《易容師》: 第四章-神秘詩句
「嘔呀......」忍唔著，實在忍唔著要嘔！
嘔到失足仆地，控制唔住......繼續嘔，一路嘔，一路咁退。退到撞埋門邊，
遠方才眼前的怪物。
「仆街......嗚嘔！咩撚野黎架！嘔......」
原先以為自己嘔到冇野好嘔，因為岩先係教授個到，我可以嘔既都嘔哂。
估唔到依家，真係連黃膽水都嘔撚埋出黎！
劉SIR走埋黎，禁著個口：「依家你見到既，就係三個月前失蹤既少女，
程小芳。」
玻璃窗內，繼續不斷傳出「碰碰碰」的撞擊聲。
「咁關我撚事咩！屌你，你係咪傻架！比我睇埋Ｄ X-file！」
「o靚仔，我話你知，你依家見到既都算好。起初我地警方搵到佢個陣，
比依家更加恐怖千萬倍！」
「你大個呀！」我抹乾口角Ｄ黃膽水，但始終唔敢企起身。因為我真係好
怕，再見到個先個隻野......
「大概三日前，我地警方接報，懷疑市區附近出現野豬。警方同漁農處接
報到場，係凌晨二點五十三分，公路對出十公里內既叢林發現到程小芳。而當
時既程小芳......嘴巴兩邊已被剪開，並且身穿黑色皮革，四肢全冇。有既係四
把五呎七吋長既卜刀，分別安插係佢四個被截肢既位到。令佢係黑夜爬行起來
個陣，好似有四隻腳既野生動物一樣。」
屌你老尾！
「咪叫你咪再講囉！我唔想再聽有關呢隻怪物既野呀！屌.....」
我仲未講完，臉上已經感覺食左腳重野，比人踢到鼻孔盛下既黃膽水都飛
埋出黎。
「死o靚仔你同我聽住！」劉SIR一手揪起左我：「係你話過我知，你夢
到一個著皮革既短髮女仔。同時入面個個，唔係咩野怪物，個女仔曾經都係一
個人！佢都唔想架！仆街！！！！」
說完，佢一手甩底左我。我撞落門上，驚動到門外既職員，其中一個馬上
衝入黎問咩事。
「無事，Ｄ仆街o靚仔發癲姐！」
劉SIR講完呢句野，懲教職員都無講咩。成個氣氛急速變冷，再無人點講
野，只係聽到玻璃窗既另一面，繼續有野係到不斷撞擊。直至......
「呃......劉SIR，如果無咩，我唔阻你同證人傾計啦！」
「花中空......之鏡月......」
正當該名職員轉身離開個陣，玻璃窗入面，無再傳出撞擊聲。
反之傳出斷斷續續既字句：「水城裡......花中空......之鏡月......水城裡......花
中空......之鏡月......水城裡......花中空......之鏡月......水城裡......花中空......之鏡
月......水城裡......花中空......」
然後，整間黑房，聽到既除左斷句，就係人類急於既呼吸聲，以及腳震震
到槍械既聲。
大家都好似比冰凍左一樣，唔敢郁，就連頭先怒氣衝天既劉SIR，此刻都
雙眼瞪大，呆板咁望著玻璃窗個邊。
「點......點解會咁架？」
我都唔知咩事，劉SIR忽然係咁自言自語。
「咁多日黎，佢除左叫之外，都無講過任何一句野.....」
唔好話佢無啦啦識講野，我自己第一次聽，都嚇到唔敢再郁。好似，好驚入
面隻野，讀緊Ｄ咩口訣法術，讀完隨時搵人開刀。
接著，程小芳愈讀愈大聲！
水城裡......花中空......之鏡月......水城裡......花中空......
之鏡月......水城裡......花中空......之鏡月！！！！
跟手，無啦啦又尖叫左一下：
「我讀左啦！唔好再打我！唔好殺我妹呀！！！！依呀呀！！！！！！！」
再回覆到頭先見面個陣，發左癲邊叫邊四圍亂撞。
呀！！！！！！！！！！！！！！！！！！
屌你！太恐怖啦！！！！
我實在忍受唔著，我爬左起身，推開左個職員，向著走廊既另一邊跑去！
房入面既撞擊聲，尖叫聲繼續唔停係我耳邊徘徊。
我好驚，真係好驚程小芳會衝出黎，好似夢中既熊教授，或許人形蜈蚣咁
食左我呀！
話我知，呢個又係咪個夢境？求求你，比我醒呀！！！！
唔知咩原因，可以跑得太急太亂黎，跑左陣我已經攰到停左係到。
「屌你老母！你呃我！你老母根本唔係到！」
咁岩得咁橋，我停左係頭先個痴線佬間房門前，佢又發左癲咁衝埋黎，伸
出手想媽叉我咁！
屌！但論恐怖，呢個痴線佬根本唔恐怖得過頭先個程小芳。
本能下發洩，我一拳轟左落鐵門到，怒視個痴線佬，示意佢咪撚再搞我！
點知......
「對唔著......對唔著呀！唔好殺我！大哥，救下你，唔好殺我呀！！！！」
個痴線佬真係痴線，忽然又驚返我轉頭，坐低係係地上，係咁抓著牆邊瘋
狂大叫救命。
「先生，先生！」同時，其中一名職員追到上黎：「你跌左眼鏡呀.....」
「唔好意思，唔該哂。」我戴返眼鏡，望返個位職員，見到佢滿頭冷汗，
我諗佢可能同我一樣，根本未驚夠。
(to be continued...)