有一晚一個來電: 無法兌現的承諾

自從分手之後，
雖然整個人都處於低谷，
但阿欣講得岩，生活依然都要繼續。
其實果時，我真係好多謝身邊既朋友都好支持我
同幫我。每次有咩苦水想吐下，佢地都義不容辭，
呢ｄ朋友，去邊度搵呢。

冇錯，分手係就係好唔開心，會好唔捨得。
因為當你每次回想起，
你同佢咁辛苦，先將大家既彼此關係拉近到愛情呢個地步，


投放左咁多心機同感情，為大家締造一個又一個甜蜜既回憶。

由初次手碰手既悸動，接吻過後既酥麻感，到進一步身體接觸果種激情，
由大家一齊坐公園，聖誕睇燈飾，上大家屋企，行沙灘，行山．．
呢ｄ一切一切，都會令你覺得，
一下止冇晒所有野，實在係好唔甘心，事情唔應該發展到呢個地步，
所有努力都好似已經白費晒。

果時，我係度諗，我真係覺得冇可能再識過一個女仔係好似阿紫咁，
咁適合我。失去左愛情之後，我間唔使都會拎本日記出黎回味下。


既然我已經冇可能從阿紫身上獲得愛情既感覺，
就只好透過日記懷緬一下過去既回憶。

發展一段感情，
由相識，拉近，示愛，一齊。
模式都係不斷重複不斷重複，
當你太過愛一個人之後，
或許你就會發現，
要開始一段新戀情真係唔易，因為你已經太攰，
甚至冇辦法好好專注再將自己既感情投放係第二個女仔身上，


一黎你心入面依然不能走出前一段愛既陰霾，
另一方面怕自己再受傷，再沉淪多一次．．．

無錯，
一段愛情使我成長，
分手過後令我清楚自己愛情上扮演既角色有咩做得唔好，
有咩應該要改善，有咩應該多加注意，從而令下一段感情
維持得更好，令下一個愛人活得更加幸福。

但係，每愛一次，心入面對愛情果種悸動，果種衝擊，
就會被削弱一次。所以先會造就呢一句，初戀永遠係最深刻。
愛得愈多，有時不經不覺間，投放既感情亦愈黎愈比之前少，
咁，愛情經驗豐富，仲係唔係一件好事？？

從阿紫呢段愛，我亦更加稍稍意識到，


世界上根本未必有咩奇跡。
我又唔係作奸犯科，又唔係偷呃拐騙，
又唔係一腳踏雙船，亦唔係對阿紫唔好，
點解可以無啦啦分埋手？

或許，這就是命運吧。

中三既生活，
有一班朋友陪我過，
其實我都已經心足。
縱然我婉拒左阿欣既愛，
我同佢依然係好好朋友．．

我唔知道我到暑假果時，
可唔可以接受到佢呢一段戀情。


我冇刻意去諗，
我始終覺得，愛情，還是順其自然好吧。

咁先可以清楚了解你自己既感覺，
或許我到時依然無法接受，
又或許，我到時卻勇敢去愛，
誰知道？

有時刻意去搵一段愛情，
未必係最理想。
以順其自然既心態去等，
出現果一位先係最適合你。

中三雖然好多科要讀，
但感覺上起碼比阿欣輕鬆。


每上歷史世史果ｄ堂，我都會訓教，這是常識吧！
不訓不是人！邊對得住自己呀！

惟獨是理科堂，我就會精神ｄ。
反而阿欣就真係慘ｄ，畢竟佢面對既係會考，
我唔駛，所以我有時都會打比佢，當鼓勵下．．

我：喂，阿欣，
你溫書溫成點呀？

阿欣：一般啦！
咁好死打比我呀？

我：冇，我太得閒，想搵你攝下時間姐！



阿欣：你份人真係冇句好說話！
見我溫得咁辛苦都唔鼓勵下．．．

我：哦，加油啦！

阿欣：食屎啦你！叫你講先講，
冇ｄ誠意！

我：喂，咁你講晒啦！
神又係你鬼又係你！
講又比人話冇誠意唔講又比人話冇良心！
駛唔駛我cut線再打比你，
重新黎過講返次呀！

阿欣：好呀，拜拜！

然後阿欣就cut左我線，
頂佢咁撚把炮真係講得出做得到！
咁我再打啦，唔係點呀！

我：阿欣，
我係專誠打你同你講，
你會考溫書要加油架。

阿欣：咁就差唔多，
喂！阿樂我有英文唔識呀！

我：咁好明顯唔關我事啦！

阿欣：係咪咁呀，教下我啦搵日！

我：麻煩到死，幾時呀！

阿欣：我唔駛返學架啦而家，
就你啦！

我：哦，咁再約啦。
你有冇諗過，萬一考唔到咁點？

阿欣：冇呀，成日諗咪只會令自己冇心機溫書！
盡左力就算架啦！所以先想搵你幫我咋麻！
你知我ｄ英文根基唔好．．．

我：一餐飯啦！

阿欣：妖，咩都要講回報架你！

我：我都係係你身上學返黎架咋！

阿欣：收啦你，唔講啦，我繼續溫，
係咁啦！

識左阿欣咁耐，
佢係一個幾獨立，
好少去要求人既女仔黎，
今次竟然見佢主動叫我教佢英文，
睇黎佢真係麻麻地．．．．
我見佢又面對住咁大壓力既會考，
仲點會想推佢唔教呢．．．

阿欣話佢唔想去太嘈既地方，
想黎我屋企溫，貪夠靜同舒服。
屌，點解阿紫同阿欣都覺得我屋企舒服？
我真係一ｄ都唔覺！
不過靜就真係幾靜。

我：邊度唔識呀？

阿欣：我帶晒黎架啦！
一次過教，方便呀麻！

我：咁鬼多，玩野咩你！

阿欣：都係學你姐，
你數學咪又係一次過問我！

我：唉，我終於知教人係一件好煩既事！

阿欣：你都覺呢！
所以我教你都覺得好煩！
你知你人又蠢．．

我：得啦得啦！咁多聲氣，
不如你專心一ｄ做你既英文好唔好！？

阿欣：唔好．．

我：咪學人撒嬌啦！你唔係果type女仔黎！

阿欣見我咁講，
即刻用手吱我條腰，一路講：死啦你！邊有撒你嬌姐！

我：哈，你咪慢慢吱囉，
我都唔怕既．．．
你快ｄ做啦，
我都做自己功課先．．
有唔明再問我。

阿欣既英文水平真係麻麻，
grammar根基打得唔好，
做題目有好多都搞到亂晒．．
更何況語言點同數學呢，
唔係話一次就教得好．．．

我做做下野既時候，
阿欣就將佢坐緊既凳，拉埋我度．．

我：咩料呀？

阿欣：冇呀，想近埋你度做呀麻．．
問野都方便ｄ啦！係咪先！

我：但你太埋阻到我做野喎！

阿欣：邊有姐！拿拿林做啦你！！

我：其實你係咪有燥狂症？

阿欣：你就有呀！
再嘈捏死你個死人頸！
喂，阿樂，
好口渴呀有冇野飲呀！
識做少少好唔好？

我：冇喎，口水就有，要唔要！

阿欣：好呀，黎呀！

我聽到佢咁講之後，即刻呆左．．
然後我就縮沙：我去斟水比你。

返返黎之後，
阿欣：唔係話口水架咩？

我：痴線痴上腦呀你！
繼續啦，我教你一次先啦，
睇你都唔識。

如是者，我就一路教阿欣英文，
一路睇佢做．．過下過下就過左幾個鐘．．．

打後既日子，我間唔中都會幫佢惡補下英文，
因為佢自己都驚會考唔合格。
直至考英文會考為止．．．．．

係阿欣會考果時，
我地都冇特登去搵大家，
我亦費事阻住佢溫書，
同時間我亦要準備期末考．．．

直至中三既暑假，
我諗七月中，
阿欣搵返我。

我：點呀，會考果排都冇回音，
考得如何呀？

阿欣：嗯．．唔好再提啦．．
反正都已經冇咩所謂．．

我：點會冇所謂呀？
你真係唔為你前途擔心架咩！？

阿欣：阿樂．．．
其實我打黎，係想同你講件事架．．

我其實都心裡有數，
因為我清楚知道係咩事．．．
應該係關於我同阿欣既發展吧．．．
其實，我都作好主意．．

阿欣：不如．．
聽日我地約出黎講呀。

我：好呀，冇問題．．


數年後既阿樂，
戰戰競競pass過會考，
升到中六。

百忙既讀書生活間，
有一晚，一個來電，
一把曾幾何時熟悉既聲音，
一把曾幾何時日日都聽住既聲音，
數年之後，再係我耳邊響起。
呢一種感覺，好特別。

我：你係．．．．．．．．

??：搞錯呀，咁都唔應得我把聲架（好明顯埋怨緊我），我係阿紫呀。

嗯，呢把聲音的而且確係阿紫。
一個我曾經非常之愛，非常之痛錫既一個女仔；
但亦係一段，令我心入面既傷口，久久未能痊癒，
未能完全釋懷既一段情。

三年啦，初戀真係咁深刻入骨嗎？
又係既，三年以黎，大家都冇搵過大家，
縱使係一個簡單既電話，都沒有。

同佢寒喧左幾句之後，
阿紫既聲音，依然同初中時一樣，沒怎麼變。
就好似帶返我到以前我地初中相愛既日子咁，
依樣的溫柔，惹人憐愛。

然後，阿紫用好溫柔既語氣：係呢，阿樂，你記唔記得我地係點識架？

我：記得，中一個年．．．．．．．．．．

我地既曾經，我地既回憶，
都再一次突如其來地，被勾起。
初戀既樂章，
就好似係失落既過去之中，
再次被尋回，被彈奏。

阿紫：阿樂，估唔到你仲記得咁清楚。

我：嗯，畢竟係屬於自己既回憶，
又點會唔清楚呢。

我繼續話：你把聲．．
都依然冇變啊．．
仲係咁甜。

阿紫：係咩，
不過阿樂你把聲已經變得沉左，
我都差ｄ唔認得。

我：嗯，男仔係咁架啦，
好難聽阿可？

阿紫：咁又唔係，幾成熟呀。

我地就不經不覺間，
傾左個幾鐘頭電話。
言談中，
大家都有講，有笑．．．．

阿紫：哈哈，阿樂，
同你傾電話真係好開心。

我：係咩，咁咪幾好，
我最鍾意聽你笑阿麻。

阿紫：你比以前幽默左呢。

我：嗯，多謝。

阿紫：係呢阿樂，
你．．得唔得閒？
中六聽你講好似好忙咁。

我：近期都還可以，
只係多功課做姐，做咩？

阿紫：冇．．．
其實我地都好耐冇見，
所以我想．．

也對，
我同阿紫已經有三年冇見面，
我對佢既樣貌都已經有ｄ模糊。
果時，我都幾有衝動想見返一次面，
我想知道．．
究竟佢有冇變到．．
同埋，見面時既感覺，又係點呢。

我：嗯，冇問題啊，
你想約幾時？我可以就你。

阿紫：冇所謂呀，幾時都得，
我已經唔係之前咁，約時間要等一個月啦阿樂，
你放心喎。

我：哈哈，我以為真係要預左一個月搵你預約添。

嗯，單係呢點，
已經同以前好大出入了，算是一件好事吧！

阿紫：嘻，不如就今個星期六，好嗎？

我：嗯，就咁話啦．．
係呢，你想去邊？

阿紫回答左我之後，
我就覺得個提議都唔錯．．
果一刻，我既心就再一次期待住見面既來臨。

有時候，
感覺呢樣野真係好奇怪。
當你以為對一個人再冇感覺既時候，

其實內心深處，並唔係呢回事。
特別係，你曾經愛過既人。

即使分左手，
感覺依然唔會消失，
歲月，時間只能夠令你對悉日既感覺，
給淡忘，給消退。

但淡忘等唔等於消失？
我實在不置可否。

因為有時忘記就等同好似消失左一樣，
生活上冇一樣野令你再勾返起悉日既感覺。

不過，
有時當一ｄ外來既刺激黎到既時候，
就好似阿紫呢一個電話咁，
你心底暗處某一種感覺，
就好似從冰封多年既狀態，
慢慢被融化，令感覺再絕處萌生多一次。

比著以前既我，
如果阿紫打黎叫我出去，
我諗我會拒絕，因為一見返佢就會令我傷口滲血一樣。

但而家，或許事隔多年，我已經放低左好多。
心態經過調整之後，對阿紫亦冇咩野耿耿於懷。

反而仲增添左一份好奇，一份對大家三年以黎分隔兩世界既期待。
不過放低還放低，電話裡頭我依然冇問阿紫而家既感情生活，
畢竟果時覺得略帶尷尬同突兀。

阿紫，你而家既生活．．．．究竟係點呢？

星期六，
我約左阿紫係地鐵站等。
因為有點緊張，
我就比預定時間早到左十分鐘。

望住人來人往既地鐵站，
眼睛不斷找尋一個期待已久既面孔，
同時，心入面一直係度跳得奇快。
估唔到，見一位舊情人，
都會咁緊張，明明已經咁熟悉了吧。

跟住，就有人叫左我個名一次。
我望返去聲音來源既位置，
阿紫已經微笑住咁，行緊過黎。

我：阿紫，
好耐冇見。

http://www.youtube.com/watch?v=flSOyjakPCI

阿紫：嘻，好耐冇見啦。
阿樂你高左好多耶！

我望住阿紫個樣，
嗯．．三年以黎佢有點改變，
打扮衣著方面成熟左。

面上化左少少淡妝，令到阿紫既輪廓更出。
亦冇以前咁包包面，髮型由以前既直髮，變成有少少曲，
多了幾分氣質麻。

不過，有一樣野冇轉變，就係佢身體既香氣，
依然係初中熟悉果一種。

我：你都成熟左靚左阿，
每次出街都咁靚女點得架？

阿紫：哈哈，唔係啦。
今次同你咁耐冇見，
想打扮得好少少咋麻，
得登為你而設架。

我：喔，實在係我既榮幸。

我地一路行，阿紫就有路講。

阿紫：阿樂，呢度都變左好多，
我已經好耐冇黎啦。

我：無啦啦你又點會黎呢。

阿紫：係呢，你仲係係原校讀嗎？

我：嗯嗯，已經慣左熟悉既環境，
同埋有一班好朋友陪我，我都唔想轉校讀。

阿紫：咁你冇左我，又慣唔慣？

阿紫咁講，
我就諗左一諗，
佢既說話方式，都係同以往一樣，
鍾意有意無意咁突襲下你，
依舊咁，令我有點不知所措。

我得登行得快過佢，
背住佢講：唔知呢。

阿紫既好奇心係果時又發作．．
阿紫：講啦講啦，
人地想知阿麻。

我：哈，你想知我就要講架啦。

阿紫：係呀。

我：點解？

阿紫：因為我曾經係你女朋友囉。

我：你都識講曾經啦，
效用已經過左期啦，麻煩如果想生效一次既，
就去續約呀唔該。

阿紫：哈哈，唔鬼理你。
咦！？唔經唔覺到左啦喎，
外牆好似翻新過咁既？

我：嗯，係呀。
歡迎黎到你既母校，
等我做導遊帶你參觀。

阿紫：好呀，入去囉。

星期六既學校，
雖然係開放，但就冇咩人返黎。
好處係夠晒平靜，
可以好好咁比我同阿紫一齊慢慢重遊舊地。

平時日日返學見慣見熟既我，
覺得學校已經冇咩特別好行。
估唔到今日既我，
有阿紫再次陪伴底下，
感覺都特別唔同。

實在，好懷念以前同阿紫一齊讀書既日子啊。

入到學校之後，
阿紫一路行係前面，
我就跟係佢後面。

果時我係度諗：

你呢一面，我曾經何時真係日日都想見住。
縱使分手之後，
我無時無刻都諗住你，
依然，無時無刻都想見你。
皆因我實在太過唔捨得身邊冇左你既日子，
你知唔知呀，阿紫？

三年之後，我呢個願望，終於如願。
終於，可以再見返阿紫；
終於，我地既世界又再次接通起黎。

阿紫回望過黎，
望住我：傻佬，呆呆咁諗緊咩呀？

”傻佬”呢一個詞語，
我已經三年以黎都冇咩點聽過啦，
特別係從你口中講出，
感受先係最深，你又知唔知？

我：冇呀，
點呀．．有冇發現有咩轉變咁呀？

阿紫：嗯．．．．（阿紫諗左一陣）
小食部好似冇咩點變呀，
只係ｄ枱凳多左咁。

我：嗯嗯，可惜小食部星期六唔開。

阿紫：嘻，仲有飲品機呀麻。
咦！有朱古力奶喎，你飲唔飲呀？

我望住阿紫微笑既樣，不禁點點頭。
我亦好想再嚐一次，朱古力奶果種甜甜既味道，
就好似初戀一樣，令人淘醉。
然而飲品可以輕而嚐到，
但初戀既滋味，一去難再返。

阿紫就係飲品機度按左兩盒，
一個比佢，一個比我。

阿紫遞埋黎：拿，好懷念呀可？
以前我同你都好鍾意飲。

我：嗯嗯，你走左之後，
就已經冇人成日傻傻咁，返學時
將一盒朱古力奶，放係我枱頭。

阿紫：嘻，而家咪有囉。
咁你仲鍾唔鍾意飲呀？

我：我諗我對佢，
永遠都唔會有可能到唔鍾意呢個地步。

阿紫聽我講完之後，
微笑咁講：我地去操場度坐下囉。

阿紫既笑容，依然係咁動人，叫人動心。

失落已久既笑容同感覺，估唔到會係今日，
好似拼圖一樣，逐塊逐塊咁，慢慢尋回。
呢一幅拼圖，到最後，究竟會係怎樣的一幅？

去到操場時，
阿紫對住我講：阿樂，仲記唔記得呢個位？

我微笑住咁話：嗯，當然記得。
以前我地成日小息一齊落黎坐架麻。

阿紫：嗯，對我黎講，
已經係五年前既事．．
估唔到，今日可以黎返呢度，
坐返呢個位，仲要同住阿樂你一齊添。

我：講真，我都冇諗過，
幾年之後可以再見返你．．．

阿紫：你個病．．
而家點．．？

我：好好多啦．．
冇以前咁，成日發作。

阿紫：阿樂，你知嗎？
之前同你分手果時，
我真係冇怕你個病會因為咁而嚴重落去。

我：其實當時，我真係有諗過唔食藥就算．．．．

阿紫：下．．真架！？
真係冇食呀？？（阿紫有點大反應）

我：哈，你唔駛咁驚，
如果我真係冇食，你就唔會見到我啦。

阿紫就用手拍我，跟住話：咦！想嚇死我咩．．

我：冇錯我果時係好失落好唔開心．．
但我又唔想屋企人擔心，
所以都唔會做到咁不負責任既．．

阿紫聽到我咁講，變得有點唔開心，
就同我講：對唔住．．．

我：嗯，唔緊要．．
都過左去咁耐，況且我而家又好地地。

阿紫：聽到你咁講，我就放心啦。
係呢，阿樂．．．

我：嗯？

阿紫：可唔可以陪我去多一個地方？

我：好，你想去邊？

阿紫：海旁。

海旁可以話係見證我同阿紫好多既回憶，
有甜蜜，有失落．．
果時我已經冇咩所謂，
我只係覺得，只要可以見到阿紫多一陣，
我就已經心滿意足。

彷彿見返阿紫之後，
我既視線就無法從佢身上轉移一樣，
佢既眼神，佢既笑容，
佢既每一下微小既一舉一動，
都吸引到我去注意。
究竟，我自己，係咪仲係愛住佢？

去度尖沙咀海旁既時候，
已經係日落黃昏。
夜景我就見得多，
不過呢度既日落就好耐都未睇過啦。

同阿紫一路沿海旁行住，
感受住熟悉既海風，
我就愈黎愈想回味過往，
腦入面一一既景象亦再次重播起黎。

阿紫：呢度既回憶，真係好多呀可？
仲記得我地聖誕坐係度交換過禮物．．

我：嗯，果時望住維港既夜景，亦都係最璀璨．．

阿紫：阿樂．．
聖誕我冇出現果日．．．
你最後有冇去度？

我：有．．．．
因為我想見你．．
所以．．
我就係海邊等你等左幾個鐘頭。
不過，到最後你都冇出現．．

阿紫：其實．．
由分手到而家．．
你有冇嬲過我，
有冇恨過我咁做．．？

我搖搖頭，話：冇啦．．我又點捨得．．
況且，根本就唔關你事，
我知道你都唔想，都係迫不得以。

或許今日上天就係比呢個機會我，
可以好好咁平靜落黎，
比阿紫同我一個機會，
好好講出對當時分手決定既心底話．．

阿紫望住我，有點感動話：阿樂，多謝你，
一直以黎都咁體諒同包容我。

阿紫繼續話：其實．．

我：嗯？

阿紫：其實我搵返你，係有原因．．．．

聽到阿紫咁講，
我真係有ｄ驚惶，
到底，阿紫呢一個電話，
呢一次約我出去，
係有咩原因．．．？

（有晚無意聽到呢首純音樂，咁岩歌曲叫thepromise，
我覺得幾貼題．．．
http://www.youtube.com/watch?v=sqxbZq7d86Q）

我聽到阿紫咁講，
我停低左腳步．．．

我：有咩原因？

阿紫係衫袋入面，
拎左張紙出黎，遞比我．．
我仔細望住張紙，
見到紙上果幾隻字，我不禁驚訝起黎．．

我：阿紫．．你．．．

阿紫語氣帶點苛責：你係咪好奇怪我點解搵到？

我：嗯．．．．

阿紫：呢張紙條，
係我前幾日有一晚發脾氣時，
隨手搵個公仔扔既時候，係入面跌出黎．．．
果個熊仔．．就係你分手前．．．
我地大家最後一次見面既禮物．．

我冇出聲．．
係，冇錯我係特登將一張小字條返係熊仔抱住果個禮物盒入面．．
因為我實在唔知可以再以咩方式，
去表面我當時既感受．．．
不過我之前都提過，公仔抱住既禮物盒，唔係咁易留意打唔打得開．．
果時我只係諗，阿紫會發現既．．即係我同佢仲有緣分．．．
但估唔到，呢個緣份．．係三年過後．．．

阿紫：阿樂．．．
你點解唔話我知．．．？

我：話你知咩野．．

阿紫：話我知你收埋左呢一封字條係入面，
話我知字條入面既說話：
”無論以後分左手係點，我最愛既人都係你，我願意無限期咁等你”
點解呀！！（阿紫語氣帶少少激動）

我：咁當時你都話我地係受你屋企人阻止，
我係電話講咩都冇用，
咁我仲可以點表面我既心意？
我已經係電話裡頭講得好清楚．．
呢張紙仔，係我特登唔話你知，
我相信如果大家真係有緣份，總會見到。

我有點喜悅咁話：阿紫，而家你而家都見到啦？
之後三年之後姐，都唔算太遲呀．．
如果可以我地依然可以繼續．．．．

阿紫有點泛淚光：但阿樂你．．
從來都冇係電話裡頭講過話會無限期咁等我．．．
不過，都已經太遲啦．．

阿紫講到呢度，
我就問：點．．點解．．？

阿紫：因為，我已經有男朋友．．．．

阿紫佢．．原來．．已經有男朋友．．
這就已經表示，我同佢之間，
已經冇咩可能再有機會發展．．

阿紫繼續話：阿樂，其實我並冇怪你ｄ咩．．
因為係我自己講分手先，
係我地果時timing根本唔好先．．
如果．．如果我地可以遲ｄ相識．．
我相信．．我相信我同你一定可以長久一點．．

我聽到阿紫咁講，
其實無程度都已經心滿以足，
起碼我知道阿紫心入面，即使過左三年後，
見返呢張字條，都依然會對我同佢段感情再重燃返少少感覺。
遺憾既只係，我同佢，始終係timing唔岩．．
第一次，係我同佢拍拖，我地受屋企人影響而分手。
第二次，係阿紫而家已經有男朋友，我地冇可能再係現階段一齊。

其實命運呢樣野，真係好難掌握，
即使個紙條比阿紫好早睇到又點？
佢可以掌握自己命運再同我一齊咩？
佢又可以無了期一直等咩？

雖然聽到佢有男朋友，難免個心真係有唔舒服．．
但我都想了解下而家阿紫既感情生活．．

我：咁．．你上幾日唔開心．．
就係因為．．．

阿紫：嗯，係因為我同男友嘈左交，
所以激氣得濟．．就．．

我：哈哈，咁我個熊仔真係悲哀啦．．

阿紫：我唔係有心架，阿樂．．

我：唔緊要．．
咁你男朋友對你好唔好呀？
而家仲有冇再嘈呀？


阿紫：無啦，好返lu。
其實佢對我都幾好，
無論性格同人品。

我：係呢．．
咁你地點識．．．？

阿紫：其實佢同我爸爸有ｄ熟既，
佢係大學生黎架啦，係我爸爸間
公司做緊parttime。

我聽到呢度，終於向命運低頭．．
原來係同佢老豆有關係．．唔怪得．．
可以同阿紫咁公開地拍拖．．
有時終於明白，機會唔係我，就唔係我．．

我：咁．．佢家底應該唔錯吧．．

阿紫：嗯．．

咁咪幾好．．
有個符合佢屋企人要求，
又性格幾好既男仔．．
仲比我好吧．．

我強顏歡笑咁話：阿紫，只要你過得開心同幸福既，
其實我都已經好滿足．．
你男朋友又符合晒你屋企人要求．．
我．．我真係好鄧你高興．．

阿紫：阿樂．．你．．

我：其實我今日知道你話見我，
我都預備左一封信比你，
不過見你已經咁幸福，我睇怕都冇咩用處啦．．

阿紫搖搖頭：嗯，你而家比我，我想睇呀．．

然後我就比左封信比阿紫，
阿紫拎上手之後，就係我面前，打開黎睇．．

呢封信既內容係咁：

阿紫，好耐冇見啦，
亦都好耐都冇寫過信比你．．
近排同你傾返電話，
真係好開心。

估唔到三年之後，
呢一個電話，唔單止一點都唔陌生，
反而我地仲傾得比以前開懷左，開心左。
或者大家真係太耐冇接觸．．

知道你話黎緊星期六會約我，
其實心入面都有一種無名奇妙既期待。
咁多年冇見既你，
唔知會變成點呢？
唔知道，大家見面既時候，
又會唔會覺得好突兀呢？

不過傾電話既時候，知道你把聲都冇咩點變，
果種感覺，就好似帶緊我去坐住時光機，
返返去以前初中同你一齊相愛既日子，
果種感覺，依然係似曾相識。

冇錯，以前冇左你既日子，
我的確好難過，好唔開心，心入面日日都唔舒服。
因為我覺得，我實在付出得太多時間同心血，
突然之間就將呢一份累積返黎既心機付諸流水，
我真係覺得好可惜．．

不過，係呢段期間，全賴一班好友支持我．．
我先慢慢咁係失戀既傷口之中，
痊癒過黎，我先有勇氣，再繼續面對返自己既生活。

無見三年，
我實在唔知道，可唔可以再有機會同你發展落去。
我亦唔知道，你屋企人會唔會再阻止你。
不過得知道你可以自由咁出街，做自己鍾意做既野，
我心入面都好為你高興，總算唔駛再受住家庭既束縛吧。

無論我地有冇機會發展，
再做情侶，或者繼續做朋友又好，
我覺得，
你永遠係我心底入面，
仲暗處，都佔住一個微小但而重要既位置。
呢一樣野，
我相信係我久久未能完全忘記你既原因。

期待住星期六同你既見面．．

阿樂

阿紫睇完之後，
不禁．．
流下兩行眼淚，
望住佢呢眼泛淚光既雙眼．．
我真係唔知點算．．

阿紫佢突然行左過黎，
攬住我，
同我講：阿樂．．
多謝你．．
我真係覺得好感動．．
多謝你比一段咁難忘既戀愛我．．

佢繼續有點嗚咽咁話：雖然我地唔可以再係埋一齊，
但我同你一樣，永遠係心入面某個位置，
都存在住你．．

我安慰返阿紫話：
唔緊要喎，愛情呢樣野冇話邊個岩，邊個唔岩，
亦冇話怪得邊個。一個曾經互相相愛既情侶，
如果到最後分手時卻淪落到互相憎恨既地步既話，
咁真係太諷刺同悲哀啦。

我地，依然係好朋友麻。

我繼續話：拿，紙巾呀，抹下個靚樣先啦。

阿紫：嗯，你講得岩，
分左手再做朋友真係唔易，
更何況係好朋友．．

我：係囉，
我肚餓啦真係，食ｄ野開心下好冇？

阿紫：嗯。

雖然某程度我係有點失望，
但同佢食飯傾計既時候，
我地依然都好開心，傾得好投契。
其實變相亦都係一種解脫．．

點解咁講？
因為我而家已經知道，阿紫幸福。
我就唔駛再為一個人，繼續等落去．．
對我自己，變相係一種解脫。

可以完完全全令我去放低一個人，
完完全全去重整自己既情緒，
繼續交顆心出黎，去嘗試愛上第二個，
嘗試珍惜第二個來臨時既機會。
咁樣，唔係仲好咩？

遺憾既係，
我係張小字條既承諾，無辦法再兌現得到，
因為阿紫已經有男朋友，我亦無需要再繼續等．．

遺憾既係，
我呢一幅拼圖，
永永遠遠缺失了最重要的一角，最重要的一塊。