冇呀，見買左盒熱朱古力奶比你暖下身呀。見你練得咁辛苦。
我：真係喎！多謝你呀。
見到佢呢種行為，我既心入面其實真係好溫暖。
唔係因為呢盒奶本身有既熱溫，
亦唔係因為純粹天氣凍既反差，
而係因為，我真正感受到，係一片煩惱周旋緊既期間，係得佢，阿紫，
表現得咁關心我。試問一個中一生，點頂得順屋企咁多唔開心野，而加仲加埋個病。
我望住呢盒奶定住左一陣，心入面有股力量凝聚緊係我眼睛，我感覺到我有Ｄ想喊。
阿紫見到我定左神，問：做咩呀你？呢排怪怪地咁既？
我繼續Dup低頭，講：冇呀。（隱約帶點嗚咽）
教練：喂，阿樂，唔好掛住溝女啦，練波啦！
阿紫：咁我遲ｄ再搵你啦，走先啦，８８。
就係咁，我目送住佢既背影離去．．．．．．．
雖則唔係ｄ咩會死人既病，但我要多注意體育堂同要帶藥返學校食。
而家幾乎每個朝早，阿紫都會買盒熱朱古力奶比我，放係我台面。
不經不覺，成為了習慣。
ＡＭＹ：你就好啦，日日有朱奶飲！
我：你咁想要比你囉。
ＡＭＹ：唔好啦，容咩易飲肥我。
我聽到即刻 ＞ ＞
我：你仲有得肥咩！ （我講完即刻扮閃去掉垃圾，費事又比佢打）
今日好凍，得十度倒。我見阿紫不斷縮埋個身。係午飯時間，我好自然咁，
除左我件校褸，直接從後咁幫佢披住。佢感覺到有野披住，佢望住我，
眼眨眨咁，我見佢碌大隻眼望住我．．．．
我：係咪凍？我見你個身縮埋左，我諗住你著住佢應該會暖Ｄ。
趕唔切買熱朱古力奶，用件校褸頂住當先啦。
阿紫見我咁講，好甜咁笑住，講：咁細心既你！（跟手摸左我個頭幾下）
就係因為呢個行徑，有Ｄ人見到都嘩鬼咁叫，我就覺得冇咩野，一於懶理。
阿力見到，即刻走埋黎：力哥，我又凍呀，可唔可以除件衫比我呀？
我：頂，玩野呀！ 點呀，個男人婆阿晴有佢溝你？
阿力：你點知佢想溝我？哦！原來你條死仔隊佢埋黎既！我屌你！
我：都係益你姐。
阿力：屌你啦！男人婆都叫益我，今次真係多得你唔少。
阿紫聽到，拎轉頭講：咩原來阿晴鍾意阿力呀？
我：係呀，唔係既話佢點會咁聽我話，係我介紹佢比阿力識既！
阿力：我既一生就比你咁樣催毀啦，整鋪咁潔既比我。
阿紫聽到，好甜咁講：哦，原來係咁！
我：唔係你以為我同阿晴做咩？
阿紫：冇野喎（好輕挑咁講）
食完ＬＵＮＣＨ，我拎藥出黎食。
ＡＭＹ即刻話：嘩，阿樂！你病呀！早講呀麻，好彩冇飲你包奶。
阿紫聽到ＡＭＹ咁講，即刻拎過黎問：阿樂，你病咩？冇事呀麻你，咩病呀？
從佢既反應，我見佢係真係好緊張我。但，我內心爭扎緊，諗緊講定唔講。
眼見阿紫，拎轉頭咁緊張望我，搞到我唔知講唔講個真相好。點解？
因為，我地個級（唔係我個班），有個女仔因為行動不便，每日都要拎住
個扶手一下一下咁行，所以冇咩野人會同佢做朋友，可能大多都係嫌佢麻煩。
而我諗諗自己，呢個病雖然唔係咩不治之症，但阿紫會唔會因為咁，嫌棄
唔同我做朋友？我好不容易先係呢間學校得到一點歡樂，我唔想破壞佢，
於是．．．．．．．．．
我答： 冇，我感冒姐。唔駛要太擔心既。
聽完我感冒之後ＡＭＹ即刻作撞咁，彈開幾尺，驚我傳染佢。
我：放心啦ＡＭＹ，冇細菌可以埋到你身架。
阿紫：感冒都食咁多藥？睇黎你都幾嚴重喎，唔舒服就唔好返學呀麻，傻佬。
我： （阿紫話我”傻佬”，單單呢兩個字，我唔知點解覺得好親暱）
就係咁，阿紫就眼仔碌碌咁望我食藥，好似前世未見過人食藥咁。
我比佢咁望住，我都有Ｄ唔自然。雖然隻手有Ｄ手震，但我仲係掩飾得好好。
佢見我食完，就係袋入面，拎粒二寶比我，講：食藥苦呀，食粒糖啦。
我：多謝。 （個一刻真係好窩心）
然後繼續上堂。上堂既時候，我都不其然分左心，諗緊，究竟點解
阿紫對我特別好咁。因為好奇心既底下，我決定今晚問佢。突然，
英文老師問我：Lok！How to spell "restaurant"？
我突然比佢咁嚇一嚇，唔撚記得點串，我起身個時呆左一呆。
阿紫拎轉頭做口型比我睇（r-e-s-t-a-u-r-a-n-t)
我照咁串返比miss聽。
英文老師：Correct.And pay attention to the lesson！
串完後，我就坐返低，望住阿紫既背脊。
阿紫，呢一個人，就係會咁識關心我，同幫我。
佢頭先呢個舉動，令我更加有衝勁去問佢點解。
放學返到家，見到ＩＣＱ佢Ｏｎ左，但．．．
老母：阿仔，唔好成日掛住玩電腦啦，快ｄ熄左佢做功課！
我：得得得（我心諗冇辦法了，惟有咁啦）
然後我係ｉｃｑ問阿紫：可唔可以比你電話我？我唔用得電腦
阿紫：好呀，ｘｘｘｘ ｘｘｘｘ（手提電話）
我見到就打左個突，個時中一買得起手提電話，應該幾有錢。
做完功課後，我就戰戰競競咁，一隻一隻手指，慢慢咁，按
阿紫既電話號碼，同時比時間我，緩衝自己急促既心跳－－－－
我懷著戰戰競競既心情，按阿紫既電話號碼，終於接通左，
一把好熟識既聲音：喂
我：喂，阿紫呀唔該。（慣左，明知應該係佢把聲都照咁講）
阿紫：我係呀，咁都唔應得我把聲架。（又埋怨我鳥 ）
阿紫繼續講：係呢，點解今晚咁快就off ICQ既？
我：冇，我媽見我成日用電腦，佢唔俾我用姐，所以咪索性打比你。
阿紫：哦，得我仲以為你特登搵藉口想拎我電話添。（我個時冇諗過囉 ）
我：我諗你有ｄ妄想症啦。
阿紫：車！哄下人都唔得既！
我唔想咁快入正題，於是我就講下其他野先，實在太緊張
我：聖誕節個假期有咩做呀？
阿紫：做咩，你想約我咩？
我：唔係，咁問下得唔得先 （女仔就係咁，永遠問佢野就以為我係想做我問個樣野）
阿紫：冇呀，會同屋企人去泰國旅行。
我聽到咁，有種莫名既失落感，當時我仲解釋唔到點解自己會咁．．．．．
我：你就好啦，我一次都未試過去出國旅行，屋企根本冇咁多錢。
阿紫：要唔要手信呀？ （佢咁問我有點驚訝，完全冇諗過佢會送野比我）
我：好呀，平平地得架啦，我冇咩所謂。（唔．．係時候入正題）
我吸一口氣：係呢，聽人講，你同ｄ女仔唔係咁岩玩咁喎？
阿紫佢冇出聲，靜左一靜。
我：阿紫？
阿紫：係呀，佢地話我成日都同男仔玩，話我勾引佢地喎。
聽到佢咁講，其實我好唔開心。
我安慰佢話：事實唔係咁喎，係佢地痴埋你度咋喎。同埋你係活潑型既女仔，
同咩人玩都夾得埋既。
阿紫聽到我咁講，笑住同我講：嘻，你咁樣即係安慰梗我啦喎？
我：因為我覺得你對我特別好呀麻，其實點解係我呢？（終於講左出口）
阿紫再靜一靜。（佢今晚究竟搞咩，成日都好似吞吞吐吐咁）
當我想再開聲叫佢既時候，佢突然講：係因為，其他男仔痴埋黎都係有機心，係得你冇。（佢好直接同急速咁講）
我聽到佢咁講，我個心好似觸左一下電咁。呢種咁特別既感覺，究竟係咩野？
我：機心．．咩係機心呀？（我個時真係唔明呢個詞語）
阿紫：傻佬真係傻佬。咁都唔識。
即係話，佢地痴埋黎都係想同我拍拖。
但惟獨得你，我感覺到你係真心對人好同冇私心既。
所以我先放心同你一齊玩，先唔抗拒你。
我：咁又係呀，我又真係冇咩私心，人地對我好我就會對返人好架啦。
（所以話，童年既時候，對人永遠都係最真心，有個句講個句。冇咁多顧忌，
同時冇咁多利益衝突，可以放個心，同人做朋友。出到黎社會，邊個會係你朋友？
我地人類係幾時開始，違背自己既良心去對人？）
因為阿紫講左好大段野，我需要ｄ時間消化，我停左一陣．．．．
心諗：究竟，佢對我既感覺，係好朋友，定係其他？
我冇機心，究竟，係好定唔好？唉，呢ｄ問題點解會咁煩架，唔諗啦
我想轉移話題，實在唔想咁快探討，於是．．．．．
我：你幾時生日架？問下咋，唔代表想送禮物比你！（今次先發制人 ）
阿紫笑住講：哈哈，你又知我想話你想送禮物比我既！？估唔到我同你開始有
ｄ心靈相通喎。我４月生日既。
阿紫接著問：咁你呢？
我：我５月生日架。
跟住，阿紫講左句令我好震驚，好手足無措既說話，呢句，我永遠都記得！
阿紫聽完我講我既生日日期之後．．．．．
阿紫：下，你５月生日架！？噢，我係唔會鍾意細過我既男仔既。
當時我係諗緊送咩生日禮物比佢好，但當我聽到呢一句之後，
我個心真係好唔舒服，係個一刻，聽到呢句咁沉重既說話，我既心跳，
就好似識得感應咁，每一下跳動都變得好沉重，成個人既思緒開始亂，
我實在忍受唔到呢種壓抑感。
阿紫：阿樂，阿樂，你做咩呀，唔出聲既？
我：冇，可能因為感冒唔舒服，想早ｄ休息。（點解要比我聽到呢ｄ說話呢）
阿紫：咁我聽日再買熱朱古力奶比你暖下身啦。
我：我諗唔駛啦，我都係唔想飲住。我訓覺啦，８８。
係我收線個一刻，我聽到阿紫想叫停我，但我實在收得太快。
我諗，佢應該感覺到我有ｄ唔開心，想安慰返我。
但係無論佢點安慰，都無法彌補佢個句說話。
所以與其係咁，倒不如快ｄ收線。
我訓係張床，望住個天花板，腦海不停盤旋緊佢個句說話。
而我，亦都係第一次，因為一個女仔既說話而唔開心。
冬天既夜晚，的確係好凍，但係，點都唔及，而家我個心咁荒涼。
究竟，我係咪鍾意左阿紫？如果係，我又應該點做？因為，就連
我自己，都好介意個病。同埋，佢根本睇唔上細過個既人．．．
點解我仲要自尋煩惱？？就係咁，反反覆覆，就訓著左．．．．．
第二日返學，我見到阿紫，就再勾返起佢尋晚所講既野，
我冇理佢，就係咁，個日，連堂都冇心機上，返到屋企，
老母講：喂，阿仔！有個女仔搵你幾次呀，打黎屋企，叫你搵返人喎。
我：係咩．．．．．．（心諗，一定係阿紫黎）
老母：做咩頭dup dup咁呀！哦！係咪對人做錯事呀！
我：痴線既你都，唔同你講啦。
我一支箭咁標入房，拎起個電話，究竟，打唔打好．．．．．．？
最後我都係決定左，打比佢。對住呢個女仔，我真係投晒降。
電話接通左。我即刻話：喂，阿紫呀，你搵我？
阿紫：．．．．．．．．（佢冇出聲）
我：喂，阿紫，你聽唔聽到我講野呀？（無理由既，明明接通左架啦）
係電話既聽筒，傳來好一兩下索鼻水既聲音。我聽到之後．．．．
＞ ＞
阿紫．．．佢喊緊？？
我：阿紫，你係咪喊緊？Ｓｏｒｒｙ呀，我唔應該係學校唔理你，
我知我咁做係好唔岩，對唔住呀真係。（你搞到我都想喊埋一份 ）
沒想到，原來我既一舉一動，都會牽引到佢既情緒。
沒想到，我，第一次整喊既女仔，就係阿紫。
我個心實在好難過，真係咩都唔重要啦，最緊要佢開心返，以後話點就點啦。
係呢一刻，我好相信，所有曾經愛過，曾經鍾意過人既男仔，不論個女仔係
咪鍾意你都好，你都唔想，你都唔忍心，睇見你鍾意既人流眼淚。
阿紫終於開聲，佢把聲嗚咽得好緊要，應該係喊得好犀利．．．．．．．
阿紫：你係咪已經唔再理我啦
我笑住講：哈哈，你講咩，好ｌｕｒ呀，我聽唔到真係。（可能因為喊得太勁,講野好 lur)
心諗：哎，仆街鳥，佢喊緊我仲笑添，今次屌啦星啦真係
阿紫：我喊緊你仲笑，你好衰呀。（好似喊得仲犀利左）
我：對唔住對唔住，唔笑唔笑，你慢慢講。
阿紫喊到咳左兩聲，問：你係咪已經唔再理我啦？
我：唔係，我唔會再咁架啦。（無論佢對我既感覺係點都好，個一刻我已經無所謂）
阿紫：成班已經冇同想同我做朋友架啦，我唔想冇左你，我唔想連你都唔理我呀。
係呢一刻，我先真真正正發現同明白。
原來阿紫，一直以黎係學校，都係唔開心咁過。平時見佢笑面迎人，原來都只係掩飾緊。
直至識到我，令佢可以開懷ｄ，將開心既事情蓋過唔開心既事情。日日笑住咁過。
而我，當初入黎呢間中學度讀，都係好唔開心，好唔願意。直至我識到阿紫，佢令我返
學既日子，變得愉快，因為佢，令我對返學，變得有所期待，期待下一日會發生咩趣事。
原來，我地大家都不約而同地，咁需要大家。咁需要一個倚靠。
呢ｄ，唔通就係緣份？
我同阿紫既距離，就係因為佢咁真心，咁直接既讀白，彼此拉近左一大步。
感情就係咁，有時要經歷過起起伏伏，經歷過開心流淚，經歷過彼此既對話，先會成長。
相方唔互相澆水，施肥，愛情亦只會係萌芽，經唔起考驗，最後枯死。
我同阿紫，就係因為今晚彼此，赤裸裸咁講左大家既心聲，先會將距離拉近。
當然，離同佢一齊既時間，仲有好大短路要行。愛情，就係要付出心機先有，
個晚，我清楚知道，阿紫同我原來係好似。我亦開始知道，佢需要ｄ咩。
離聖誕愈黎愈近，個個人都好似討論緊，聖誕假去邊好。
ＡＭＹ係我隔離又再單打我：喂！阿樂，聖誕有咩搞呀？
我：超，你都傻既，點解要話你知姐？總之唔會同你過咪得。
ＡＭＹ：頂！講野冇句好聽既。人地問你野你唔可以好好咁答架咩？
我：冇呀冇野做呀得未呀！！
ＡＭＹ：喂，靚仔！唔好話ＡＭＹ姐有好野唔益你，聖誕不如一齊？
屌！我冇聽錯呀，定係我食藥食得多開始有幻聽！呢句說話應該阿紫同我講先係。
我：得，你拎呢一年去減肥，下個聖誕咪同你出囉。
ＡＭＹ即刻搵本書想拍鳩我，我即刻口快快講左．．．．．
我：拿你再打我我老死都唔會同你去。
ＡＭＹ呢條肥婆，聽力咁撚好，身體咁多脂肪，編編冇積係佢個耳仔度，
而家仲識玩捉字塞添。
ＡＭＹ即刻奸笑：哈！我唔拍力啦而家，即係你會去啦！
我屌，點會咁撚樣架 唉，算撚數，反正聖誕冇野做，阿紫又去泰國。
我：煩人，咁有咩做呀？
ＡＭＹ：唔駛驚，我先唔會單獨同你出去，孤男寡女容咩易．．．．．
我：你唔駛再挑逗我啦，我對你真係冇興趣，入正題啦。
ＡＭＹ：我地諗住叫埋阿力，叫埋其他幾個朋友去踩單車咋麻。
我：哦，單車個位點夠你坐呀，你個屎忽都唔平衡啦。行單車徑做運動啦你
ＡＭＹ：算！！見你今次咁合作，我就唔打你！！約定架啦。
就係咁，我同阿力同ＡＭＹ仲有幾個男仔女仔將會去踩單車。
聖誕假前最後一日，我地班搞左個聯歡大食會。（唉，例牌野，年年都搞 ）
每個人都要負責整唔同既野食呀咁。
而我，就梗係叫我老母整佢最撚手既秘製雞翼啦。
（個次我好記得整左６０隻，因為我諗住每人有兩隻呀麻，最後比老母屌到ＨＩＨＩ，
話攞苦黎辛搵佢笨。 ）
咁個大食會都係例牌野啦，波羅腸仔沙律薯片伴生菜呀果Ｄ。
阿紫就整左姐哩糖。我見到佢，我即刻同佢講：嘩，整咁大盤，咪有排整！？
阿紫：都唔係呀，同我屋企人一齊整好快手咋麻。
ＡＭＹ見到我盤雞翼即刻話：好似好好食咁喎。（頂佢條肥婆 ）
我：唔好意思，冇你份喎。
ＡＭＹ：頂！唔好咁孤寒啦，佢即刻拮我．．．．一隻雞翼走撚左去。
我：頂，真係冇佢收！
阿紫：你地兩個都幾襯架喎。
我：係咪連你都咁講呀，唔比你食啦！（我即刻轉身）
阿紫即刻用手捉住我隻手，講：哎，唔好唔好！我想食呀
我ＦＥＥＬ到佢又再掂我隻手，我諗緊縮定唔縮之制。
佢突然用佢雙手，摸左我隻手幾下．．．．．
阿紫：點解．．你隻手咁凍同咁濕既？你唔舒服？
比佢咁講一講，我即刻縮手：係．．我隻手不嬲好多手汗，所以我唔鍾意
人地掂我隻手。（因為自卑 ）
阿紫佢即刻講：唔係呀，幾得意呀
我心諗：佢既取向係咪有問題，定有怪癖。
我：點會得意呢，上次我特登將我Ｄ手汗抹落阿力塊面度，佢即刻雞咁腳大嗌住跑去廁所洗面
（我成日都會咁整人，由中一至中七都係 ）
阿紫即刻大笑：哈哈，你真係好鬼衰。
然後阿紫輕輕拮我舊雞翼，慢慢咁放係佢咀邊，細細力咁咬左佢一啖。
之後阿紫又碌大隻眼望住我：好好食喎
我：係咩，等我試下先。