《易容師》: 第十四章-教授越獄

　　2015年5月8日，晚上6點24分。新界區，屯門某影樓。
 
　　「OK，今日係咁多先。阿震，你執埋野收工先啦！」
　　距離熊教授禁錮案完結後，我回復返我過往既正常生活，繼續做我既見習
攝影師。
 
　　你地可能會問，真係可以返到正常生活？
　　緊係唔係啦！
 
　　裸女蜈蚣，人形爬爬仲未捉到。搞到我每日都同老闆請求早Ｄ收工，逼多


人既地鐵返屋企。
　　然而，三日前劉SIR都搵過我，話我知有關Wendy既事。
　　Wendy係熊教授被捕既同一日，又離奇失蹤。我亦冇再去過大學，所有事
情都係我個大學同學，少少咁樣透露比我知。
　　「o靚仔，我查到你想知道個個人既有關資料。Wendy，全名況倩宜。ＸＸ
大學就讀心理學科，教授正正又係熊德倫。另外，佢係大學女子足球隊隊長，
除左足球之外，佢擅長多項運動競技。例如：長跑、柔道、空手道等等......」
 
　　「劉SIR呀劉SIR，呢Ｄ我都大概清楚，我想......知道有關案情既野。」
　　「好既，明白。咁......你應該都知，況倩宜係教授被捕個日，佢都開始失蹤


左。但我地警方認為，佢唔會係供犯。雖則，佢返學同參加足球隊既時間，同
教授空閒時間係配合。但係，我地係教授沙田同元朗既住戶入面，除左程小芳
衣物纖維同DNA之外，只係發現到唔屬於況倩宜既第三者DNA。而況倩宜同
之前案件失蹤既少女相反，留有長頭髮。暫時認為況倩宜既失蹤，只不過係時
間上既巧合。」
　　「咁個第三者係邊個？」又冇消息，唯有問下其他當傾下計啦！
　　「該名DNA經化驗證實，同程小芳有親屬關係。唔排除係......同樣失蹤多
個月，程小芳親細妹，程小蘭。同樣，係五日前你被怪物追捕既地方，其中一
組DNA吻合。所以，我地警方都一致認為，程小蘭同樣已遭熊教授毒手，改造
成一隻人唔似人，鬼唔似鬼既怪物。」


 
　　我唔想知！我只想知你地究竟諗到方法捉佢未？
　　同埋，我依家只係在乎Wendy既事炸！
 
　　「最後，o靚仔，劉SIR我想同你講......況倩宜既野，你都係唔好再查啦。」
　　「點解呀？你係咪知道Ｄ咩？講呀！」
　　「唉！我地警方上到況倩宜屋企搜索個陣，無意中係佢電腦發現左幾段，
有關佢既色情片段。內容我唔點講啦！不過經我地分析，片中男子雖然唔係熊
德倫教授，但......」
　　「得！唔洗再講！」我截停左劉SIR講既野，因為我知道......我夢境既野又
一一現實。
　　呢一刻，我完全明白「三萬蚊，過夜呀！你條女，係雞呀！」當時杰倫個
心情。
 
　　點解，真相，往往都係咁殘酷！！！！


 
　　2015年5月8日，晚上7點18分。西鐵站附近既馬路。
 
　　我岩落電梯，眼前就見到一架熟悉既GTR。
　　我冇理會，直行直過。
 
　　「喂！o靚仔！做咩幾日都唔接我電話？喂！叫你企係到呀！」
　　「劉SIR，案件都完左啦，仲搵我做咩啵！」
　　「Sorry，我知道況倩......個女仔件事，對你好大影響。不過，依家有件事
真係好需要你幫幫手。」
　　劉SIR捉到我手實一實，睇黎真係又有十萬火急既事。
　　「做咩？快Ｄ講，我唔想夜晚晚返去，又比隻怪物追捕。」
　　「熊德倫教授，向我地警方要求要見你。」咩話？點解要見我呀？
 
　　「我知你諗緊咩，教授到依家都冇認罪。就係今日，佢忽然要求見我地警


方既人，要我地帶你去搵佢。佢話只要你去搵佢，真相就會解開。所以，在公
在私，我都好想你去幫下手。」
　　「明白。」我點點頭，猶豫左陣：「去都得，但你要確保我安全。」
　　「放心啦！揸車送你返黎，送到上屋企。再唔係，夜既去埋我到訓囉！」
　　就係咁，我答應左劉SIR，再次一同前往小欖。
 
　　2015年5月8日，晚上8點04分。新界屯門，小欖精神病治療中心內。
 
　　見面室到，我同熊教授相隔只係一張枱。
　　而熊教授雙手被鎖上手扣，望到我個陣，神精就呆滯變到極之亢奮。
 
　　「你終於黎啦！太好啦！太好啦！哈哈哈哈！」
　　「喂！犯人冷靜Ｄ！」熊教授死命咁捉著我雙手，我係一邊叫佢冷靜Ｄ，
一邊係咁掙扎。當然，劉SIR同獄警都即時幫禁住佢啦！
 


　　「Fuck off！！」下一秒，熊教授竟然搶左劉SIR支槍！推跌埋劉SIR，撞
向獄警到！
　　就係個一個混亂既時刻，熊教授企左起身，用槍指住我個頭：「全部人咪亂
黎！你敢亂第一次打死個o靚仔先！」
　　你地可能會問，其他獄警見咁既情況，點解唔偷偷地砰佢一槍救左我先？
　　Too simple！熊教授依家仲可以要乜有乜，就係佢口中仲有機會搵到其他失
蹤少女既線索呀！
 
　　仆街！一切都黎得太快啦！
　　我根本都反應唔切！！！！

　　　　　　　　　　　　　　　　　　　　　　　　　　　(to be continued...)