《讓我重新遇見你》·緣圓系列·: 第二十七章 平安夜

第二十七章 平安夜

想轉個身抱住啊婷訓﹐
換黎既只係冷冰冰既床褥...
啊婷呢？

我迷迷糊糊張開眼睛。
一個著住白色背心﹐
短褲﹐
展現出完美身形既女仔﹐


正響到梳緊佢既長髮。
條腿...
真係好長...
白到反光...
真係想摸下...

佢一個華麗轉身「肥豬仔﹐醒左啦？」佢行左過黎。
蹲低響床邊。
微微笑一笑。
「冇你訓唔著呀。」我搣下佢塊。


「我醒左成粒鐘﹐你依家先知？」佢摸下我凌亂既頭髮。
「咁你唔叫醒我？」我瞇埋隻眼靠近再攬住佢膊頭。
「見你瞓得咁冧﹐琴晚我瞓左你都未瞓﹐咁咪俾你瞓多陣囉。」原來你知！
「你真係好。」我笑住咁望住佢。
「起身去刷牙啦。」佢搣住我塊面咁講。
「係啦係啦。」我拿拿臨行去廁所刷個靚牙梳個靚頭。
搞掂﹐
輕鬆。
「行啦﹐換衫落去士多食野啦。」



食完野之後﹐
我送左啊婷返佢屋企。
事關佢屋企人返左黎﹐
唔通我仲留住人地個女咩？

過左幾日就到左平安夜﹐
從來一個人過既聖誕﹐
今 年！
終 於！
唔洗自己一個咁過啦！

不經不覺﹐
我同啊婷都拍左拖兩個月。

雖然唔算多唔算少﹐


但係我啊媽就死都要我帶啊婷去見家長...
我又唔係唔想﹐
只係覺得所有野都黎得太快啦。
果日HeaHea地應承左啊媽。
冇諗過佢又當真架喎。
細佬仔唔呃得﹐
啊媽更加唔呃得。
Well.
不過之前啊媽都叫我帶佢返屋企食餐飯﹐
我諗平安夜帶啊婷上去﹐
當做冬都唔過份既。

前一晚同啊婷講話上我屋企食飯﹐
個傻妹話好緊張，
唔知要做咩﹐


最後仲話要煮飯喎﹐
希望佢唔會好似吉仔咁啦...

一朝早就要出新墟街市買餸﹐
好凍呀...
我唔想離開張被﹐
張被更加唔想我離開佢。
無奈啊婷既奪命追魂call﹐
令我最終都起左身。

「係啦係啦…起身啦依家。」我未訓醒所以把聲好似含住啖飯咁。

不過呢啲都唔係重點﹐
換衫先。



揀左一陣﹐
着恤衫啦唉。

搭埋車去新墟﹐
望一望錶﹐
時間啱啱好。

「喂！」啊婷響我耳邊嗌。
「行啦。」我拖住佢隻手走入去充滿住異味既街市。

好臭﹐
我理解唔到啲師奶可以忍受呢種味。
不過佢地身體入面可能有一種抗體﹐
果種抗體會隨住人既成長﹐
而一日一日咁增加。



對呢種夾雜住血腥同埋魚腥既味道﹐
完全不是問題。

「嘔...」我乾嘔左一下。
我唔想再聞啦…

望一望啊婷﹐
佢個閉氣既樣﹐
我忍唔住笑左出黎﹐
結果吸咗一啖「毒氣」。
屌…

「走啦啊婷﹐我地去百佳買啦。」早日逃離呢個地獄。
呢到真係唔適合我...

去到百佳﹐
啊婷揀左好耐都未揀到﹐
咁揀法唔掂架喎。

「不如我地整肉眼排﹐配薯蓉﹐再整木糠布甸啦。」揀咗半日佢終於諗到喇。
「好呀好呀好呀。」我Hea答佢。

幾經辛苦終於買曬所有材料﹐
廢事一揪二揪咁樣搭輕鐵。
Call的先。

有錢就是任性。

買左成朝,
休息一陣又要開始整野。
「娘娘﹐放過我啦。」我響梳化成條死屍咁攤咗響到。
「喂呀...」又扁嘴…
又用呢招﹐
你認為用同一招對我有用咩？
「知道娘娘﹐即去。」喂﹐陸添羽你又中招喎。
啱啱先話同一招冇用。

不過望到啊婷個笑容…
唔得啦﹐
我要融啦…
「拉我起身呀。」我扮曬可愛咁舉高對手。
我真係好想打自己...
「起身啦﹐肥仔。」佢一野拉我起身。

我幫佢執好曬啲材料﹐
因為時間尚早，
所以呢整左木糠布甸先。

材料有:
瑪麗餅 一包 6-8塊
淡忌廉 300g
煉奶 15g
芒果 一個（用作裝飾）

鐘凱婷既木糠布甸秘方。

材料齊曬﹐
開波！

「啊添﹐你幫我壓碎啲餅先。」佢比左一個密實袋我。
「Yes!madam!」
我大概分左兩次放咗幾塊到入密實袋到。
當我好努力咁壓碎佢既時候。
另一邊啊婷已經打緊cream。
佢一次過倒哂煉奶同淡忌廉落去
大概打到9成﹐
「搞掂。」佢好滿意咁望住自己打起左果啲cream。

「好香呀。」我行埋去攬住佢,
偷偷咁挖左少少cream食「好味。」
「喂呀…又偷食。」佢望住我個樣﹐呆左一陣。
「做咩呀？」我搣一搣佢塊面。
「呃...我突然唔記得之後要點整啫。冇野啦﹐我記得啦。」佢拎起打蛋機想繼續打。
「啊婷，你打好咗cream架啦喎…」
「咦...係喎。」佢再呆左下,
睇下本「日記」。
「好啦﹐我今次真係記得啦。」

佢拎左啲透明膠杯出黎﹐
之後就一層餅一層cream咁裝落杯到。
再將芒果切粒放上去裝飾。
而我就企嚮側邊到等食。

「係咪食得啦？」我一手拎起其中一杯﹐食左一啖…
「個口感好怪呀…」我望一望啊婷﹐
佢竟然笑緊我「傻仔,要雪凍左先好食架。」
「要等多幾耐先食得呀？」今次到我扁嘴。
「等多最少半個鐘先食得。」佢打開雪櫃。
「不過依家仲早﹐未有咁快食飯啵。
不如你做多一次model比我畫呀？」佢放曬啲布甸﹐
企響身眼仔碌碌咁望住我。
「不如我入房訓陣先。你就畫住…生果先啦。」我對眼就快打唔開。
之後我就偷偷地入左房。

瞓左一陣。
點解有野攬住我？

我睜開眼一望﹐
啊婷瞓左響我隔離仲攬住我瞓…
佢用大腿夾住我大腿﹐
仲要輕輕磨擦...
突如其來既襲擊﹐
令我開始扯扯地。
咪扯啦。
控制住自己呀陸添羽。
「唔好咁對我啦...我想訓啊。」我心諗。

無奈啊婷攬到實一實唔想放手﹐
隔多一陣...
我同佢既距離愈黎愈近。
我就愈黎愈把持不住。

唔得啦﹐
要開大技啦。
三字經！
「人之初,性本善;性相近,習相遠;苟不教,性乃遷;教之道,貴以專………」
背到唔知邊句﹐
我就忍唔住訓返。

三字經﹐
我人生第一次覺得你有用。