有一晚一個來電: 回憶都是突如其來的(下)
我放低盤雞翼（好撚重），拮左舊。講：係喎！（我老母係得既！）
之後佢拮左個姐喱糖，話：阿樂，張開口。
我即刻話：唔駛啦唔駛啦，我自己黎得。（唔慣）
阿紫：唔好啦，快Ｄ啦，就黎跌啦。（舊姐哩拮得唔好）
就係因為咁，我第一次，比女仔餵我食野（除老母外）。
唔知係咪因為佢餵既關係，定係因為落得多糖既關係，
個舊姐哩，係我食過最好食，最甜既。
阿紫跟住話：係呢，我去泰國之後，你會唔會掛住我？
又突襲我，搞到我又面都紅埋。
我今次好堅定咁答佢：會呀
阿紫聽完我咁講之後，即刻哄左埋黎我耳邊，我扯左（好似係）．．
阿紫細細聲咁一個一個字講：咁你等我返黎啦喎
我點點頭。然後望返碟雞翼！頂，差唔撚多冇撚晒
我：唉，搞錯呀，我食左一舊咋
阿紫：唔緊要，食我個Ｄ姐哩啦。
阿紫全程一路微笑住咁望住我，我地兩個，就好似小情侶咁，互相食大家整既野。
就係咁，我就係聖誕聯歡會入面，食左好多阿紫整既姐喱。（起碼有一個月無意慾再食）
大食會食到咁上下，當然輪到遊戲時間。（好老實講，個時既遊戲時間冇咩特別事發生，我唔會多講
鳥，因為唔想作情節）
遊戲完左之後，仲有少少自由活動既時間。我就諗住再睇下有咩好食啦，食姐喱玩完遊戲
之後咩都消化晒。阿紫無啦啦走埋黎，因為佢係由我正面行過黎，於是，好明顯係可以見
到佢雙手放左係後面，神神秘秘咁。佢依舊用佢招牌式既笑容．．．．．．．
問我：阿樂，我有Ｄ野想送比你呀，你估下咩黎呀？
我唔想估，所以想偷偷地望下佢身後雙手拎住既禮物。
佢意識到之後，就好鬼馬咁後退兩步，同我保持返距離，唔比我望到。
阿紫跟住話：拿，唔准咁奸茅呀，如果唔係，唔送比你架！(佢又do起個咀咁講)
我見咁既情況，心諗：一於而家俾埋啦。（我都預備左野想送比阿紫）
我：阿紫，你等我一陣。（我就即刻走去我書包，拎左我份”禮物”出黎）
阿紫好疑惑咁唔知我想做咩，於是一路都皺緊眉頭望我。
我拎完手上份禮物即刻學阿紫咁，放係身後。
我行埋去阿紫面前：阿紫，我都有野送比你呀，你估下咩黎既？
阿紫笑住答：嘻嘻，大家又會咁夾既。
然後，阿紫提議：不如大家數１２３之後拎出黎比大家睇呀？
我聽到呢個主意覺得好唔錯，我答：又好，一於咁話啦。
就係咁，我同阿紫就互相望住大家，一齊數：１－－２－－－３！！！
我地見到大家份禮物，都不禁眼仔碌碌望住對方．．．．．
真係唔敢想像，原來大家都不約而同咁，送埋同一份禮物------------聖誕卡。
我諗大家都好清楚，小學個時，每個聖誕都好興送聖誕卡俾同學。於是，
雖然我上到中一，但呢個習慣都依然繼承住。（一張聖誕卡，一份心意，而家仲有幾多人會珍惜？）
阿紫知道佢都有禮物收既時候，真係好開心：阿樂，真係好多謝你呀。
從佢既反應，睇得出佢絕對係真心覺得份禮物好，雖然一張聖誕卡唔係咩貴野，但從廉價禮物中
送上最真誠既心意，總好過買一份又貴，又冇感情既禮物，係咪？
我同阿紫講：我都好多謝你既聖誕卡，記住返到屋企先拆呀。（係大家面前拆氣氛有ｄ怪）
因為我地呢個舉動有點張揚。阿力見到就行埋黎：頂你阿樂，阿紫有野收我冇野收！
ＡＭＹ一聽到話有野收，即刻衝埋黎，我梗係退後幾步，容咩易比佢撞親！
ＡＭＹ：喂，阿樂！你唔係咁呀，送禮物都唔益我？
我：就係唔想益你先唔送囉。仲要自己講出黎落自己面都有。
ＡＭＹ：算數！好彩我都食左你唔少．．．．．．．雞翼！
我：頂！原來Ｄ雞翼係你食晒！？抵你呢世都咁肥既真係！
我講完之後，就走去我書包度，拎多兩封聖誕卡出黎。
其實我又點會冇預備聖誕卡送埋比我朋友呢．．．話晒得ＡＭＹ同阿力都係我最ＦＤ既（係果時）
我：拿，我唔係對阿紫特別好架，我都有寫聖誕卡比你地架，睇下！
阿力同ＡＭＹ見到之後，即刻好開心咁講：ＹＥＡＨ！多謝你呀樂哥。
其實我又冇咩所謂，送多兩封又唔係少忽肉。
阿紫見我咁既舉動，同我講左句：阿樂，你對每一個都好好呀真係。
我：最緊要都係大家開心姐。
（係三份聖誕卡之中，得阿紫個份，係我最用心設計，阿力同ＡＭＹ個份都係寫下字就算）
送完禮物，大家都係時候執返Ｄ垃圾，準備離開學校。
返到屋企，我慢慢咁從書包拎阿紫送既聖誕卡。
個一刻，我好相信，阿紫一返到屋企應該都會咁做．．．．．．．．
從書包拎起阿紫佢送既聖誕卡，我仔細咁觀察左一陣。
米色既聖誕信封，背後寫住：”阿樂收”三個字。簡簡單單。
字體筆劃圓潤輕柔，同一般男仔剛勁既字體風格有好大出入。
心諗：呢Ｄ就係女仔寫既字嗎．．．．．．．
係”阿樂收”三個字旁邊，貼左幾張細細張既貼紙。
我令返去信封既正面，信封口，用一張相對較大既”米妮”貼紙痴住。
我輕輕摸落去，原來係凹凸的，非常有質感。
我好小心咁拆開張貼紙。拎出聖誕卡。
封面呈現典型既聖誕風格，紅色做主色，金色閃粉印住”MERRYCHRISTMAS"，
背景係落緊雪，有個聖誕老人騎住架鹿車，背住好多禮物。
我翻開聖誕卡。迎面而黎既係一陣芳香味。
（我好記得，因為個時唔明點解聖誕卡會有香味，所以聞多幾聞）
阿紫用左好多閃粉既筆去做配答，內容係話：
阿樂，聖誕快樂呀！你係我中學入面，第一個我會送聖誕卡既男仔。
多謝你一直以黎都比到咁多歡樂我，我真係好開心！我去泰國個幾日，
唔知你會點過呢？無論點都好，你都一定要等我返黎呀，知嘛？
阿紫。
雖然內容唔係好多，但阿紫都好比心機用唔同既貼紙去裝飾下聖誕卡既內頁，
令到佢唔會咁寡。張聖誕卡，就同阿紫個性格一樣，一樣咁有活力。
就係咁，我就收到中學第一個女仔送既聖誕卡。
唔知點解個時既我，重覆睇左個內容好幾次，好似每個細節都唔想放過，
好似一打開，就唔想咁快就返放落個信封咁。
當我仲凝望緊張聖誕卡既當時，阿紫打電話比我．．．．．
阿紫：喂，阿樂呀！（語氣好開心咁講）
我：係。
阿紫：我睇左你份聖誕卡啦，真係畫得好靚好有心機呀。
相信大家都應該想知道，我送比阿紫張聖誕卡係點既係咪？
其實係聯歡會前一晚，我已經買左聖誕卡去畫。
係聖誕卡內頁入面，我用素描筆畫左個聖誕老人俾佢。
內容係話：阿紫，MERRYCHRISTMAS!
去泰國旅行記住要玩得開心D呀，手信買唔買都真係冇所謂。
老實話你知呀，其實我初時入黎讀真係唔係咁開心架，
都係識到你，阿力同ＡＭＹ先比到咁多快樂我，令到我每日都過得咁開心。
而你對我一直都咁好，所以呢張卡我都好比心機設計，代表我一番心意。
希望你會喜歡啦。阿樂
回到電話既對話。阿紫問：你以前有學過畫畫架？點解話得咁靚既？
我：冇呀，只不過係小學時成日都會自己無聊搵Ｄ野畫咋麻。
阿紫：咁你都真係幾叻喎，冇學過都畫得咁好。點解唔油上顏色既？
我：因為．．．．．．（其實個刻唔係好想講）
阿紫：因為咩呢？
我：因為我係有色弱，從小學開始美勞堂既時候，每次要上色既畫我都好低分。
因為我唔識配答Ｄ顏色。所以，我只係畫素描，因為係黑白多。
阿紫聽完之後，話：ＳＯＲＲＹ呀，我唔應該咁問你。
我：傻啦，都唔關你事，你根本唔知道呀麻。
阿紫繼續講：估唔到你都同我一樣，初初返學時都係唔開心喎。
我：係呀，直至識到你先唔同Ｄ。（我個時唔知點解會咁直接）
阿紫甜笑左一聲：嘻，係咩。放心啦，我會令你日日都咁開心架，阿樂。
唔知點解，我覺得佢當時呢一句，真係好溫柔，我個心就好似溶化左一樣。
我好開心咁講：我都會令你開開心心咁過架。
就係咁，阿紫就準備去泰國，而我就準備去同同學踩單車。
唔知道，阿紫，去到泰國，會唔會掛住我呢？
聖誕寒假終於到，對一個中一生，個時無咩物慾既我黎講，真係唔知點過好。
好彩都有朋友約下我，唔係就悶到ＨＩＨＩ，所以我都好一向重視朋友。
朦朦朧朧間，我感覺到我臉頰帶點溫暖。我睜開眼睛，原來已經天光。
面上既暖意，原來係朝早既陽光帶比我。我當時實在好懷念，因為自從上中學開始，
就好少可以訓到日照三竿呢段時間。以前小學返下晝班真係唔識珍惜呢種感覺。
係我個腦係度諗：阿紫應該答緊早機了吧。
唔知道，坐飛機既感覺係點既呢．．．
唔知道，三萬尺高空上面既陽光，同係屋企比，又有咩唔同呢．．．
我嘗試係屋企望望天空，睇下會唔會有飛機經過。結果，一架都冇。
心諗：我真係傻，就算有，都唔會係阿紫個班。
食完午飯之後阿力打比我，約左我去沙田火車站等。
老實講，個次係我一生第一次，踏足沙田。
不過踩單車，我小三至小四個時已經學識踩兩輪車，所以難唔到我。
（不過我到中七果時依然識有Ｄ人係唔識踩單車）
見到阿力同ＡＭＹ呢兩個朋友熟識既面孔，我都好開心。
ＡＭＹ：頂你，有冇搞錯呀。約你一點就遲半個鐘！
我：我都唔想架！第一次黎唔識路呀。
阿力：快Ｄ行啦，一陣好多人踩架啦。
同行幾人我地就去左租單車。
拎到單車之後，即刻上車踩幾腳熟練下，實在太耐無踩，好懷念。
阿力一拎到車，就講：喂，不如鬥快啦！
ＡＭＹ即刻答單話：好呀，駛驚你，我實ＷＩＮ架！
我：咁又係呀，你Ｄ肥膏係晒腳度，一定爆發力驚人！
ＡＭＹ即刻駛個單車埋黎撞鳩我。
阿力：頂你兩個又係度灑花槍，唔理你地啦，我踩先。
ＡＭＹ：喂，阿力！你咁茅既！想偷雞！？我唔會輸比你架。
就係咁，兩個人就先開始踩上去．．．．．
我望住佢地既背脊，不禁笑住搖搖頭，真係冇佢地咁好氣。
心諗：或許，這就是青春吧。
我開口：喂，你地，等埋我呀！
我地沿沙田，踩入大埔，海賓公園果頭。
當時我第一次踩個條路，踩踩下都幾新鮮。我冇特登同阿力，ＡＭＹ鬥快。
所以我滯後左。但冇所謂啦，我想靜靜咁享受下，睇下風景。
其實我一直都好鍾意踩單車。可以比我靜下，諗下野，同時睇下風景。
沿左條河踩，感覺真係幾唔錯。加上有陽光，暖左唔少。
踩踩下途中，我不經不覺追上了ＡＭＹ。
我：哈哈！無力啦！？叫左你唔好牽強，睇下你而家似咩樣。
ＡＭＹ：你識咩呀！我費事踩咁快，落你地面咋！
我：一定係囉！叫左你平時做多Ｄ運動，又唔聽我講，又成日食我Ｄ糖。（做咩Ｑ咁撚壓韻）
ＡＭＹ：超，肥有咩唔好！（我聽到即刻笑左）
我：話時話呀ＡＭＹ，你平時比人咁笑，唔會唔開心架咩？
ＡＭＹ：唔會喎，咪有得人笑囉！我反正唔會理佢地點諗，做咩要令到自己唔開心姐！
比ＡＭＹ咁講一講，令我開一開竅。樂觀既性格真係好。
（反正我唔介意人地肥唔肥，做朋友姐，駛咩咁揀擇！）
我：真係要比個ＧＯＯＤ你！
踩踩下，我視線唔知點解好自然咁望上天空。
！！真係有架飛機經過喎！！！
個時既我，唔知點解好自然咁加快左腳力，全速想追架飛機。
ＡＭＹ即刻話：喂！阿樂！無啦啦踩咁快做咩呀！！
我無理到佢，心入面只係想追架飛機。
到最後．．．．．．梗係追唔到啦。
當時既我，心入面又係度諗：阿紫，究竟．．我可唔可以追到你．．．．
到海賓公園，我見ＡＭＹ真係頂唔順。
我：ＡＭＹ，不如休息下先。
阿力，唔好撚踩咁快啦，休息下先啦。
就係咁，我地就停低去休息下。附近見有賣野飲。我就買左三支，兩支比ＡＭＹ同阿力。
ＡＭＹ：估唔到你都幾好人架喎！
我：咩估唔到，不嬲都係！（我好強調）
阿力就問：點解你唔約埋阿紫？
我：哦，佢話要同屋企人去泰國喎。
阿力：其實你係咪想追人，我睇得出佢對你應該都有Ｄ野。
係鍾意咪去馬囉，驚咩！
ＡＭＹ：咁又係呀！盲既都睇得出阿紫對你特別好。
我重申：咁係因為我冇機心姐。（我識得用呢個字了，）
ＡＭＹ：咩係機心？？
我：頂，你真係！咁簡單既詞語都唔識。算啦，講你都唔明架啦。
阿力：你就好啦，起碼你有對象。我就真係咩都冇啦。
我：男人婆阿晴囉。
阿力：你又提佢，都係因為你咋。
我：其實ＡＭＹ都唔錯呀，你可以考慮下。
ＡＭＹ：頂你咩，無啦啦燒埋我個忽。我先唔受溝呀！
我同阿力即刻大笑：哈哈！！你係冇人吼姐！
ＡＭＹ：話時話，識到你地做朋友真係幾好，幾開心。
阿力：
我：我都係。快Ｄ拿拿林飲埋佢，再踩啦。
我地三個，既友誼，係個刻，真係邊個都取代唔倒。
大家真係要好好珍惜朋友。
無女一場空唔緊要，但唔可以冇真心朋友。
就係咁，我地個日踩單車都踩得好開心。當然時不時都有諗住阿紫。
返到屋企，好攰，第一時間去沖涼。沖完涼出黎，
電話響，暱名電話，究竟邊個會打比我？我最憎就聽暱名電話！
個刻，我真係好唔想聽！！！
從細個開始，我就唔鍾意聽匿名電話。（講真，我都唔知點解咁）
但唔知點解，呢個匿名電話，令我有股衝動去聽。我用手，提起電話。
我：喂！
電話傳來一陣陣沙沙聲，有Ｄ刺耳。
我繼續：喂！！搵邊個！？
電話都繼續傳黎沙沙聲，心諗：屌，唔係咁邪呀！鬼食泥！？
我想ＣＵＴ線個陣．．．．．．．．．．．．．．．．
??：喂？唔該搵阿樂呀！
我：我係，你係邊個．．．．．．．？？？？
??：搞錯呀，咁都唔認得我把聲，阿紫呀！
我：（一聽到）．．ＳＯＲＲＹ呀，電話收音唔係太好，認唔出
個刻，真係估唔到，阿紫，會打長途電話比我，真係好驚訝
我個刻開心得好緊要：點解你會打比我既，長途電話好貴架喎。
阿紫：傻佬，掛住你咪打比你囉！睇下你有冇同其他女仔傾計呀麻！
我：冇呀冇呀，今日去左踩單車返黎咋，玩得幾開心。你泰國果邊點呀？
阿紫：都幾好玩呀，食左好多野，而家睇緊表演咋麻。
（唔怪得沙沙聲咁嘈）
我：快Ｄ返啦，我開始有Ｄ掛住你啦！（我個刻真係衝口而出）
阿紫：嘻，係咩！你都會架咩？唔返ＬＵ．．．．．（真係跳皮）
我：唔好啦
阿紫：等多我三日啦，好快咋麻傻佬。
阿紫繼續講：好啦唔講啦，長途費貴呀！早Ｄ休息啦知嗎？
我：知道。
雖然短短個兩三分鐘，但呢個電話，即使係佢ＣＵＴ左線之後，我都好唔忍心放低。
雖然，明知道佢已經ＣＵＴ左線，但只要我拎住個電話，彷彿，佢就好似仲係我耳邊咁。
回想起今日阿力講過既說話，我，係咪應該去追佢．．．．．？？
我個病，又係咪介意黎都多餘？？又應唔應該同佢坦白講？？
如果失敗左，我會唔會因為咁，同阿紫連朋友都冇得做？？？
相信大家都經歷過呢種心理拉据戰，亦都會明白呢種感覺，
呢種狀態，係幾咁唔好受！你想得到多Ｄ既時候，又唔知會唔會因為咁，
反而失去多Ｄ。你唔去追求既時候，機會就永遠唔會到你手。
追求愛情，就好似一種打賭，一種賭博。但你往往無法估計到賠率係幾多，係幾大。
你，又做好輸晒既準備未？
個一刻既我，究竟，又做好呢個準備未？定係呢一切一切，都係得我係度單戀緊．．．？？
係阿紫走左個幾日途中，老實講，我真係冇咩好做，唔係睇電視就玩下電腦咁。
記得個時，科技仲未咁發達，根本就冇咁多野可以係互聯網度下載，邊度會有咩
ｂｔ呀，ｆｏｘｙ呀呢樣野呀。未有咩ｍｐ３格式既歌係網上面任人下載。
要睇電影聽歌，大多數人都係去碟鋪買。所以，個時我都好鍾意行下碟鋪。
聖誕假入面，惟一我有樣野想買，就係discman。
於是，係阿紫返黎個日，就同我家姐一齊夾錢，就走去百老匯呀個ｄ大行度買。個時一個
discman既價錢都ｏｋ貴架（至少對我地黎講）。
最後，我地都買左一部sony既discman。(銀色的)
買完之後，就同家姐去行下唱片鋪。個時聽到一首英文歌，覺得隻碟幾正，
大家又估唔估到係咩歌呢．．．．．．．．．．．．．？
其實係ｗｅｓｔｌｉｆｅ首ｍｙｌｏｖｅ。真係好好聽
（而家聽返，歌詞都幾應景）。
如是者，咁我就買左隻碟，亦成為我聖誕最大既收獲，最大既一份聖誕禮物。
其實，呢隻碟，對我黎講，絕對係有一份特別既意義係入面。
當然，到至今，我仲保留住呢隻碟。
返到家，食過飯後，一路聽住ｗｅｓｔｌｉｆｅ隻碟。
心入面，一路係度諗：
阿紫，你係邊？應該差唔多返到香港吧。
希望你真係要安全，平安咁返到黎。（唔知點解，個時我會覺得坐飛機好危險）
當聽到ｍｙｌｏｖｅ既時候，我家既電話響了．．．．．．．
我即刻仆過去接，老母嚇親話：嘩，阿仔，你駛唔駛咁心急呀，好緊要咩個電話？
心諗：緊要，當然緊要啦，我等左四日啦，就係等今日呢一個電話。
我連忙用手拎起電話，講：喂，係咪阿紫？（我好心急，好急促咁問）
當時個心不停默默咁唸住：一定要係你呀阿紫。（）
阿紫：哈，你又知係我既。（原來真係）
做咩呀，太掛住我呀？（佢見我咁緊張佢，就好甜咁講）
我：（既然你咁問到，我都不妨老實）掛呀，真係好掛。
阿紫：係咩，算你啦！（呢個回應，好似已經係佢期望我係一定會答”我掛住你”咁）
阿紫繼續講：好攰呀，去泰國返黎。雖然睇左好多風景，食左好多野，但坐飛機時實在太悶啦，都冇野做。
我：最緊要都係你平安咁返到黎，返到黎有我就唔會悶啦
阿紫：哈哈，識講哄人既說話喎，把口浪過油咁既。唔似你喎。
你平時係咪都係咁對女仔架。
我：唔係呀，我第一次對女仔講咋．．．．．．
個時，其實我根本，就唔識ｄ咩甜言蜜語。對一個中一生黎講，又點會識。
個句，係我發自內心咁講既。估唔到，原來呢ｄ就係甜言蜜語．．．．
阿紫：量你都唔敢啦，嘻嘻。（佢好開心，同時又好管家式既語氣講）
阿紫：係呢，頭先首歌咩歌黎架？你都鍾意聽歌架咩？幾好聽喎。
（因為一路對阿紫講電話個時，之前係一路係電腦播緊ｍｙｌｏｖｅ）
我：首歌叫ｍｙｌｏｖｅ，我今日買架隻碟。
阿紫：可唔可以播多次呀？我想聽真ｄ呀。
於是，我就ｐｌａｙｂａｃｋ一次比佢聽。
阿紫繼續：真係好好聽呀，旋律都幾唔錯。
我：我都覺得係呀，大家真係夾。
阿紫：車，鬼得閒同你夾呀傻佬。（口裡說不，心裡卻．．．）
呀，係呀，我買左份禮物比你呀。
我：真架！（沒想到，阿紫真係會買）咩黎架？
阿紫：唔話你知，你返學咪知ｌｏ！！
我：又好，我見你語氣都攰啦好似，不如今晚早ｄ訓好唔好？
阿紫：阿樂，你真係好細心。好啦，我沖埋涼去訓啦都。
我：咁好啦，早抖啦。
就係咁，成為左我同阿紫係闊別４日後，第一個電話。
唔知道，阿紫份禮物，係咩黎呢？我好想，快ｄ返學呀．．．．
阿紫收線完個一刻，我仲有ｄ耳猶未盡。不過，我個心總算都安定落黎。
老母見我聽完電話，同我講：喂！阿仔！做咩呢排成日咁多電話，
又傾得咁神秘咁呀！
我：唔係呀，都係同朋友傾姐。
老母：係咩！？（佢好疑惑）呢排成日見你春風滿面咁喎，又同果個細路女傾呀？
我：細路女！？
老母：係呀，佢把聲係細路女聲呀麻。
我：哈哈，佢唔係細路女黎架，同我同一班既中一女仔黎。
老母：喂！阿仔，成日咁傾法，係咪對人有意思呀！？
我：傻既，你幾時變到咁八掛！？唔同你講咁多，我去訓覺。
好快趣，一月份返學既日子又到。但我係返學既前一晚，卻訓唔著。
心入面係度諗：阿紫，究竟我應該點同你講我既心意呢．．．．
而家就表白既話，會唔會太急，太快？
話晒識左阿紫先幾個月．．．．．．．．
都係唔講住啦，等大家再認識深入一點，先同佢講啦！
個晚，我就決定左，再比少少時間我自己，先至表白。
呢個決定．．究竟．．．到頭黎．．．會令我後悔？定無悔呢？
聖誕假過後既第一日返學日，因為尋晚訓得唔好。
係答巴士既途中，我都ｄｕｐ下ｄｕｐ下。突然間醒一醒，
心諗：屌！差ｄ唔記得落車！．．．．．
返到學校，繼續當我既風紀．．．．守住樓梯。
阿紫：阿樂．．．．（陽光般的聲音）
我：今日咁早既！？
阿紫：我特登咁早返既，見學校冇咩人，送禮物比你都方便ｄ呀麻。
阿紫係書包拎出份禮物，今次直接比我鳥。
阿紫：拿，送比你架！
看見到既係，一個茶色小紙袋裝住，紙袋上有ｄ花紋圖案，幾有民族特色。
我拎上手既質感係有ｄ硬硬地，究竟，係咩黎架呢？
我好開心笑住：多謝你呀，我聖誕都冇送ｄ咩比你
阿紫：傻佬，你咪送左張聖誕卡囉。你呢張聖誕卡，係我收咁多入面，
最靚，最有心思，而且係我最鍾意架。
我聽到佢咁講，真係好甜．．．．
個刻，我實在好想有表白既衝動．．．．
因為，我真係好想，好想，可以每日都咁甜，每日都有呢種感覺。
個時我未知道，呢種感覺．．．．．．就係叫”幸福”
但當然我都克制住自己啦。我微笑著，點點頭：你鍾意，我就滿足啦。
阿紫：咁我上去先啦。
阿紫上左去之後，實在忍唔住，我拆開左份禮物。
搣開張透明膠紙，打開紙袋。而份禮物，其實係一個泰國手繩黎。
我見到個刻，真係好開心，好鍾意。因為條手繩係用好多唔同色彩做配答。
至於有咩顏色呢？呢ｄ我就真係唔係太識講，各位巴打都知道我有色弱，唔係好識判斷顏色。
但我可以講既係，手繩五彩繽紛得黎，唔會太浮誇同搶眼，同時係感覺到帶住文族色彩。
所以我覺得，條手繩好特別。當然，只要阿紫送既，就已經係獨一無二．．．．．
我就即刻將佢帶係右手。
可能因為係同學眼中，佢地可能會覺得只係一條手繩，所以就冇特別覺得，
我呢條手繩係人地送既禮物。所以我都可以好放心帶。
阿紫留意到我帶條手繩，都好開心對我笑住講：咁快帶起佢既你？
我：係呀，因為我覺得真係好特別呀麻。手繩就梗係要成日帶住架啦。
多謝你呀阿紫，我真係好鍾意。
係呢，點解你會揀手繩既？（真係好想知背後既原因）
阿紫：因為，當你見唔到我既時候，咪可以當佢係我ｌｏ。
咁你就唔會成日心掛掛啦，係咪？
阿紫繼續話：仲有，其實揀顏色上，我都諗左好一陣先揀呢條架。
我好奇問：點解咁講既？
阿紫：因為，我知你之前成日唔開心。
所以係顏色上，我就諗住揀ｄ暖色既，有活力ｄ，咁睇落去都會開心ｄ啦。
我經過佢講一講之後。
真係估唔到，原來，阿紫係咁細心，咁為我著想，就連一份禮物既顏色，背後都有意思。
我：其實，你咁關心我，對我咁細心，我真係好感動。
阿紫：傻佬真係傻佬，咁易滿足既你。
（又係既，細個既時候，易滿足，的確係一件好事，做人都快樂ｄ）
阿紫講完之後，小息鐘聲又起。準備上下一堂，家政。
阿紫拎返轉之後，我一直凝望住條手繩。
心裡講：我，一定會好好珍惜你。
我間中學既安排係咁既，上半班學號既同學就上家政，下半班學號既同學就上設計與工藝。
阿紫，就係上家政。而我，係上工藝。
老老豆豆，我真係好唔鍾意上工藝。點解？睇落去就知
而ＡＭＹ同阿力都同我一齊上工藝。
咁入到工藝窒，一張台四個人。我就順理成章，同佢地兩個同一張台啦。
大家都知道工藝台，會有樣野叫”虎鉗”（唔知個字係咪咁寫）
個”虎鉗”，其實係用黎ＨＯＬＤ住塊木板，等佢唔好走位既。
咁我地要整一張木凳。（一聽到個時，我即刻暗裡屌老母）
我：頂，唔係呀，做木凳？一黎就咁難！痴線架。
阿力：唔係呀，好似幾好玩幾過癮咁。
ＡＭＹ：我就真係未驚過，呢Ｄ野，根本難唔倒我！！哈哈。
咁我地就開始用線鋸鋸木啦。成個班房就充斥住鋸木聲，成個地盤咁
我鋸鋸下，無咩為意，一望。屌！．．．啦星呀！
我：頂，鋸條直線，無啦啦鋸”咩”左既，唉，又要再鋸過啦。
唔單止咁，仲要一岩一忽添！！
我即刻望望阿力，睇佢會唔會咁啦！點知．．．．．
我：嘩阿力，你鋸得好靚喎，又直又順！！（頂，點解會咁！）
阿力：係咩！都唔係好難姐，唔明你點解會鋸成咁。
我講完無耐，諗住死死氣繼續啦！突然聽到．．．”啪”左一聲（巴打唔好諗邪）
ＡＭＹ：哎呀，ＰＫ啦真係！鋸斷左條線鋸添！
我即刻笑鳩佢：哈哈，你知你肥就唔好用出盡奶力啦！
ＡＭＹ：呀！你再講信唔信我鋸你呀啦！
阿ＳＩＲ見到斷左，就同ＡＭＹ講：拿，下次再斷要罰你錢架啦。
阿樂，唔好掛住望，快Ｄ做！
我：係．．．．．
咁我地今堂就只係鋸個凳面。落堂後見到我個製成品，我仲心灰。
我：我頂咩！我想鋸個圓形做凳面，出到黎變左正方形．．．
ＡＭＹ同阿力即刻笑到我死：哈哈，你真係冇天份啦，算吧啦！
（就係因為呢個說話，往後成為我被人作茶餘飯後既笑柄）
反觀阿力，真係鋸得好唔錯。
上完工藝都打鐘，準備食ＬＵＮＣＨ。
阿紫手上拎住個盒，走埋黎．．．．．．．．．．．
阿紫：我頭先岩岩上完家政呀。
今日老師教我地整紅蘿蔔薯仔炆雞翼呀！
我：聽個名好似好吸引咁喎（頂，我又上家政咪幾好）。
我最鍾意就係食雞翼。
阿紫：上次見你媽咪ｄ手勢咁好食，真係好鄧你
呢位咁好廚藝既媽咪開心同幸福呀！
阿紫道出呢句說話。
我又諗返起我呢個複雜既家．．．．
又係既，雖然，家庭係就係唔太理想，唔太幸福。
但，勝在，我老母真係好錫我！
加上，我更加想，捉住阿紫雙手同佢講：仲有令我感到幸福既，係你呀．．．．
當然，我冇咁做．．．．
我：我都覺呀，我媽咪真係算好唔話得啦！！
阿紫笑一笑，連忙打開個盒，講：係啦唔好講咁多啦，快ｄ試試我既手勢啦！
一陣凍左就唔好食架啦！
我見阿紫打開左個食物盒，見到ｄ雞翼．．．．好似好得
我：貌相好唔錯喎，仲咁香添！試試先！！
我用膠叉拮左一舊雞翼黎試試．．．．．．．．．．．＞＞
咬左幾口，我停左係度．．．．．．．．．．．．．．．．．．
真係．．．．好好食！完全係我媽咪煮出黎個種感覺．．．
雖然我老母同阿紫煮既雞翼係唔同煮法．．．．
但．．個種感覺，離奇地熟悉．．．．
就係我日日食媽咪住既餸個種．．親暱感！
個份心意，原來，係真係食得出，同感受得到。
更加令我想到，我老母，原來餐餐都咁用心去煮野比我食！
（各位忙還忙，得閒記住同多ｄ家人食下飯．．．多ｄ珍惜．．．）
阿紫見我停左口，問：點呀？係咪唔好食？
（佢有少少皺眉）
我，望一望住阿紫對眼：唔係．．唔係．．．
真係，好好食！！好食得好緊要！（感觸）
阿紫：係就好啦！咁啦，我應承你！
我每次上完家政都比你試試我既手勢好冇？
只有你先有特權試架咋！（）
我，聽到阿紫呢句．．由衷咁講：好。（真係求之不得）
阿紫：咁食飯啦！
就係咁，好快到左ｌｕｎｃｈｔｉｍｅｂｒｅａｋ！
我照舊拎藥出黎食，ＡＭＹ．．．．．．
ＡＭＹ：嘩，阿樂！你搞咩呀！感冒仲未好返咩？
成個聖誕假都過左啦喎！咩感冒都好啦！仲係食咁多既！？
就係因為ＡＭＹ呢一句．．．．阿紫聽到．．．．
有Ｄ野，唔發生都要發生．．．
紙始終包唔住火．．．．
聽到ＡＭＹ咁講，阿紫即刻飯都唔食，拎過黎忙住我．．
我真係手足無措，我唔想比ＡＭＹ知，但我知道我再瞞唔過阿紫！
頂，我個心個時仲係痛緊！！又未食藥！
我心靜一靜．．．首先，我應付左ＡＭＹ先！（我裝作無事）
我：ＡＭＹ，你唔駛咁擔心，我只係重感冒姐，
係Ｄ藥冇咩效，我咪繼續食囉！
ＡＭＹ：哦，咁你小心Ｄ啦！快Ｄ食多Ｄ，快Ｄ好麻！
好彩，都瞞到ＡＭＹ。我望望我個水樽．．頂．．冇晒水！
我：ＡＭＹ，唔該，可唔可以幫我落去買支水？（同時想駛開ＡＭＹ）
ＡＭＹ：點解你唔自己落去呀！哈哈，你咪又係咁懶！！
係呢刻我真係冇心情再開玩笑，真係好痛．．．．．．
我：ＡＭＹ．．唔該．．我真係好唔舒服！
（ＡＭＹ見到我黎真咁，所以佢都唔為難我，拿拿聲去買水）
阿紫：阿樂．．．．（佢個樣好擔心）
阿樂．．．！
我：（我伏低左係張台）
阿紫：阿樂，你不如講真話！我相信感冒唔會令到你而家咁！
到底咩事？講比我聽好唔好？（語氣溫柔，但帶點責意）
我個刻真係痛到唔想講野．．．我頂唔順啦真係，，冇辦法．．
我：阿紫．．唔好意思呀．．可唔可以借你個水樽比我，我想食藥．．
阿紫見我咁既狀況，冇出聲，比左樽水我。
我離口飲，食藥．．．．．．．．
我：比幾分鐘時間我休息下．．．．（我好認真咁講，之後再伏係台面）
大家，個種痛，真係唔係講笑。
個心，唔會痛得好犀利，亦唔係好切切實實既痛。
但係，會好有節奏咁，一下一下拿住拿住咁，令你成身都冇晒力，唔再想做任何野．．．
阿紫見我咁，繼續冇出聲．．．直接我好返Ｄ既時候．．．佢終於開口．．．．．
阿紫見到我好似好痛苦咁，伏係台面．．．．．佢第一次見我咁，應該來不及反應吧！
良久，阿紫終於講：（佢語氣明顯唔開心）阿樂，究竟你發生咩事？
我實在無辦法唔講真相：其實我個心一直有Ｄ問題．．．．
耐唔耐就會痛下，拿住拿住咁。
為左舒緩呢種咁壓抑，沉重既氣氛，我裝作無事，開心咁講．．
我：不過阿紫你唔駛擔心，
並唔係你想像中咁嚴重架，
只要準時食藥就冇問題架啦！
阿紫聽到我咁講，開始有ｄ激動：頭先你咁辛苦既樣仲可以話唔嚴重咩！！
個一刻，我呆住．．．我係第一次見阿紫咁激動。
佢既語氣好明顯帶住責意，帶住嚴肅。
但我睇得出，佢咁大既反應，都係因為好擔心我先咁樣。
原來，阿紫比我想像中，仲投放得多感情去我身上．．．．．
當初，我真係冇諗過阿紫既反應，會好似而家咁．．．
我只係唔想佢會嫌棄我呢個病，唔同我做朋友，先會用呢個藉口．．．．
個一刻，我仲未來得及反應，阿紫：你點解要講大話．．．
我最憎人對我講大話架啦！
講完呢句之後，阿紫即刻衝出班房。
係個一刻，因為全部同學都去晒操場流連咁濟，得返我一個係班房．．．
我一個人，定了神，我究竟怎麼了？
眼晴焦點竟然變得如此模糊．．．．．．
是藥物影響嗎？
不。
原來是眼淚，把我的視線變得混濁了。
混濁得令我再無法看清前方，無法看清方向。
因為是突如其來的激動，我起初竟分辨不到，原來我開始想喊。
這個身體，好像不再受我控制。
應該是說，我想控制，也控制不了。
個一刻，我說出口：阿紫，對唔住。
心諗：我真係傻，人地都走左，我而家先黎講有咩用．．．．
沒想到，一個善意既謊言，會落得如此下場。
唔知道，我仲有冇機會，去解釋？
班房，變得如此的寂靜
內心，變得如此的空虛
阿紫，你究竟去左邊？
就係阿紫走左無耐，我隱約聽到班房外有腳步聲。
聲音由遠而近，心諗：係咪阿紫返返黎？
我趕緊用手將我眼睛上既淚水抹一抹，調整下情緒。
腳步聲愈黎愈近，我可以肯定冇錯係入呢個班房。
我望到果個人．．．．．．．．．．．．．．
原來係．．．．．．ＡＭＹ。
佢終於買完水返上黎。
我見到唔係阿紫返黎，心入面更加難受。
或許，她真的受傷了。
我點都要扮開心一點，唔可以比ＡＭＹ覺得我有野。
我：ＡＭＹ，買水買咁耐架！等得你黎人都死啦！！
ＡＭＹ：嘩，你個死仔仲好講。
自己又唔去買喎！你知唔知下面小食部幾多人排隊呀！
我見冬天凍，仲特登買左支暖水比你送藥呀，係小食部！
我見ＡＭＹ咁細心，我都費事再串佢：真係唔該晒你！
下次請返你食糖補數！
ＡＭＹ見我咁講，即刻話：少可喎阿樂！今日咁好死既！
（ＡＭＹ一路講一路拍住我膊頭）
ＡＭＹ繼續話：咁你繼續食藥啦！頭先排隊排到尿急，我去個廁所先。
我輕輕回左佢一句，咁佢就走左出去。
我望一望個鐘，已經差唔多打鐘，點解阿紫仲未返黎．．．．
佢究竟去左邊。過左三分鐘．．．．．．
鐘聲終於響，同學都陸陸續續返黎。
我不斷留意入黎既同學，不斷心入面係度諗，
下一個究竟係咪阿紫返黎呢？
結果，同學都差唔多返齊，仲未見到佢入黎。
隔多一陣，終於，阿紫都返黎啦。
我一直都望左佢，留意到佢雙眼好明顯紅左，有少少腫。
佢．．．．喊過黎？
一想到呢度，我個心就更加唔舒服。
阿紫入黎既時候，一直冇望過我，冇同我有眼神交流。
我好清楚，阿紫今次真係嬲，真係好唔開心。
個一刻，我第一次面對呢種情況，我究竟可以做Ｄ咩．．
我，又可以做到Ｄ咩？
不過，我都知道，而家並唔係軟弱，並唔係自責既時候。
畢竟錯果個都係我，講大話就係唔岩！
我下定決心，決定今晚打比阿紫同佢解釋．．．．．．
雖然我冇咩信心成功，但我相信條手繩會俾到力量我！
我好記得果日，我成個人都落晒型。
ＬＵＮＣＨ果後個兩堂，我完全冇心機上。
老師講既一字一句，我都聽唔入耳。
心入面只係得，究竟我點先可以哄返阿紫．．．．．
究竟阿紫仲會唔會理我．．．．．
我一路諗，一路望住阿紫，那嬌小，柔弱既背面。
眼淚又再一次，不聽使喚的，湧出。
個一刻，我真係好想有攬住阿紫既衝動，
我，好想話比阿紫聽，我講大話都係話大家好，並唔係有心。
不過，我始終要克制下自己Ｄ情緒。
因為仲上緊堂，係堂上面喊比人見到就大獲。
我強忍住淚水，這種感覺，很難受。
我同阿紫既距離，雖然只係咫尺之間，雖然可以伸手可及。
但個一刻，我覺得阿紫同我既距離拉遠左好多。
雖然佢實實在在咁，坐係我前面。
但我實在無法猜測，無法估計，究竟佢個心諗緊咩．．．．
呢種疏離感，令我第一次感到無助，感到落寞，
我第一次，缺乏了．．．安全感。
最後兩堂好不容易過去，放學鐘聲響起。
唔知點解，果一剎那，我好唔想落堂，好唔想放學。
因為咁就意味住，阿紫要走。
意味住，我同佢既距離會拉得更遠，更大。
我已經失去左好多安全感，我唔想，連視線範圍，都見唔到阿紫。
落堂後，阿紫好快咁執左野。
依然，冇望過我，冇拎轉黎。
佢執完野之後，起身，背起書包。
我期望佢會同我講聲再見，好讓我感受到佢仲係會理我。
可惜，阿紫，依然地，一言不發，沒有轉身，就離開那座位，離開班房。
我想開口叫停佢，但係，我始終想俾空間阿紫靜一靜。
阿紫走左之後，我亦都冇咩好留戀。
同ＡＭＹ阿力講聲再見之後，我亦都步出校門。
原來，當一個你鍾意，一個你重視既人嬲你既時候，
你自己係會咁唔好受。
我雖然實實在在咁行緊路，但那一刻，
我個身體就好似被人掏空左一樣，得返一個軀殼。
原來，當靈魂都不在既時候，人便不會快樂，不會幸福．．．．
唔開心既時候，回家既路程，都顯得特別遙遠。
我返到屋企，粒聲都冇出，就入左房，並將房門鎖上。
我坐係床度，望住手腕上既手繩，阿紫既影像就即時呈現係我腦海入面。
揮散不去的片段，在我腦中，不斷無情地播放。
我實在控制不了。結果，我痛哭了，把身驅都哭得抽搐著。
今天激動既情緒，終於可以係冇人睇倒底下，釋放出黎。
原來我係強忍得咁辛苦．．．．．．．．．．．．．．．．．．．
或許，我腦海中控制不了的播放片段，是為我好，是為我著想，
好讓我把哀傷一次過發洩出黎。
果然，哭過後，我終於舒服一點。
突然，聽到有人敲門，原來係我媽。
老母：阿樂仔，做咩鎖住度門呀！快Ｄ開門啦，食飯架啦！
我冇應到，我趕緊拭乾眼淚，出去食飯。
我老母見我對眼紅紅咁，佢應該知我唔開心，知我有Ｄ野。
佢冇特別多問，冇特別出聲。
我坐左係張凳度，我媽就幫我裝左碗飯，端上飯桌。
我並沒有起動食飯的意慾。
係個一刻，我媽夾左一個雞翼比我，
佢同我講：阿仔，拿，你最鍾意食既雞翼呀。
（說畢，並用手摸左兩下我個頭）
佢繼續講：快Ｄ食完快Ｄ休息下，一陣凍左就唔好食架啦
我知你今日都好攰。
佢講完呢句說話之後，我忽然覺得呢句說話似曾相識。
無錯．．．阿紫係家政堂完左既時候，
都有請我食雞翼，都有講過類似既說話（阿樂，快Ｄ食啦，一陣凍左就唔好食架啦）
我夾住呢舊雞翼，慢慢咁放入口。
那熟悉既味道同感覺又再次湧現出黎．．．．．．
係個一刻，雖然阿紫嬲左我，但我至少從家人身上，
再次得到溫暖，得到支持．．．．
我又再次忍唔住，就係咁，我抱住媽咪，再哭了一場。
而她，依舊用手摸住我個頭，一粒聲都冇出，等我好好咁喊。
食過飯後，我再次拎起電話，諗住打比阿紫．．．．
我手有點震，畢竟今次，仲緊張過上次．．．．．．．．
我深吸一口氣，終於把阿紫電話都按上．．．．
阿紫，，，求下你，，，，一定要聽我電話呀．．．．．．．
我好不容易才拿起勇氣，把阿紫既電話給按上。
一把熟悉既聲音再次呈現係耳邊。
阿紫：喂。（佢語氣好唔開心）
我：喂，阿紫，係我阿樂呀。
阿紫冇出聲，應該仲係唔開心緊。
我要快Ｄ將一五一十講比佢聽，唔可以再咁婆媽了。
我：阿紫，我知你好唔開心，我知你唔係咁想聽到我把聲。
但都懇請你聽完我解釋先，等我可以了結左件心事，
之後點，你再話事啦。
我講完之後，阿紫依然冇出聲。
其實佢唔ＣＵＴ我線已經算大幸，我唔可以氣餒。
我繼續講：其實當初，我真係唔係有心呃你。
我會講呢個大話，只係唔想你嫌棄我呢個病，
因為我怕你唔會想再同我做朋友。
我好唔容易先識到你，好唔容明先從你身上感受到快樂，
我唔想比呢種感覺從我身上流失呀，我唔想因為我個病，
令我失去返學既衝勁。
我真係唔知道，我同你之間既感情會增加得咁快，
令你受傷仲為我喊，我真係好唔安樂，
阿紫，好對唔住。
阿紫聽完我講之後，我隱約聽到佢既喊聲。
我再安慰阿紫：阿紫，你唔好喊啦，我真係唔會再講大話架啦。
我應承你呀，好唔好
個時，阿紫終於同我講野：我知你講大話係為大家好呀，
但你知唔知道，係個時我真係好擔心你呀。
（阿紫喊住咁講）
我：對唔住呀，我真係知錯啦，我保證我以後都唔會咁做。
請你原諒我啦
阿紫索左一下鼻，講：以後唔準再咁啦知唔知呀！
唔準再令我擔心啦．．．
我見佢咁講，我即刻好開心咁講：知道知道！
係個一刻，我真係好感謝阿紫咁包容我，
令我既安全感再返返黎，令我同阿紫既距離，又拉近返。
知道阿紫唔會因為咁而嫌棄我，我個心都舒服返好多。
陰霾過後，又係一片晴天。
個一刻，我再次感受到，我實實在在的活在這世界上！