《易容師 II 模仿犯》: 第三章-倒行逆施

 
　　霍霍霍霍霍霍霍霍霍......
 
　　光影交錯下，一門之隔，成個恐怖大頭呈現眼前。
　　加上風扇扇葉聲，不平均擺動產生既怪聲，不停徘徊耳邊，令我好似身處
係3D電影院睇鬼片一樣。
　　睇著汪震雙眼掹大到就突出嚟，一大片眼白包著豆豉咁大既瞳孔。我除左
驚，真係唔知點反應。
 
　　「喂！」一聲大叫，將我拉返現實：「犯人70243，馬上跪低！」三名獄警




衝前將汪震按低，只係汪震雙眼仲凝視著本書。
　　「劉SIR，你地冇事嗎？」
　　「冇......冇事。」成個過程，根本不足兩秒。但呢兩秒足已令我出哂冷汗，
全身心跳血脈都瞬間停頓咁。
 
　　「你冇野嗎？」我轉身扶起陳仔。
　　「頭先......嚇撚死我啦。」陳仔抓實手上既缺頁，低著頭急急腳咁走。
　　我呼左口氣，今次頭也不回，跟著陳仔身後離開。
 
　　唔講出口，唔代表真係唔怕。




　　當下咬緊牙關既我，同陳仔一樣，好怕一轉身，汪震又忽然呈現眼前。
　　個種好似一直係你身後，吊實你、逼到你處於極度恐慌既階段，我真係唔
想再經歷多次。
 
　　出到小欖大門，我仲係驚魂未定。
　　「天哥......天哥！」
　　「咩事？」陳仔係我耳邊大左幾聲，我先醒過嚟。
　　「老頂岩先CALL左我地好幾次呀。」陳仔將電話拎到我面前，比我睇熒
幕顯示著「未接電話(7)-上司 李Sir」。
　　我即刻打開自己電話，都有十個未接電話，其實八個都李SIR打嚟。另外




兩個，就係Fish。
 
　　「你拿拿聲打比老頂，我依家去拎車。」
 
　　返到車上，我望到接完電話既陳仔一臉迷茫，就好奇問佢：
　　「做咩？老頂又亂咁屌人呀？」
　　「唔係呀......老頂好慌張咁問我地係邊。又叫我地唔洗返差館，直接去失蹤
者李秀麗既宿舍附近啵。」
　　咁奇怪？唔理啦，照去馬。
 
　　「喂？你搵我有事？」前往醫院既途中，我用藍牙Call返Fish。
　　「冇呀，睇你有冇睇我比你既Whatsapp炸嘛～」
　　「姐姐呀，我做緊野呀......下次冇咩緊要野，唔好打黎......」我無氣咁講。
　　「咁人地放假，自己一個悶嘛！」死啦，佢又嬲，要講Ｄ咩哄佢先岩？
 




　　「得啦，你做你野啦。唔煩你啦.....」電話中，聽得出Fish好失望。
　　於是我係紅燈位之前，我拿林打開手機，查睇返Whatsapp，睇下佢Seed
左Ｄ咩比我。
 
　　「喂，陳仔你睇下隻Dog幾戇鳩！」
　　原來分別係一條Youtube搞笑短片，同一條高登惡搞POST。
　　「哈哈哈！好痴線啵天哥！邊到搵嚟？你唔似會睇Ｄ咁搞笑既野啵！」
　　哈，衰妹又幾鬼馬！
 


　　2015年10月13日，早上10點34分。屯門醫院，職員宿舍A座。
 
　　係帶著內疚既歡樂心情，我同陳仔泊好左車之後，終於嚟到醫院宿舍A
座。




　　睇到四周都比我地警方用膠帶封鎖出入通道，以及草叢附近既範圍。
　　「伙計。」我同陳仔出示左警員證，唔太相熟既伙計先放我地入去。
　　「阿天，咁遲架？」岩穿過警戒線，李SIR就衝埋嚟叫著我。
　　「搞咩飛機，幾組既人都係度既？」我四周環視，望到岩先既伙計，同周
圍既人都係同區既重案分隊。
 
　　「你同陳仔，跟我過嚟。」李SIR拉著我，陳仔隨後跟上。
　　我地三個人去到警戒線外，一部設有視頻既警車入面。
　　李SIR拍拍入面一個伙計，叫佢放條片出嚟。個位伙計聽到之後，成個呆
左係度：「吓？李SIR......真係又要播呀？」
　　「係呀！」李SIR個樣先係唔耐煩，然後成個人沉左，好唔情願咁講：「我
叫你播就播啦......」
　　我同陳仔兩個互望，硬係覺得有Ｄ唔對路。
　　但醒目既我地，都無點出聲，只有李SIR自己講：「你地自己睇下......就明
白咩架啦。」




 
　　從影像既角度環境，望到既正正係通往醫院宿舍A座一條小路。
　　光線偏暗，有D少雀仔叫聲。再睇睇右上方，寫住時間係：
　　「11/10/2015」及「05:46AM」。
 
　　片段既一開始，05:46既十秒後，一個短髮女子從熒幕既左下角走出嚟，向
著宿舍方向走......


　　一步、兩步、三步......


　　六步、七步、八步......






　　一直相安無事，直到佢走到右上方。

 
　　呀！

 
　　就係個名女人快走出CCTV既範圍時候，一聲尖叫，個女人忽然跌入左草
叢去！
　　接著，成個畫面，就連草叢都無任何動靜。
　　「完左？」陳仔細細聲問，我只係搖搖頭表示。


 
　　依呀──
 


　　又一聲尖叫，熒幕好似比Ｄ咩野撞到咁，勁力咁震盪左下，成個CCTV只
得成雪花睇。
　　「咩事呀？」我同陳仔一面無奈，望著一直背著熒幕既李SIR。
　　「開......開慢鏡比佢地睇。」李SIR依舊冇轉返個頭嚟，揚下手叫個位伙計
做野。
 
　　CCTV再次重播，時間返到早上5點46分12秒。
　　伙計幫我地較慢左四倍，等左成半分鐘，終於睇到個女人走到去熒幕既右
上方.....
　　「呀！！！！」同樣一聲既尖叫，無疑係該名女子發出。但同時間，我地
可以隱約睇到，原來係右上方一團黑影撲出嚟，將名女人推入左草叢！
　　「咁既！？」陳仔好驚訝咁望著我，我「噓」左聲，叫佢專心Ｄ。
　　不過，唔知係因為較得太慢，抑或係岩先比團黑影阻礙到。接下嚟，明明
可以預計到既一幕，竟然令我開始緊張到吞口水.....
 
　　5點46分20秒。
 
　　依......
　　叫聲既開頭嚟了！熒幕入面既草叢郁左下。
 


　　依......
　　草叢入面見到一雙好似人既眼睛，令我諗起呢陣叫聲好似好熟悉。


 
　　呀──
　　一雙眼！就好似岩先監倉汪震既一雙眼白包著豆大既瞳孔.....
　　瞬間呈現熒幕！
 
　　「哇屌！」陳仔嚇到退後，撞到後邊設備。
　　可能你地會話，有無咁誇？岩岩先比汪震嚇完嚟。
　　問題係，呢雙眼唔單只係活生生，仲係倒轉。
　　我既意思係，呢個「人」既頭上下倒轉，撲埋熒幕。
 
　　點解我會知道？就係影片完既一刻，睇到雙眼既同時......
　　一把兩邊被剪開既大嘴巴，竟然出現係雙眼睛既上方！
 
　　　　　　　　　　　　　　　　　　　　　　　　　　　(to be continued...)