《易容師 II 模仿犯》: 第四章-故事重演

　　睇完個段片後，車廂內我包括我，四個人冇一個出聲。甚至，就連作出下
一步既反應都冇......
 
　　李SIR依舊頭都冇轉過黎，橋著雙手，手指係咁抓著手肘。
　　播片既伙計擰埋一面，咬緊牙關同時瞇埋眼，避開唔直望熒幕。
　　陳仔繼續坐係地上，雙腳除左不斷咁震，就好似冇諗過企返起身。
　　而我，成個頭都冇點扭擰，只係郁動眼珠，環視以上情況。
 
　　大家好似好驚，怕一有Ｄ咩大動作，「裂口怪物」會從熒幕內衝出黎咁。
 




　　「熄.....左去。」李SIR強行保持鎮定咁講，個伙計先急忙關左段片去。
　　我扶返起陳仔，李SIR同時繼續講：「你地依家知道發生咩事啦？」
　　陳仔唔敢講，親身經歷過既我更加唔敢講。
 
　　應該話，唔敢想事件再次發生──


 
　　「易容師一案，仲未結束啊！」






 
　　李SIR講完呢句，佢表情變成緊加沉重。
　　我知，大家都知......最唔想既恐怖事件再一次呈現眼前，試問一時三刻邊個
接受得到？
　　就咁呢到一段片，已經有兩個受害者，然而試諗下背後又有幾多個同樣既
無辜人士？
 
　　你老尾......正仆街！
 




　　「屌你老尾......」隨著李SIR講出在場人心聲後，我同陳仔落埋車做野。
　　經過左一日既搜索，我順道了解左上頭點處理呢單案件。
 
　　同汪震一案大同小異，一樣只係由我地屯門區重案區伙計負責。就連個段
恐怖短片，都只係比曾經參與過汪震一案既伙計睇過。成段片以重要證物及防
止外洩理由，強行原片帶走。
　　上頭更交帶，絕對唔可以洩露案件當中所有「細節」出去。若果有記者追
問，一律以「懷疑失蹤人口事件」處理。
 


　　2015年10月14日，中午12點48分。屯門醫院，醫院飯堂。
 
　　「裂口怪物」出現後既一日，我約左負責帶何秀麗實習既外科醫生Dr.Chan
係醫院既飯堂食飯。




　　「以我所知何同學應該就無同人結怨，而佢日常生活都好正常......無話咩特
別既癖好個Ｄ。」
　　眼前年約四十歲，著住白袍，短髮戴眼鏡既，正正就係Dr.Chan。一個比人眼
前一亮，感覺係專業、正經、斯文既成熟男人。
 
　　同佢交談期間，有唔少醫生護士同佢打招呼，佢亦禮貌微笑回應。
　　年輕有為，又似德高望重，比我一種奇異既熟悉感。
　　「係啦，Dr.Chan呀，你知唔知人有冇可能扭曲哂手腳，依舊可以活動自如
架？」由於，何秀麗單案要當作普通失蹤人口去查，基本上我都以一個閒談方
式去嘗試了解。
　　更甚，眼前係一個專業醫生，我都想藉以對方既知識，查探一下有關「製
造怪物」一事。
　　「呃，點解咁問？」本想飲啖咖啡既Dr.Chan，一聽到我既問題就停止左手
上動作。
　　「冇，純粹好奇！」我都飲左啖奶茶。




　　「哈哈，劉SIR你既問題都幾得意。呢種做法，唔係冇可能。但係都要睇
返你點界定『活動自如』啦！」
　　「哦......」我冇再追問落去，因為我感覺到對方唔太想討論呢個話題。
　　或者，我真係將個話題帶得太遠啦！
 
　　之後我同佢再了解返外科實習既問題，比如：時間制定、實習人數、實習
名單等等。
　　不過都係冇咩特別有用既線索，反而最有用既係我一個奇怪問題既答案。
　　未夠半個鐘，我見Dr.Chan不時望手錶，我估佢應該仲有野做，就主動同
佢講有野做走先。
　　就係我企起身，轉身準備離開個陣，唔小心撞到一個男仔。
　　「喂，小心。」Dr.Chan對著個男仔講。而個男仔抱實部相機，苦笑咁同我
講SORRY，就坐低係Dr.Chan對面。
 






　　2015年10月14日，下午5點17分。屯門醫院，職員宿舍附近的停車場。
 
　　話說今日係搜證既第二日，我已經感覺好頭痛，全身冇力。
　　工作左成半日，問左最後見過何秀麗既Dr.Chan，又再同Ｄ伙計周圍搜查多
半日，依然毫無進展......
 
　　感覺，就好似當日去到大學查「易容師」一案咁。
　　無助，又無奈。
 
　　我背靠車門，點起支煙，煙霧迷漫之中再次回想何秀麗事。
　　我總係覺得，成件事既中間，好似缺少左一Ｄ野......
 
　　「痴線！」忽然一句鬧人既說話，將我從迷離既思索抽回現實。
　　「依家短髮既女仔，係咪都咁犯賤架？」一句，似曾相識既說話。




 
　　由一個戴著眼鏡，手執相機既男仔講出口。
　　而呢個o靚仔，正正就係岩先中午，我同Dr.Chan道別個時遇到既一個。
 
　　一切，又好似當日去到大學查「易容師」一案咁......
　　驚愕，又驚嚇。
 
　　唔同既係，我腦海竟然播起一段歌詞：
　　快到終點 才能知道 又再回到起點 從頭上路......
 
　　　　　　　　　　　　　　　　　　　　　　　　　　　(to be continued...)