《讓我重新遇見你》·緣圓系列·: 第八章 幸運

［第八章］ 幸運

每日放學搵啊婷已成為我生活既一部分，
黎緊就係統測啦。

唉。
咪又係炒。

「放學得唔撚得？我要搵啊婷，我要返屋企！吼！」我個心諗。
「統測唔過60分同我星期六日返黎補課！」古sir講。


哦…容易…乜鳩話?!
「統測唔過60分同我星期六日返黎補課！」
「統測唔過60分同我星期六日返黎補課！」
「統測唔過60分同我星期六日返黎補課！」
呢句響我個腦到Load左幾次

「癡線架!」我坐響圖書館冇啦啦大叫。
事關我個腦響到諗緊統測。
「同學，靜啦。」圖書館既黑面女皇指住我黎講。
「陸同學，門口都聽到你把聲啦。」一把甜既聲音傳入我既耳仔。


「啊婷大人，救我呀。」我用哭腔黎講。
「咩事呀？」我望住佢既側臉，
我竟然有衝動想錫落去。

之後我就將來龍去脈講曬俾啊婷聽。

「好啦，我幫你溫。但你要俾心機喎。」佢側一側頭望住我。
雙眼閃下閃下非常吸引。
「有啊婷大人，小臣子會十分認真。」我抬一抬副眼鏡。



終於考完啦，我個腦真係咁大個仔都未試過放咁多野。
等我打電話問下啊婷之前講既條件係咩先。
我成日都覺得打電話仲方便過whatsapp。
第一次打俾佢好緊張呀。

「嘟…喂?」嘩，咁快聽電話既。
我連講咩都未諗過。
「喂喂喂…係咪鍾凱婷？」聽到佢把聲個心都即刻跳快左拍。
「係呀傻仔。」佢噗哧一笑。
傻仔…
「小臣子考完科舉啦。」我搞笑咁講。
「話你傻仔真係冇錯。做咩呀？」佢笑住咁講。
「你之前話有條件，咁個條件係咩？」
「哦！係呀，我爸爸間咖啡店響屯門開左分店，但人手又唔夠…」佢把聲好難堪。
「得!一定幫手!」啊婷叫到唔通唔幫咩?


「好啦!咁我send資料俾你啦。我有野做緊唔同你傾住啦。」聽到佢果面好嘈﹐
不斷有雜音。

早放又冇人同我打機，
返自己地球轉個圈先。

經過30分鐘既漫長車程。
我終於返到屯門。
餓餓地。
去前面間野食下先。

去到果間野排隊。
排左二十分鐘！
足足二十分鐘。
做野有冇咁慢？



已經餓餓地﹐
仲要我等咁耐﹐
真係嬲嬲地。
「檸檬蛋白派。朱古力蛋糕拎走。」我極躁底咁講。
「肥死你呀。」我屌呀，咩服務態度？
「關你能…啊婷？」正當我想講粗口鬧人既時候，我抬頭竟然俾我見到著住制服既啊婷。
仆街！佢唔會聽到我想講粗口架？

同埋，導演！
幫我cut返走果句「做野有冇咁慢？」！

我上下掃視﹐
隻眼停留左響佢既腳到，
條裙太短啦！


再望下客人，個個都麻甩佬黎既。
班人見我到睥過去，即刻扮望第二到。
但又要偷偷地睇。
你班仆街。唔洗扮啦。我見到曬。
唔可以再俾佢地望架啦。
於是我除左自己件褸圍住佢條腰果個位「凍呀。」
「唔該…我星期一還返俾你…」佢應該意識到咩事，
所以塊面到紅到好似蘋果咁。
超得意！
我當堂冇咁躁底，仲會心微笑左下。

我攞曬食物。
坐底食左一啖檸檬蛋白派，
個心情即刻好返曬。
食甜野係開心既。



呢個時候啊婷左過黎。
「好冇味呀？」佢坐左響我對面。
我好認真咁試「好似有少少甜。」
定係我望住佢食特別甜呢？
「好啦。等我改善下先。」佢抬住頭望住我。
「你改？」我有點兒驚訝。
「係呀，呢到既甜品有一部分我整架。」佢眨一眨眼。
「呢間係…？呀！」我突然醒起
「係呀。我爸爸間店呀。」佢笑我個反應
「啫係我遲下會響到返工啦。啫係你會到關照我啦～」我食完成個檸檬蛋白派
「無錯。我返去做野先啦。再傾啦我地。」之後佢就走左。
坐多陣扮欣賞果到既設計。
查實係望多佢幾眼。

本來以為要考多日生物，
所以會見唔到啊婷。
但最後都俾我撞到佢，
唔通真係緣份？
嘻嘻。
不枉我浪費時間黎呢到。

今日真係我既Lucky day…嗄？竟然俾我見到…