(青春極少甜)原來曖昧真係最好既階段: 14-坦白

魏天培拉住我，不斷行。

「魏天培……我好攰……」
行到去一個公園，我真係頂唔順。

「點解妳咁豬兜架！俾人鬧唔識出聲呀？」佢甩開我隻手，拍左我個頭一下。

佢一拍我，我好似俾人禁左個開水制咁，一下喊左出黎。

「係呀我係豬兜呀……我係唔識出聲呀……咁又點喎……」


我既眼淚不停咁湧出黎，喊到不斷抽搐。

呢排壓抑住自己內心既感情，又好迷惘，完全決定唔到自己想點。應該投入對呀逸既感情，定係正視自己對魏天培既感覺。之後又無啦啦俾人暗地裏話左一餐，俾唔熟既人誤會我，受左好多眼光。我都未知發生咩事，呀逸同魏天培就突然有正面衝突。我個腦真係好亂好煩好失措……

同魏天培獨處，佢一拍我話我蠢個下，我覺得我好似終於可以放鬆，就忍唔住喊唒出黎。 

魏天培個樣明顯變得好慌張，唔知點算好。

「我講下笑咋……喂……對唔住啦……唔好喊啦妳……」
佢輕輕摸住我個頭，好似見番當初係邱sir手上救番我既佢。



但係我喊左就好似唔識停咁，眼淚不停流出黎。

「……」魏天培拎左張紙巾俾我，沉默咁望住我喊。 

唔知過左幾耐，我終於喊到冇眼淚。

「……多謝你……」
「嗯……」佢個樣好尷尬。



「魏天培……我諗我有D野要同你講……」
「嗯？」 
「關於邱sir個次……佢到底捉住我D咩把柄……」

 我一直唔想面對對魏天培既好感，最大既原因就係呢一樣。
佢救左我，但佢唔知到底我刪除個樣野到底係咩。佢對我有好感，但佢唔知我同呀逸發生過既野。
因為佢唔知，所以先仲會對我好。因為佢唔知我做過D咁既野，所以佢先會鍾意我。
我覺得既然我做過呢件事，就應該要承認自己鍾意既係呀逸，就唔應該再對其他人有感情。
但係隨住時間既過去，我慢慢清楚自己對呀逸既感情未必係鍾意，只係在意佢、想解佢呢個謎、貪戀刺激。而我對魏天培既感覺，更加似係想同佢一齊。
然而，我唔可以咁自私，突然放開呀逸，又係瞞住魏天培既狀態下俾佢知到我對佢既感覺。所以，要正視我對魏天培既好感，首先就係要對佢坦白。 

「個個檔案，係閉路電視影到我同周銘逸一齊係影印房行出黎既片。」

「我跟住落黎講既野……可能好唔合邏輯.，你可能唔會信，聽完仲可能會好憎我……但我都一定要講……」
講到「可能會好憎我」既時候，我一陣鼻酸，一度以為已經流乾既眼淚，又一行行唔受控制咁流落黎。



我真係……好唔想魏天培憎我…… 

魏天培望住我，個樣有D擔心又有D困惑，似乎係因為唔知我到底講緊D咩。

「我同周銘逸，曾經試過係影印房做D越軌既行為……雖然冇做到最後一步，但一開始做主動既人係我……」

佢開始咬住唇唔望我，我知佢係控制緊自己情緒。

「個陣我對佢有好感，所以我咁樣做左……」

佢一直唔出聲。

我好驚……好驚佢會好嬲，好驚佢會憎我，好驚佢以後唔再理我……
一咁樣諗，D眼淚就加倍咁滴落。



「咁，點解妳而家要話我知。」佢開口。
「因為……我覺得自己同呀逸做過呢D野，就應該好好對待自己呢份感情。於是，到我對你有好感既時候，我都同自己講我鍾意既應該要係呀逸……」

魏天培聽到我講對佢有好感既時候，個頭郁左一郁，好似想望我，但當我講埋下一句，佢就好似決定唔望咁，感覺佢有D焦躁。

「不過慢慢，我知道我要認清自己個心，要知道我對你既感情到底係點，唔可以呃自己，如果唔係對我、呀逸、同你都冇好處。然而我清楚，令我逃避對你既感情既原因，就係我瞞住左你呢件事……所以……我講完喇……

你……你可唔可以……唔好討厭我……」
我哽咽住，講出黎既野都變得破碎。 

我見到佢終於望番我，但係即使我既視線直望向佢，即使我同佢距離好近，我既眼淚都令到我眼中既佢模糊不清。

 佢冇作任何回答，輕輕將我抱住。



呢個行為已經係一個清晰既回答：佢唔會討厭我。

知道答案而放心既我，只係喊得更犀利，哩係佢心口係咁喊。

「妳講得好清楚，點解妳要而家解釋呢件事俾我聽啦。」

我唔明佢講咩，抬頭望一望佢。

「以前既事就係以前既事，而家同以後唔會再發生就得啦……妳話妳解釋，係因為要面對……妳對我……既感覺嘛……」佢望向遠處，口窒窒咁。
「咁咪面對下囉。」佢故作輕鬆咁講。 

我笑一笑，點一點頭。  





到我情緒平伏番，佢就送左我番屋企。

俾著平時，我一定希望番屋企條路可以長D。但今日，我對眼又紅又腫，個腦又亂，只想可以快D番去休息下。 

「我……番去喇。」
「嗯，再見。」
「再見。」 

我地好簡單咁道別，
但心入面，
好似多左一D野。