有一晚一個來電: 愛是恆久忍耐(上)
等左一陣之後，屋企既門鐘忽然間響起。
門鐘唔係按一次就算，仲要係咁按唔停。
心諗：頂你個阿欣，駛唔駛按唔停呀，死左都比你嚇返生啦屌！
我係床上面起身，
頭仍然痛得好緊要，開始有點兒暈暈地。
落床之後，我用盡身體僅餘既力氣去開門。
打開鐵閘後，嗯，真係阿欣黎。
我即刻同佢講：你駛唔駛按咁多次門鐘呀！（把聲好沙）
阿欣就話：我驚你訓死左或者暈低左呀麻．．．
我：你都傻既，用腦都知如果我暈低左，
你估你按多幾次我就識醒架啦咩．．
阿欣：人地好心黎睇你仲要咁串人喎！
你睇下你而家似咩樣呀！
病到成個人都白晒啦！！
我：入黎先講啦，係呢度講貪好睇咩．．．
然後阿欣就入左黎我屋企，
其實我都唔係第一次比女仔黎我度．．
（屌你唔好誤會住，
小學時我都有請ｄ女同學上黎開party。
當然完左個party就無下文啦，
大家唔駛幫我作埋落去或搵位入我了。）
阿欣：點呀，阿樂你，
行唔行到呀？見你好似冇力咁喎．．．
我同你去睇醫生先啦。（語氣變得有點溫柔）
我：你等我一陣，我換埋衫先．．．
阿欣：怕咩姐，麻鬼煩架真係落樓下都要換衫．．
我：唔通著住呢件米奇老鼠衫落去咩．．．（仲要好撚大頭）
你肯我都唔肯啦，比人笑到面黃呀！（屋企衫係咁架啦）
阿欣即刻笑我：哈哈，唔係呀，都幾得意呀。
我：︿＃︿＄％＃＠＠
我換好衫之後，
就同阿欣落去睇醫生鳥。
平日診所唔會太多人，
所以直接walkin無預約。
去到診所，
我同姑娘講我發燒之後，
佢就埋黎比左支探熱針我含住。
我見無野做，咪一路含住一路整到支針上下咁郁囉．．．
然後阿欣就拍我：喂，仲細咩你！
唔好玩啦，正經ｄ探好唔好呀，
一陣探唔準就麻煩啦。
我：阿欣，不如你行埋去磅下你幾重啦，
你咁得閒（我見有個磅）
之後阿欣就走左過去，
磅左一陣，
我見佢返返黎就問佢：點呀，係咪肥左？
阿欣：你就肥呀！不知幾fit！
我：幾多磅呢即係？
阿欣：超，點解要話你知呀！！
聲沙仲講咁多野，因住變失聲呀！！
臭婆娘你真係惡毒！！
係呢個時候，
姑娘：阿樂，請入去醫生房．．．．．．
咁我就起身行去醫生房啦，
我起身時，阿欣又起身。
我有點驚訝問：阿欣，你唔係諗住跟我入去呀？
阿欣：係呀，有咩問題．．．
我：你係度等把啦。
阿欣：我係要跟呀，唔跟點知你咩事姐，
你唔想我同你一齊入咪叫醫生趕我出黎囉。
我：．．．．．（真係無言）
我入到去醫生房，
就坐低，阿欣就坐係我旁邊。
頂，真係有ｄ唔自然。
醫生見到我地兩個都係咁上下年紀，
就用帶點而奇怪既眼光望一望我同阿欣。
醫生：你叫阿樂呀可？
我點點頭。
醫生：咁呢位係．．．．．
我估唔到醫生會問我呢個問題．．．
屌我都話叫阿欣唔好跟住晒架啦！
我個腦即刻轉得好快話：Er...佢係我家姐。
講完之後，阿欣即刻碌大左隻眼望住我，
我諗佢都估唔到我咁講。
我心諗：抵你死啦，又係你要跟入黎！
咩呀！唔撚玩得呀！？
醫生：哦，
睇返你頭先探熱紀錄，
你有ｄ發高燒喎。
仲有咩邊度唔舒服？
我：喉嚨好痛，頭痛，仲有ｄ頭暈。
醫生：有冇見感冒或者想嘔。
我拎一拎頭。
醫生：嗯，張開口我幫你睇下。
然後醫生就用支電筒同個雪條棍
係我個口度搞下搞下。
醫生：係喉嚨發炎姐，冇咩其他野既。（唉，例牌野）
醫生繼續話：拿高件衫等我聽下你心跳．．．．．
下．．．屌，仆街啦真係。
阿欣係我旁邊喎，點好意思呀搞到我。
我望住阿欣，佢都有點面紅。
無啦啦又面咩紅，係都我先啦．．．．
然後我就拿高件衫啦．．．．．
我拿高件衫之後，
阿欣個頭就即刻拎咩左一邊唔望住我，
估唔到個臭婆娘都幾怕醜。
醫生用聽筒幫我探左幾探之後，
就同我講：阿樂，你心跳得有ｄ快喎。
梗係啦，有女仔係度．．．
我：可能有ｄ緊張。
醫生：駛唔駛打針？
快ｄ好架喎。
一聽到打針，我毛管都豎起晒。
我真係好驚打針，比人拮既感覺係唔好受！
我即刻話：唔駛啦唔駛啦，
我食藥得架啦。
阿欣笑住咁話：哈，仲係咁怕打針，
都咁大個人啦！！
生人唔生膽。
我：又關你事架喎！
見冇咩野，我就出返去，
拎完藥比完錢就返屋企。
返到去之後，
我就諗住拎起包藥食啦．．
點知．．．
阿欣：喂！你就咁食呀？
我：係呀，有咩問題？
阿欣：見唔見到寫住飽肚服呀蠢人！
一陣食完胃痛你就知死呀。
阿欣繼續話：唉，真係睇少你一陣都唔得，
你去床度訓陣先啦！
我煮完野食之後叫你起身啦．．
我見有人煮比我，我又唔介意．．．
因為我真係好撚眼訓同頭痛，
見阿欣咁講，我就即刻仆返去床訓。
無幾耐，
我就感覺到有人拍我，
同叫一叫我．．．
阿欣：阿樂．．阿樂．．
我朦朦朧矓咁睜開眼睛．．
見到阿欣佢坐左係我旁邊。
阿欣：我煮好野比你食啦，
起身食左先啦，食完先繼續訓麻。（阿欣既語氣係果刻溫柔好多，
感覺就好似阿紫係我旁邊咁）
因為我實在太眼訓，所以唔願起身，
就拎個被蓋過個頭，諗住唔理阿欣。
阿欣：喂！死人樂！起身啦！
我數一二三呀！！一！二！三．．！！
我：好啦好啦，起身咪起身囉。
阿欣：咁先係架麻。
然後我就出去食，
阿欣話：見你屋企有福字米粉，
我就住比你食啦。
原本諗住買粥比你既，但我唔識路．．
我：唔緊要，真係麻煩晒你。
阿欣用手摸一摸我個額頭，
然後細細聲講：阿樂，你真係好熱喎額頭，
係咪好辛苦呀。
我：少少啦，
真係唔好意思呀，打攪左你咁耐。
阿欣：我係費事你一陣有咩事，
屋企人會擔心姐！又唔係為左你！
雖然果一刻我知阿欣係特登先咁講，
但我多好明白佢既心意。
我：阿欣，點都好啦，
多謝你呀。
食完野之後，我就拿拿臨食藥。
其實都幾多，仲有支咳藥水添，
最憎飲咳水。
咩都搞掂好，
我：阿欣，我諗住去休息下先。
今日都係問唔到數啦睇黎．．．
阿欣：傻啦！病仲要教你數咩唔通。
快ｄ休息啦去！
我：咁你呢？
阿欣：我等多一陣就走啦。
於是，我就上床訓覺。
訓左幾分鐘之後，我感覺到額上有點涼意。
我張開眼睛．．．
阿欣：咦！？整醒左你呀，唔好意思呀。
我諗住濕左ｄ毛巾放係你額頭會舒服點呀麻。
估唔到，阿欣都有咁細心既一面。
我果時冇回應到阿欣，只係一直望住佢。
阿欣繼續話：咁阿樂你好好休息啦知嗎？
我走啦，之後等你好返先再搵我啦。
我下意識果時，
唔知點解會捉住左阿欣隻手。
佢當時即刻面紅住了，
其實，
我果時只係想講．．．
我：阿欣，多謝你今日既照顧呀。
然後，阿欣就微一微笑，摸左我個頭幾下，
就走左啦。
而家諗返起，如果當時冇阿欣佢睇住，
可能我真係會臥床不起。
病好過後，
其實我都有親身再打電話比阿欣，
再次多謝阿欣佢既照顧。
果時，如果巴打問我有無心動，
我的確有少少。
咁樣並唔代表我衰想一腳踏兩船，
而係我第一次見到，
女朋友以外既，
一個女性既好朋友，
會為左我個病，
踏出呢一步，去著手照顧我，關心我。
或者當時，
我真係可能將對阿紫既感覺，
錯誤地投射左係阿欣身上面。
畢竟阿欣佢，都係一個好女仔黎。
十二月中既時候，
我亦有搵返阿欣，叫佢教返我數。
期後便是一連串既考試。
係果個期間，雖然我真係好掛住阿紫，
有時連書都搞到冇心機溫。
因為我實在好怕，
連聖誕都見唔到佢。
不過，有一晚阿紫打黎，
將我內心既疑惑都一一化解。
阿紫：阿樂，我聖誕節可以出黎陪你啦。
你唔駛驚見唔到我啦傻佬。
我知道左之後，即刻好開心咁話：真架？太好啦！
我地已經成兩個月無見．．
阿紫：嘻，咁你考完試未呀？
我：仲有一科呀你呢？
阿紫：哦，你就好啦，我仲有兩科呀。
阿紫繼續話：阿樂，我今年預備左份聖誕禮物比你呀．．
我：哈，咁岩既，我都預備左比你喎。
阿紫：嘻，咁到時交換啦。
傾完電話之後，
我望住屋企窗外既夜景。
唔知道，阿紫會預備左一份咩禮物比我呢？
仲記得，
中一既聖誕，阿紫去左泰國旅行，
聖誕禮物就係一條泰國手繩。
除此之外，大家仲不約而同咁，
係聖誕聯歡果時，
互相送左一張聖誕卡比大家。
互相食大家屋企人，親手整既野食，
亦係第一次，食阿紫餵我既姐哩糖。
呢一切一切，我仲記得好清楚，
就好似尋晚發生一樣。
估唔到，一年過去啦。
我同阿紫，由當初既朋友，
轉變成而家既情侶關係。
我同阿紫，亦都相愛左逾半年。
雖然期間冇見過幾多次面，
但大家對大家既愛，
依然冇蛻變到。
亦只係嘈過一次交。
對於一個愛情既初生之犢黎講，
咁既成績，已經算不錯了吧。
今年既聖誕，
再唔係單身咁過，
唔需要再嘗試孤獨既滋味，
係呢個節日，
係呢個對單身寡仔黎講係一個仇人節既節日，
我終於可以一嚐，
係街度，拖住最鍾意既人，一齊過聖誕節既味道。
唔知道，今年既聖誕節，難唔難忘呢？
12月25日，聖誕節。
我同阿紫相約好，夜晚先出去尖沙咀。
因為佢下晝要陪屋企人，話約左親戚一齊食飯。
我倒沒什麼所謂，畢竟，
黑夜才是聖誕節最搭擋的伴侶。
燈飾亦只有夜晚睇，先至最吸引。
夜晚出門前，媽媽叮囑我，
唔好咁夜返屋企，出去要注意安全。
經過我家樓下既商場時，
我環望四周，
原來聖誕裝飾已經佈置得妥妥當當，
商場中間仲豎立住一棵聖誕樹，
想不到場內喇叭所播既音樂，
都換成聖誕歌曲。
沿住街道前往地鐵站，
今日人流比較多，
一家大小都選擇出去食飯，
拈上一點節日氣氛。
夜晚既氣溫，明顯驟降左好多，
加上風大，
冬天既風吹起黎比顯比秋日既
更加無情，冷酷。
面對住殺意騰騰，如有刮面之意
既北風，我還是趕快加緊腳步，
快點行入地鐵站比較好。
好在，臨出門時都著多左衫，
但去到海旁應該會更凍吧。
地鐵車廂內固然比平時多人，
其實我從來答地鐵，
都唔會點坐，到而家都係，
還是留比需要既人坐好一點。
有時見到有ｄ人，
明明有阿婆係前面企係度都唔讓下座，
心裡總會有點不屑。
阿紫約左我係尖沙咀碼頭果邊等，
出尖沙咀站後，
人群開始熙來攘往，
好不容易才走到碼頭。
其實，離遠我已經望到阿紫。
佢企既位置頗為顯眼，
我仔細望真一點，
佢今日著左一件白色長褸，
頭髮亦放左落黎，
腳上著住一對黑色長靴。
嗯，阿紫打扮成熟左。
我行到埋去，
從佢雙明眸我已經意識到
佢見到我。
阿紫對住我微微笑：
阿樂，等左你好耐啦。
我：哈，係咩，唔好意思呀，
地鐵站出黎太多人，
想行快ｄ都唔得。
我再仔細望一望阿紫，
今日既係，真係靚左。
白色既長褸同佢雪白透紅既
皮膚真係好襯，
雙唇略塗左一點唇彩，
令阿紫個樣睇起黎更加動人。
我繼續話：阿紫，你今日好靚呀。
阿紫：梗係要靚ｄ啦，
容咩易你一陣睇其他女仔架！
我：唔會啦，我今日對眼reserve左比你架啦。
阿紫：哈哈，係咪架，我實會全程留意住你架！
果時，我雙眼入面，
除左得阿紫之外，
其實咩人都已經睇唔倒，
因為佢真係好吸引。
我地先去食飯，
因為知道今日一定會好多人，
所以預先book定了餐廳。
行到去餐廳門口，
已經見到好多人係出面等緊。
阿紫：哇，真係好多人哎，
好彩我地book左位咋，
如果唔係實有排等呀。
我：哈，其實我係好憎排隊，
所以特登book定囉，
一定無走雞既！
阿紫捏捏我個鼻，
話：你真係叻架姐！！
我地入去囉。
然後，阿紫就拖住我，
一齊步入餐廳。
聖誕節，當然係食聖誕大餐，
亦係最方便快捷不過，
唔駛諗麻。
我：阿紫，唔知係咪冇見兩個月，
今日見到你我特別緊張。
阿紫：點解呀，我又唔係陌生人，
我係你女朋友哎。
我拎一拎頭：
嗯嗯，就係因為你係我女朋友，
但我地卻隔左咁耐冇見，
所以每次見面，
其實都會有一種新鮮感，
因為大家都唔知大家有咩轉變麻。
阿紫：咁我，仲係唔係中一既我呀？
我諗左一諗：唔係啦，
阿紫你比中一靚左，成熟左。
阿紫：嘻，多謝你讚我喎。
阿樂你仲係好似中一果時既你阿，
傻傻更更咁。
我：係呀，咁咪即係唔好囉．．．．．
阿紫：唔係啦，
我就係鍾意你傻傻更更麻。
我：係咩係咩．．
好啦，ｄ野食黎啦，我地快ｄ食啦。
食飯既途中，
我同阿紫都不忘一路傾計。
估唔到，阿紫都會講佢學校ｄ野
比我聽。
阿紫：我係學校度都識左ｄ朋友啦，
佢地都對我好好，幾岩咀型，
所以我係果邊都過得幾開心。
我：我仲以為你一直都．．
唔會願意講你學校既野比我知添。
阿紫：嗯，冇所謂啦，
我都係唔想你擔心我麻。
跟住，阿紫都分享左ｄ學校趣事比我聽。
原來，佢係果邊都真係習慣左，
仲相處得唔錯。唔駛好似以前中一咁，
冇咩人同佢交朋友。
我：阿紫，咁你係學校咁開心．．
咪唔會掛住我囉。
阿紫：傻啦阿樂，點會喎，
我唔掛住你掛住邊個呢。
我：朋友囉．．．
阿紫笑住講：哦～有人吃醋。
我：車，邊有姐，
我先冇咁小器。
阿紫：哈哈，阿樂你係個大醋程。
說真的，其實我當時真係有點吃醋。
心頭總是酸酸的，實在不是味兒。
阿紫就講：阿樂，我餵你食野補返數啦。
不過，我見住阿紫既可愛樣，
我又點繼續忍心去呷落去呢。
只要，阿紫個心係向住我，
我就已經足夠啦。
食完野之後，
我地行返去鐘樓果邊，
打算同阿紫一齊欣賞係維港
對岸既燈飾。
沿途行去碼頭果時，
眼見到好多情侶，
係我同阿紫身邊擦過。
大家都拖住手，
享受聖誕既節日氣氛。
因為已經擁有阿紫，
所以，我同佢，
亦係街道中，成為無數對幸福情侶之中，
其中既一對。
雖然微小，我們並沒有任何名氣，
並不為人所識，
但不打緊，幸福，在愈微小既事物底下，
便會愈顯眼，愈能夠感受到。
而且，我既幸福，並不需要旁人幫我地
做見證，只要係阿紫一個就足夠。
我一路拖住阿紫隻手，
我感覺到佢手溫有點凍，
我就話：阿紫，你等我一陣。
然後我就拎一對手套出黎，
我：一人一個呀。
阿紫：咁你另一隻手咪唔暖囉，
比左我。
我：能夠拖實你隻手，
已經係最大既溫暖啦。
阿紫見我咁講，
就面紅紅咁，戴左一個手套。
阿紫就話：阿樂，你凍唔凍呀？
好似著得好少衫咁喎，
呢度又大風。
我：嗯，唔係好凍姐，
放心啦。
阿紫：唔好啦，一陣又惹病呀傻佬。
阿紫將一條頸巾攬係我條頸度，
同我講：拿，攬住佢啦。
我：咁你呢？你咪會凍親囉。
阿紫：嘻，唔會喎，
呢條頸巾，係我等登織比你架，
當係聖誕禮物呀阿樂。
我見阿紫咁講，
我眼定定咁望住左條頸巾．．．
呢條頸巾．．係阿紫專登織比我嗎？
我用手摸一摸頸巾個質感，
因為用冷線織．．真係好柔軟同溫暖。
我剎那間有點感動，
女仔花心思織一條頸巾，
實在不容易呀。
然後阿紫就幫我攬起條頸巾。
我就捉住左佢隻手，
我話：阿紫，不如一齊攬囉。
之後我就幫阿紫攬一半。
阿紫一路冇出聲，
只係甜甜咁望住我。
我地慢慢咁，行到星光大道。
見到好多人係度擺攤，
又有人係度賣花，賣聖誕帽。
阿紫見到有賣聖誕帽，
就同我講：咦！？有聖誕帽喎，
不如一人一個囉。
我見阿紫笑得咁開心，我當然話好。
我幫佢戴上紅白色既聖誕帽，
感覺上，顯得阿紫更加可愛。
行到地攤時，都好多係幫人影相。
仲記得，中一果時比阿紫拒絕左之後，
我係呢度遇到一位幫人影相既伯伯。
但今天，已經唔見佢啦。
阿紫：阿樂，我有帶相機喎，
不如我地合照一幅呀，呢度咁靚。
果一刻既我，當然冇問題。
因為，我終於可以有機會，
以男朋友既身份，同阿紫影一幅合照，
再唔係遙不可及既事。
相機既發明真係好偉大，
快門按下既一刻，
就為我同阿紫既愛，
留下回憶，留下烙印，
同時亦留下見證。
相片，永遠係紀錄住，凝結住
最美麗，最扣人心弦既一刻。
為何愛情卻沒有呢？
世上如果有任何一個發明，
係可以保留住一份愛情既話，
即使係價值不菲，我都願意去買。
但可惜，愛情是無價。
又怎能用有限換無限呢？
行左一陣，我想靜靜咁，
欣賞燈飾，於是，我就同阿紫，
坐左係海旁比人坐既欄杆位。
果一刻，我地坐係度，
默默咁欣賞住維景黑幕下既夜色，
對住海，吹住海風。
有阿紫既陪伴下，
眼前既東方之珠，
看起黎並不再黯淡無光。
果然，愛情讓什麼也來得眼前一亮。
愛情，令同一讓事物，綻放出不同的角度。
霓虹燈擁抱下既海港，
是繁榮，是寂靜，是璀璨，是耀目。
在阿紫既陪伴下，
更是溫馨，是甜蜜，是幸福，是滿足。
我用右手，
繞過阿紫後背，
將阿紫既纖腰一併攬住。
好讓佢多一點溫暖。
阿紫挨住我個膊頭，
同我講：阿樂，有你陪住我，
先係我最大既快樂。
我係呢個時候，
拎左部discman出黎。
我：阿紫，之前咪話我覺得首
星晴幾好聽既，不如而家一齊聽囉。
http://www.youtube.com/watch?v=jaERYZlvJTc
然後，我就同阿紫，
一齊聽住星晴，一齊默默咁欣賞
眼前既一切。
光害下既香港夜色，
雖然抬起頭，見唔到任何星星，
但眼前既阿紫，
已經係我最明亮既一顆流星。
流星劃過一刻，
是曇花一現，
是難能可貴，
但卻不是永恆。
愛情，也是一樣。
曇花一現，叫人不知所措，
難能可貴，叫人懂得去追求，去珍惜。
果一刻，我亦將我整好既
Cushion送比佢。
阿紫見到之後：嘻，係熊仔喎，
你又知我鍾意熊仔既。
阿樂你好叻呀，咁都識整，
我會好好攬住佢架訓覺時。
我：我都係請教人偷師學返黎架咋。
情濃下既我，當時近距離望住阿紫既面，
都情不自禁地．．．
我：阿紫．．．．
然後我就輕輕錫落去阿紫既咀唇度。
阿紫既咀唇，
微微地帶甜味。
我就傻傻更更咁問：
阿紫，點解你咀唇咁甜既？
阿紫：哈，傻佬，我查左唇彩麻，
本身佢帶點水果既甜味架。
阿紫繼續話：阿樂你咀唇有點乾喎，
我幫你查潤唇膏呀？
我即刻話：哈，唔好啦，我唔想男人老狗查唇彩。
阿紫：哈哈，邊個話幫你查唇彩姐傻佬，
我有另一支潤唇膏架。
然後，阿紫就慢慢咁幫我查，
就同我講：咁樣錫錫都舒服ｄ啦，係咪？
阿紫佢，依然係咁細心同體貼。
我再次輕嚐阿紫咀唇上既蜜味之後，
同佢坐多一陣，就完結今日既聖誕節見面。
係果一刻，眼前所有既野都好美好，
好和諧，沒有太大波動。
我同阿紫既感情，亦看似好穩定，
沒什麼阻礙。
不過，果一刻，其實我萬萬都估唔到，
果一年既聖誕，係我同阿紫第一年過，
亦都係最後一年過既聖誕。
始終，再閃耀既流星，亦有沒落既一刻。
我同阿紫約好左，
黎緊一月會去佢屋企一次。
因為二月新年假應該冇機會見面。
果一次去阿紫屋企，
係最難忘既一次。
點解？
因為實在太刺激了。
聖誕過後，我就更明白，
我對阿紫既愛，係無法自拔，係不能輕易動容。
阿紫，你知唔知道，我真係好鍾意你。
你一雙明亮既眼眸，令到我地既愛，更能傳神咁詮釋出黎。
每次望住你雙眼，我都好自然比你既眼神所吸引住，
唔捨得有任何一分，一秒離開你既視線，
你好比地心吸力，牽引住我心入面，每一下跳動。
你白裡而微泛紅霞既面孔，
就彷彿連太陽都會為你而動容一樣，
唔捨得係你雪白既肌膚上，留下任何烙痕。
你每一吋皮膚上果一份柔軟水潤既觸感，
就好似係幸福愛河上沐浴過後既印證。
阿紫，你又知唔知道，
你帶比我既初戀，你帶比我既愛，
無論係口述，定係筆錄，我都無法子可以形容。
果時，我仲記得，你好鍾意問我一個問題．．．．．
一個月唔埋兩個月，就會問一次．．．
第一次問既時候，
阿紫：阿樂呀，你其實鍾意我ｄ咩姐？
（每次問時，都好似向緊我撒嬌咁）
我當時諗左一諗：嗯．．．．．．．．
阿紫：哦～～阿樂，你要諗既～
即係我無野值得你鍾意啦！
我：唔係呀，係因為你有太多野值得我鍾意啦，
我實在唔知講邊樣好，
咁講啦，我鍾意你既全部。
阿紫就甜甜咁講：嘻嘻，都唔知係咪真既。
第四次問時，阿紫開始對個答案有點唔滿足。
阿紫：阿樂呀，其實鍾意我ｄ咩姐？
我：咩都鍾意呀，好難講架喎，
鍾意一個人邊有原因架。
阿紫：唔得呀，又係呢個答案，
我要其他。
我：我鍾意你夠活潑開朗，每次一見到你，
一聽到你把聲，即使我有幾唔開心我都會開心起黎。
我鍾意你夠可愛啦，對我又溫柔體貼，
每次做ｄ咩都以我為先。
嗯．．我鍾意你塊面夠肉地，
可以比我任搣唔嬲。
阿紫：哈哈，塊面夠多肉都係一個理由黎架咩。
咁係咪唔多肉之後你就唔鍾意我架。
我同阿紫係埋一齊都七八個月，
最近一次佢又問我。
阿紫：阿樂，我有咩值得你鍾意呀？
我：哈哈，你問左咁多次，
唔會厭架咩？
阿紫：咁人地想知呀麻。
點知你會唔會變心喎。
我：你咁可愛，我點捨得對你變心呢．．．
係變，都變得更加愛你啦。
阿紫：真既？嘻嘻。
你呀，唔准嫌我煩架，
我係呢一世都會係咁問你架。
我：遵命。
其實我明白，
阿紫係好想知道，
佢自己身上有咩咁吸引到我鍾意，
有時連佢自己都肯定唔倒自己。
不過唔緊要，
因為係你身上，
我真係搵唔倒一個，唔值得我鍾意你既理由。
一月份，寒冬，
縱使係咁，我仍然非常期待，
冬季旅行既來臨。
班入面經投票決定，
我地會去蝴蝶灣哦。
其實，學校生活，
只係同朋友一齊果時，
即係小息，食飯，或者放學後，
先會多姿多彩。
大部分時間都係沉悶乏味，
上堂Ｄ內容又冗長，
好彩有個冬季旅行，打破下僵局。
因為係冬季，同埋去蝴蝶灣，
我地當然係燒烤架啦。
終於可以同班好友，好好咁玩返日啦！！
其實旅行係有好多規範，
有好多野都唔比玩，
唔比落沙灘游水，
甚至玩水都唔比。
唔比踩單車，唔比放風箏，
只係比玩ballgames，
但當然唔係女仔個波。