(青春極少甜)原來曖昧真係最好既階段: 15-表白

番到屋企，我沖完涼就趴落床。我決定俾時間自己諗清楚自己係鍾意邊個，唔再勉強自己。 

Whatsapp傳黎好多未讀信息，大部份係黎自我同Tina佢地個group，佢地好擔心我，係咁安慰我。同埋話我知o岩o岩咁多人聚集令老師過左黎。知道發生咩事之後，呀魚佢地已經得到應有既處分。
另外有D就係一D平時野都唔會同我講句，但突然關心我，問我今日發生咩事既同學。

而有幾個，係呀逸send俾我。

呀逸：魏天培帶左妳去邊？
呀逸：妳有冇事？
呀逸：我去搵妳



呢三句之後，呀逸就冇再講過野。
佢唔係仲搵緊我呀嘛？！

我：我番到屋企喇 好安全

五分鐘後，佢覆我：安全就好

正當我又打算讚嘆佢對我既關心，怕我有事而親身去搵我呢個行為既時候，我回想起，Kiki話我將毛巾一條俾佢一條俾魏天培之後，佢望住我個個不解既表情。



當時佢真係冇幫我解釋到毛巾唔係我俾佢，
但係我又何嘗唔係冇同佢講到，

毛巾係因為魏天培而買。



「早晨。」
「油淇早晨。」
「早晨呀。」


我既心情開朗番好多，一入到班房就同大家打招呼。

「早晨呀逸。」經過呀逸個位，我都同佢打左聲招呼。
「……嗯。」
佢應得好求其，我好疑惑咁繼續行番自己位到坐。

點解平時咁有禮貌既呀逸會唔出聲？

小息既時候，我見呀逸去左圖書館，我就跟左過去。

佢慢慢咁行，係書架前面搵書。我就係佢既對面，望住書架空隙之間佢既身影，跟住佢行。
行到盡頭，再冇書架既阻擋，我地面對面。
佢呆一呆，然後繼續前行。 
我都呆左。 
點解……佢唔理我？



 我追上去。

「呀逸……」

佢停低，但眼神依舊係望住D書既方向。

「呀逸，係咪我做錯D咩……你做咩好似……唔理我咁既……」

呀逸本身放係其中一本書上面既手放左落黎。
「妳冇做錯任何野，做錯既係我。」
我唔明佢咩意思，冇出聲，等佢繼續講落去。

「我個日冇講到事實出黎，對唔住。」佢低頭。
「唔緊要……你唔知……所以先拎左條毛巾……聽到個陣，你應該都反應唔切。」我不自覺避開魏天培個名。


「但我想妳知，我唔係幫佢地唔幫妳，而係……即使佢地講D難聽說話，我地都唔應該同佢地一樣把口咁衰，妳明唔明……」
「嗯，我知，我冇怪過你。」佢點頭。
「咁……點解你唔理我？就係因為呢件事內疚？」我問。
佢抿唇，吸左一口氣。


「因為我鍾意妳。」
「但係我覺得，妳鍾意個個好似唔係我。」


我個心用力咁震左一下。
俾人當面表白既感覺真係好震撼，尤其係個個人係自己一直以黎既男神。

「所以我唔想打擾妳。」佢依然低住頭。



「其實，我未搞清楚自己係點諗……我需要時間。」我都係時候講清楚。
「……好，我俾時間妳，諗清楚。係妳清楚答案之前，我會等。」佢講完之後，笑左一笑就離開左圖書館。


我個心，就變得越黎越焦急。