[屍文]遺留者的影像: 第十一章

7月2號，下午5點36分。

飯堂「會議」結束將近一小時，但見富正淡久無音訊，伍真綾心有擔憂，卻又不敢打擾那眉頭深鎖的葉英信。

「阿欣……」毫無選擇之下，她只得走進飯堂問何梓欣。

「係？阿綾？」何梓欣剛剛清理完血跡，正躺在椅子上休息。

「你唔好同大佬講呀……我只係想問下，你有冇見過阿正？」





「阿正？」何梓欣愣了愣，才道：「無呀……我一直係飯堂做野，佢地唔係出面咩？你不如再搵下啦。」

「哦……咁唔該哂，我再去搵下。」伍真綾說畢連忙離開，她總覺得此刻的氣氛有異，眾人的臉上都掛著沉重，但又說不出有甚麼奇怪。

「嘩啦嘩啦……」

雨勢比起早晨變得更大，伍真綾一走出戶外，便被雨水潑濕身子。凝望灰暗的天空，一股不詳的氣息突然充滿全身，好不舒服。

「阿綾？妳做咩企係度？行入啲啦，呢度好大雨呀！」熟悉的聲音倏然在耳邊響起，來者竟是全身濕透的富正淡。





「阿正……你頭先去左邊呀？做咩全身濕哂咁！？你唔會係同大佬……」

富正淡苦笑搖頭：「唔係呀，我岩岩同肯尼……即係嗰個鬼佬呀！傾啲野姐……咁行左去路軌度，咪淋濕哂囉……」

伍真綾看見富正淡平安無事，也不追問：「阿正……咁大佬佢點講呀？我岩岩見到阿牛入左去……佢無咩事呀嘛？」

「嗯，佢暫時無事……放心。」富正淡說著頓了頓，神色忽然凝重起來：「阿綾呀……我依家要問妳一樣野，妳認真咁答我。」

「吓？哦……」





「妳，妳信唔信我？」

「嗯？」

「我話，妳信唔信我！比妳揀，妳會信我定葉英信？」

「吓？」伍真綾被突如其來的問題一怔，但她很快便回以一個動人微笑：「唔……梗係你啦。」

富正淡聽畢登時鬆一口氣，他環望四周道：「咁就得啦……我有啲好緊要嘅事同妳講，我地搵個無人嘅地方先……」

富正淡沒有等待伍真綾回答，便匆匆將她拉走。










與此同時，位於月台末端，那間貼著"不准進入"大字帖的房間。

據牛仁晃所言，那是一個擺放屍體和隔離感染者的地方，統稱「禁地」，一個裝神弄鬼的名字。

內裡空間不大，只夠擺放兩張桌子和幾把椅子。而入目相當黑暗，只有十餘枝蠟燭點燃，提供視野。

葉英信坐在一角，語氣不滿、繃起臉皮道：「盛明，你做乜野呀？叫左你唔好咁張揚，你係咪傻撚左？」

神情冷酷的盛明高舉手中利刃，陰笑道：「係咩？可能係啦，真係唔好意思。你明架，我等左好耐啦……已經成幾日無野落過肚。」

「你食屎啦扑街！之前已經搞到我周身蟻，又想嚟？」

盛明用利刃切開桌上的黑色物體，冷笑道：「哈，你咪同我講笑。之前嗰壇野係你諗出嚟，我只係負責做。所有野都係跟你指示，唔關我事。」





「哈哈哈！！你都幾好笑喎，我之前嗰單唔同你計，咁頭先呢？你係佢地眼前捅左高功利一刀，依家點收科？」

葉英信望向腳邊，只見高功利正躺臥在血泊中一動不動，匕首仍插在腹中，也不知是死是活。

「大佬，我係為左救你咋。高功利等我嚟處理，你同佢地講，高功利發難，走甩左就得。」

「吓？你無撚野呀嘛！咁白痴嘅大話你都講得出？咁阿牛呢？你想點？」

牛仁晃被綁在椅上，同樣毫無動作，不知道是在睡覺還是暈倒過去。

「牛仁晃已經受感染，無得救架啦，將佢交比我處理。到時你同佢地講，阿牛病發逃走左，咁樣啦。」盛明放下利刃，執起另一把豬肉刀，在磨刀石上霍霍作響。

「又係咁講？哈哈……盛明，你真係當佢地傻架？係人都聽得出有鬼啦。」葉英信赫然站起，一手抆飛盛明的冷帽。





這時盛明的動作瞬息止下，他回首怒瞪葉英信，身體散透出陰寒的氣息。

盛明指住地上的冷帽，怒目相向的道：「你！執番頂帽比我！」

「盛明，你聽住，我同你只係互惠互利，我唔會驚你，你唔好係我面前扮哂野。高功利，你鍾意點就點，反正佢都比你捅左一刀。牛仁晃嘅話，你同我好好諗掂佢，唔好亂嚟。出面嗰個叫富正淡嘅傻仔，好撚麻煩，佢實追究到底，我唔想任何野影響到我……」

葉英信高大的身軀站在盛明面前相當具壓迫感，他邊說邊用食指篤其胸口。但見盛明沒有絲毫退縮，昂首挺胸，手中的豬肉刀不斷敲打桌面。

「哦，我好驚呀。你將個富正淡帶埋過嚟咪得囉。」

葉英信沒有回答，怒哼一聲便揚長而去。剩下眼神冰冷的盛明，在漆黑中露出猙獰而森寒的笑容。










二人走到月台遠處，那已是欄杆之後，一個既不會被雨淋濕，又頗為隱密的施工位置。

「聽住……」富正淡深深吸了口氣，道：「我地要離開呢度。」

「咩……咩咩話……離開呢度！？咪住咪住，你傻左？唔好玩啦！」

伍真綾一下子大叫出來，立即被富正淡捂住嘴巴：「唔好咁大聲呀……」

見伍真綾點了點頭，富正淡才鬆手續說：「唔係玩呀……我……同肯尼好認真咁商量過架啦，聽日就可以離開呢度。」

「離開呢度……咁……去邊？點去？點解突然要咁做？」此刻的伍真綾極度混亂，她理解不來富正淡在說些甚麼。

「妳冷靜啲先……聽我講……我覺得呢度好唔安全，妳都聽到近來喪屍叫得越嚟越大聲，證明屍群好可能已經知道我地係上面呢個位，佢地攻上嚟不過係時間問題。」

當然，這只是幌子，富正淡根本不清楚屍群的動向，他更忌諱的，是古裡古怪的葉英信和盛明。

「咁……洗唔洗通知大家一下？你……會唔會太突然？」

「係幾突然……但係妳信我，我依家唔係玩，我好認真。我同肯尼已經有哂全盤計劃，我地會去九龍灣嘅政府根據地。」

「九龍灣？」伍真綾稍微回想一下，再道：「你係話嗰個廣播？」

「係。我諗你都聽過個廣播，留係度都唔知要等幾耐先有救援。與其係咁，不如我地先去左嗰度睇過，如果政府根據地係真嘅，可能即刻可以送我地去一個安全嘅地方呢。」

「但係……你點知係咪真係有根據地係度？話唔定段廣播係假嘅呢？大佬就係唔想搏，所以先叫大家留低，建立左呢個地方等救援……」

「如果個廣播係假嘅，我地可以到時先再諗辦法。」富正淡下意識地環望四周，續道：「肯尼之前係鞍祿街搵到架黑色七人車，佢試過仲用到。我地可以揸車由西沙路開始，沿城門河揸到大老山公路，再經過大老山隧道，就可以好順利咁出到九龍。理論上係咁講，實質係點當然唔知啦，不過係可以一搏。啦，車匙係度。」

富正淡把銀白色的車匙塞進伍真綾手中，繼續道：「車匙妳袋住，聽朝一早我會叫醒妳，趁朝頭早喪屍無咁活躍嘅時候起程……我諗點都會比夜晚落去好掛，始終呢度去到鞍祿街都要一段路程。」

伍真綾接過車匙，一臉迷茫地望著富正淡，櫻桃小嘴時開時合，好像想說甚麼。

並非富正淡說得不清楚，也不是不相信他，只是……

富正淡看出伍真綾在苦惱，聲音和表情都嚴肅起來：「阿綾，如果妳唔想跟我地走嘅話，我唔會強逼妳，妳可以比返條車匙我。當然，我好想妳同我地一齊走……因為……妳唔係我身邊嘅話……」

伍真綾目不轉睛地凝望富正淡，還不時搖擺馬尾，似乎在期待著甚麼。

「我諗我會幾悶……係，係非常之咁寂寞。」

說完這句，富正淡立即轉身，習慣性地深呼吸幾下。因為他剛才望著伍真綾的時候說到滿臉通紅，不是憤怒，而是超級緊張。人生20年來從未講過的對白，連自己都覺得害羞。

富正淡慢慢轉頭回去，但眼神仍刻意避開伍真綾。

此時伍真綾微微側頭，鼓起臉頰，嫣然一笑，露出潔白的牙齒，笑出迷人的酒窩。

「你頭先唔係告白下嗎？」

聽到伍真綾的說話，富正淡連忙擺手，慌道：「吓……唔係呀……緊係唔係啦……真係唔係呀……我……我只係……我……」

「哈哈哈……」伍真綾每次笑起上來，雙瞳剪水、齒如瓠犀，迷人自然又不做作：「阿正，你係個好人……」

吓？我是個好人？

「不過……」

我才不是好人！慢著……

「我會跟你走。」

跟我走？

吓？

富正淡還以為伍真綾下一句要說「你係個好人，不過我鍾意嘅係葉英信」，內心一片慌亂，自己都準備收下人生以來第一張好人卡了。

因為他曾經試過告白，卻在告白之前便被拒絕了的悲劇……

他呆在原地，腦筋有點轉不過來。

「你做咩企定定係度呀？洗唔洗咁大反應呀？哈哈……」伍真綾捂住粉唇笑個不停：「哈哈……認真啦，總之我覺得，你係唔會呃我。唔知點解，總之我信你，我信你……你會保護我。」

伍真綾的笑語說到富正淡心坎，既溫暖、又受落。

她的笑容總是令人舒暢，能撥開愁霧、解除煩憂，比煙酒興奮劑更甚。

這句說話更讓富正淡燃起男子氣慨，即使是拼了命也要保護好眼前這個笑口常開的女孩。

「不過呢……我想知道，點解你咁信嗰個肯尼？佢會唔會帶我地去啲奇奇怪怪嘅地方架？」

伍真綾總算開始接近問題核心，富正淡立刻回神過來：「嗯……係……其實……我都唔可以好確定咁講。不過，直覺話我知佢應該唔係咩大奸大惡嘅人……掛。妳放心，如果有咩衣郁嘅話我一定會保護好妳……妳要信我，好無？反正我信肯尼……一定多過葉英信。」

「點解你好似對大佬好有偏見咁？以我所知佢唔係咁架，佢一直對我好好……其實你地頭先係飯堂發生過啲咩嚟？」

富正淡眉頭緊皺，嘆氣道：「對妳好好？唉，一言難盡，依家講唔係好方便……呢樣聽日先講。總之妳信我，佢一定唔係咩好人。」

「哦……我唔係唔信你，你定啲嚟啦，唔洗係咁重覆喎。哈哈哈……」伍真綾又開始傻笑起來，她真的很喜歡笑，而且笑得很悅目。

富正淡想起，自己的母親講過，喜歡笑的女孩都是好女孩。

唉……阿媽佢都唔知去左邊……

「我想問呀……妳笑咩姐？我有咩咁好笑？」

伍真綾有一秒歇止了笑聲，然後捂住嘴巴按住肚子，笑得更加用力：「哈哈哈……你個樣好好笑囉……你唔只變態，仲好毒、好樣衰添呀哈哈哈……」

富正淡心靈一陣受挫，不知如何回答。

「你係咪好少同女仔講野呀？你個樣好呆，講野又九唔搭八咁！哈哈哈……！！」

此刻富正淡無言地站在原地，臉如死灰……

良久，伍真綾才緩緩收起笑意，道：「哈哈哈……我真係頂唔順啦……講下笑咋！你哈哈……咳咳……嗯係呢……得我地三個人走？咁阿牛呢？仲有昇伯、阿欣、阿柔佢地呢？」

「我諗過，接近黎明，我同肯尼就會向葉英信提出帶走阿牛……如果佢真係唔比……我地就夾硬嚟，到時即刻走。」富正淡邊說邊戒備四周：「理論上，阿牛係感染者，葉英信無困住佢嘅必要，佢真係阻止我地帶走佢嘅話，就一定有問題。其他人，我真係幫唔到咁多，亦都唔知佢地嘅意願。」

「哦……咁樣……會唔會唔係幾好？」

「好就一定唔好架啦，但依家唔輪到講好唔好……我有種好不安嘅感覺，再拖落去一家會發生啲咩事。信我，我嘅直覺好準。」

「你直覺好準？哈哈……咁我問你，我今晚著咩色襪？」

富正淡聽罷，隨即望向那對白滑美腿：「白色。」

伍真綾一掌拍在富正淡的頭頂：「醒喎！識瞰喎！蠢唔哂喎！」

富正淡沒好氣的道：「唔好玩住啦！阿綾，聽朝一天光我就會叫醒妳，到時我會同肯尼準備好一切，妳跟住我地就得。」

「唔洗你叫啦，我自己識醒架啦。係喎……其實係咪應該同大佬佢地講聲，畢竟受佢地照顧咁耐，突然走左去，好似唔係幾好……」

「我明，無問題，妳聽朝同佢地道別啦。」

「依家或者今晚唔得？」

「唔得。」富正淡撥開遮住額頭的頭髮，露出畏懼神情：「我覺得……妳依家同佢講我地要走嘅話，葉英信會即刻打死我……」

「吓？點會呀……你係咪諗多左呀？」伍真綾驚訝說道，剛才笑逐顏開的樣子已不復存在。

「真係架，妳唔明架啦，佢無妳想像中咁偉大，我聽日先同妳解釋啦。把槍係妳度係咪？」

伍真綾輕輕點頭：「係呀……」

「妳袋住佢防身，千祈唔好比人見到。肯尼嗰枝比葉英信收左，呢枝槍係救命草。」

「哦，好！」

此時富正淡把頭探回去觀望，見自己的方向無人注視，便示意伍真綾回去。

「阿綾，妳今晚洗唔洗守夜？」

「唔洗呀。」

「嗯，咁妳等陣做完野就訓覺，養足精神，準備好聽日嘅事。」

「嗯……好啦。」

一直聽著富正淡的話語，伍真綾其實有點忐忑不安。

雖則自己已決定了要跟富正淡離開，但心裡總是不太舒服。不是說不信任他，而是說要離開這裡，實在太過突然，畢竟在這裡生活了快十天，每個人都照顧過她、給予過她鼓勵。

她都把牛仁晃他們當作家人一樣了，要靜悄悄地走，道別沒一句，自己的良心怎麼說也過意不去。

所以她決定了，今晚睡覺之前，便會偷偷跟葉英信和盛明以外的人道別，這樣做才不會後悔，能夠安心離去……






凌晨2點42分，夜已深。猛烈的雨勢中途停過一次，但才緩和半小時便又刮起狂風暴雨。

富正淡睡不著覺，他正為明天的計劃做最後準備，包括武器糧水、救援牛仁晃的詳細和路線規劃。

伍真綾如同之前所想，打掃工作結束後，瞞住富正淡向眾人道別。雖說已答應了富正淡跟他離開，但看見何梓欣、老伯萬康昇、另一女生馮希柔等人不捨的表情，其實她也掙扎了很久。

而肯尼則處於半睡狀態，他曾是一個軍人，受過嚴格訓練，體質比起外表更加健壯，任何風吹草動都會驚醒。但事實上，他並不同意救走牛仁晃，原因是牛仁晃已經受到感染，不穩定性太大，對他的安全極具威脅。

至於伍真綾，他更是反對。帶著一個手無縛雞之力的女人到處走本來就是件苦差，還可能與葉英信起衝突，這些對他來說全都是負累。

但讓他最詫異的，莫過於富正淡主動提出要離開這裡。他本來就是為了來這個地方才拼命救下富正淡二人，目的達成，理應安心、安份下來。不過聽到九龍灣和深水埗可能有政府的根據地之後，他最後還是選擇放手一搏，畢竟一直待在這裡也不見得有何希望。

他不太理解富正淡的想法，但從他來看，富正淡個性和善，體格亦不俗，的確是個可以一用的人。

正所謂「工欲善其事，必先利其器」。富正淡坐在路軌上的一個隱密位置，用布輕抹刀身，又在堅硬的路軌上輕輕磨刀。

縱使被雨水淋濕身體，但他卻很享受這種感覺。他覺得雨水能保持他頭腦清醒，防止他太倦一覺睡到不知時日，同時又有點……異彩的浪漫。

他從小便是這樣，喜歡淋雨、喜歡追風，經常玩到像落湯雞回家，被媽媽痛打一頓。亦因如此，他從小學開始，就幾乎未試過因著涼而感冒，錯有錯著，抵抗力變得非常好。

這幾個小時他想了很久、很多的事情。他一直在想，自己當初來這裡的目的到底是甚麼？

尋求安全？不，是牛仁晃救他回來，自己是誤打誤撞下加入葉英信的團體。

本來的目的就不是長留，準備好糧水出發找黃圭澄才是他的盤算。伍真綾絕對是個意外的存在，他並不知道自己已不自覺地被她深深吸引住。

而且加入才一天，就發生了不愉快的事，差點死掉。

高功利背叛自己，害他和牛仁晃被屍群追殺，幾乎葬身屍海。

下午飯堂的會議，更覺得葉英信是個城府很深、怪異非常的人。他從見到葉英信的第一眼開始，便有這種不友善的感覺。

那個盛明更不用說，整天都不見人，一出場不是打招呼，而是捅人一刀，明明葉英信說過不可做過火的事，但他卻例外容許盛明，根本不正常、可疑至極。

而直接讓富正淡萌生離開的念頭，是葉英信和盛明二人，都散發出一種危險的氣息。他不知道怎麼解釋，總之就是有一種這樣的感覺。

「偏偏咑叮……」

嗯？

「偏偏咑叮……」

又是這種硬器碰撞的聲音，昨天守夜的時候都有聽過。富正淡的聽力其實很好，那種聲音層次分明、清脆響亮，像是磨刀聲，又像利器撞破物件時的聲音，夜晚聽起來更多了一分恐怖。

「唧嗖……」

又來了……

富正淡很清楚自己沒有在磨刀，而這次聽到的也基本肯定是磨刀聲了。

這種時候……到底誰還在磨刀？

剛才夜晚，葉英信叫大家安心睡一覺，由他和盛明負責守夜。但葉英信守在路軌遠處，理應不會在搞裡搞怪……

好奇心和本能驅使下，富正淡收回菜刀，爬上月台，一步步接近聲源。

眾人睡的死死，他瞥眼看到車廂裡有三、四人在。而據他所知，睡在兩個藍色帳篷裡的大概是伍真綾、何梓欣和那個甚麼馮……希柔。

為免驚動到其他人，他盡量放輕腳步……

深夜很冷，冷得他直打了個哆嗦。雖然下雨，但四周很寧靜，讓那些聲音變得更顯亮清晰。

「吱嗦……」

這次又轉變了聲頻。經過了4次的細心聆聽，富正淡已大抵確認，聲從何來。

阿牛不是在裡面嗎？難道是阿牛喪化了？那是他的叫聲？不不不！別再胡思亂想……

現在的他，已站在貼著"不准進入"字條的那個房間的門前。這個房間其實是位於月台最遠端、電機房和緊急通道的附近，大概是一個放雜物的房間。

原本是雜物房之流……但現在被葉英信拿來做義莊。

「禁地」的大門是防火門，用鋼鐵鑄造，毫不透光，壓根看不到裡面的情況。從月光下看，門面非常新淨，應該才打造沒多久。

這個房間……是鐵路站原本就存在的嗎？

為甚麼要將阿牛關進這種密不透風的房間……阿牛……不會有事吧？

他百分百肯定，那種詭異而引人發寒的利器硬器聲，是從眼前這個「禁地」裡所傳出。

而他與詭譎「禁地」的距離，只有一門之隔……