有一晚一個來電: 譜上休止符的最後

其實當我同阿紫分左手之後， 
我都唔知道，原來三年後仲會接觸到佢。 
不過，我始終非常之多謝阿紫， 
因為初戀對我黎講， 
一直都係一個無形既心結。 

我怕我再識第二個女仔既時候， 
依然唔知道，我究竟可唔可以完完全全放低 
舊情去愛，定係純粹係尋找阿紫既影子先會去愛人。 



三年以黎，因為呢一個原因， 
我變得唔輕易去愛上一個人， 
我亦變得唔係咁放心去愛， 
直至遇到阿紫中六呢個電話， 
同再次見返佢。 

因為佢既說話，並無傷害我ｄ咩， 
佢既動機，亦唔係話想令我再受傷或者責備我ｄ咩， 
佢只係純粹想我放低佢， 
因為就連阿紫佢自己，都覺得唔值得我再等佢。 


佢會好內疚。 

佢覺得我唔識愛我自己，只係顧住諗其他人。 
佢既原意係想藉住呢次見面， 
同我講清楚，佢已經搵到幸福。 

並想我完完全全咁返低佢， 
內心得到直正既解脫， 
唔好再咁傻只係為左等佢而放棄任何可以去愛既機會， 
唔好為左一段過去既初戀而令到自己唔敢再去愛一個人， 


想我把握機會好好捉緊未來既幸福， 
好好去找尋屬於我自己既戀愛。

其實都岩， 
我自問真係覺得好攰， 
我亦唔應該再百無了賴咁等一個人。 

呢ｄ某程度已經唔係叫長情， 
係痴情，盲目。 
同時，我亦好應該為自己著想一下， 
好好咁等待重新再來臨既機會， 
我相信，第二次既戀愛， 
一定會比第一次更好。 

無論點都好，我同阿紫都係好好既朋友。 


其實，我同佢既關係，而家都係朋友以上， 
但戀人未滿。 

大家都清楚知道大家唔會鍾意大家， 
但關係就比好朋友再親暱少少。 
有時人就係咁奇怪， 
可以同倒一個女仔發展到超友誼關係， 
相處得好好，人地同你唔熟既話， 
一眼就會覺得你地有野。 

但係你地自己心知道， 
大家對大家只能係去到超友誼， 
但卻冇法到情侶關係。 
我相信仲有巴打試過咁。 



其實我覺得咁樣都幾好， 
起碼我唔會再抱住一個暗戀或者單戀既心態 
再對佢，咁樣相處都幾舒服， 
始終我已經唔想太過約束住自己既心境， 
可以釋懷真係一件唔易既事。 

阿紫，其實我亦好多謝你， 
比我一個咁難忘，又甜蜜既初戀。 
同時亦比到我一段，咁美妙既樂章。 
人生能得一次咁既經歷，夫復何求？ 

我會永永遠遠祝你幸福，快樂。

其實中六既時候， 
我係班入面認識左一個女仔， 


佢叫阿婷。 

之前我都冇同過佢一班， 
因為佢係高我一個form。 
因為會考留過班一次， 
所以升中六時我同佢係理科， 
就理所當然係同一班。 

阿婷係一個人品同性格都非常好既女仔， 
亦且樣貌亦生到好標緻，幾靚女。 
不過佢英文水平又係麻麻地果隻， 
所以有時佢都會請教我英文， 
我亦好樂意教佢。 
間唔中，亦會同佢係msn吹下水， 
相處起黎都算唔錯。 



因為我同阿紫果次見面之後， 
終於可以幫我既初戀劃上正正式式 
點上一個休止符。 

阿婷今日放學之後， 
又坐係我隔離，問我英文grammar， 
同埋唔識做reading。 
佢一路問我，我就一路教佢。 
教佢既期間，一直都留意住佢側面， 
同埋佢雙迷人既大眼睛。 
阿婷見我咁望住佢， 
就同我講：喂，阿樂，做咩呀？ 
一路望住我，專心ｄ好唔好？ 

果一刻， 
我忽然之間問佢： 
阿婷，你識唔識彈鋼琴？ 

阿婷：識少少啦，做咩？ 

我：嗯，咁就岩， 
可唔可以得閒教下我？ 
因為我最近想學。 

阿婷：好呀，冇問題呀。 

然後，阿婷就問我： 
喂，咁呢題應該點做呀？ 
我唔識點轉passive voice呀。 

我就係佢條答案橫線上， 
畫左一個四分音符。 

阿婷見到之後，就笑笑口話： 
阿樂，玩野呀。 
我要轉passive呀，唔係要四分音符呀。 

我就微笑住，同佢講： 
阿婷，唔好擦左佢。 
呢個音符，就當係我地友誼既開始吧！ 

然後，我就一路望住佢， 
一路諗：或許，佢可以幫我係空白既五線譜上，  
由四分音符開始，同我攜手再譜出另一段樂章。  


－完－