《讓我重新遇見你》·緣圓系列·: 第二十四章 前夕

第二十四章 前夕

我見到個電話號碼我就Cut左線。
個電話係陸矛琪打俾我。
我唔想再聽佢任何電話。
我唔想同啊婷再有咩誤會啦。

呢排啊雄夜晚都叫我出去打波。
無計啦﹐
佢同我一樣住屯門。


如果我唔出佢一定踩上門搵我。
所以我都唔知話好定唔好。

呢晚我就冇出黎。
因為我約啊婷既日子終於到左！
我驚佢唔記得﹐
就前一晚就提佢﹐
可能你會話﹐
唔記得咪下次囉。



但你估流星雨咁易有得睇架咩。
要擇日架。

所以平時對放飛機呢家野冇乜所謂既我﹐
就算點都要叫要啊婷出黎。

果日我晨早就起左身﹐
其實都唔早架啦…
十二點左右啦。
約左啊婷兩點﹐


我諗夠時間執下個人既。

今次真係真係唔可以好似第一次咁趕頭趕命﹐
眼屎都未抹乾淨就出門口。
沖個涼﹐吹返好個頭。
揀左件恤衫﹐
同啊婷既果件情侶褸。
牛仔褲﹐
一對著左幾次都冇既波鞋。
無辦法啦﹐
對鞋真係太型啦﹐
我唔想整污糟。

著完對鞋﹐
再執理啲星圖﹐紅光電筒﹐地蓆﹐


仲要帶多件褸。
呀！相機﹐三腳架﹐應該齊。
好似斜揹袋型啲。
就斜揹袋啦﹐
放曬啲野入去﹐啱啱好。
抹乾淨副眼鏡。
出門口接啊婷先。

嘩﹐型真係有代價架。
個袋真係好乸重。
好彩輕鐵入面有位坐啫﹐
我唔係同啲啊婆搶位﹐
我只係唔想浪費資源啫。

我都係講下笑啫﹐


又唔洗真係俾個啊婆我既。
算啦﹐我讓。

我去到啊婷屋企。
見到佢響到著緊褸。
嘻嘻﹐真係情侶褸。

「肥添﹐你今晚可以去到幾夜呀？」佢繞住我手臂。
同我並肩坐響梳化。
「幾夜都得。屋企呢幾日都冇人。」查實我啊媽同老竇過左大海。
仲話間屋俾我任玩唔嬲﹐
返黎自然打俾我﹐
俾時間我收拾殘局咁話喎。

佢地對我真係好呀。



啊婷響房到攞左個書包﹐
仲放左兩件衫入去。
「你做咩帶衫？」我坐響梳化問佢。
「去你屋企過夜呀。」佢行返出黎同我講﹐
見到佢隻耳朵開始泛紅。
「好地地去我屋企？」唔係話唔歡迎...
只係成件事好似有啲離奇咁...
「爸爸媽媽去左二人世界﹐佢地話唔想我發生咩事但又冇人知。所以叫我搵人去過夜…咁我咪搵你囉。」佢又行返入房。
咁開放？
「佢地知你搵我架啦？」都係問清楚啲好。
「佢地最信得過你呀。」佢放左啲日用品入書包。
咁睇得起我？
雖然我對啊婷都唔會做得啲咩。
「你唔係唔歡迎呀？」佢補充多句。


「住幾耐都得啦！」呢句係真心話黎。
「口花花。」佢笑得好甜咁望住我。
佢話咁快就執曬啲野。
我就同佢出門口食個午餐。

同佢去左最近既茶餐廳﹐
叫左碗沙嗲牛肉米﹐
諗諗下坐入北潭涌都要幾耐﹐
入到去都餓啦。
所以就外賣左兩個魚柳包。
再去多個7仔買野飲。

咩都搞掂曬就拖住佢去搭車「其實我地今日去邊呀？」我一直都冇同佢講去邊。
「北潭涌囉。」今日啲風就有啲大﹐
我拉住佢隻手放響自己衫袋入面。
「去咁遠？有古惑。」佢望下我
「一陣你咪知囉。」我向佢挑一挑眉﹐
畫面十分令人葡萄。

坐車果陣都係我坐出佢坐入﹐
雖然呢啲係好細微既動作﹐
但男人響呢啲位先加分呀。

學野啦咁多位男士。

搖下搖下終於去到北潭涌。
好彩我同啊婷都唔係啲會暈車浪既人啫。
如果唔係真係唔知去邊到嘔好。

我同佢周圍行﹐
搵到一個唔錯既位。
放好張蓆就同佢輪流去廁所。
當然佢去先啦。
當我都去完返去既時候﹐
就見到啊婷攞左本畫簿出黎好專注咁畫畫﹐
連我返左黎都唔知。
「畫得好靚喎。」我呢啲唔識視藝既人﹐
只係識分靚同唔靚。
「你終於返黎啦！你坐低俾我畫！」佢坐響地下拉住我隻手。
「坐響到就得？」我指住自己。
「係呀。」佢將本畫簿揭去另一頁。

我坐左幾分鐘我就忍唔住同佢傾計。
「肥婷。你畫畫好叻架？」咩問題呀？
啊婷修視藝﹐
畫畫衰極都有譜啦。
佢冇答我既問題﹐
「肥婷。」
「肥婷。」
「肥婷。」我連續左佢三次
「唔好講野啦。乖。」佢好集中響佢幅畫到。
好啦我唔煩佢啦。

「畫完啦！」佢終於畫完啦！
坐到差啲變北潭涌啲石頭呀。
我望下佢幅畫﹐
忍唔住感嘆左句「好似我呀。」
「嘻嘻﹐我將佢送俾你啦。」佢想撕張畫出黎。
「唔洗啦。俾你好好留住。」我攞左個魚柳包出黎「食野啦。」
佢接過魚柳包開始食。

天開始黑﹐人亦多左。
咁樣代表﹐
流星雨好快就開始。